ZACARIAS
1 Diad komawalon bulan na komaduan taon nen Dario,+ oniay mensahe nen Jehova a sinmabi ed si propeta Zacarias*+ ya anak nen Berekias ya anak nen Ido: 2 “Sinmanok a maong si Jehova ed saray kaamaan yo.+
3 “Ibagam ed sikara, ‘Oniay inkuan nen Jehova na saray armada: “‘Pawil kayo ed siak,’ so imbaga nen Jehova na saray armada, ‘tan ompawil ak ed sikayo,’+ so inkuan nen Jehova na saray armada.”’
4 “‘Agyo aaligen iray kaamaan yo, ya oniay imbaga na saray inmuunan propeta ed sikara: “Oniay inkuan nen Jehova na saray armada, ‘Ipangasi yo, taynan yo iray* mauges a kabibilay yo tan saray mauges a kagagawa yo.’”’+
“‘Balet ag-ira dinmengel, tan agda ak inimano,’+ so imbaga nen Jehova.
5 “‘Kawalaan la natan na saray kaamaan yo? Nambilay ta na andi-anggaan iray propeta? 6 Balet, agta anengneng na saray kaamaan yo so kasumpalan na saray salitak tan ganggan ko ed saray propeta a lingkor ko?’+ Kanian pinmawil ira ed siak tan inkuan da: ‘Ginawa nen Jehova na saray armada so manepeg ed sikami lapud saray kabibilay tan kagagawa mi, a singa ninonot to lan gawaen.’”+
7 Diad koma-24 ya agew na koma-11 a bulan, salanti, say bulan na Sebat,* diad komaduan taon nen Dario,+ oniay mensahe nen Jehova a sinmabi ed si propeta Zacarias ya anak nen Berekias ya anak nen Ido: 8 “Akanengneng ak na pasingawey diad labi. Walay lakin akalugan ed ambalangan kabayo, tan sikatoy tinmunda ed kawalaan na saray kiew a mirto diad kelas; tan diad benegan to et wala ray kabayon ambalanga, kolor-lati, tan amputi.”
9 Kanian inkuan ko: “Siopa iraya, katawan ko?”
Inmebat imay anghel a mitotongtong ed siak: “Ipanengneng kod sika no siopa iraya.”
10 Insan inkuan na samay laki a tinmunda ed kawalaan na saray kiew a mirto: “Saraya so imbaki nen Jehova pian onliber ed dalin.” 11 Tan oniay inkuan dad samay anghel nen Jehova a tinmunda ed kawalaan na saray kiew a mirto: “Niliber mi lay dalin, tan say interon dalin et mareen tan maligen.”+
12 Kanian oniay inkuan na anghel nen Jehova: “O Jehova na saray armada, anggad kapigan ya agmo kasian so Jerusalem tan saray syudad na Juda,+ a 70 taon mo lan pangipapatnagan na sanok mo?”+
13 Maabig tan makaligliwa iran salita so inyebat nen Jehova ed samay anghel a mitotongtong ed siak. 14 Insan oniay inkuan ed siak na anghel: “Iyeyag mo, ‘Oniay inkuan nen Jehova na saray armada: “Agaylay seseg ko parad Jerusalem tan parad Sion.+ 15 Sinmanok ak a maong ed saray nasyon ya anggapoy kapagaan,+ ta agak sinmanok a maong,+ balet pinaloor da so kadederal.”’+
16 “Kanian oniay inkuan nen Jehova: ‘“Ompawil ak ed Jerusalem a walay panangasi,+ tan nipaalagey ed sikato so abung ko,”+ so imbaga nen Jehova na saray armada, “tan niyunat ed Jerusalem so sakey a lubir a panagsukat.”’+
17 “Eyag ka nin maminsan tan ibagam, ‘Oniay inkuan nen Jehova na saray armada: “Onleppua lamet so kamaongan ed saray syudad ko; tan ligliwaen lamet nen Jehova so Sion+ tan pilien to lamet so Jerusalem.”’”+
18 Insan tinmangwa ak tan akanengneng ak na apatiran saklor.+ 19 Kanian tinepetan ko imay anghel a mitotongtong ed siak: “Anto iraya?” Inyebat to: “Saraya so saklor ya angitayak ed Juda,+ Israel,+ tan Jerusalem.”+
20 Insan impanengneng nen Jehova ed siak so apatiran marunong a komikimey. 21 Intepet ko: “Antoy gawaen na saraya?”
Inkuan to: “Saray saklor so angitayak ed Juda ya anggad anggapo lay anggan sakey a makapangitangway ulo to. Onsabi irayan marunong a komikimey pian taktakoten da iratan, tan deralen da iray saklor na saray nasyon ya angitagey na saklor da sumpad dalin na Juda pian sikatoy itaytayak da.”
