Unonan Samuel
2 Sanen asingger lay ipatey nen David, saraya so bilin tod si Solomon ya anak to: 2 “Magano ak lan ompatey.* Kanian manpabiskeg ka+ tan paneknekan mon laki ka.+ 3 Nepeg mon sumpalen so obligasyon mod si Jehova a Dios mo diad panakar mo ed saray dalan to tan diad pangunor mo ed saray inter ton totontonen, ganggan, panangukom, tan saray panonot to unong a nisulat ed Ganggan nen Moises;+ diad ontan et ontalona ka* ed amin a gawaen mo tan diad inerman a laen mo. 4 Et sumpalen nen Jehova imay insipan to nipaakar ed siak: ‘No saray ananak mo et imanoen day dalan da, a manakar iran matoor ed arapan ko diad interon puso tan kamarerwa* ra,+ agbalot naandian so pamilyam na anak a laki ya onyurong ed trono na Israel.’+
5 “Amtam met no antoy ginawad siak nen Joab ya anak nen Zeruia, samay ginawa to ed duaran pangulo na armada na Israel—si Abner+ ya anak nen Ner tan si Amasa+ ya anak nen Jeter. Pinatey to ra, ya impaagus toy dala+ na guerra diad panaoy kareenan, tan inyan to itan ed balkes a walad awak to tan diad saray sandalyas ya akasulong ed sali to. 6 Kiwas ka unong ed karunongan mo tan agmo aabuloyan a saray uban to et onlasur a mareen ed Lubok.*+
7 “Balet ipatnag moy matoor a panangaro ed saray ananak nen Barzilai+ a Gileadita, tan nepeg a kaiba ira ed saramay akarungo ed lamisaan mo, ta ontan so impatnag dad siak a suporta+ sanen imbatikan koy Absalom ya agim.+
8 “Wadtan met si Simei ya anak nen Gera a Benjaminita a taga Bahurim. Sikato may angibaga na maruksan panag-ayew+ ed siak diad agew a paonla ak ed Mahanaim;+ balet sanen inabet to ak ed Jordan, diad arapan nen Jehova et sinambaan kod sikato: ‘Agta ka pateyen ed espada.’+ 9 Natan agmo aabuloyan a sikatoy agnadusa,+ ta marunong kan too tan amtam no antoy nepeg mon gawaen ed sikato; ilasur mo ed Lubok* iray uban to a kadadala.”+
10 Si David et nampainawa la a kaiba na saray inmuunan atateng to tan sikatoy imponpon diad Syudad nen David.+ 11 Say karukey* na impanuley nen David ed Israel et 40 taon. Sikatoy nanuley na 7 taon legan a walad Hebron,+ tan nanuley na 33 taon legan a walad Jerusalem.+
12 Tan si Solomon et yinmurong ed trono nen David ya ama to, tan diad inlabas na panaon et niletneg a malet so panarian to.+
13 Ag-abayag, si Adonias ya anak nen Hagit et linmad si Bat-sheba ya ina nen Solomon. Intepet nen Bat-sheba: “Kasin linma ka dia parad kareenan?” Sikatoy inmebat: “On.” 14 Insan inkuan to ni: “Walay labay kon ibagad sika.” Kanian inkuan nen Bat-sheba: “Mansalita ka.” 15 Et inkuan to: “Amtam a siak komon so manuley ed panarian, tan iilaloan na interon Israel a siak so magmaliw ya ari;+ balet say panarian et aglinmad siak noagta diad si agik, ta inter itan ed sikato nen Jehova.+ 16 Balet natan, wala labat so sakey a kerewen kod sika. Agmo ak komon papabaingan.” Kanian inkuan nen Bat-sheba ed sikato: “Mansalita ka.” 17 Et inkuan to: “Ibagam komon ed si Arin Solomon ya iter tod siak si Abisag a Sunamita pian magmaliw ya asawak,+ ta amtak ya agto ka pabaingan.” 18 Diad saya et inkuan nen Bat-sheba: “Sige! Mitongtong ak ed ari parad sika.”
19 Kanian linmay Bat-sheba ed si Arin Solomon pian mitongtong parad si Adonias. Et inmalagey a tampol so ari pian abeten so ina to tan tinmuek ed sikato. Insan yinmurong ed trono to tan impaiyan to met so tronon parad ina na ari, pian sikatoy onyurong ed nikawanan to. 20 Et inkuan nen Bat-sheba: “Walay melag a bengatlan kerewen kod sika. Agmo ak komon papabaingan.” Kanian inkuan na ari ed sikato: “Ibagam labat, inak; ta agta ka pabaingan.” 21 Et imbaga to: “Iter mo komon si Abisag a Sunamita ed kinen Adonias ya agim pian magmaliw ya asawa to.” 22 Et oniay ebat nen Arin Solomon ed si ina to: “Akin et kekerewen moy Abisag a Sunamita parad si Adonias? Kerew mo met la pati say panarian parad sikato,+ ta mas panguloan ni nen siak,+ tan sikatoy susuportaan nen Abiatar a saserdote tan si Joab+ ya anak nen Zeruia.”+
23 Diad satan et sinambaan nen Arin Solomon diad arapan nen Jehova: “Dusaen ak komon na ambelabelat na Dios, no diad sayan kerew nen Adonias et aliwan bilay toy kasalat.* 24 Natan, unong a mabilay si Jehova, samay amabiskeg tan amayurong ed siak+ diad trono nen David ya amak tan samay angiletneg na sankaabungan ko,*+ unong ya insipan to, ompatey si Adonias+ ed sayan agew.” 25 Tampol ya imbaki nen Arin Solomon si Benaias+ ya anak nen Jehoiada, kanian linma tan kinabil toy Adonias tan inatey.
