Job
16 Et inmebat si Job, a kuan to:
2 “Dakdakel lay onian nadngel ko nensaman.
Amin yo et makapagonigon a managligliwa!+
3 Mangangga ni kasi iray maapan* salita?
Antoy mamapakiwas ed sikayon onebat na onia?
4 Sarag ko met so mansalita a singa gagawaen yo.
No wala kayod kipapasen ko,*
Sarag koy mangusar na makakombinse iran salita sumpad sikayo
Tan ipeyengpeyeng koy ulok ed sikayo.+
5 Anggaman ontan, pabiskegen ta kayo diad saray salitan ompapaway ed sangik,
Tan say panagligliwa na bibil ko et mangiter na inawa.+
6 No mansalita ak, agnaekal so sakit a naliliknak,+
Tan no agak la mansalita, kaunongay nabawas ed satan?
8 Sisingkaten mo ak met, tan kinmana itan a pantasi,
Kanian say inkaebeng ko et mantetestigo sumpad siak.
9 Say sanok to so aneral ed siak, tan eem-eman toy sakit na linawa tod siak.+
Manngayet iray ngipen to lapud siak.
Susugatan ak na kalaban ko diad panamegley na saray mata to.+
10 Sinmangi ra pian akmonen da ak,+
Tan tinatampal da ak pian mudmoraen ak;
Dakdakel iran nantitipon sumpad siak.+
11 Iyaawat ak na Dios ed saray kalangweran a lalaki,
Tan ibubuntok to ak ed saray lima na mauges.+
12 Dati et anggapoy mangogonigon ed siak, balet ta dineral to ak;+
Dinegkeman toy tenger ko tan pinapairap to ak;
Insan ginawa to ak a puntirya to.
Iyiibung toy apgok diad dalin.
14 Singa ak padir a bubungaw-bungawen to;
Sikatoy singa sundalon onaatakid siak.
16 Ambalanga lay lupak ed panaakis ko,+
Tan asireg la ray matak,
17 Anggano saray limak et agnanggawa na inkaruksa,
Tan say pikakasik et dalisay.
18 O dalin, agmo komon tatabonan so dalak!+
Tan anggapo komon so pampainawaan na akis ko!
19 Anggan natan, samay mantatasi parad siak et walad tawen;
Samay makapantestigo parad siak et walad tagey.
21 Komon ta walay mamegley diad baetan na sakey a too tan say Dios,
A singa diad baetan na sakey a too tan say kapara ton too.+