Unonan Samuel

7 Tan diad loob na 13 taon et impaalagey nen Solomon so abung* to+ anggad asumpal itan.+

2 Tan impaalagey to so Abung na Kakiewan na Lebanon+ a 100 a kasiko* so karukey to, 50 kasiko so kalapar to, tan 30 kasiko so katagey to diad apatiran dasig na saray lusek a sedro; tan wala ray biga a sedro+ diad tapew na saray lusek. 3 Agubidaan itan na saray kiew a sedro diad tapew na saray panuksolan ya akatapew ed saray lusek; say bilang na saray lusek et 45, a 15 ed kada dasig. 4 Walay taloran dasig na saray bintanan nanhamba, tan kada bintana et walay kapetekan ton bintana, a saraya et taloran talunton. 5 Amin a lolooban tan lusek na puerta et walaan na kuadradon* hamba, pati say arap na saray bintana a nampepetekan ed taloran talunton.

6 Tan impaalagey to so Pasen* na Saray Lusek a 50 kasiko so karukey to tan 30 kasiko so kalapar to, tan diad arap na satan et walay balkonahe a walaan na saray lusek tan tarong.

7 Impaalagey to met so Pasen* na Trono,+ a ditan so pangukoman to—say Pasen a Panangukoman+—tan inusaran da itan na kiew a sedro manlapud datal ya anggad saray pagsen.

8 Say abung* a panayaman to, a walad sananey a sular,+ et inletneg ed benegan na Pasen,* tan parehoy inkagawa ra. Impaalageyan to met so asawa to ya anak na Faraon na sakey ya abung a miparad sayan Pasen.+

9 Amin iraya, manlapud pundasyon ya anggad toktok na padir tan anggad baleg a sular,+ et gawad mablin bato+ a tinabas unong ed sukat tan pinakinis na saray lagari-bato, diad loob tan paway. 10 Tan inletneg so pundasyon diad panamegley na saray angkakabaleg a baton mabmabli; say sukat na arum a bato et samploran kasiko, tan say arum et waloran kasiko. 11 Tan diad tapew na saratan et wala ray mablin bato a tinabas unong ed sukat, ontan met iray kiew a sedro. 12 Say baleg a sular et apaliberan na padir a walaay nantatapewan a taloran dasig na tinabas a bato tan sakey dasig na saray kiew a sedro, a singa ed samay loob a sular+ na abung nen Jehova tan say balkonahe na abung.+

13 Et impatawag nen Arin Solomon si Hiram+ manlapud Tiro. 14 Sikatoy anak na sakey a balon bii a nanlapud tribu nen Neftali, tan say ama to et taga Tiro a managpanday na gansa;+ tan sikatoy marundunong, makatalos,+ tan eksperiensyado ed amin a klase na kimey nipaakar ed gansa.* Kanian linmad si Arin Solomon tan sinumpal toy amin a kimey to.

15 Sikatoy nanggawa na duaran lusek a gansa,+ a minoldi to iratan; kada lusek et 18 kasiko so katagey to, tan kaukolan so lubir a panagsukat a 12 kasiko so karukey to* pian onliber ed kada lusek.+ 16 Nanmoldi met na duaran gansan ulo na lusek. Say sakey ya ulo na lusek et limaran kasiko so katagey to, tan samay sakey nin ulo na lusek et limaran kasiko met so katagey to. 17 Say ulo na kada lusek et apaliberay iket a walaay kadenan dekorasyon;+ pitora ed sakey ya ulo na lusek tan pitora met ed samay sakey nin ulo na lusek. 18 Tan ginawa ton duaran dasig iray granada ya akapaliber ed iket a dekorasyon pian nasakbongan so ulo na lusek; ontan so ginawa to ed duaran ulo na lusek. 19 Say inkadesinyo na saray ulo na lusek a walad balkonahe et singa rosas a lirio ya apatiran kasiko so katagey da. 20 Saray ulo na duaran lusek et walad tapew na malimpek a parte ya anginan ed saray iket a dekorasyon; tan walay 200 a granada ya akadasig ed paliber na kada ulo na lusek.+

21 Inletneg to ray lusek na balkonahe na templo.*+ Inletneg to may bandad kawanan* a lusek tan nginaranan to na Jakin,* insan inletneg to may bandad kawigi* a lusek tan nginaranan to na Boaz.*+ 22 Tan say inkadesinyo na saray ulo na lusek et singa rosas a lirio. Kanian asumpal a ginawa iray lusek.

23 Insan sikatoy nanggawa na Dayat* a minoldin metal.+ Malimpek itan, a 10 kasiko so sukat na sangab to tan 5 kasiko so katagey to, tan makaliber ed satan so lubir a panagsukat a 30 kasiko so karukey to.*+ 24 Tan diad leksab na sangab to et wala ray akapaliber a tabyayong* a dekorasyon,+ a samplora ed kada kasiko diad paliber na Dayat, tan duaran dasig irayan tabyayong a ginawan katekep na Dayat. 25 Impatoon itan ed 12 baka,+ 3 so akaarap ed amianen, 3 so akaarap ed sagur, 3 so akaarap ed abalaten, tan 3 so akaarap ed bukig; tan akatapew ed sikara so Dayat, tan walad bandad pegley na satan iray ebet a parte na laman da. 26 Tan say kakapal na Dayat et sakey dakulap;* tan say sangab to et ginawan singa sangab na kopa, a singa rosas a lirio. Say ikakarga ditan et 2,000 sukat a bat.*

