Levitico

16 Akitongtong si Jehova ed si Moises kayari na impatey na duaran ananak nen Aaron lapud inyasingger da ed si Jehova.+ 2 Inkuan nen Jehova ed si Moises: “Ibagam ed si Aaron a kuyam a diad manepeg a panaon labat so iloob to ed masanton pasen,+ diad loob na kurtina,+ diad arap na sakob ya akatapew ed Kaban, pian ag-ompatey,+ ta manpanengneng ak diad tagey na sakob+ ed panamegley na sakey a lurem.+

3 “Saya so nepeg ya awiten nen Aaron sano onloob ed masanton pasen: sakey a kilaw a kalakian a baka bilang apay parad kasalanan+ tan sakey a kalakian a karnero bilang apay a popoolan.+ 4 Nepeg ton isulong so masanton linen ya andukey a kawes,+ tan sakbongan na linen a karsonsilyo*+ so laman to,* tan nepeg a sikatoy manbalkes na linen+ tan mangisulong na linen a turbante+ ed ulo to. Masanton kawes+ iratan. Sikatoy manames+ insan isulong to iratan.

5 “Nepeg a sikatoy mangalad saray Israelita+ na duaran kilaw a kalakian a kanding bilang apay parad kasalanan tan sakey a kalakian a karnero bilang apay a popoolan.

6 “Insan nepeg ya iyapay nen Aaron so kalakian a baka ya apay parad kasalanan, a satan et onkana ed sikato, tan sikatoy manggawa na pananakbong parad sikato+ tan sankaabungan to.

7 “Insan to alaen so duaran kanding tan paalageyen to iratan ed arapan nen Jehova diad lolooban na tolda a pantitiponan. 8 Si Aaron et manggaway pampapalaranan ed duaran kanding, say sakey et parad si Jehova tan samay sakey et parad Azazel.* 9 Samay kanding ya apili parad si Jehova ed panamegley na pampapalaranan+ et iyapay nen Aaron tan usaren to itan bilang apay parad kasalanan. 10 Balet samay kanding ya apili parad Azazel ed panamegley na pampapalaranan et nepeg a mabilay ya iyakar tan paalageyen ed arapan nen Jehova ta pian nagawaay pananakbong ed panamegley na satan, pian nibulos itan ed kalawakan parad Azazel.+

11 “Iyapay nen Aaron so kalakian a baka ya apay parad kasalanan, a satan et onkana ed sikato, tan manggaway pananakbong parad sikato tan sankaabungan to; kayari na satan et pakgeran to so kalakian a baka ya apay parad kasalanan, a satan et onkana ed sikato.+

12 “Insan alaen to so kargaan na ngalab+ a napnoy mandarlang a ngalab manlapud altar+ ed arapan nen Jehova tan duaran sankaakop a pinon ambalingit ya insenso,+ tan awiten to iratan ed loob na kurtina.+ 13 Iyan to met so insenso ed apoy diad arapan nen Jehova,+ tan sakbongan na asewek na insenso so sakob+ na Kaban a walad tapew na Testimonya,+ pian sikatoy ag-ompatey.

14 “Sikatoy mangala na daiset a dala+ na kalakian a baka tan iwalsik to itan ed panamegley na gamet to diad arap na sakob diad bandad bukig a diking, tan maminpito ton iwalsik ed arap na sakob so daiset a dala ed panamegley na gamet to.+

15 “Insan pakgeran to so kanding ya apay parad kasalanan, a satan et onkana ed saray totoo,+ tan iyakar to so dala+ na satan ed loob na kurtina+ tan gawaen to so singa ginawa to ed dala na kalakian a baka; nepeg ton iwalsik itan ed sakob tan diad arap na sakob.

16 “Nepeg a sikatoy manggawa na pananakbong parad masanton pasen nipaakar ed saray agmalinis a gawa na saray Israelita tan nipaakar ed saray impakasumlang da tan kasalanan da,+ tan ontan so nepeg ton gawaen parad tolda a pantitiponan, a nipasen ed limog da diad kawalaan na saray agmalinis a gawa ra.