2 Tan tinmangwa ak tan anengneng ko so sakey a laki a sankaegnaan toy lubir a panagsukat.+ 2 Kanian intepet ko: “Iner so laen mo?”
Inyebat to: “Sukaten koy Jerusalem pian nanengneng no panoy kalapar tan karukey to.”+
3 Tan pinmaway imay anghel a katongtong ko, tan sikatoy inabet na sananey ya anghel. 4 Insan inkuan tod sikato: “Batik ka diman tan ibagam ed samay kalangweran a laki, ‘“Say Jerusalem et panayaman+ a singa maawang a baryo,* lapud amin a totoo tan ayayep a walad loob to.+ 5 Tan magmaliw ak a singa padir ya apoy ya akapaliber ed sikato,+ tan siak so magmaliw a gloria diad pegley to,”+ so imbaga nen Jehova.’”
6 “Gali! Gali! Taynan yo so dalin ed amianen,”+ so imbaga nen Jehova.
“Ta intaytayak ta kayo ed saray direksion na apatiran dagem na tawen,”+ so imbaga nen Jehova.
7 “Gala, O Sion! Taynan ka, sikan miaayam ed anak a bii na Babilonia.+ 8 Ta oniay inkuan nen Jehova na saray armada ya angibaki ed siak ed saray nasyon a manasamsam ed sikayo+ kayari na inkigloria* to: ‘Siopaman a maniwit ed sikayo et manidiwit ed bukel na matak.+ 9 Ta iyayag ko natan so limak ed sikara, tan magmaliw iran samsam parad saray aripen da.’+ Tan naamtaan yon imbaki ak nen Jehova na saray armada.
10 “Eyag kad liket, O anak a bii na Sion;+ ta onsabi ak,+ tan manayam ak ed kawalaan mo,”+ so imbaga nen Jehova. 11 “Diad satan ya agew et dakel a nasyon so ondapag ed si Jehova,+ tan magmaliw iran totook; tan manayam ak ed kawalaan mo.” Tan naamtaan yon imbaki ak ed sikayo nen Jehova na saray armada. 12 Kayarianen nen Jehova so Juda bilang apag to ed masanton dalin, tan pilien to lamet so Jerusalem.+ 13 Mandeen kayo ed arapan nen Jehova, amin yon laman,* ta sikatoy onkiwas tan onsabi manlapud masanton ayaman to.
3 Tan impanengneng tod siak si Josue+ ya atagey a saserdote ya akaalagey ed arapan na anghel nen Jehova, tan akaalagey si Satanas+ ed nikawanan nen Josue pian sikatoy kontraen to. 2 Insan inkuan na anghel nen Jehova ed si Satanas: “Banoen ka komon nen Jehova, O Satanas,+ on, banoen ka komon nen Jehova ya amili ed Jerusalem!+ Agta sayan too et mandarlang a kiew ya inekal ed apoy?”
3 Natan, si Josue et akasulong na marutak iran kawes tan akaalagey ed arapan na anghel. 4 Inkuan na anghel ed saramay akaalagey ed arapan to, “Lakseb yo ray marutak a kawes to.” Insan inkuan tod sikato, “Inekal ko lay impakalingom,* tan nakawesan kay mararakep a kawes.”*+
5 Kanian inkuan ko: “Mangiyan kayo na malinis a turbante ed ulo to.”+ Tan inyan da ed ulo to so malinis a turbante tan sikatoy kinawesan da; tan akaalagey ed asingger so anghel nen Jehova. 6 Insan oniay imbaga na anghel nen Jehova ed si Josue: 7 “Oniay inkuan nen Jehova na saray armada, ‘No tumboken mo iray dalan ko tan no sumpalen moy obligasyon mod siak, manlingkor ka bilang ukom ed abung ko+ tan mangasikaso* ed saray sular na abung ko; tan abuloyan ta kan makaloob a kaiba na sarayan akaalagey dia.’
