Komaduan Awaran

36 Insan inala na saray totood Juda so anak nen Josias a si Jehoahaz+ tan ginawa ran ari ed Jerusalem a kasalat nen ama to.+ 2 Si Jehoahaz et mantaon na 23 sanen nagmaliw ya ari, tan taloy bulan a nanuley ed Jerusalem. 3 Balet, sikatoy pinaekal na ari na Ehipto diad posisyon tod Jerusalem tan impanmulta to so dalin da na 100 a talenton* pilak tan sakey a talenton balitok.+ 4 Ontan met, say ari na Ehipto et ginawa ton ari ed Juda tan Jerusalem si Eliakim ya agi nen Jehoahaz tan sinalatan to na Jehoiakim so ngaran to; balet si Jehoahaz ya agi to et inawit nen Neco+ diad Ehipto.+

5 Si Jehoiakim+ et mantaon na 25 sanen nagmaliw ya ari, tan 11 taon a nanuley ed Jerusalem. Sikatoy nantultuloy a nanggaway mauges ed pakanengneng nen Jehova a Dios to.+ 6 Si Arin Nabucodonosor+ na Babilonia et linma a milaban ed sikato pian nabalor to na duaran gansan gulonggulong tan niyakar to ed Babilonia.+ 7 Tan arum ed saray kagawaan ed abung nen Jehova et inawit nen Nabucodonosor ed Babilonia tan inyan to iratan ed palasyo to diad Babilonia.+ 8 Tan saray arum nin agawa ed si Jehoiakim, saray makapadimlan bengatla a ginawa to tan amin a mauges a bengatlan naamtaan nipaakar ed sikato, et akasulat ed Libro na Saray Arari na Israel tan Juda; tan si Jehoiakin ya anak to so nagmaliw ya ari a kasalat to.+

9 Si Jehoiakin+ et mantaon na 18 sanen nagmaliw ya ari, tan taloy bulan tan samploy agew a nanuley ed Jerusalem; tan sikatoy nantultuloy a nanggaway mauges ed pakanengneng nen Jehova.+ 10 Diad kagapo na taon,* angibaki si Arin Nabucodonosor na mangawit ed sikato diad Babilonia,+ pati saray mablin kagawaan ed abung nen Jehova.+ Tan ginawa ton ari ed Juda tan Jerusalem si Zedekias ya agi nen ama to.+

11 Si Zedekias+ et mantaon na 21 sanen nagmaliw ya ari, tan 11 taon a nanuley ed Jerusalem.+ 12 Sikatoy nantultuloy a nanggaway mauges ed pakanengneng nen Jehova a Dios to. Agto nampaabeba ed arapan nen propetan Jeremias,+ a nansalita diad ganggan nen Jehova. 13 Sikatoy nanrebelde met ed kinen Arin Nabucodonosor,+ samay amakiwas ed sikaton mansamba ed arapan na Dios, tan nansiansian benger* tan anawet so puso to tan agto labay so onasingger ed si Jehova a Dios na Israel. 14 Amin a papangulo na saray saserdote pati saray totoo et angipatnag na alablabas ya ag-inkamatoor, ya inalig da ray makapadimlan kagagawa na saray nasyon, tan dinutakan da so abung nen Jehova+ a pinasanto to ed Jerusalem.

15 Et naynay iran papasakbayan nen Jehova a Dios na inmuunan atateng da ed panamegley na saray mensahero to, on, aminpigapiga to ran pinasakbayan, lapud panangasi to ed saray totoo to tan ed ayaman to. 16 Balet inelek-elekan da ray mensahero na tuan Dios,+ tan nileglemew da ray salita to+ tan niludlurey da ray propeta to,+ anggad sinmanok si Jehova ed saray totoo to,+ anggad anggapo lay ilalo ya onabig ira.

17 Kanian pinakiwas ton milaban ed sikara so ari na saray Caldeo,+ a pinapatey tod espada iray kalangweran a lalaki ra+ diad santuaryo ra;+ ag-akaliknay panangasi ed kalangweran a laki odino bii, matatken odino mansasakit.+ Amin et inyawat na Dios ed lima to.+ 18 Amin a kagawaan ed abung na tuan Dios, angkakabaleg man odino angkekelag, pati saray kayamanan ed abung nen Jehova tan saray kayamanan na ari tan saray prinsipe to et inawit ton amin ed Babilonia.+ 19 Pinoolan toy abung na tuan Dios,+ inggeba toy padir na Jerusalem,+ pinoolan toy amin a malet a tori ditan, tan dinederal toy amin a mablin bengatla.+ 20 Saramay akaliktar ed espada et inawit tod Babilonia,+ tan nagmaliw iran lingkor to+ tan saray anak ton lalaki anggad sanen ginmapon nanuley so panarian na Persia,+ 21 pian nasumpal so salita nen Jehova ya impaibaga tod si Jeremias,+ anggad nabayaran na dalin iray sabaton to.+ Diad amin ya agew ya apaulyanan so dalin et nginilinan na satan so sabaton, pian nasumpal so 70 taon.+

22 Diad unonan taon nen Arin Ciro+ na Persia, pian nasumpal so salita nen Jehova ya impaibaga tod si Jeremias,+ pinakiwas nen Jehova so puso* nen Arin Ciro na Persia a manggawa na proklamasyon ed interon panarian to, ya impaisulat to met,+ a mangibabagan: 23 “Oniay inkuan nen Arin Ciro na Persia, ‘Si Jehova a Dios na tawen et inter tod siak so amin a panarian na dalin,+ tan ingganggan to ak a mangipaalagey na abung to ed Jerusalem, diad Juda.+ Balang sakey ed sikayo a kabiangan na totoo to, niwala komon ed sikato si Jehova a Dios to, tan sikatoy naabuloyan ya onlad Jerusalem.’”+