7 Kayari na abayag ya impantongtong,* inmalagey si Pedro tan imbaga tod sikara: “Agagi, kabkabat yo a manlapu la nen inmuuna iran agew et pinili ak na Dios diad sikayo pian diad panamegley ko et narengelan na saray aliwan Judio so salita na maong a balita tan manisia ra.+ 8 Tan say Dios, a makaamta na walad puso,+ so nantasi ed impangiter tod sikara na masanton espiritu,+ a singa ginawa to met ed sikatayo. 9 Tan parehoy impangipasen tod sikatayo tan ed sikara,+ tan nilinisan toy kapusoan da lapud pananisia ra.+