Jeremias

27 Diad gapo na uley nen Jehoiakim ya anak nen Josias, say ari na Juda, oniay mensahe nen Jehova ed si Jeremias: 2 “Oniay inkuan nen Jehova ed siak, ‘Manggawa ka na saray bedber tan saray pako, tan iyan mo iratan ed beklew mo. 3 Insan iter mo iratan ed ari na Edom,+ ari na Moab,+ ari na saray Ammonita,+ ari na Tiro,+ tan ed ari na Sidon,+ ya ipawit mod saray mensaheron sinmabi diad Jerusalem ed si Arin Zedekias na Juda. 4 Ipasabim ed sikara iyan ganggan parad saray kakatawan da:

“‘“Oniay inkuan nen Jehova na saray armada, say Dios na Israel; oniay ibaga yod saray kakatawan yo, 5 ‘Siak so nanggawa ed dalin, katooan, tan saray ayayep a walad dalin ed panamegley na baleg a pakayarik tan akaunat a taklay ko; tan inter ko iya ed siopaman a labay kon pangiteran.*+ 6 Tan amin irayan dalin et inyawat kod lima na lingkor ko, si Arin Nabucodonosor+ na Babilonia; pati saray atap ya ayayep et inter ko pian manserbi ira ed sikato. 7 Amin a nasyon et manserbi ed sikato tan ed anak to tan ed apo to anggad isabi na panaon a mangangga so panarian to,+ sano sikatoy aripenen na dakel a nasyon tan makapanyarin arari.’+

8 “‘“‘No walay nasyon odino panarian ya agmanserbi ed si Arin Nabucodonosor na Babilonia tan agto isilong so beklew to ed pako na ari na Babilonia, dusaen ko itan a nasyon diad panamegley na espada,+ eras, tan salot,’* so imbaga nen Jehova, ‘ya anggad naupot ko ran amin ed panamegley na lima to.’

9 “‘“‘Kanian agyo dedengelen iray propeta yo, saray managparles yo, saray managkugkugip yo, saray managmahiko yo, tan saray managsalamangka yo, a mangibabagay: “Agyo panserbian so ari na Babilonia.” 10 Ta katilaan so ipropropesiya ra ed sikayo, a lapud satan et niyarawi kayo ed dalin yo, tan itaytayak ta kayo, tan sigpot kayon naandi.

11 “‘“‘Balet say nasyon a mangisilong na beklew to ed pako na ari na Babilonia tan manserbi ed sikato, abuloyan ko ran mansiansia* ed dalin da,’ so imbaga nen Jehova, ‘tan taneman tan panayaman da itan.’”’”

12 Onia met so imbagak ed si Arin Zedekias+ na Juda: “Isilong yoy beklew yo ed pako na ari na Babilonia tan manserbi kayod sikato tan ed totoo to, tan manbilay kayo.+ 13 Akin et ompatey ka tan saray totoom ed panamegley na espada,+ eras,+ tan salot,+ unong ya imbaga nen Jehova ed nasyon ya agmanserbi ed ari na Babilonia? 14 Agyo dedengelen iray salita na saray propeta a mangibabaga ed sikayoy, ‘Agyo panserbian so ari na Babilonia,’+ ta katilaan so ipropropesiya ra ed sikayo.+

15 “‘Ta agko ra imbaki,’ so imbaga nen Jehova, ‘balet katilaan so ipropropesiya ra ed ngaran ko, a manresulta ed pangitayak kod sikayo tan sigpot kayon naandi, sikayo tan saray propeta a manpropropesiya ed sikayo.’”+

16 Tan oniay imbagak ed saray saserdote tan ed sarayan amin a totoo: “Oniay inkuan nen Jehova, ‘Agyo dedengelen iray salita na saray propeta yo a mangipropropesiya ed sikayoy: “Saray kagawaan ed abung nen Jehova et maganggano lan nipawil manlapud Babilonia!”+ ta katilaan so ipropropesiya ra ed sikayo.+ 17 Agyo ra dedengelen. Manserbi kayo ed ari na Babilonia tan manbilay kayo.+ Akin et kaukolan a naderal iyan syudad? 18 Balet no talagan propeta ira tan no walad sikara so salita nen Jehova, paulyan yo ran mikasi ed si Jehova na saray armada pian agnaawit ed Babilonia iray akeran kagawaan ed abung nen Jehova, ed abung* na ari na Juda, tan ed Jerusalem.’

19 “Ta oniay inkuan nen Jehova na saray armada nipaakar ed saray lusek,+ say Dayat,*+ saray kariton,+ saray akeran kagawaan ya atilak ed sayan syudad, 20 ya ag-inala nen Arin Nabucodonosor na Babilonia sanen inerel tod Jerusalem si Jeconias ya anak nen Jehoiakim, say ari na Juda, pian awiten tod Babilonia, a kaiba so amin a gagalangen a totoo ed Juda tan Jerusalem;+ 21 on, oniay inkuan nen Jehova na saray armada, say Dios na Israel, nipaakar ed saray kagawaan ya atilak ed abung nen Jehova, ed abung* na ari na Juda, tan ed Jerusalem: 22 ‘“Diad Babilonia so pangiyakaran ed saratan,+ tan mansiansia iratan diman anggad agew ya imanoen ko lamet iratan,” so imbaga nen Jehova. “Insan alaen ko tan ipawil ko iratan ed sayan pasen.”’”+