Genesis

31 Agnambayag et nadngelan to ya oniay ibabaga na saray lalakin ananak nen Laban: “Inala nen Jacob so amin a kaykayarian nen ama tayo, tan atipon to iyan amin a kayamanan manlapud saray kayarian nen ama tayo.”+ 2 Sano onnengneng si Jacob ed lupa nen Laban, nalikna to a say pidedeneng tod sikato et aliwa lan singa samay dati.+ 3 Kanian inkuan nen Jehova ed si Jacob: “Pawil ka lad dalin na saray inmuunan atateng mo tan ed kakanayon mo,+ tan mansiansia ak a walad sika.” 4 Insan impatawag nen Jacob si Raquel tan Lea pian onla ra ed uma a kawalaan na pulok to, 5 tan inkuan tod sikara:

“Naimanok ya anguman lay pidedeneng nen ama yo ed siak,+ balet say Dios nen amak et nansiansia ed siak.+ 6 Amta yon mismo a nanlingkor ak ed ama yo diad interon biskeg ko.+ 7 Tan sinaol ak nen ama yo tan aminsamplo ton inuman so upak; balet ag-inabuloyan na Dios a sikatoy manggaway mauges ed siak. 8 No ibaga ton, ‘Saray batekan so magmaliw ya upam,’ mananak na batekan so interon pulok; balet no ibaga ton, ‘Saray gulisan so magmaliw ya upam,’ mananak na gulisan so interon pulok.+ 9 Kanian aalaen na Dios so ayayep nen ama yo tan iiter tod siak. 10 Aminsan, sanen mankakasta so pulok, anengneng ko ed kugip a saray kalakian a kanding a mankakasta diad pulok et gulisan, batekan, tan baklayan.+ 11 Insan inkuan na anghel na tuan Dios ed siak diad kugip, ‘Jacob!’ a diad saman et inkuan ko, ‘Wadia ak.’ 12 Tan intuloy ton inkuan, ‘Ipangasim, ontangwa ka tan nengneng mo a say amin a kalakian a kanding a mankakasta diad pulok et gulisan, batekan, tan baklayan, ta anengneng ko so amin a gagawaen nen Laban ed sika.+ 13 Siak so tuan Dios a nampanengneng ed sika diad Bethel,+ a diman et nilanaan mo so sakey a baton pakanodnonotan tan nansamba kad siak.+ Natan et bangon ka, paway ka ed sayan dalin, tan pawil ka ed dalin a niyanakan mo.’”+

14 Diad saya et inmebat ed sikato si Raquel tan Lea: “Wala ta ni antokaman a natawir mi diad sankaabungan nen ama mi? 15 Agta dayo so pangipapasen tod sikami, lapud inlako to kami tan gagastosen toy kuarta a niiter parad sikami?+ 16 Amin a kayamanan ya inala na Dios ed ama mi et kien mi tan kien na saray ananak mi.+ Kanian gawam so amin ya imbaga na Dios ed sika.”+

17 Insan inmalagey si Jacob tan inlugan tod saray kamelyo iray ananak to tan saray asawa to,+ 18 tan inwanwan to so amin a pulok to tan amin a kayarian ya atipon to,+ saray walad sikaton ayayep ya atipon to ed Padan-aram, pian onla ra ed si Isaac ya ama to diad dalin na Canaan.+

19 Natan et linmay Laban a mankiskis na bagoy karnero to, insan tinakew nen Raquel iray estatuan terafim*+ a kayarian nen ama to.+ 20 Ontan met, siniliban nen Jacob si Laban ya Arameo, ta agto imbagad sikato so itaynan to. 21 Tan sikatoy tinmaynan tan binmaliw ed Ilog,*+ sikato tan say amin a kayarian to. Insan sikatoy amaarap ed mapalandey a rehyon na Gilead.+ 22 Diad komatlon agew, nipaamta ed si Laban a tinmaynan lay Jacob. 23 Kanian intagar to iray agagi* to tan sikatoy inusilan da ed loob na pitoy agew tan sikatoy nabotan da ed mapalandey a rehyon na Gilead. 24 Insan linmay Dios ed si Laban ya Arameo+ diad panamegley na kugip ed labi+ tan inkuan tod sikato: “Manalwar kad ibagam ed si Jacob.”+

25 Kanian nila nen Laban si Jacob, sanen nipaalagey la nen Jacob so tolda to ed palandey tan nankampo lay Laban tan saray agagi to ed mapalandey a rehyon na Gilead. 26 Insan inkuan nen Laban ed si Jacob: “Antoy ginawam? Akin et siniliban mo ak tan inawit mo ray ananak ko a singa ra inerel ed guerra? 27 Akin et insekretom so intaynan mo tan siniliban mo ak tan agmo imbagad siak? No imbagam komon, pinasipot ta kan walay panliliket tan saray kansion, tan tamburin tan arpa. 28 Balet agmo ak inikdan na pankanawnawan angoban iray apok* tan ananak ko. Aliway ginawam. 29 Walay pakayarik a mamasakit ed sikayo, balet nansalita ed siak kalabian so Dios na ama yo, ya inkuan ton, ‘Manalwar kad ibagam ed si Jacob, balanglan maong odino mauges.’+ 30 Tinmaynan ka la lapud pampirawat mon makapawil ed abung nen amam, balet akin et tinakew mo iray dirios ko?”+

