Unonan Samuel

28 Et tinipon nen David ed Jerusalem so amin a prinsipe ed Israel: saray prinsipe na saray tribu, papangulo na saray grupon+ manlilingkor ed ari, papangulo na nilibo tan papangulo na nilasus,+ saray manangasikaso na amin a kaykayarian tan ayayep na ari+ tan saray anak ton lalaki,+ kaiba iray opisyal ed palasyo tan amin a mabibiskeg tan makayarin lalaki.+ 2 Insan inmalagey si Arin David tan inkuan to:

“Dengel yo ak, O agagik tan totook. Pirpirawat na pusok so mangipaalagey na abung a panginan na kaban na sipanan nen Jehova tan say toonan na sali na Dios tayo,+ tan angiparaan ak la parad pangipaalagey.+ 3 Balet inkuan na tuan Dios ed siak, ‘Aliwan sikay mangipaalagey na abung parad ngaran ko,+ ta akibiang kad saray guerra, tan angipaagus kay dala.’+ 4 Ingen ta diad interon sankaabungan nen amak et siak so pinili nen Jehova a Dios na Israel pian magmaliw ya ari ed Israel ya anggad angga,+ ta si Juda so pinili ton lider,+ tan diad sankaabungan nen Juda et pinili toy sankaabungan nen amak,+ tan diad saray anak a lalaki nen amak et siak so inabobonan to, pian gawaen ton ari ed interon Israel.+ 5 Tan diad amin ya anak kon lalaki—ta inikdan ak nen Jehova na dakel ya anak a lalaki+—pinili toy Solomon ya ana’ko+ pian onyurong ed trono na panarian nen Jehova diad Israel.+

6 “Inkuan tod siak, ‘Si Solomon ya anak mo so mangipaalagey na abung ko tan saray sular na abung ko, ta sikatoy pinilik a magmaliw ya anak ko tan siak so magmaliw ya ama to.+ 7 Iletneg kon malet so panarian to ya anggad angga+ no sikatoy determinadon mangunor ed saray ganggan ko tan saray panangukom ko,+ a singa gagawaen to la natan.’ 8 Kanian ibagak diad arapan na interon Israel, say kongregasyon nen Jehova, tan diad pakadngel na Dios tayo: Alwaran yon usisaen tan tumboken so amin a ganggan nen Jehova a Dios yo, pian nakayarian yo so maabig a dalin+ tan magmaliw itan a permanentin tawir na saray ananak yo.

9 “Tan sika Solomon ya ana’ko, kabaten moy Dios nen amam tan manlingkor kad sikato diad interon* puso+ tan maliket* a kamarerwa,* ta uusisaen nen Jehova so amin a kapusoan,+ tan natetebek toy amin a kanonotan tan motibo.+ No sikatoy anapen mo, abuloyan to kan naromog mo,+ balet no taynan mo, ipulisay to ka ya anggad angga.+ 10 Nonot mo a sika so pinili nen Jehova a mangipaalagey ed abung a magmaliw a santuaryo. Manpakpel ka tan igapom lay kimey.”

11 Insan inter nen David ed si Solomon ya anak to so plano+ parad balkonahe+ tan parad nanduruman kuarto, saray kuarton panagsimpenan, saray kuarto ed tagey, saray kuarto ed loob, tan say kuarto a kawalaan na sakob a parad pipupulangan.*+ 12 Inter to met so plano na amin a bengatlan impasabid sikato diad panamegley na espiritu parad saray sular+ na abung nen Jehova, parad amin a kuarton pananganan ya akapaliber ed satan, parad saray pasen a pangiinay kayamanan ed abung na tuan Dios, tan parad saray pasen a pangiinan na saray bengatlan pinasanto;*+ 13 inikdan to met na instruksion nipaakar ed saray grupo na saray saserdote+ tan saray Levita, nipaakar ed amin a kimey a panaglingkor ed abung nen Jehova, tan nipaakar ed amin a kagawaan parad panaglingkor ed abung nen Jehova; 14 ontan met ed belat na balitok, say balitok ya usaren ed amin a kagawaan parad nanduruman panaglingkor, say belat na amin a kagawaan a pilak, tan amin a kagawaan parad nanduruman panaglingkor; 15 pati say belat na saray balitok a kandelero+ tan saray balitok a lamparaan na saratan, say belat na nanduruman kandelero tan saray lamparaan na saratan, tan say belat na saray pilak a kandelero, salanti, say nipaakar ed kada kandelero tan saray lamparaan na satan unong ed usar to; 16 pati say belat na balitok parad saray lamisaan na nantatapewan a tinapay,*+ salanti, say kada lamisaan, ontan met ed pilak parad saray pilak a lamisaan, 17 say nipaakar ed saray tinidor, saray yaong, saray pitsil a gawad puron balitok, tan say belat na saray angkekelag a balitok a yaong,+ salanti, kada angkekelag a yaong, tan say belat na saray angkekelag a pilak a yaong, salanti, kada angkekelag a yaong. 18 Imbaga to met so belat na puron balitok parad altar na insenso+ tan say mangirerepresenta na karwahe,+ salanti, saray balitok a kerubin+ ya akabuskag iray payak da tan manasanib ed kaban na sipanan nen Jehova. 19 Inkuan nen David: “Say lima nen Jehova et walad siak, tan inikdan to ak na aralem a pakatalos pian nisulat+ ko so amin a detalye na plano.”+

20 Inkuan ni nen David ed si Solomon ya anak to: “Manpakpel tan manpabiskeg ka tan igapom lay kimey. Agka natatakot odino nakekebbiew, ta si Jehova a Dios, say Dios ko, et walad sika.+ Agto ka taynanan odino paulyanan,+ noagta sikatoy walad sika ya anggad nasumpal so amin a kimey a panaglingkor ed abung nen Jehova. 21 Et wadia ray grupo na saray saserdote+ tan saray Levita+ parad amin a panaglingkor ed abung na tuan Dios. Walad sika iray mabulos tan marunong a komikimey a manggaway amin a klase na panaglingkor,+ pati saray prinsipe+ tan amin a totoo a manumbok ed saray instruksion mo.”