8 “‘Ipangasim, dengel ka, O Josue ya Atagey a Saserdote, sika tan saray kaibam ya akayurong ed arapan mo, ta sarayan lalaki et onkana bilang tanda; iparungtal ko so lingkor ko+ a manngaray Simit!+ 9 Nengneng yoy bato ya inyan kod arapan nen Josue! Walay pitoran mata ed sayan bato; tan walay iyukit kod satan,’ so imbaga nen Jehova na saray armada, ‘tan diad sanagew et ekalen koy kasalanan na satan a dalin.’+
10 “‘Diad satan ya agew,’ so imbaga nen Jehova na saray armada, ‘imbitaan na balang sakey ed sikayo so kapara ton too pian onlad silong na sengeg na ubas to tan diad silong na kiew ton igos.’”+
4 Pinmawil imay anghel ya akatongtong ko tan binangon to ak, a singa mamabangon na naugip. 2 Insan inkuan tod siak: “Antoy nanenengneng mo?”
Kanian inkuan ko: “Walay nanenengneng kon puron balitok a kandelero,+ tan walay yaong ed tagey to. Walay pitoran lamparaan ed tapew to,+ on, pitora, tan sarayan akatapew a lamparaan et walaay pitoran tubo. 3 Tan walay duaran kiew ya olibo ed abay na satan,+ sakey ed nikawanan na yaong tan sakey ed nikawigi.”
4 Insan tinepetan ko imay anghel a katongtong ko: “Antoy kabaliksan na saraya, katawan ko?” 5 Kanian tinepetan ak na samay anghel a katongtong ko: “Agmo amtay kabaliksan na saraya?”
Inyebat ko: “Andi, katawan ko.”
6 Insan inkuan tod siak: “Oniay mensahe nen Jehova ed si Zerubabel: ‘“Aliwan diad panamegley na puersa militar, odino pakayari,+ noagta diad panamegley na espirituk,”+ so inkuan nen Jehova na saray armada. 7 Siopa ka, O baleg a palandey? Magmaliw kan plastado a dalin*+ diad arapan nen Zerubabel.+ Tan ipaway to so bato a walad toktok* legan dan iyeeyag: “Agaylay dakep! Agaylay dakep!”’”
8 Onia lamet so mensahe nen Jehova a sinmabi ed siak: 9 “Saray lima nen Zerubabel so angiletneg ed pundasyon na sayan abung,+ tan saray mismon lima to so manumpal ed satan.+ Tan naamtaan yo a si Jehova na saray armada so angibaki ed siak diad sikayo. 10 Ta siopa so nanmudmora ed agew na melag a gapoan?*+ Ta manliket ira tan nanengneng da so patawin* ed lima nen Zerubabel. Sarayan pitora et saray mata nen Jehova ya onnenengneng ed interon dalin.”+
11 Insan sikatoy tinepetan ko: “Antoy kabaliksan na sarayan duaran kiew ya olibo a walad kawanan tan kawigi na kandelero?”+ 12 Sikatoy tinepetan ko lamet: “Antoy kabaliksan na saray sanga* na duaran kiew ya olibo a mangipapaway na balitok a larak ed duaran balitok a tubo?”
13 Kanian intepet tod siak: “Agmo amtay kabaliksan na saraya?”
Inyebat ko: “Andi, katawan ko.”
14 Inkuan to: “Saraya so duaran alanaan ya akaalagey ed abay na Katawan na interon dalin.”+
5 Tinmangwa ak lamet, tan anengneng koy sakey ya ontitikyab a lukot. 2 Intepet tod siak: “Antoy nanenengneng mo?”
Inyebat ko: “Walay nanenengneng kon ontitikyab a lukot, a say karukey to et 20 kasiko* tan say kalapar to et 10 kasiko.”
3 Insan inkuan tod siak: “Saya so ayew ya onkakayat ed interon dalin, lapud amin a mantatakew,+ a singa nisulat ed sakey a pagpag na lukot, et agnadudusa; tan amin a mansasamba,+ a singa nisulat ed biek a pagpag, et agnadudusa. 4 ‘Idapok itan,’ so imbaga nen Jehova na saray armada, ‘tan onloob itan ed abung na matakew tan ed abung na samay mansasamba na tila diad ngaran ko; tan mansiansia itan ed loob na abung to tan deralen to itan pati saray tabla tan bato na satan.’”
