Numeros

30 Insan kinatongtong nen Moises iray papangulo+ na saray tribu ed Israel, ya inkuan to: “Oniay ingganggan nen Jehova: 2 No say sakey a laki et mangisipan+ ed si Jehova odino isamba to*+ ya ompaliis ed sakey a bengatla, agto nepeg a sumlangen so imbaga to.+ Nepeg ton sumpalen so amin ya insipan ton gawaen.+

3 “Tan no say sakey a bii et manggaway sipan ed si Jehova odino insamba ton ompaliis ed sakey a bengatla sano sikatoy kalangweran tan manaayam nid abung na ama to, 4 tan narengel na ama toy sipan to odino say insamba to* ya ompaliis ed sakey a bengatla tan ag-onkontra so ama to, mansiansia so amin a sipan to tan amin ya insamba ton ompaliis ed sakey a bengatla. 5 Balet no sikatoy sebelan na ama to sano narengel ton sikatoy nanggaway sipan odino nansamba ya ompaliis ed sakey a bengatla, ag-itan mansiansia. Sikatoy perdonaen nen Jehova lapud sikatoy sinebelan na ama to.+

6 “Balet no sikatoy akiasawa legan a wala ni sipan to odino wala ni sakey a sipan a bengatbengat ton ginawa 7 tan narengelan itan na asawa to tan ag-onkontra diad agew a pakadngel to, mansiansia ray sipan to odino saray samba ton ompaliis ed sakey a bengatla. 8 Balet no sikatoy sebelan na asawa to diad agew a pakadngel tod satan, nayarian na asawa to a paandien so sipan odino say bengatbengat a sipan a ginawa to,+ tan sikatoy perdonaen nen Jehova.

9 “Balet no say sakey a balo odino sakey a biin akidiborsyo et manggaway sipan, amin a ginawa ton sipan et mansiansia ed sikato.

10 “Balet, no ginawa na sakey a bii imay sipan odino samay samba ton ompaliis ed sakey a bengatla legan a sikatoy walad abung na asawa to 11 tan nadngelan itan na asawa to tan agkinmontra, mansiansia so amin a sipan to odino antokaman ya insamba ton ompaliis ed sakey a bengatla. 12 Balet no sigpot a pinaandi na asawa to so antokaman a sipan odino insamba ton ompaliis ed sakey a bengatla diad agew ya impakadngel to ed saratan, ag-iratan mansiansia.+ Pinaandi la iratan na asawa to, tan sikatoy perdonaen nen Jehova. 13 Nipaakar ed antokaman a sipan odino antokaman a samba ya ompaliis ed sakey a bengatla pian ipulisay so dilin pilalek,* nayarin paletan odino paandien itan na asawa to. 14 Balet no diad ilabas na saray agew et sikatoy agkinontra na asawa to, pinaletan met la na asawa to so amin a sipan to odino amin ya insamba ton ompaliis ed sakey a bengatla. Pinaletan to iratan lapud sikatoy agkinmontra ed agew a nadngelan to iratan. 15 Balet no paandien to iratan lanlamang, pigaran panaon kayari na samay agew ya impakadngel tod saratan, akoen to ray pansumpalan na kasalanan na bii.+

16 “Saraya so totontonen ya ingganggan nen Jehova ed si Moises nipaakar ed sakey a laki tan say asawa to, tan nipaakar ed sakey ya ama tan say kalangweran ya anak ton bii a manaayam nid abung to.”