17 “Nepeg ya anggapoy arum a toon wadman ed loob na tolda a pantitiponan manlapud iloob to ya anggad ipaway to ed masanton pasen pian manggaway pananakbong. Sikatoy manggawa na pananakbong parad sikato tan sankaabungan to+ tan interon kongregasyon na Israel.+

18 “Insan sikatoy ompaway tan onlad altar,+ a walad arapan nen Jehova, tan manggaway pananakbong parad satan, tan sikatoy mangala na daiset a dala na kalakian a baka tan daiset a dala na kanding tan iyan to ed saray saklor na altar diad amin a diking. 19 Maminpito to met ya iwalsik ditan so daiset a dala ed panamegley na gamet to tan linisan itan tan pasantosen to ed saray agmalinis a gawa na saray Israelita.

20 “Sano asumpal to lan ginawa so pananakbong+ parad masanton pasen tan tolda a pantitiponan tan say altar,+ iyasingger to met so mabilay a kanding.+ 21 Itapew nen Aaron iray lima to ed ulo na mabilay a kanding tan ipatua to ed tapew na satan so amin ya impakalingo na saray Israelita, tan amin ya impakasumlang da tan amin a kasalanan da, tan iyan to iratan ed ulo na kanding+ tan ibulos to itan ed kalawakan diad panamegley na lima na samay lakin apili a manggawa ed saya.* 22 Awiten a mismo na kanding diad desierto so amin ya impakalingo ra,+ tan ibulos to so kanding diad kalawakan.+

23 “Insan onloob si Aaron ed tolda a pantitiponan tan ekalen to iray linen a kawes ya insulong to sanen sikatoy linmoob ed masanton pasen, tan igaton to iratan diman. 24 Nepeg ya amesen toy sarili to*+ diad masanton pasen tan isulong to iray kawes to;+ insan sikatoy ompaway tan iyapay to so apay ton popoolan+ tan say apay a popoolan parad saray totoo+ tan manggawa na pananakbong parad sikato tan parad saray totoo.+ 25 Paaseweken tod tapew na altar so taba na apay parad kasalanan.

26 “Say laki ya angibulos ed kanding parad Azazel+ et nepeg ton ipesak iray kawes to, manames, tan kayari na satan et nayarian to lay onloob ed kampo.

27 “Tan say kalakian a baka ya apay parad kasalanan tan say kanding ya apay parad kasalanan, a say dala na saratan et inyakar ed masanton pasen pian manggaway pananakbong, et nepeg ya ipaway ed kampo, tan nepeg a poolan iray katat, karne tan dutak na saratan.+ 28 Nepeg ya ipesak na samay amool ed saratan iray kawes to tan manames, tan kayari na satan et nayarian to lay onloob ed kampo.

29 “Saya so manbayag a ganggan parad sikayo: Diad komasamplon agew na komapiton bulan et nepeg yon pairapen so inkasikayo,* tan agkayon balot mankikimey,+ balanglan niyanak ya Israelita odino sakey a dayo a manaayam ed limog yo. 30 Diad satan ya agew et nagaway pananakbong+ parad sikayo, pian niyabawag kayon malinis. Nalinisan kayo ed amin a kasalanan yo diad arapan nen Jehova.+ 31 Sakey iyan sabaton na sigpot a pampainawa parad sikayo, tan nepeg yon pairapen so inkasikayo.*+ Sakey iyan manbayag a ganggan.

32 “Say saserdoten alanaan+ tan aturo* a manlingkor bilang saserdote+ ya onsublay ed ama to+ et manggaway pananakbong tan isulong to iray linen a kawes,+ saray masanton kawes.+ 33 Sikatoy manggaway pananakbong parad masanton santuaryo,+ tolda a pantitiponan,+ tan altar;+ tan sikatoy manggaway pananakbong parad saray saserdote tan parad amin a totoo a kabiangay kongregasyon.+ 34 Saya so manbayag a ganggan parad sikayo,+ pian nagawaay pananakbong a maminsan ed kada taon parad saray Israelita nipaakar ed amin a kasalanan da.”+

Kanian ginawa to so unong ed ingganggan nen Jehova ed si Moises.