Unona ed Saray Taga Corinto
16 Natan, nipaakar ed panagkolekta a parad saray masanto,+ nayari yon tumboken iramay imbilin ko ed saray kongregasyon ed Galacia. 2 Diad unonan agew na kada simba, kada sakey ed sikayo et nepeg a mangibiig unong ed pakasarag to, pian say pankolekta et agla gawaen sano onsabi ak. 3 Balet kasabik ditan, ibakik iray lalaki ya abobonan yo unong ed saray sulat yo+ pian awiten dad Jerusalem so donasyon a mabulos yon inter. 4 Balet no kaukolan ya onla ak met diman, mila ak ed sikara.
5 Balet onla ak ed sikayo sano akadalan ak lad Macedonia, ta ondalan ak nid Macedonia;+ 6 tan ompan mansiansia ak na pigaran panaon odino mamalabas ak ni ingen na ambetel a panaon ditan ed sikayo, pian sano onla ak lad laen ko et naibaan yo ak nin magano ed pambiahek. 7 Ta agko ni labay so minengneng ed sikayo natan ya onsamar ak labat, lapud maniilalo ak a nakaiba ta kayo ed pigaran panaon,+ no iyabuloy nen Jehova.* 8 Balet mansiansia ak ni ed Efeso+ anggad Piesta na Pentecostes, 9 lapud nilukas ed siak so sakey a baleg a puerta a mangitonton ed kimey,+ balet ta dakel so onsusumpa.
10 Natan, no onsabi si Timoteo,+ seguroen yon anggapoy pampagaan to no wadtan ed sikayo, ta gagawaen toy kimey nen Jehova,*+ a singa siak. 11 Kanian, anggapo komon so manleglemew ed sikato. Ipatnubang yo pian maligen a makakar ed siak, ta manaalagar ak ed sikato a kaibak iray agagi.
12 Natan, nipaakar ed si Apolos+ ya agi tayo, sikatoy kinombinsik ya onlad sikayo a kaiba iray agagi. Agto ni labay so onla natan, balet onla ditan sano wala lay pankanawnawa to.
13 Mansiansia kayon aliing,+ bembenan yon malet so pananisia yo,+ manpakpel kayo,*+ manpabiskeg kayo.+ 14 Komon ta amin a gagawaen yo et gawaen yo diad aro.+
15 Natan et papasesegen ta kayo, agagi: Amta yo a saray membro na sankaabungan nen Estefanas so unona iran bunga diad Acaya tan intalaga day sarili ra a manlingkor ed saray masanto. 16 Komon ta mantultuloy kayo met a manpasakop ed ontan iran totoo tan ed amin a mitutulongan tan mansasagpot.+ 17 Balet maliket ak a wadiay Estefanas+ tan si Fortunato tan si Acaico, lapud tinulongan da ak anggaman anggapo kayo dia. 18 Ta pinainawa day pusok* tan say puso yo. Kanian apresya yo so onia ran totoo.
19 Manpapakumusta ed sikayo iray kongregasyon ed Asia. Ipapasabi di Aquila tan Prisca pati say kongregasyon a walad abung da+ so maaron panangumusta ed sikayo bilang disipulo na Katawan. 20 Manpapakumusta ed sikayo so amin ya agagi. Ibano yoy sakey tan sakey diad panamegley na inaagin angob.*
21 Awat yoy panangumustak. Siak, si Pablo, so nansulat ed saya.
22 No walay siopaman ya agmangaaro ed Katawan, komon ta sikatoy nisamba. Onsabi ka la komon, Katawan mi! 23 Niwala komon ed sikayo so agnaparaan a kaabigan na Katawan a Jesus. 24 Niwala komon so arok ed sikayon amin a disipulo nen Kristo Jesus.