Unong ed si Mateo

13 Diad saman ya agew et pinmaway si Jesus ed abung tan yinmurong ed gilig na dayat. 2 Tan dinmago ed sikato so dakel a totoo kanian sikatoy linmugan ed sakey a baloto tan yinmurong, legan ya akaalagey ed gilig na dayat so amin a totoo.+ 3 Insan dakel so imbaga tod sikara ed panamegley na saray ilustrasyon,+ ya inkuan to: “Walay sakey a tomatanem a linman mangisibwag na bini.+ 4 Legan ton mansisibwag, wala ray binin naplag ed gilig na dalan, tan sinmabi ray manok tan tinoktok da iratan.+ 5 Say arum et naplag ed mabaton pasen a daiset so dalin, tan tinmubo ran tampol lapud atapew so dalin.+ 6 Balet amagaan ira sanen asinagan na agew, tan nalnes lapud ag-ira linmamot. 7 Say arum et naplag ed kasabitan, tan binmaleg iray sabit tan sinakbongan da ra.+ 8 Balet say arum et naplag ed maong a dalin tan nambunga ra, say sakey et nambungay 100, samay sakey et 60, samay sananey et 30.+ 9 Ondengel komon imay walaan na layag.”+

10 Kanian dinmago iray disipulo tan inkuan dad sikato: “Akin a manguusar ka na saray ilustrasyon diad pitotongtong mod sikara?”+ 11 Sikatoy inmebat, ya inkuan to: “Niiter ed sikayo so pakatalos ed saray sagradon sekreto+ na Panarian na tawen, balet ag-itan niiter ed sikara. 12 Ta siopaman a walaan, sikatoy naikdan ni na dakel tan nawalaan na amayamay; balet siopaman ya andian, anggan say walad sikato et alaen.+ 13 Saya so rason no akin a mitotongtong ak ed sikara diad panamegley na saray ilustrasyon; ta onnenengneng ira balet agda met lanlamang nanengneng, tan ondedengel ira balet agda met lanlamang narengel, tan agda natatalosan so kabaliksan na satan.+ 14 Tan nasusumpal ed sikara so propesiya nen Isaias. Inkuan na satan: ‘Narengel yo balet agyon balot natalosan so kabaliksan na satan, tan onnengneng kayo balet agyon balot nanengneng.+ 15 Ta nagmaliw ya agmaawat so puso na sarayan totoo, tan nadngel na kalayagan da balet ag-ira kinmiwas, tan inlikdem day kamataan da, pian agbalot makanengneng iray mata ra tan makarengel iray layag da tan makatalos ed kabaliksan na satan diad puso da pian makapawil ira, tan paabigen ko ra.’+

16 “Balet maliket kayo ta makanengneng iray mata yo, tan makadngel iray layag yo.+ 17 Ta ibagak ed sikayo so tua, nampirawatan na dakel a propeta tan matunong a totoo a nanengneng iray nanenengneng yo balet ta agda iratan anengneng,+ tan nampirawatan dan narengel iray narerengel yo balet agda iratan nadngel.

18 “Dengel yo sirin so ilustrasyon nipaakar ed toon angisibwag na bini.+ 19 Sano walay siopaman ya ondengel ed salita na Panarian balet ta agto natatalosan so kabaliksan na satan, onsabi imay mauges+ tan samsamen to so nitanem ed puso to; saya imay nisibwag ed gilig na dalan.+ 20 Nipaakar ed samay nitanem ed mabaton pasen, saya imay onderengel ed salita tan maliket ya angawat a tampol ed satan.+ 21 Balet aglinmamot noagta nansiansian agano, tan sanen sinmabi so kairapan odino panamasegsegang lapud salitay Dios, sikatoy agapol a tampol. 22 Nipaakar ed samay nitanem ed kasabitan, saya imay onderengel ed salita, balet saray kapagaan ed sayan sistema na mundo*+ tan say mapalikdon pakayari na kaykayamanan so manasakbong ed salita, kanian ag-itan manbunga.+ 23 Nipaakar ed samay nitanem ed maong a dalin, saya imay onderengel ed salita tan makakatalos ed kabaliksan na satan, tan sikatoy manbubunga, say sakey et manbungay 100, samay sakey et 60, samay sananey et 30.”+

24 Sakey nin ilustrasyon so insalaysay tod sikara, ya inkuan to: “Say Panarian na tawen et niyaliling ed sakey a toon angisibwag na maong a bini diad uma to. 25 Legan a nanaugip iray totoo, sinmabi so kabusol to tan angisibwag met na saray sisanyas* diad angisibwagan na saray trigo, insan tinmaynan. 26 Sanen tinmubo tan binmuyag la iray trigo, tinmubo met iray sisanyas. 27 Kanian sinmabi iray aripen na akan-abung tan inkuan dad sikato, ‘Katawan, agta maong a bini so insibwag mod umam? Akin balet et wala ray tinmutubon sisanyas?’ 28 Inkuan tod sikara, ‘Sakey a toon kabusol so nanggawa ed saya.’+ Inkuan ed sikato na saray aripen, ‘No ontan, labay mon bagoten mi iratan?’ 29 Inkuan to, ‘Aleg, ta ompan napibagot yo met iray trigo sano bagoten yo iray sisanyas. 30 Paulyan yo iratan a manbansag ya ombaleg anggad panag-ani, tan sano panaon lay panag-ani et ibagak ed saray manag-ani: Bagot yo nin unona iray sisanyas tan berber yo iratan tan poolan yo ra; insan yo la tiponen iray trigo diad kamalir ko.’”+

31 Sakey nin ilustrasyon so insalaysay tod sikara, ya inkuan to: “Say Panarian na tawen et singa sakey a bukel na mustasa ya inala na sakey a too tan intanem tod uma to.+ 32 Diad tua et sankamelagan itan ed amin a bukel, balet sanen binmaleg et nagmaliw a sankabalegan ed saray pisipising tan nagmaliw a kiew, kanian saray sanga na satan et dadapoan tan panuubongan na saray manok.”

