Genesis

29 Kayari na satan et intuloy nen Jacob so nambiahe tan amaarap ed dalin na saray totoo ed Bukig. 2 Natan et anengneng toy sakey a bobon ed uma tan taloran pulok na karnero a mandukdukol ed abay na satan, lapud kaslakan dan papainumen iray pulok ed satan a bobon. Walay baleg a bato ya akasakob ed bobon. 3 Sano natipon la ditan so amin a pulok, ipatulin da so baton akasarad sangab na bobon, tan painumen da iray pulok, insan da ipawil imay bato ed sangab na bobon.

4 Kanian inkuan nen Jacob ed sikara: “Agagik, taga iner kayo?” a diad satan et inkuan da: “Taga Haran.”+ 5 Inkuan tod sikara: “Kabat yoy Laban+ ya apo nen Nahor?”+ a diad satan et inkuan da: “Kabat mi.” 6 Diad saya et inkuan tod sikara: “Kumustay kipapasen to?” Inmebat ira: “Maong met. Tan nitan lay anak ton Raquel+ a kaiba na saray karnero!” 7 Insan inkuan to: “Atagey ni agew. Aliwa nin oras pian tiponen iray karnero. Painum yo ray karnero, insan yo ra pankabkaben.” 8 Diad saya et inkuan da: “Agmi nayarin gawaen itan anggad natipon lan amin so pulok tan nipatulin da lay baton akasarad sangab na bobon. Insan mi la painumen iray karnero.”

9 Legan to nin mitotongtong ed sikara, sinmabi si Raquel a kaiba iray karnero nen ama to, ta sikatoy sakey a biin managpastol. 10 Sanen anengneng nen Jacob si Raquel ya anak nen Laban ya agi nen ina to, ontan met ed saray karnero nen Laban, tampol ya inmasingger si Jacob tan intulin to so baton akasarad sangab na bobon tan pinainum to iray karnero nen Laban ya agi nen ina to. 11 Insan inangoban nen Jacob si Raquel tan inmakis na maksil. 12 Tan imbaga nen Jacob ed si Raquel a sikatoy kanayon* nen ama to tan sikatoy anak nen Rebeca. Kanian sikatoy batik tan imbaga to iya ed ama to.

13 Sanen nadngel nen Laban+ so balita nipaakar ed si Jacob ya anak na agi ton bii, sikatoy batik pian abeten to. Sikatoy nilakap to tan inangoban to tan inawit tod abung to. Tan imbaga tod Laban so amin ya agawa ed sikato. 14 Inkuan nen Laban ed sikato: “Tuan sika so pukel ko tan laman ko.”* Kanian sakey bulan a sikatoy akiayam ed sikato.

15 Insan inkuan nen Laban ed si Jacob: “Manlingkor ka kasi ed siak ya anggapoy bayar lapud no kanayon* ta ka?+ Ibagam ed siak no pigaray labay mon upa.”+ 16 Natan et walay duaran marikit nen Laban. Say ngaran na panguloan et Lea, tan say ngaran na yugtan et Raquel.+ 17 Balet aliwan marakep iray mata nen Lea, ingen ta makapasagyat so itsura nen Raquel tan magangganan bii. 18 Inaro nen Jacob si Raquel, kanian inkuan to: “Panlingkoran ta kay pitoran taon parad si Raquel+ ya anak mon yugtan.” 19 Diad saya et inkuan nen Laban: “Magmaong nin sikatoy iter kod sika nen say iter kod sananey a laki. Mantultuloy kan miayam ed siak.” 20 Tan pitoy taon a nanlingkor si Jacob parad si Raquel,+ balet diad pakanengneng to et singa labat iratan pigaran agew lapud panangaro tod sikato.

21 Insan inkuan nen Jacob ed si Laban: “Iter mo lad siak so asawak ta asumpal la iray agew na panlilingkor ko, tan abuloyan mo ak a sikatoy iyamong ko.” 22 Diad saman et tinipon nen Laban so amin a totoo ed saman a pasen tan angitaryay ponsia. 23 Balet diad saman a labi et inala toy Lea ya anak to tan inyakar to ed si Jacob pian napiakdolan to. 24 Inter met nen Laban so lingkor ton bii a si Zilpa pian magmaliw a lingkor nen Lea ya anak to.+ 25 Sanen kabuasan la, anengneng nen Jacob a si Lea manaya so kaakdol to! Kanian inkuan tod si Laban: “Antoy ginawam ed siak? Agta nanlingkor ak ed sika parad si Raquel? Akin et niloko mo ak?”+ 26 Lapud saya et inkuan nen Laban: “Agmi dia kustombre so pangiter ed yugtan a bii antis na samay panguloan. 27 Sumpal mo ni so sakey simba a piliket ed sayan bii. Kayari na satan et niiter ed sika iyay sakey a bii bilang kasalat na pitoran taon nin panlingkor mod siak.”+ 28 Ontan so ginawa nen Jacob tan sinumpal toy sakey simba ya akiliket ed sayan bii, kayari na satan et inter tod sikato bilang asawa si Raquel ya anak to. 29 Sakey ni, inter nen Laban so lingkor ton bii a si Bilha+ pian magmaliw a lingkor nen Raquel ya anak to.+

30 Insan akiakdol met si Jacob ed si Raquel, tan mas inaro toy Raquel nen si Lea, tan sikatoy pitoy taon nin nanlingkor ed si Laban.+ 31 Sanen anengneng nen Jehova ya agnaaaro* si Lea, sikatoy inabuloyan ton manlukon,*+ balet si Raquel et agmakaanak.+ 32 Kanian nanlukon si Lea tan angiyanak na ugaw a laki tan inngaran toy Ruben,*+ ta inkuan to: “Lapud inimano nen Jehova so paniirap ko,+ kanian aroen ak la natan nen asawak.” 33 Tan sikatoy nanlukon lamet tan angiyanak na ugaw a laki, insan inkuan to: “Lapud dinmengel si Jehova, ta agak naaaro kanian inter to met ed siak iya.” Insan sikatoy inngaran ton Simeon.*+ 34 Tan sikatoy nanlukon lamet tan angiyanak na ugaw a laki, insan inkuan to: “Natan et mikasakey lad siak so asawak, ta angiyanak ak ed sikato na taloran lalaki.” Kanian sikatoy ningaran a Levi.*+ 35 Tan sikatoy nanlukon lamet tan angiyanak na ugaw a laki, insan inkuan to: “Natan et idayew koy Jehova.” Kanian sikatoy inngaran ton Juda.*+ Kayari na satan et sikatoy tinmunda lan nananak.