5 Insan inmasingger imay anghel a katongtong ko tan inkuan tod siak: “Tangwa ka, ipangasim, tan nengneng mo no antoy ompapaway.”
6 Kanian intepet ko: “Anto ’tan?”
Inyebat to: “Sayan ompapaway et efa a kargaan.”* Intuloy to ni: “Oniay piparaan na saramay mauges diad interon dalin.” 7 Tan anengneng kon tinmagey so malimpek a sakob ya ismay, tan walay biin akayurong ed loob na kargaan. 8 Kanian inkuan to: “Irerepresenta na sayan bii so kaugsan.” Tan intulak to so bii ed dalem na efa a kargaan, tan inyan to so ambelat a sakob ya ismay ed sangab na satan.
9 Insan tinmangwa ak tan anengneng kon onaasingger so duaran bibii, tan ontitikyab ira ed dagem. Walay payak da a singa saray payak na dulakak. Tan intagey da so kargaan diad baetan na dalin tan tawen. 10 Kanian tinepetan ko imay anghel a katongtong ko: “Iner so pangiyakaran da ed efa a kargaan?”
11 Inyebat tod siak: “Diad dalin na Sinar,*+ ta ipaalageyan da na abung to diman; tan no asumpal la itan, sikatoy iyan ditan diad manepeg a pasen to.”
6 Insan tinmangwa ak lamet tan anengneng ko so apatiran karwahe ya ompapaway ed baetan na duaran palandey, tan saray palandey et gansa. 2 Say unonan karwahe et guguyoren na saray ambalangan kabayo, tan say komaduan karwahe et guguyoren na saray andeket a kabayo.+ 3 Say komatlon karwahe et guguyoren na saray amputin kabayo, tan say komapat a karwahe et guguyoren na saray batekan tan nandurumay kolor a kabayo.+
4 Tinepetan ko imay anghel a katongtong ko: “Anto iraya, katawan ko?”
5 Inyebat na anghel ed siak: “Saraya so apatiran espiritu+ ed katawenan ya ompapaway kayari ran inmarap ed Katawan na interon dalin.+ 6 Samay* guguyoren na saray andeket a kabayo et onaarap ed dalin ed amianen;+ saramay amputi et onaarap ed dalin a walad lampas na dayat; saramay batekan et onaarap ed dalin ed abalaten. 7 Tan saramay walaay nanduruman kolor et manpirawat lan onla pian liberen day dalin.” Insan inkuan to: “La kayo, liber yoy dalin.” Tan linma ran nanliber ed dalin.
8 Insan imbaga ton maksil ed siak: “Nengneng mo, kinmepa so espiritu nen Jehova diad dalin ed amianen lapud saramay kabayon linma diman.”
9 Oniay mensahe lamet nen Jehova a sinmabi ed siak: 10 “Alam ed si Heldai, Tobia, tan Jedaias iray inala ra ed saray totoon nibantak ed arum a dalin; tan diad satan met ya agew et la kad abung nen Josias ya anak nen Sofonias, a kaibam irayan lalaki a nanlapud Babilonia. 11 Mangala kay pilak tan balitok tan manggawa kay korona* tan iyan mod ulo nen Josue+ ya anak nen Jehozadak, say atagey a saserdote. 12 Tan ibagam ed sikato,
“‘Oniay inkuan nen Jehova na saray armada: “Nia so lakin manngaray Simit.+ Sikatoy onsimit ed mismon kawalaan to, tan ipaalagey to so templo nen Jehova.+ 13 Sikato so mangipaalagey ed templo nen Jehova, tan sikato so mangawat na kagalangan. Sikatoy onyurong diad trono to tan manuley, tan magmaliw met a saserdote ed trono to,+ tan niwalay mareen a pantunosan ed sayan dua.* 14 Tan samay korona* et onkanan pakanodnonotan* ed si Helem, Tobia, Jedaias,+ tan si Hen ya anak nen Sofonias, diad templo nen Jehova. 15 Tan onsabi iramay walad arawi tan mibiang ira ed pangipaalagey ed templo nen Jehova.” Tan naamtaan yon imbaki ak ed sikayo nen Jehova na saray armada. Tan nagawa itan—no naynay yon dengelen so boses nen Jehova a Dios yo.’”
