Ukom

6 Balet ginawa lamet na saray Israelita so mauges ed pakanengneng nen Jehova,+ kanian inyawat ira nen Jehova ed Midian diad loob na pitoy taon.+ 2 Inuleyan na Midian so Israel.+ Lapud Midian et nanggawa iray Israelita na saray amotan da* ed kapalandeyan, ed saray ungib, tan ed saray pasen a mairap a laen.+ 3 Sano mantanem na bini so Israel, atakien ira na Midian, Amalek,+ tan saray taga Bukig.+ 4 Mankampo ra pian onsumpad sikara tan deralen day bunga na dalin ya anggad Gaza, tan anggapoy ikera dan naakan parad Israel, anggapo pati karnero odino baka odino asno.+ 5 Ta ontatdang ira ya awit da ray ayayep da tan saray tolda ra, a say karakel da et singa duron,+ tan ag-ira nabilang pati saray kamelyo ra,+ tan onla ran maneral ed dalin. 6 Kanian nanirap a maong so Israel lapud Midian; tan kinmerew na tulong iray Israelita ed si Jehova.+

7 Sanen kinmerew na tulong iray Israelita ed si Jehova lapud Midian,+ 8 angibaki si Jehova na sakey a propeta ed saray Israelita, pian ibaga tod sikara: “Oniay inkuan nen Jehova a Dios na Israel, ‘Siak so angipaway ed sikayo ed Ehipto kanian nipaway kayo ed abung ya akaaripenan yo.+ 9 Sirin, inliktar ta kayo ed lima na Ehipto tan ed amin a mamapairap ed sikayo tan pinataynan ko rad arapan yo tan inter kod sikayo so dalin da.+ 10 Tan inkuan kod sikayo: “Siak si Jehova a Dios yo.+ Agyo nepeg a takotan iray dirios na saray Amoreo a diad dalin da so panaayaman yo.”+ Balet agyo ak tinulok.’”*+

11 Diad saginonor et sinmabi so anghel nen Jehova+ tan yinmurong ed silong na baleg a kiew a walad Ofra, a kayarian nen Joas ya Abi-ezerita.+ Si Gideon+ ya anak to et manbabayo na trigo diad panagpespesan na ubas pian ag-itan nanengneng na Midian. 12 Insan nampanengneng ed sikato so anghel nen Jehova tan inkuan to: “Si Jehova et walad sika,+ sikan mabiskeg a sundalo.” 13 Diad saman et inkuan nen Gideon ed sikato: “Dispensa, katawan ko, no si Jehova et walad sikami, akin et agawa iyan amin ed sikami?+ Kawalaan na saray amin a makapakelaw a gawa to ya inistorya ed sikami na kaamaan mi,+ ya inkuan dan, ‘Impaway itayo nen Jehova ed Ehipto.’+ Natan et inkaindan kami la nen Jehova,+ tan inyawat to kamid lima na Midian.” 14 Sikatoy inarap nen Jehova tan inkuan to: “Manpabiskeg ka tan la ka, iliktar mo so Israel ed lima na Midian.+ Agta siak so mangibabaki ed sika?” 15 Oniay inyebat nen Gideon ed sikato: “Dispensa mo ak, Jehova. Panoy pangiliktar kod Israel? Say boleg ko* so sankaraisetan ed Manases, tan siak so sankamelagan ed sankaabungan nen amak.” 16 Balet oniay inkuan nen Jehova ed sikato: “Lapud wala ak ed sika,+ kabilen moy Midian a singa labat ira sakey a too.”

17 Insan inkuan tod sikato: “No natan et aabobonan mo ak, mangipanengneng kad siak na sakey a tanda a sika so mansasalita ed siak. 18 Ipangasim, agka onaalis dia anggad makapawil ak ya awit koy regalok ya iter kod sika.”+ Kanian inkuan to: “Mansiansia ak dia anggad makapawil ka.” 19 Tan linmoob si Gideon tan intarya toy kilaw a kanding tan andi-lebaduran tinapay a gawad sakey efa* ya arina.+ Inyan tod baskit so karne tan inyan tod banga so digo; insan inyakar tan imparungo to iratan ed sikato diad silong na baleg a kiew.

