Oseas
2 Akusaan yoy ina yo; akusaan yo,
Ta sikatoy agko asawa+ tan agto ak asawa.
Nepeg ton itunday prostitusyon* a gagawaen to
Tan say pikakalugoran to,
3 Ta no andi, sikatoy lakseban ko tan pagmaliwen kon singa diad samay agew na inkiyanak to,
Pagmaliwen kon singa kalawakan,
Gawaen kon amagaan a dalin,
Tan pateyen kod kapgaan.
4 Tan agko kasian iray anak to,
Ta niyanak ira lapud prostitusyon.*
Sikato ya angilukon ed sikara et kinmiwas a makapabaing,+ ta imbaga ton,
‘Tumboken ko iramay manangarok,+
Saramay mangiiter ed siak na tinapay tan danum,
Kawes a gawad bagoy karnero tan linen, larak tan inumen ko.’
6 Kanian saraan koy sabisabit so dalan to;
Tan mangipaalagey ak na padir sumpad sikato,
Pian agto naromog iray dalan to.
7 Usilan to iray manangaro to, balet agto ra naabotan;
Ta magmaong ni ed saman so kipapasen ko nen say natan.’+
8 Agto binidbir a siak so angiter ed sikato na ilik,+ balon alak, tan larak,
Tan siak so angiter ed sikato na dakerakel a pilak
Tan balitok, a saratan et inusar da parad si Baal.+
9 ‘Kanian ompawil ak tan alaen kod sikato so ilik ko diad panaon na panag-ani
Tan say balon alak ko ed panaon na panagtipon,+
Tan alaen kod sikato so kawes kon gawad bagoy karnero tan linen a pansasakbong tod inkalakseb to.
10 Ipanengneng ko natan ed saray manangaro to iray pribadon parte na laman to,
Tan anggapoy lakin makapangiliktar ed sikato ed limak.+
11 Panganggaen koy amin a panliliket to,
Saray piesta to,+ saray panseselebra toy balon bulan, sabaton, tan amin a panaon na piesta to.
12 Tan deralen koy kaubasan to tan saray kiew ton igos, ya ibabaga ton:
“Saraya so upak ya inter na saray manangarok”;
Pagmaliwen ko iratan a katakelan,
Tan upoten iratan na saray atap ya ayep.
13 Mikuentaan ak ed sikato lapud saray agew na impambagat tod saray imahen nen Baal,+
Sanen insulong to iray ikaw to tan saray parakep to tan tinmumbok ed saray manangaro to,
Balet nilingwanan to ak,’+ so imbaga nen Jehova.
14 ‘Kanian sikatoy kombinsien ko,
Sikatoy iwanwan kod kalawakan,
Tan mansalita ak pian naalak so puso to.
15 Manlapu lad satan a panaon et ipawil kod sikato iray kaubasan to,+
Tan say Lawak* na Acor+ bilang puerta a mamaarap ed ilalo;
Ebatan to ak diman a singa diad saray agew na inkaugaw to,
Singa diad agew na impaway tod dalin na Ehipto.+
16 Tan diad satan ya agew,’ so imbaga nen Jehova,
‘Tawagen to ak lan Asawak, tan agto ak la tawagen a Katawan Ko.’*
17 ‘Agko la paibalikas ed sikato iray ngaran na saray imahen nen Baal,+
Tan agla nanonotan iray kangaranan da.+
18 Diad satan ya agew et manggawa ak parad sikara na pisisipanan ed saray atap ya ayep,+
Tan ed saray manok tan ed saray onkukurong a bengatla diad dalin;+
Paandien kod dalin so pana tan espada tan guerra,+
19 Alaen ta ka bilang nobyak ed andi-anggaan;
Tan alaen ta ka bilang nobyak unong ed inkatunong tan inkahustisya,
Ed matoor a panangaro tan panangasi.+
20 Alaen ta ka bilang nobyak unong ed katooran,
Siak si Jehova, tan nakabkabat mo ak.’+
21 ‘Diad satan ya agew et onebat ak,’ so imbaga nen Jehova,
‘Iter koy kerew na tawen,
Tan iter met na tawen so kerew na dalin;+
22 Tan iter met na dalin so kerew na ilik tan say balon alak tan say larak;
23 Sikatoy itanem kod dalin a singa bini a parad siak,+
Tan ipatnag koy panangasik ed sikato ya agkinasian;*
Tan ibaga ra: “Sika so Dios mi.”’”+