Ukom

17 Walay sakey a laki ed mapalandey a rehyon na Efraim+ a manngaray Miqueas. 2 Oniay inkuan tod ina to: “Samay 1,100 a piraso na pilak a naandid sikayo, a lapud satan et nansamba kayo tan nadngel ko itan—walad siak so pilak. Siak so angala.” Diad saman et inkuan nen ina to: “Bendisyonan komon nen Jehova so ana’ko.” 3 Kanian impawil tod ina to so 1,100 a piraso na pilak, balet inkuan nen ina to: “Pasantosen ko parad si Jehova so pilak a sankabembenan ko, pian usaren iya na ana’ko ed panggawa na sakey ya imahen tan sakey a metal ya estatua.+ Ipawil ko la natan ed sika.”

4 Kayari ton impawil ed ina to so pilak, angala so ina to na 200 a piraso na pilak tan inter tod managpanday na pilak. Ginawa to itan a sakey ya imahen tan sakey a metal ya estatua; tan niiyan iratan ed abung nen Miqueas. 5 Sayan laki a si Miqueas et walaan na abung parad saray dirios, tan sikatoy nanggawa na sakey ya efod+ tan saray estatua a terafim*+ tan tinuro toy* sakey ed saray anak to pian manlingkor bilang saserdote to.+ 6 Diad saraman ya agew et anggapoy ari ed Israel.+ Say gagawaen na balang sakey et no antoy duga ed pakanengneng to.*+

7 Natan et walay sakey a kalangweran a laki ed pamilya nen Juda a manaayam ed Betlehem+ diad Juda. Sikatoy sakey a Levita+ ya agano nin manaayam diman. 8 Tinaynan na laki so syudad na Betlehem ed Juda pian mananap na panayaman to. Legan a sikatoy manbiabiahe, sikatoy akasabi ed mapalandey a rehyon na Efraim, diad abung nen Miqueas.+ 9 Insan inkuan nen Miqueas ed sikato: “Iner so nanlapuan mo?” Sikatoy inmebat: “Sakey ak a Levita a nanlapud Betlehem ed Juda, tan manaanap ak na pasen a panayaman ko.” 10 Kanian inkuan ed sikato nen Miqueas: “Miayam kad siak tan manlingkor ka bilang ama* tan saserdote parad siak. Ikdan ta ka na samploran piraso na pilak kada taon tan pigaran kawes tan say kanen mo.” Diad saman et linmoob imay Levita. 11 Kanian inmabuloy imay Levita a miayam ed si Miqueas, tan impasen to iyan kalangweran a laki a singa sakey ed saray ananak to. 12 Ontan met, tinuro nen Miqueas imay* Levita pian manlingkor bilang saserdote to+ tan nanayam ed abung to. 13 Insan inkuan nen Miqueas: “Natan et amtak a gawaen nen Jehova so maabig ed siak, ta nagmaliw a saserdotek imay Levita.”