20 Oniay inkuan natan na anghel na tuan Dios ed sikato: “Alam so karne tan andi-lebaduran tinapay tan itapew mo iratan diman ed baleg a bato, tan ikalbom so digo.” Tan ontan so ginawa to. 21 Insan inyunat na anghel nen Jehova so baston a sankaegnaan to tan indiwit to ed karne tan andi-lebaduran tinapay, tan dinmalang so apoy diad bato tan apoolan so karne tan andi-lebaduran tinapay.+ Insan naandipat ed pakanengneng to so anghel nen Jehova. 22 Naamtaan nen Gideon ya anghel nen Jehova iman.+

Tampol ya inkuan nen Gideon: “O Soberanon Katawan a Jehova, arap-arapan ya anengneng koy anghel mo,+ O Jehova!” 23 Balet inkuan nen Jehova ed sikato: “Kareenan komon so niwalad sika. Agka natatakot;+ agka ompatey.” 24 Kanian angipaalagey diman si Gideon na altar a parad si Jehova, tan tatawagen itan a Jehova-shalom*+ ya anggad natan. Wadman ni itan ed Ofra na saray Abi-ezerita.

25 Diad saman a labi et oniay inkuan nen Jehova ed sikato: “Alam so kilaw a kalakian a baka nen amam, say komaduan kilaw a kalakian a baka a mantaon na pitora, tan igebam so altar nen Baal a kien nen amam, tan batang mo so sagradon poste* a walad abay na satan.+ 26 Kayarim a mangipaalagey na altar a parad si Jehova a Dios mo diad toktok na sayan pasen a salimbengan diad panamegley na nantatapewan a bato, alam imay komaduan kilaw a kalakian a baka tan iyapay mo bilang apay a popoolan ed tapew na saray kiew a nanlapud binatang mon sagradon poste.”* 27 Kanian angitagar si Gideon na samploran lalakin lingkor to tan ginawa to so imbaga nen Jehova ed sikato. Balet natatakot a maong ed sankaabungan nen ama to tan ed saray lalaki ed syudad, kanian diad labi to ginawa imbes a diad agew.

28 Sanen asakbay a binmangon ed kabuasan iray lalaki ed syudad, anengneng dan nagba so altar nen Baal tan abatang so sagradon poste* a walad abay na satan, tan niyapay la so komaduan kilaw a kalakian a baka diad kapampaalagey ya altar. 29 Nantetepetan ira: “Siopay nanggawad saya?” Kayari ran nanimbestiga et inkuan da: “Si Gideon ya anak nen Joas so nanggawa ed saya.” 30 Kanian inkuan na saray lalaki ed syudad ed si Joas: “Ipaway moy anak mo pian sikatoy ompatey, ta inggeba toy altar nen Baal tan binatang toy sagradon poste* ed abay na satan.” 31 Insan oniay inkuan nen Joas+ ed saramay amin ya inmarap ed sikato: “Nepeg yo kasin idepensay Baal? Nepeg yo kasin iliktar? Siopaman a mangidepensa ed sikato et nepeg a pateyen diad sayan kabuasan.+ No sikatoy sakey a dios, paulyan yon idepensa toy inkasikato,+ ta walay angigeba ed altar to.” 32 Tan diad saman ya agew et inngaran ton Jerubaal* si Gideon, ya inkuan to: “Paulyan yon idepensa nen Baal so inkasikato, ta walay angigeba ed altar to.”

33 Nantitipon so interon Midian,+ Amalek,+ tan saray taga Bukig;+ tan binmaliw ira* tan nankampo rad Lawak* na Jezreel. 34 Diad saman et niwala* ed si Gideon+ so espiritu nen Jehova tan pinaknol toy tambuyog,+ tan nantitipon iray Abi-ezerita+ pian ontulong ed sikato. 35 Sikatoy angibaki na saray mensahero diad interon Manases, tan nantitipon met ira pian ontulong ed sikato. Sikatoy angibaki met na saray mensahero diad Aser, Zebulon, tan Neftali, tan tinmatdang ira pian onabet ed sikato.

36 Insan inkuan nen Gideon ed tuan Dios: “No iliktar moy Israel ed panamegley ko, unong ya insipan mo,+ 37 nia, mangigaton ak na bagoy karnero diad panag-ilikan. No say bagoy karnero labat so nabasay linaew, balet ta amaga so dalin ed kaliberliber to, naamtaan kod satan ya iliktar moy Israel ed panamegley ko, unong ya insipan mo.” 38 Tan onman so agawa. Sanen sikatoy binmangon ya asakbay ed tinmumbok ya agew tan pinespes to so bagoy karnero, say apespes ton linaew ed bagoy karnero et napanoy baleg a yaong. 39 Balet inkuan nen Gideon ed tuan Dios: “Agkomon ondalang so sanok mo ed siak, tan abuloyan mo ak nin onkerew a maminsan. Ipangasim, abuloyan mo ak pan manubok lamet ed panamegley na sayan bagoy karnero. Ipangasim, pagmaliwen mo komon a say bagoy karnero labat so amaga, balet nabasa na linaew so dalin.” 40 Kanian diad saman a labi et onman so ginawa na Dios; say bagoy karnero labat so amaga, tan abasa na linaew so dalin.