Deuteronomio

27 Insan oniay ingganggan nen Moises tan saray mamatatken na Israel ed saray totoo: “Gawa yo so amin a ganggan ya iter kod sikayo natan. 2 Tan diad agew ya ombaliw kayo ed Jordan pian onarap ed dalin ya iter ed sikayo nen Jehova a Dios yo, mangilira kayo na saray angkakabaleg a bato tan palitadaan yo iratan.*+ 3 Insan isulat yo ed saratan so amin a salita na sayan Ganggan sano akabaliw kayo la, pian makaloob kayo ed dalin ya iter ed sikayo nen Jehova a Dios yo, sakey a dalin a manag-agus so gatas tan dilo, unong ya insipan ed sikayo nen Jehova a Dios na saray inmuunan atateng yo.+ 4 Sano akabaliw kayo lad Jordan, ilira yo iratan a bato diad Palandey Ebal+ tan palitadaan yo iratan,* unong ya igaganggan kod sikayo natan. 5 Mangipaalagey kayo met ditan na sakey ya altar parad si Jehova a Dios yo, sakey ya altar a gawad bato. Agyo iratan uusaran na saray balatyang a kagawaan.+ 6 Mangusar kayo na saray agtinabas a bato sano ipaalagey yo so altar nen Jehova a Dios yo tan mangiyapay kayo ditan na saray apay a popoolan parad si Jehova a Dios yo. 7 Mangiyapay kayo na saray bagat a pandurungoan+ tan akan yo iratan ditan,+ tan manliket kayod arapan nen Jehova a Dios yo.+ 8 Tan isulat yon malinew ed saratan a bato so amin a salita na sayan Ganggan.”+

9 Insan nansalita ed interon Israel si Moises tan saray saserdoten Levita, ya inkuan da: “Mandeen kayo tan dengel kayo, O Israel. Diad sayan agew et nagmaliw kayon totoo nen Jehova a Dios yo.+ 10 Dengel yo so boses nen Jehova a Dios yo tan gawa yo iray ganggan+ tan totontonen to ya iter kod sikayo natan.”

11 Diad saman ya agew et oniay ingganggan nen Moises ed saray totoo: 12 “Sarayan tribu so onalagey ed Palandey Gerizim+ pian mamendisyon ed saray totoo sano akabaliw kayo lad Jordan: Simeon, Levi, Juda, Isacar, Jose, tan Benjamin. 13 Tan saraya so onalagey ed Palandey Ebal+ pian mangiyabawag ed ayew: Ruben, Gad, Aser, Zebulon, Dan, tan Neftali. 14 Tan ebatan na saray Levita so amin a totoo ed Israel diad maksil a boses:+

15 “‘Naayew so too a manggaway imahen+ odino metal ya estatua,+ sakey a bengatlan makapadimla ed si Jehova,+ say ginawa na saray lima na marunong a komikimey,* tan inyamot to itan.’ (Tan onebat so amin a totoo na, ‘Amen!’*)

16 “‘Naayew so agmanrespeto ed ama to odino ina to.’+ (Tan ibaga na amin a totoo ya, ‘Amen!’)

17 “‘Naayew so mangiyalis ed muhon* na dalin na kaabay to.’+ (Tan ibaga na amin a totoo ya, ‘Amen!’)

18 “‘Naayew so mangibalang ed sakey a bulag a too diad dalan.’+ (Tan ibaga na amin a totoo ya, ‘Amen!’)

19 “‘Naayew so mamikewet ed hustisya+ a parad dayo, say ugaw ya ulilad ama,* odino abalon bii.’+ (Tan ibaga na amin a totoo ya, ‘Amen!’)

20 “‘Naayew so miakdol ed asawa nen ama to, ta pinabanday toy ama to.’*+ (Tan ibaga na amin a totoo ya, ‘Amen!’)

21 “‘Naayew so misekso ed antokaman ya ayep.’+ (Tan ibaga na amin a totoo ya, ‘Amen!’)

22 “‘Naayew so miakdol ed agi ton bii, ya anak nen ama to odino ina to.’+ (Tan ibaga na amin a totoo ya, ‘Amen!’)

23 “‘Naayew so miakdol ed katulangan ton bii.’+ (Tan ibaga na amin a totoo ya, ‘Amen!’)

24 “‘Naayew so mantambang tan mamatey ed kapara ton too.’+ (Tan ibaga na amin a totoo ya, ‘Amen!’)

25 “‘Naayew so mangawat na pasuksok pian pateyen* toy sakey a toon andiay kasalanan.’*+ (Tan ibaga na amin a totoo ya, ‘Amen!’)

26 “‘Naayew so agmanumpal ed saray salita na sayan Ganggan a nepeg to komon a tumboken.’+ (Tan ibaga na amin a totoo ya, ‘Amen!’)