Eclesiastes

8 Siopay kapara na samay toon marunong? Siopay makaamta na solusyon ed problema?* Say karunongan na too et mangiiter na liwawa ed lupa to tan mamapaamo ed masebeg ya itsura to.

2 Ibabagak: “Unor mo ray ganggan na ari+ bilang respeto ed samay sinambaan mod Dios.+ 3 Agka manggaganat ya ontaynan ed arapan to.+ Agka onsusuporta ed antokaman a mauges+ ta sarag ton gawaen so amin a labay to, 4 lapud say salita na ari et agnayarin nasumlang;+ siopay makapangibagad sikato, ‘Antoy gagawaen mo?’”

5 Samay manguunor ed ganggan et agmakaeksperiensyay mauges,+ tan say marunong a puso et naamtaan toy dugan panaon tan paraan.*+ 6 Walay panaon tan paraan* parad kada bengatla,+ lapud dakdakel so pakakagonigonan na katooan. 7 Anggapoy makaamta no antoy nagawa, kanian siopay makapangibagad sikato no panon itan a nagawa?

8 No panon a say too et anggapoy pakayari to ed espiritu* tan agto napugeran so espiritu, anggapo met so pakayari na siopaman ed agew na ipapatey.+ No panon ya anggapoy abuloyan ya ontaynan legan na guerra, agmet abuloyan na kaugsan a makatakas iramay manggagawa ed satan.*

9 Anengneng ko yan amin, tan inteen koy pusok ed kada kimey a gagawaen diad dalin, diad panaon a say too et uuleyan toy kapara ton too diad pankaugsan* to.+ 10 Tan anengneng ko ya ipoponpon iray mauges, saramay datin onloloob tan ompapaway ed masanton pasen, balet alingwanan iran tampol diad syudad a panggagawaan day kaugsan.+ Saya met et andi-kakanaan.

11 Lapud agtampol susumpalen so sentensia ed mauges a kagagawa,+ say puso na totoo et makmakpel a manggaway mauges.+ 12 Anggano say makasalanan et maminlasus a manggaway mauges tan siansia nin manbibilay na andukey, amtak a saramay ontatakot ed tuan Dios et maabig so pansumpalan da, lapud ontatakot irad sikato.+ 13 Balet, aliwan maabig so pansumpalan na samay mauges,+ tan saray agew na bilay ton singa anino et agto naparukey,+ lapud sikatoy ag-ontatakot ed Dios.

14 Walay bengatlan andi-kakanaan* a nagagawa diad dalin: Wala ray matunong a totoo ya ipapasen a singa ra nanggaway mauges,+ tan wala ray mauges a totoo ya ipapasen a singa ra nanggaway matunong.+ Nibagak a saya met et andi-kakanaan.

15 Kanian impaseseg koy panliket,+ ta diad dalin et anggapo lay mas maabig ed sakey a too nen say mangan tan oninum tan manliket; saya so nepeg a walad sikato legan a mansasagpot diad amin ya agew na bilay to,+ ya inter na tuan Dios ed sikato diad dalin.

16 Inteen koy pusok pian onggamor na karunongan tan nengnengen so amin a nagagawa* diad dalin,+ ya agak makakaugip diad agew tan labi.* 17 Kanian ninodnonot ko so amin a kimey na tuan Dios, tan amoriak ya agnatalosan na katooan no antoy nagagawa diad dalin.+ Anggan antoy gawaen na totoo, agda itan natalosan. Anggano ibaga ran walay magenap a karunongan dan mangamta, talagan agda natalosan itan.+