Levitico

23 Onia ni inkuan nen Jehova ed si Moises: 2 “Mansalita kad saray Israelita tan ibagam ed sikara, ‘Saray piesta+ parad si Jehova a nepeg yon iyabawag+ et masanto iran pandaragup. Saraya so piesta parad siak:

3 “‘Anemiran agew so pankimey, balet diad komapiton agew et sabaton na sigpot a pampainawa,+ sakey a masanton pandaragup. Agkayo nepeg a mankimey. Sabaton itan parad si Jehova ed inerman a panaayaman yo.+

4 “‘Saraya so piesta parad si Jehova, saray masanton pandaragup a nepeg yon iyabawag diad saray panaon a parad saratan: 5 Diad koma-14 ya agew na unonan bulan,+ diad pansirunget* et say Paskua+ parad si Jehova.

6 “‘Diad koma-15 agew na satan a bulan et say Piesta na Andi-lebaduran Tinapay parad si Jehova.+ Pitoy agew so nepeg yon pangan na andi-lebaduran tinapay.+ 7 Diad unonan agew et selebraan yo so masanton pandaragup.+ Agkayo mankikimey na antokaman ya ambelat. 8 Balet mangiyapay kayo na apay a pinoolan parad si Jehova ed loob na pitoran agew. Diad komapiton agew et walay nagawan masanton pandaragup. Agkayo mankikimey na antokaman ya ambelat.’”

9 Onia ni inkuan nen Jehova ed si Moises: 10 “Mitongtong kad saray Israelita tan ibagam ed sikara, ‘Sano akaloob kayo lad dalin ya iter kod sikayo, tan anien yo iray bunga diman, nepeg a mangiyakar kayo met ed saserdote na sakey a bedber na saray unonan bunga+ na inani yo.+ 11 Tan ipayapay to imay bedber diad arapan nen Jehova pian naabobonan kayo. Nepeg ya ipayapay itan na saserdote diad agew kayari na Sabaton. 12 Diad samay agew a paipayapay yo imay bedber et nepeg yon iyapay so sakey ya andiay depekton kilaw a kalakian a karnero a mantaon na sakey, bilang apay a popoolan parad si Jehova. 13 Say apay a kakanen et nepeg a duaran kakaplo na sakey ya efa* na pinon arina ya alaokay larak, bilang apay a pinoolan parad si Jehova, sakey ya ambalingit* ya angob. Say apay ya iinumen et nepeg a kakapat na sakey a hin* na alak. 14 Agkayo mamangan na antokaman a tinapay, insanglil ya ilik, odino balon ilik anggad satan ya agew, anggad niyakar yo so apay parad Dios yo. Sakey iyan manbayag a ganggan parad amin a henerasyon yo diad inerman a panaayaman yo.

15 “‘Manbilang kayo na pitoran sabaton manlapud samay agew kayari na Sabaton, manlapud samay agew ya inyakar yo imay sakey a bedber na apay ya ipapayapay.+ Nepeg a kompleton simba iratan. 16 Manbilang kayo na 50 agew+ anggad samay agew kayari na komapiton Sabaton, insan mangiyapay kayo na balon apay a kakanen parad si Jehova.+ 17 Mangiyakar kayoy duaran tinapay bilang apay ya ipapayapay manlapud saray panaayaman yo. Saraya et nepeg a duaran kakaplo na sakey ya efa* na pinon arina. Nepeg ya iluto iraya ya alebaduraan,+ bilang saray unonan aluton bunga parad si Jehova.+ 18 Tan nepeg yon iyapay iray tinapay a kaiba so pitoran andiay depekto a kalakian a kordero, a saratan et mantaon na sakey, tan sakey a kilaw a kalakian a baka tan duaran kalakian a karnero.+ Onkana iratan ya apay a popoolan parad si Jehova a kaiba so matukoy ya apay a kakanen tan apay iran iinumen, bilang sakey ya apay a pinoolan, ya ambalingit* ya angob parad si Jehova. 19 Tan nepeg kayon mangiyapay na sakey a kilaw a kanding bilang apay parad kasalanan+ tan duaran kalakian a kordero, a saratan et mantaon na sakey, bilang bagat a pandurungoan.+ 20 Ipayapay iratan na saserdote pati saray tinapay a nanlapud saray unonan aluton bunga, bilang apay ya ipapayapay ed arapan nen Jehova, a kaiba na duaran kalakian a kordero. Onkana iratan bilang masanton bengatla a parad si Jehova tan kien iratan na saserdote.+ 21 Diad satan ya agew et iyabawag yo+ so masanton pandaragup a parad sikayo. Agkayo mankikimey na antokaman ya ambelat. Sakey iyan manbayag a ganggan parad amin a henerasyon yo diad inerman a panaayaman yo.

