Daniel

12 “Legan na satan a panaon et ontalindeg* si Miguel,*+ say makapadinayew a prinsipe+ ya akaalagey parad totoom.* Tan walay onsabin panaon na gonigon ya agnin balot agawa manlapud samay panaon ya impangiletneg ed inmunan nasyon. Tan legan na satan a panaon et makaliktar iray totoom,+ amin a nisulat ed libro na Dios.*+ 2 Tan ombangon so dakel ed saramay naugip ed dabok, say arum et parad andi-anggaan a bilay tan say arum et parad kababaingan tan parad andi-anggaan a kabalawan.

3 “Tan saramay walaay aralem a pakatalos et onsinag a singa kaliwawa na tawen, tan saramay ontutulong ed dakerakel pian magmaliw a matunong et singa saray bitewen ed anggad angga.

4 “O Daniel, pansiansiam nin sekreto irayan salita, tan selyadoan mo so libro ya anggad panaon na anggaan.+ Dakel so mananap,* tan ondakel so tuan kakabatan.”+

5 Tan siak, si Daniel et anengneng kon walay duara nin akaalagey diman, sakey ed sayan gilig na ilog tan sakey ed biek a gilig na ilog.+ 6 Insan sakey ed sikara et inkuan tod samay lakin akakawes na linen,+ a walad tagey na saray danum na ilog: “Panon kabayag so panaon ya onlabas anggad manampot irayan makapakelaw a bengatla?” 7 Insan nadngel ko imay lakin akakawes na linen, a walad tagey na saray danum na ilog, sanen intagey toy kawanan tan kawigin lima to diad tawen, tan insamba tod samay Sakey a manbibilay ed andi-anggaan:+ “Onlabas so sakey a panaon, saray panaon, tan kapalduan panaon.* Tan sano nasumpal lay panemek ed pakayari na saray masanton totoo,+ amin irayan bengatla et mangangga.”

8 Natan et nadngel ko, balet agko atalosan;+ kanian inkuan ko: “O katawan ko, antoy pansumpalan na sarayan bengatla?”

9 Insan inkuan tod siak: “La ka, Daniel, ta nepeg a mansiansia nin sekreto tan selyado irayan salita anggad panaon na anggaan.+ 10 Linisan na dakel so inkasikara tan paputien day inkasikara tan napino ra.+ Tan saray mauges et manggaway mauges, tan anggapo ed saray mauges so makatalos ed sarayan salita; balet natalosan iraya na saramay walaay aralem a pakatalos.+

11 “Tan manlapud samay panaon a naandi so inagew-agew a bagat+ tan nilira so makapadimlan bengatla a sengegay kadederal,+ walay 1,290 agew.

12 “Maliket imay mantultuloy a manilalo* tan makasabi anggad kasampotan na 1,335 agew!

13 “Balet sika, manmatoor ka ya anggad anggaan. Manpainawa ka, balet onalagey ka pian awaten moy apag mo* diad kasampotan na saray agew.”+