Numeros

20 Diad unonan bulan et akasabi so amin ya Israelita ed kalawakan na Zin, tan nanayam ira diad Kades.+ Diman inatey tan niponpon si Miriam.+

2 Natan et anggapoy danum parad saray totoo,+ kanian nantitipon ira pian onsumpad si Moises tan Aaron. 3 Kinolkol na saray totoo si Moises,+ ya inkuan da: “Inatey kami la komon sanen inatey iray agagi mi diad arapan nen Jehova! 4 Akin et inyakar yo nid sayan kalawakan so kongregasyon nen Jehova pian ompatey kami dia pati saray ayayep mi?+ 5 Tan akin et impaway yo kamid dalin na Ehipto pian iyakar ed sayan aliwliwan pasen?+ Aliwa iyan pasen na saray bukel tan igos tan kaubasan tan prutas a granada, tan anggapoy danum a nainum.”+ 6 Diad saman et tinaynan di Moises tan Aaron so kongregasyon pian onlad lolooban na tolda a pantitiponan, insan dinmakmomo rad dalin, tan pinmatnag ed sikara so gloria nen Jehova.+

7 Insan inkuan nen Jehova ed si Moises: 8 “Alam so baston tan pantitipon moy totoo, sika tan si Aaron ya agim, tan mansalita kayod baleg a bato diad arapan da pian mangiter itan na danum, tan papaway mod baleg a bato so danum parad sikara tan ikdan moy nainum so totoo tan saray ayayep da.”+

9 Kanian inala nen Moises so baston manlapud arapan nen Jehova,+ unong ya ingganggan To ed sikato. 10 Insan impantitipon nen Moises tan Aaron so kongregasyon diad arapan na baleg a bato, tan inkuan tod sikara: “Dengel kayo natan, sikayo ran rebelde! Labay yon mamapaway kami na danum ed sayan baleg a bato parad sikayo?”+ 11 Diad saman et intagey nen Moises so lima to tan amidua ton imbasig so baston tod baleg a bato, tan pinmaway so amayamay a danum, tan inminum so totoo tan saray ayayep da.+

12 Diad saginonor et oniay inkuan nen Jehova ed si Moises tan Aaron: “Lapud agyo impatnag so pananisia ed siak tan agyo ak pinasanto ed pakanengneng na saray totoo na Israel, aliwan sikayo so mangiyakar ed sayan kongregasyon diad dalin ya iter kod sikara.”+ 13 Saya so danum na Meriba,*+ a ditan akikolkol iray Israelita ed si Jehova, kanian sikatoy apasanto ed arapan na totoo.

14 Insan angibaki si Moises na saray mensahero manlapud Kades ya onlad ari na Edom+ pian ibaga rad sikato: “Oniay inkuan nen agim ya Israel,+ ‘Amtam so amin a kairapan ya asagmak mi. 15 Linmad Ehipto iray kaamaan mi,+ tan nanayam kamid Ehipto diad dakel iran taon,*+ tan sikami tan saray kaamaan mi et minaltrato na saray Ehipsio.+ 16 Insan akikasi kamid si Jehova,+ tan dinengel to kami tan angibaki na sakey ya anghel+ tan impaway to kamid Ehipto, tan wadia kami natan ed Kades, sakey a syudad ed ketegan na dalin a nasasakopan mo. 17 Ipangasim, padalan mo kamid dalin mo. Agkami ondalan ed dinanman ya uma odino kaubasan, tan agkami oninum ed dinanman a bobon. Manakar kamid Dalan na Ari ya agkami manpakawigi odino manpakawanan ya anggad makalampas kamid dalin a nasasakopan mo.’”+

18 Balet inkuan nen Edom ed sikato: “Agka nayarin ondalan ed dalin a nasasakopan mi. Ta no andi et ompaway ak ya aka-espada a mangabet ed sika.” 19 Ingen, inkuan ed sikato na saray Israelita: “Diad manunan karsada so tatdangan mi, tan no oninum kami tan saray ayayep mi ed danum mo, bayaran mi itan.+ Labay mi labat so ondalan.”+ 20 Siansia nin inkuan to: “Agka nayarin ondalan.”+ Diad saman et pinmaway si Edom pian milaban ed sikato a kaiba toy dakerakel a totoo tan mabiskeg ya armada.* 21 Kanian agpinadalan nen Edom so Israel ed dalin a nasasakopan to, tan pinmaliis ed sikato so Israel.+

22 Tinmaynan ed Kades so amin a totoo na Israel, tan linma rad Palandey Hor.+ 23 Insan oniay inkuan nen Jehova ed si Moises tan Aaron diad Palandey Hor a walad ketegan na dalin na Edom: 24 “Si Aaron et nitipon ed saray totoo to.*+ Agto makaloob ed dalin ya iter kod saray Israelita lapud nanrebelde kayon dua ed ganggan ko nipaakar ed danum na Meriba.+ 25 Awit moy Aaron tan si Eleazar ya anak to tan iyakar mo ra diad Palandey Hor. 26 Ekal mo iray kawes nen Aaron+ tan isulong mod si Eleazar+ ya anak to, tan ompatey diman* si Aaron.”

27 Kanian ginawa nen Moises so ingganggan nen Jehova, tan tinmatdang irad Palandey Hor diad arapan na amin a totoo. 28 Insan inekal nen Moises iray kawes nen Aaron tan insulong tod si Eleazar ya anak to. Kayari na satan et inatey diman si Aaron, diad toktok na palandey.+ Insan linmeksab ed palandey si Moises tan Eleazar. 29 Sanen anengneng na amin a totoo ya inatey lay Aaron, inakisan na interon sankaabungan na Israel si Aaron diad loob na 30 agew.+