Unonan Samuel

22 Et inkuan nen David: “Saya so abung nen Jehova a tuan Dios, tan saya so altar a pangiyapayan na Israel na saray apay a popoolan.”+

2 Insan ingganggan nen David a tiponen iray dayon manaayam+ ed dalin na Israel, tan ginawa to ran managtabas na bato pian mantabas tan mankurti na saray bato ya usaren ed pangipaalagey na abung na tuan Dios.+ 3 Angiparaan met si David na dakdakel a balatyang pian gawaen a pasak parad kapot na saray puerta tan gawaen a pansigpit, ontan met iray gansa ya agnasimbang ed karakel,+ 4 tan saray troso na sedro+ ya agnabilang, ta amayamay a troso na sedro so inawit ed si David na saray Sidonio+ tan taga Tiro.+ 5 Kanian inkuan nen David: “Si Solomon ya ana’ko et ugaw ni tan anggapo ni eksperiensya to,+ tan say abung ya ipaalagey parad si Jehova et kaukolan a makapadinayew a maong,+ pian say inkabantog tan karakpan+ na satan et naamtaan ed amin a dalin.+ Kanian siak so mangiparaan parad sikato.” Diad ontan et angiparaan si David na dakdakel a materyales antis na impatey to.

6 Ontan met, impatawag toy Solomon ya anak to tan binilin ton mangipaalagey na abung parad si Jehova a Dios na Israel. 7 Oniay inkuan nen David ed anak ton si Solomon: “Pirpirawat na pusok so mangipaalagey na abung parad ngaran nen Jehova a Dios ko.+ 8 Balet oniay mensahe nen Jehova ed siak, ‘Dakdakel so impaagus mon dala, tan akibiang kad angkakabaleg a guerra. Aliwan sikay mangipaalagey na abung parad ngaran ko,+ ta dakdakel so dala ya impaagus mod dalin diad arapan ko. 9 Et nawalaan ka na anak a laki+ a magmaliw a too na kareenan,* tan sikatoy pampainawaen ko manlapud amin a kalaban to ya akapaliber ed sikato,+ ta Solomon*+ so magmaliw a ngaran to tan ikdan ko na kareenan tan kaligenan so Israel diad saray agew to.+ 10 Sikato so mangipaalagey na abung parad ngaran ko.+ Sikatoy magmaliw ya anak ko, tan siak so magmaliw ya ama to.+ Iletneg kon malet so trono to bilang ari ed Israel ya anggad angga.’+

11 “Natan, ana’ko, komon ta si Jehova et walad sika, tan komon ta ontalona ka tan ipaalagey moy abung nen Jehova a Dios mo, unong a sinalita to nipaakar ed sika.+ 12 Balet ikdan ka komon nen Jehova na pakatebek tan pakatalos+ sano iter tod sikay autoridad a manuley ed Israel, pian naunor moy ganggan nen Jehova a Dios mo.+ 13 Diad ontan et ontalona ka no maalwar mon sumpalen iray totontonen+ tan panangukom ya ingganggan nen Jehova ed si Moises ya iter ed Israel.+ Manpakpel tan manpabiskeg ka. Agka natatakot odino nakekebbiew.+ 14 Nansagpot ak a maong pian mangiparaan parad abung nen Jehova na 100,000 talenton* balitok tan 1,000,000 a talenton pilak tan saray gansa tan balatyang+ ya agnasimbang ed karakel, tan angiparaan ak met na saray troso tan saray bato,+ balet aruman mo ni iratan. 15 Dakdakel so komikimey mo—saray managtabas na bato, mason,+ karpentero, tan amin a marurunong ed nanduruman kimey.+ 16 Saray balitok, pilak, gansa, tan balatyang et agnasukat.+ Kiwas ka la tan igapom lay kimey, tan komon ta walad sika si Jehova.”+

17 Insan ingganggan nen David so amin a prinsipe na Israel a tulongan day Solomon ya anak to, a kuan to: 18 “Agta walad sikayo si Jehova a Dios yo, tan impanpainawa to kayo manlapud amin a kalaban yon akapaliber ed sikayo? Ta inyawat tod limak iray manaayam ed kaliberliber a dalin, tan say dalin da et asakop tayo diad arapan nen Jehova tan saray totoo to. 19 Natan, komon ta determinado kayo ed interon puso tan kamarerwa* yo ya anapen si Jehova a Dios yo,+ tan igapo yon ipaalagey so santuaryo nen Jehova a tuan Dios,+ pian say kaban na sipanan nen Jehova tan saray masanton kagawaan na tuan Dios+ et niiyan ed abung ya ipaalagey parad ngaran nen Jehova.”+