Unona ed Saray Taga Corinto

12 Natan, agagi, agko labay ya anggapoy amta yo nipaakar ed espiritual iran regalo.+ 2 Amta yo a sanen sikayoy totoo na saray nasyon,* nibabalang tan naiimpluensyaan kayon mandayew ed saramay agmakapansalitan idolo,+ ya ontutumbok kayo inerman so pangipaarapan dad sikayo. 3 Natan, labay kon ipaamta ed sikayo a say siopaman a mansasalita ed panamegley na espiritu na Dios et agto ibagan: “Si Jesus et nisamba!” tan anggapoy siopaman a makapangibagan: “Si Jesus so Katawan!” nilikud ed panamegley na masanton espiritu.+

4 Natan et nanduruma iray regalo, balet saksakey so espiritu;+ 5 tan nandurumay ministeryo,+ ingen ta saksakey so Katawan; 6 tan nandurumay kimey, ingen ta saksakey so Dios ya ontutulong ed balang sakey pian nagawaan irayan amin a bengatla.+ 7 Balet say espiritu et napapatnagan ed kada sakey pian nagunggonaan so arum.+ 8 Ta say inter ed sakey et say karunongan ed panagsalita* diad panamegley na espiritu, samay sakey et say panagsalita a walaay kakabatan unong ed satan met ya espiritu, 9 samay sakey et say pananisia+ diad panamegley na satan met ya espiritu, samay sakey et say pakayarin mamaabig*+ diad panamegley na satan ya espiritu, 10 samay sakey ni et say panggawa na makapanyari iran gawa,+ samay sakey et say panagpropesiya, samay sakey et say pakatebek ed saray impuyan a salita,+ samay sakey et say pansalita na nanduruman lenguahe,+ tan samay sakey et say panagpatalos ed saray lenguahe.+ 11 Balet amin iraya et gagawaen na saksakey ya espiritu, a mangiiter ed kada sakey unong ed panlabayan na satan.

12 Ta no panon a say laman et saksakey balet walaan na dakel a kabiangan, tan amin a kabiangan na satan a laman et saksakey a laman anggaman dakel,+ ontan met so Kristo. 13 Ta diad sakey ya espiritu et abautismoan itayon amin pian magmaliw a sakey a laman, balanglan Judio odino Griego, balanglan ariripen odino bulos, tan sakey ya espiritu so impainum ed sikatayon amin.

14 On, ta aliwan saksakey so kabiangan na laman, noagta dakel.+ 15 No ibaga na sali, “Aliwa ak a lima, kanian agak kabiangan na laman,” aliwa yan rason pian ibaga ya ag-itan kabiangan na laman. 16 Tan no ibaga na layag, “Aliwa ak a mata, kanian agak kabiangan na laman,” aliwa yan rason pian ibaga ya ag-itan kabiangan na laman. 17 No say interon laman et mata, iner la kasi pakadngel? No pakadngel lan amin, iner la kasi pakaangob? 18 Balet natan et inlira na Dios so kada kabiangan na laman, unong ed panliketan to.

19 No amin iratan et saksakey a kabiangan, iner la kasi so laman? 20 Balet dakel ira a kabiangan, ingen ta saksakey a laman. 21 Agnayarin ibaga na mata ed lima, “Agta ka kaukolan,” odino, agnayarin ibaga na ulo ed saray sali, “Agta kayo kaukolan.” 22 Balet saray kabiangan na laman a singano mas makapuy et nakaukolan, 23 tan saray kabiangan na laman ya iisipen tayon daiset so kagalangan da et mas papagalangan tayo,+ kanian saramay iisipen tayon agmarakep a kabiangan et mas sisimpitan tayo, 24 ingen ta saray marakep a kabiangan tayo et agla mankaukolan na antokaman. Balet, ontan so impanugyop na Dios ed laman, a mas pinagalangan to imay kabiangan a kulang na kagalangan, 25 pian anggapoy inkaapag-apag diad laman, noagta saray kabiangan na satan et pareparehon mangiyansakit ed sakey tan sakey.+ 26 No maniirap so sakey a kabiangan, manirap met iray arum a kabiangan;+ odino no nigloria so sakey a kabiangan, miliket ed satan iray arum a kabiangan.+

27 Natan et sikayo so laman nen Kristo,+ tan kada sakey ed sikayo et kabiangan.+ 28 Tan tinuro na Dios diad kongregasyon so kada sakey ed saraya: unona, saray apostol;+ komadua, saray propeta;+ komatlo, saray managbangat;+ insan saray makapanyarin gawa;*+ insan say pakayarin mamaabig;*+ say pakatulong ed arum; saray abilidad a mangidaulo;+ say pakapansalita na nanduruman lenguahe.+ 29 Agta aliwan amin ed sikara et apostol? Agta aliwan amin ed sikara et propeta? Agta aliwan amin ed sikara et managbangat? Agta aliwan amin ed sikara et manggagawa na makapanyari iran gawa? 30 Agta aliwan amin ed sikara et walaan na pakayarin mamaabig?* Agta aliwan amin ed sikara et makapansalita na nanduruman lenguahe?+ Agta aliwan amin ed sikara et managpatalos?+ 31 Balet itultuloy yon seetan ya anapen iray mas maabig a regalo.+ Ingen ta ipanengneng kod sikayo so sakey a sankaabigan a paraan.+