27 Insan sikatoy nanggawa na samplora a gansan kariton.*+ Kada kariton et apatiran kasiko so karukey to, apatiran kasiko so kalapar to, tan taloran kasiko so katagey to. 28 Tan oniay impanggawa ed saray kariton: Inikdan iratan na saray rektanggulon dingding, tan sarayan dingding et walad leet na saray bastidor. 29 Tan saray dingding a walad leet na saray bastidor et walaan na saray desinyon leon,+ baka, tan kerubin,+ tan ontan met so desinyo diad saray bastidor. Diad tagey tan leksab na saray leon tan baka et wala ray palimpek a desinyo. 30 Tan kada kariton et walaan na apatiran gansan dalig tan saray gansan ehe, tan saramay akakabit ed apatiran suyok so pinagkasuporta na saratan. Diad leksab na palanggana et wala ray pinagkasuporta to, a minoldin katekep na saray desinyon rosas diad diking na kada pinagkasuporta to. 31 Say sangab na kariton no sukaten manlapud loob a patagey et sakey kasiko; tan malimpek so sangab to, a say patoonan to et sakey tan kapalduan kasiko, tan wala ray inyukit ditan. Tan saray dingding na satan et kuadrado, aliwan malimpek. 32 Say apatiran dalig et walad silong na saray dingding, tan saray pinagkasuporta na saray dalig et akakabit ed kariton, tan say katagey na kada dalig et sakey tan kapalduan kasiko. 33 Tan say inkagawa na saray dalig et singa dalig na karwahe. Amin iray pinagkasuporta, rim,* rayos, tan kubo ra et minoldi a metal. 34 Walay apatiran pinagkasuporta diad apatiran suyok na kada kariton; saratan et minoldi a kabiangan* na kariton. 35 Diad tapew na kariton et walay malimpek a patoonan a kapalduan kasiko so katagey to tan saray walad tapew na kariton, saray pampasekder tan saray dingding na satan, et minoldi a kabiangan* na kariton. 36 Diad tapew na saray pampasekder tan saray dingding na satan et sikatoy angiyukit na saray kerubin, leon, tan kiew a palma unong ed kabaleg na espasyo na kada sakey, tan pinaliberan itan na saray desinyon rosas.+ 37 Ontan so impanggawa to ed samploran kariton;+ minoldi ran amin,+ a pareparehoy sukat tan itsura da.

38 Sikatoy nanggawa na samploran gansa a palanggana;+ say nakarga na kada sakey et 40 sukat a bat. Say sukat na kada palanggana et apatiran kasiko.* Walay sakey a palanggana parad kada sakey ed samploran kariton. 39 Insan inyan to so limaran kariton diad nikawanan na abung tan say limara et diad nikawigi na abung, tan say Dayat et inyan tod nikawanan na abung, diad bandad abalaten-bukig.+

40 Nanggawa met si Hiram+ na saray palanggana, saray pala,+ tan saray yaong.+

Kanian asumpal nen Hiram so amin a kimey a ginawa to parad si Arin Solomon diad abung nen Jehova:+ 41 say duaran lusek+ tan saray kurti-yaong ya ulo na saratan; say duaran iket a dekorasyon+ a pansakbong ed duaran kurti-yaong ya ulo na saray lusek; 42 say 400 a granada+ parad duaran iket a dekorasyon, salanti, duaran dasig iran granada parad kada iket a dekorasyon a pansakbong ed duaran kurti-yaong ya ulo na duaran lusek; 43 say samploran kariton+ tan samploran palanggana+ a walad tapew na saray kariton; 44 say Dayat+ tan say 12 baka ya angipatoonan ed Dayat; 45 tan saray latan kargaan na dapol, saray pala, saray yaong, tan amin a kagawaan ya inusaran na masileng a gansa a ginawa nen Hiram parad si Arin Solomon pian usaren ed abung nen Jehova. 46 Ginawa iratan na ari diad saray pitek a panagmoldian diad distrito na Jordan, a walad ketegan na Sucot tan Zaretan.

47 Agla sinimbang nen Solomon so amin a kagawaan lapud agaylay karakel iratan. Ag-amta so simbang na gansa.+ 48 Ginawa nen Solomon so amin a kagawaan parad abung nen Jehova: say balitok ya altar;+ say balitok a lamisaan+ a tapewan na saray apay a tinapay; 49 saray gawad puron balitok a kandelero,+ limarad kawanan tan limarad kawigi diad arap na sankadaleman a kuarto; tan saray gawad balitok a rosas,+ lamparaan, tan panagsipit;+ 50 saray gawad puron balitok a palanggana, panag-erep,+ yaong, kopa,+ tan kargaan na ngalab;+ tan saray gawad balitok a patoonan parad saray kapot na dalem a kuarto,+ salanti, say Sankasantosan, tan parad saray kapot na Masanto.*+

51 Kanian asumpal nen Arin Solomon so amin a kimey a kaukolan ton gawaen parad abung nen Jehova. Insan inloob nen Solomon so amin a bengatlan pinasanto nen David ya ama to,+ tan saray pilak, balitok, tan saray kagawaan et inyan tod saray pasen a pangiinay kayamanan ed abung nen Jehova.+