26 Et oniay inkuan na ari ed si Abiatar+ a saserdote: “La ka ed saray umam diad Anatot!+ Nepeg kan ompatey, balet agta ka pateyen ed sayan agew lapud sinakbat mo so Kaban na Soberanon Katawan a Jehova diad panaon nen David ya amak+ tan kaiba ka nen amak ed amin ya irap ya asagmak to.”+ 27 Kanian inekal nen Solomon si Abiatar bilang saserdote nen Jehova, pian nasumpal so imbaga nen Jehova diad Silo+ sumpad sankaabungan nen Eli.+
28 Sanen abalitaan iya nen Joab—ta sinuportaan toy Adonias+ balet agto sinuportaan si Absalom+—sikatoy binmatik ed tolda nen Jehova+ tan binembenan to ray saklor na altar. 29 Diad saman et walay angibagad si Arin Solomon: “Si Joab et batik ed tolda nen Jehova tan wadman ed abay na altar.” Kanian imbaki nen Solomon si Benaias ya anak nen Jehoiada, a kuan to: “La ka, patey mo!” 30 Kanian linmay Benaias ed tolda nen Jehova tan kuan tod si Joab: “Oniay inkuan na ari, ‘Paway kad ’tan!’” Balet kuan to: “Agko labay! Dia ak ompatey.” Diad saman et pinmawil si Benaias ed ari tan inkuan to: “Oniay imbaga nen Joab, tan oniay inyebat tod siak.” 31 Et inkuan na ari ed sikato: “Gawam so imbaga to; patey mo tan iponpon mo tan ekal mo ed siak tan ed sankaabungan nen amak so dala ya agmakatunongan ya impaagus nen Joab.+ 32 Paebatan ed sikato* nen Jehova so sarili ton dala, ta ag-amta nen David ya amak a pinatey to ed espada so duaran lalaki a mas matunong tan mas maong nen sikato: si Abner+ ya anak nen Ner a pangulo na armaday Israel+ tan si Amasa+ ya anak nen Jeter a pangulo na armaday Juda.+ 33 Say dala ra et paebatan* ed si Joab tan ed ilalak* to ya anggad angga;+ balet diad si David, diad ilalak* to, diad sankaabungan to, tan diad trono to et niwala komon ya anggad angga so kareenan a manlapud si Jehova.” 34 Kanian si Benaias ya anak nen Jehoiada et nila toy Joab tan pinatey to, tan sikatoy imponpon ed abay na abung to diad kalawakan. 35 Insan tinuro na ari si Benaias+ ya anak nen Jehoiada a mangidaulo ed armada bilang kasalat to, tan tinuro met na ari si Zadok+ a saserdote a kasalat nen Abiatar.
36 Et impatawag na ari si Simei+ tan inkuan tod sikato: “Manggawa kay abung mo ed Jerusalem, tan manayam ka ditan; agka ompapaway ed syudad tan agka oonlad arum a pasen. 37 Diad agew ya ompaway ka tan ombeltang ka ed Lawak na Kidron,+ seguradon ompatey ka. Paebatan ed sika* so sarilim a dala.” 38 Inkuan nen Simei ed ari: “Makatunongan itay imbagam. Gawaen na lingkor mo so imbaga na katawan kon ari.” Kanian abayag a nanayam si Simei ed Jerusalem.
39 Balet sanen manampot lay taloran taon, batik so duara ed saray aripen nen Simei tan linma rad si Akis+ ya anak nen Maaca ya ari na Gat. Sanen walay angibagad si Simei: “Wadman ed Gat iray aripen mo,” 40 tampol ya imparaan nen Simei so asno to tan linmad kinen Akis diad Gat pian anapen iray aripen to. Kapawil nen Simei manlapud Gat a kaiba iray aripen to, 41 walay angibagad si Solomon: “Si Simei et pinmaway ed Jerusalem tan linmad Gat, tan natan et wadia la.” 42 Diad saman et impatawag na ari si Simei tan inkuan tod sikato: “Agta impansamba ta kad arapan nen Jehova tan pinasakbayan ta ka: ‘Diad agew ya ompaway ka tan onla kad arum a pasen, seguradon ompatey ka’? Agta imbagam nid siak, ‘Makatunongan so imbagam; unoren ko’?+ 43 Akin balet et agmo sinumpal so sinambaan mod si Jehova tan say ganggan ya inter kod sika?” 44 Inkuan ni na ari ed si Simei: “Amtam ya amin iray makapasakit a ginawam ed si David ya amak,+ tan ipawil nen Jehova ed mismon ulom iray makapasakit a ginawam.+ 45 Balet nabendisyonan si Arin Solomon,+ tan say trono nen David et niletneg a malet diad arapan nen Jehova ya anggad angga.” 46 Diad satan et ingganggan na ari si Benaias ya anak nen Jehoiada, kanian kinabil toy Simei tan inatey.+
Diad ontan et niletneg a malet so panarian diad uley nen Solomon.+