Unona ed Saray Taga Corinto
8 Natan, agagi, labay min naamtaan yo so nipaakar ed agnaparaan a kaabigan na Dios a niiter ed saray kongregasyon ed Macedonia.+ 2 Maniirap ira lapud baleg a subok, ingen ta say agnaaandin liket da tan pinasyan irap na bilay da so mas lalon nampayaman ed inkamabunlok da. 3 Ta ginawa da itan unong ed pakasarag da,+ on, papaneknekan ko a lampas ni ingen ed pakasarag da,+ 4 ta sikaran mismo so inmasingger pian maminpigan mikasi ed sikami a nawalaan iray pribilehyon mangiter na donasyon tan ontulong ed saray masanto.+ 5 Tan aliwa labat a samay inilaloan mi so ginawa ra, ta inter da nin unona so inkasikara diad Katawan tan diad sikami unong ed linawa na Dios. 6 Kanian pinaseseg mi Tito+ a kaukolan to met a sumpalen so pankolekta ed samay donasyon a mabulos yon iiter, lapud sikatoy angigapod satan diad sikayo. 7 Balet, no panon ya onaaligwas kayo ed amin a bengatla, diad pananisia, panagsalita, kakabatan, inkagunaet, tan diad panangaro mid sikayo, onaligwas kayo met komon ed sayan mabulos a panangiter na donasyon.+
8 Ibabagak iya aliwan pian iganggan ta kayo, noagta pian naamtaan yoy inkagunaet na arum tan pian nasubok no talagan tuay panangaro yo. 9 Ta amta yo so agnaparaan a kaabigan na Katawan tayon Jesu-Kristo, ya anggaman sikatoy mayaman et nagmaliw a mairap-bilay nisengeg ed sikayo,+ pian magmaliw kayon mayaman diad impagmaliw ton mairap-bilay.
10 Tan ibagak so opinyon kod saya:+ Pakagunggonaan yo iya, ta anengneng ko a sakey taon lay apalabas et agyo labat ginapoan a gawaen iya noagta impanengneng yo met a labalabay yo yan gawaen. 11 Kanian natan, komon ta akaparaan kayon manumpal ed sayan kimey unong ed pakasarag yo, a singa met nen ginapoan yo yan gawaen. 12 Ta no say sakey et akaparaan a mangiter, nagkalalo lan makapaliket no gawaen to itan unong ed no antoy walad sikato,+ aliwan unong ed no antoy anggapod sikato. 13 Ta agko labay a mainomay itan parad arum, balet mairap parad sikayo; 14 ingen ta diad panamegley na pampapara, saray sulok yo natan so mamano ed pankaukolan da, pian saray sulok da so mamano met ed saray kulang yo, pian walay pampapara. 15 Ta unong a nisulat: “Say toon walaan na dakel et aliwan sobray walad sikato, tan say toon walaan na daiset et aliwan kulang so walad sikato.”+
16 Salamat ed Dios ta inyan to met ed puso nen Tito so masimoon a panangiyansakit a nalilikna mi parad sikayo,+ 17 lapud sikatoy aglabat kinmiwas ed panamaseseg, noagta labalabay to met itan a gawaen kanian namboluntaryon onlad sikayo. 18 Balet ibaki min kaiba to so sakey ya agin pandinayewan na amin a kongregasyon lapud pangiyaabawag toy maong a balita. 19 Aliwan satan labat, sikatoy tinuro met na saray kongregasyon a magmaliw a kaiba min ombiahe legan min aasikasoen iyan panangiter na donasyon diad kigloriaan na Katawan tan bilang paneknek ya akaparaan kamin ontulong. 20 Kanian papaliisan mi a walay nabalaw ed sikami nipaakar ed dakdakel a kontribusyon ya aasikasoen mi.+ 21 Ta ‘dugay paraan na pangaasikaso mi ed amin a bengatla, aliwa labat a diad pakanengneng nen Jehova,* noagta diad pakanengneng met na totoo.’+
22 Niarum ni, ibaki min kaiba ra so agi tayo ya aminpiga mi lan asubok tan apaneknekan a maseet ed dakel a bengatla, balet natan et mas maseet lapud manmamatalek a maong ed sikayo. 23 Balet, no walay mantepet nipaakar ed si Tito, ibaga yo a sikatoy kaibak tan kakimeyan ko parad pankaabigan yo; odino no walay mantepet nipaakar ed saray agagi tayo, ibaga yon apostol ira na saray kongregasyon tan iglogloria ray Kristo. 24 Kanian ipatnag yon inar-aro yo ra,+ tan ipanengneng yod saray kongregasyon no akin ya impasirayew mi kayo.