31 Oniay inyebat nen Jacob ed si Laban: “Lapud natatakot ak, ta inisip kon, ‘Ompan puersaen mon alaen ed siak iray ananak mo.’ 32 Siopaman a pakaromogan mo na saray dirios mo et nepeg ya ompatey. Diad arapan na saray agagi tayo, anap mod saray kayarian ko, tan alam so gawam.” Balet ag-amta nen Jacob a tinakew iratan nen Raquel. 33 Kanian linmoob si Laban ed tolda nen Jacob tan ed tolda nen Lea tan ed tolda na duaran aripen a bibii,+ balet agto aromog. Insan sikatoy pinmaway ed tolda nen Lea tan linmoob ed tolda nen Raquel. 34 Balet, inala la nen Raquel iray estatuan terafim tan inyan tod buksot a panyuyurongan na bii diad kamelyo, tan niyurongan to iratan. Kanian inanap iratan nen Laban ed interon tolda, balet agto aromog. 35 Insan inkuan tod ama to: “Agka manpapasnok, katawan ko, ta agak nayarin onalagey diad arapan mo, ta walad siak imay onsasabi ed saray bibii.”+ Kanian intuloy toy nananap a maong, balet agto aromog iray estatuan terafim.+

36 Diad saman et sinmanok si Jacob tan nansalitay ansakit ed si Laban. Insan inkuan nen Jacob ed si Laban: “Antoy asumlang ko, tan antoy kasalanan ko a makasengeg na panguusil mod siak? 37 Natan ta nananap ka lad amin a kayarian ko, antoy aromog mon kagawaay abung mo? Iyan mo dia ed arapan na agagik tan agagim, tan paulyan mo ran mandesisyon ed baetan ta’n dua. 38 Legan na 20 taon ya akiayam ak ed sika, agbalot nakalan iray karnerom tan saray kanding mo,+ tan agak balot angan manlapud saray kalakian a karnero diad pulok mo. 39 Agak angiyakar ed sika na antokaman ya ayep a biningkas na saray atap ya ayep.+ Aakoen kon mismo so inkabalang na satan. Balanglan atakew ed agew odino atakew ed labi imay ayep, sisingilen mo itan ed siak. 40 Kaskasian ak ed petang no agew, tan betel no labi, tan agak la makakaugip.+ 41 Duamplon taon ak la ed sankaabungan mo. Nanlingkor ed sika ed loob na 14 a taon parad duaran ananak mo tan 6 taon parad pulok mo, tan aminsamplom ya inuman so upak.+ 42 No anggapo ed dapag ko so Dios nen amak,+ say Dios nen Abraham tan samay tatakotan nen Isaac,*+ pinataynan mo ak komon natan a kalimalima. Anengneng na Dios so impanirap ko tan say impansagpot ko, kanian pinasakbayan to ka kalabian.”+

43 Insan inkuan nen Laban ed si Jacob: “Sarayan bibii et anak ko tan sarayan ugugaw et apok tan sayan pulok et pulok ko, tan amin a nenengnengen mo et kayarian ko tan kayarian na ananak ko. Antoy nagawaan ko natan sumpad sikara tan ed saray inyanak da? 44 Natan, gala ta mansipanan ta, sika tan siak, tan onkana iyan pantasi ed baetan ta.” 45 Kanian angalay bato si Jacob tan impaalagey to itan pian magmaliw a baton pakanodnonotan.+ 46 Insan inkuan nen Jacob ed saray agagi to: “Mangala kayo na saray bato!” Tan angala ray bato tan nanggawa ray bunton. Kayari na satan et angan ira diman ed samay bunton na bato. 47 Tan tinawag itan nen Laban a Jegar-sahaduta,* balet tinawag itan nen Jacob a Galeed.*

48 Insan inkuan nen Laban: “Sayan bunton na bato so sakey a tasi ed baetan ta’n dua natan.” Kanian tinawag to itan a Galeed,+ 49 tan Panagbantayan, lapud inkuan to: “Bantayan ita’n dua komon nen Jehova sano nanarawian ta ed sakey tan sakey. 50 No maltratoen mo iray ananak ko tan mangasawa ka ni arum nilikud ed saray ananak ko, anggano anggapoy kaiba ta’n too, nonot mo a say Dios so mantasi ed baetan ta’n dua.” 51 Inkuan ni nen Laban ed si Jacob: “Wadia iyan bunton na saray bato, tan wadia so baton pakanodnonotan ya impaalagey ko ed baetan ta’n dua. 52 Sayan bunton na bato et sakey a tasi, tan say baton pakanodnonotan et mantasi,+ ya agak onlampas ed sayan bunton na bato pian sakitan ta ka tan agka onlalampas ed sayan bunton na bato tan sayan baton pakanodnonotan pian sakitan mo ak. 53 Say Dios nen Abraham+ tan Dios nen Nahor, say Dios na ama ra, so mangukom komon ed baetan ta’n dua.” Tan nansamba si Jacob ed samay tatakotan nen Isaac ya ama to.*+

54 Kayari na satan et nambagat si Jacob diad palandey tan inimbitaan to iray agagi to a mangan. Kanian angan ira tan nansanlabi ra diad palandey. 55 Balet kabkabuasan a binmangon si Laban tan inangoban to iray apo* to+ tan ananak to tan benendisyonan to ra.+ Insan sinmipot lay Laban tan anempet la.+