22 “‘Sano anien yo so bunga na dalin yo, agyo sigpot ya aanien so walad gilig na uma yo, tan agyo dodokdoken so akera ed nan-anian yo.+ Ikera yo itan parad saray mairap-bilay*+ tan dayo.+ Siak si Jehova a Dios yo.’”

23 Onia ni inkuan nen Jehova ed si Moises: 24 “Ibagam ed saray Israelita, ‘Diad unonan agew na komapiton bulan, nepeg yon selebraan so sigpot a pampainawa, sakey a pakanodnonotan a nipakabat ed panamegley na tanol na trumpeta,+ sakey a masanton pandaragup. 25 Agkayo mankikimey na antokaman ya ambelat, tan mangiyapay kayo na apay a pinoolan parad si Jehova.’”

26 Onia ni inkuan nen Jehova ed si Moises: 27 “Balet diad komasamplon agew na satan a komapiton bulan et say Agew na Pananakbong.+ Nepeg yon selebraan so masanton pandaragup, tan nepeg yon pairapen so inkasikayo*+ tan mangiyapay na apay a pinoolan parad si Jehova. 28 Agkayon balot mankikimey ed satan ya agew ta satan so agew na pananakbong+ parad sikayo diad arapan nen Jehova a Dios yo. 29 Siopaman* ya agto pairapen so inkasikato* ed satan ya agew et nepeg ya ekalen* ed saray kabaleyan to.+ 30 Tan amin a too* a mankimey na antokaman ed satan ya agew et deralen ko ed saray kabaleyan to. 31 Agkayon balot mankikimey. Sakey iyan manbayag a ganggan parad amin a henerasyon yo diad inerman a panaayaman yo. 32 Sakey iyan sabaton na sigpot a pampainawa parad sikayo, tan pairapen yoy inkasikayo*+ diad komasiam ya agew na bulan, diad labi. Nepeg yon ngilinan so sabaton yo manlapud iselek na agew ya anggad ontumbok ya iselek na agew.”

33 Onia ni inkuan nen Jehova ed si Moises: 34 “Ibagam ed saray Israelita, ‘Diad koma-15 agew ed satan a komapiton bulan et pitoy-agew a Piesta na Saray Alolong* parad si Jehova.+ 35 Walay nagawan masanton pandaragup ed unonan agew, tan agkayo mankikimey na antokaman ya ambelat. 36 Pitoy agew kayon mangiyapay na apay a pinoolan parad si Jehova. Diad komawalon agew et nepeg yon selebraan so masanton pandaragup,+ tan nepeg kayon mangiyapay na apay a pinoolan parad si Jehova. Sagrado itan a pantitipon. Agkayo mankikimey na antokaman ya ambelat.

37 “‘Saraya so piesta+ parad si Jehova a nepeg yon iyabawag bilang masanto iran pandaragup+ a pangiyapay na apay a pinoolan parad si Jehova: say apay a popoolan+ tan say apay a kakanen+ a kaiba so bagat tan saray apay ya iinumen+ unong ed no antoy nakaukolan ed kada agew. 38 Kaaruman iraya ed samay niyapay diad saray sabaton nen Jehova,+ saray regalo yo,+ saray apay ya insipan yo,+ tan saray boluntaryon apay yo,+ a nepeg yon iter ed si Jehova. 39 Balet, diad koma-15 agew na komapiton bulan, sano atipon yo lay bunga na dalin, nepeg yon selebraan so piesta parad si Jehova diad loob na pitoran agew.+ Diad unonan agew et sigpot a pampainawa tan diad komawalon agew et sigpot a pampainawa.+ 40 Diad unonan agew et mangala kayoy bunga na sankaabigan iran kiew, bulobulong na saray kiew a palma,+ saray sanga na mabulong iran kiew tan saray kiew ya alamo diad lawak,* tan pitoy agew kayon manliket+ diad arapan nen Jehova a Dios yo.+ 41 Tinaon yon selebraan itan bilang piesta parad si Jehova diad loob na pitoy agew.+ Nepeg yon selebraan itan diad komapiton bulan bilang manbayag a ganggan ed amin a henerasyon yo. 42 Nepeg kayon manayam ed saray alolong diad loob na pitoy agew.+ Amin a niyanak ed Israel et nepeg a manayam ed saray alolong, 43 pian naamtaan na saray ontumbok a henerasyon yo+ ya impanayam kod saray alolong iray Israelita sanen impaway ko rad dalin na Ehipto.+ Siak si Jehova a Dios yo.’”

44 Kanian akitongtong si Moises ed saray Israelita nipaakar ed saray piesta parad si Jehova.