33 Sakey nin ilustrasyon so imbaga tod sikara: “Say Panarian na tawen et singa lebadura ya inala na sakey a bii tan inkames tod taloran angkakabaleg a sukat na arina ya anggad linmebag so interon masa.”+

34 Amin iraya et imbaga nen Jesus ed saray totoo diad panamegley na saray ilustrasyon. On, sikatoy naynay a manguusar na ilustrasyon sano mansasalita ed sikara,+ 35 pian nasumpal imay sinalita ed panamegley na propeta, ya inkuan to: “Biswaten koy sangik ed panamegley na saray ilustrasyon; salitaen ko iray bengatlan niyamot manlapu lad gapo.”*+

36 Insan kayari ton pinasempet iray totoo, sikatoy linmoob ed abung. Dinmago ed sikato iray disipulo to tan inkuan da: “Ipaliwawam pad sikami so ilustrasyon nipaakar ed saray sisanyas diad uma.” 37 Inyebat to: “Say tomatanem na maong a bini et say Anak na too; 38 say uma et say mundo.+ Nipaakar ed maong a bini, saraya so ananak na Panarian, balet saray sisanyas et ananak na samay mauges,+ 39 tan say kabusol ya angisibwag ed saratan et say Diablo. Say panag-ani et say kaunoran a parte na sistema na mundo,* tan saray manag-ani et saray anghel. 40 Kanian no panon a saray sisanyas et binagot tan pinoolan, ontan met so nagawa diad kaunoran a parte na sistema na mundo.*+ 41 Ibaki na Anak na too iray anghel to, tan ekalen dad Panarian to so amin a bengatlan pakagapolan tan saray totoon manggagawa na kaugsan, 42 tan ibuntok da rad manliob a hurnoan.+ Ditan so pannangisan tan panngalatengetan na ngipen da. 43 Diad satan a panaon, saray matunong et onsinag a singa kaliwawa na agew+ diad Panarian na Ama ra. Ondengel komon imay walaan na layag.

44 “Say Panarian na tawen et singa kayamanan ya akaamot ed uma, ya aromog na sakey a too tan inyamot to lamet; tan lapud liket to et inlako ton amin so kayarian to tan sinaliw to iman ya uma.+

45 “Say Panarian na tawen et singa met sakey ya ombiabiahen negosyante a manaanap na mararakep a perlas. 46 Sanen sikatoy akalmo na sakey a mabmablin perlas, inlako ton tampol so amin a walad sikato tan sinaliw to itan.+

47 “Say Panarian na tawen et singa met sakey ya iket ya impelag ed dayat tan makakala na amin a klase na sira. 48 Sanen napno la itan, ingguyor da ed gilig na dayat, tan kayurong da et inyan dad saray kargaan iramay maabig,+ balet imbantak da iramay agnayari.+ 49 Ontan so nagawa diad kaunoran a parte na sistema na mundo.* Ibaki iray anghel pian ibiig da iray mauges ed saray matunong 50 tan ibuntok da rad manliob a hurnoan. Ditan so pannangisan tan panngalatengetan na ngipen da.

51 “Kasin atalosan yo so kabaliksan na sarayan amin a bengatla?” Inmebat ira: “On.” 52 Insan inkuan tod sikara: “No ontan sirin, balang managbangat ed totoo a nabangatan nipaakar ed Panarian na tawen et miparad sakey ya akan-abung ya ipapaway tod pananginan toy kayamanan iray balo tan daan a bengatla.”

53 Sanen asumpal ya imbaga nen Jesus irayan ilustrasyon, sikatoy tinmaynan ed saman a pasen. 54 Kasabi tod mismon baley to,+ imbangat to iray totoo diad sinagoga ra, kanian nandinayew ira tan inkuan da: “Iner so angalaan na sayan too ed onian karunongan tan sarayan makapanyarin gawa?+ 55 Agta saya imay anak na karpentero?+ Agta say ina to et manngaray Maria, tan agagi to ra di Santiago tan Jose tan Simon tan Judas?+ 56 Tan agta kaiba tayo so amin ya agagi ton bibii? Iner sirin so angalaan to na sarayan amin?”+ 57 Kanian ag-ira manisia ed sikato.*+ Balet imbaga nen Jesus ed sikara: “Say sakey a propeta et napagalangan ed anggan iner nilikud ed mismon baley to tan ed mismon abung to.”+ 58 Tan sikatoy agnanggawa diman na makapanyari iran gawa lapud anggapoy pananisia ra.