7 Tan diad komapat a taon nen Arin Dario et sinmabi so mensahe nen Jehova ed si Zacarias,+ diad komapat ya agew na komasiam a bulan, say bulan na Kislev.* 2 Imbaki na saray taga Bethel si Sarezer tan Regem-melec tan saray totoo to pian kerewen so panangasi* nen Jehova, 3 ya oniay ibaga ra ed saray saserdoten walad abung* nen Jehova na saray armada, tan ed saray propeta: “Kaukolan ko kasi onakis ed komaliman bulan+ tan agnepeg a mangan, a singa ginawak ed dakel a taon?”
4 Onia lamet so mensahe nen Jehova na saray armada a sinmabi ed siak: 5 “Ibagam ed amin a totoo diad sayan dalin tan ed saray saserdote, ‘Nen manaayunal tan onaakis kayo ed kada komalima tan komapiton bulan,+ ed loob na 70 taon,+ talaga ta’n nanayunal kayo parad siak? 6 Tan no mamangan tan oniinum kayo, agta gagawaen yo labat itan parad sarili yo? 7 Agta nepeg yon unoren iray imbaga nen Jehova ya impaibaga tod saray inmuunan propeta,+ nen panaayaman ni tan maligen ni so Jerusalem tan saray syudad ed kaliberliber to, tan panaayaman ni so Negeb tan Sefela?’”
8 Oniay mensahe lamet nen Jehova a sinmabi ed si Zacarias: 9 “Oniay inkuan nen Jehova na saray armada, ‘Mangukom kayo diad tuan inkahustisya,+ tan ipatnag yo ed balang sakey so matoor a panangaro+ tan panangasi. 10 Agyo sasaolen so abalon bii odino say ugaw ya ulilad ama,*+ say dayo+ odino say mairap-bilay;+ tan agkayo manplaplano ed puso yo na panggaway mauges ed balang sakey.’+ 11 Balet agda labay so mangimano,+ tan diad inkabenger da et binmeneg ira,+ tan pinepetan day layag da.+ 12 Pinaawet dan singa diamante*+ so puso ra tan agda unoren so ganggan* tan saray salita ya impasabi nen Jehova na saray armada ed panamegley na espiritu to tan saray inmuunan propeta.+ Kanian sinmanok a maong si Jehova na saray armada.”+
13 “‘No panon ya ag-ira dinmengel sanen tinmawag ak,*+ agak met dinmengel sanen tinmawag ira,’+ so inkuan nen Jehova na saray armada. 14 ‘Tan diad panamegley na bagyo et intaytayak ko ra diad amin a nasyon ya agda amta,+ tan agla napanayaman so dalin ya ataynanan da, ya anggapoy anggan siopa ya ondadalan tan ompapawil ditan;+ ta ginawa ran pakataktakotan so marakdakep a dalin.’”
8 Sinmabi lamet so mensahe nen Jehova na saray armada: 2 “Oniay inkuan nen Jehova na saray armada, ‘Magmaliw ak a maseseg a maong parad Sion,+ tan diad baleg a sanok et magmaliw ak a maseseg parad sikato.’”
3 “Oniay inkuan nen Jehova, ‘Ompawil ak ed Sion+ tan manayam ak ed Jerusalem;+ tan say Jerusalem et tawagen a syudad na katuaan,*+ tan say palandey nen Jehova na saray armada et tawagen a masanton palandey.’”+
4 “Oniay inkuan nen Jehova na saray armada, ‘Onyurong lamet ed saray plaza na Jerusalem iray mamasiken tan akukulaw, balang sakey et sankaegnaan toy baston to lapud inkatatken to.*+ 5 Tan saray plaza na syudad et napanoy manggagalaw ya ugugaw.’”+
6 “Oniay inkuan nen Jehova na saray armada, ‘Anggaman diad saraman ya agew et singa imposible itan parad saray akera ed sarayan totoo, kasin imposible met itan ed siak?’ so imbaga nen Jehova na saray armada.”
7 “Oniay inkuan nen Jehova na saray armada, ‘Iliktar ko ray totook ed saray dalin ed bukig tan sagur.*+ 8 Tan awiten ko ra, tan manayam ira ed Jerusalem;+ tan magmaliw iran totook, tan siak so magmaliw a Dios da+ diad katuaan* tan inkatunong.’”
9 “Oniay inkuan nen Jehova na saray armada, ‘Pabiskeg yo iray lima yo,*+ sikayo a makakarengel natan ed sarayan salita a nanlapud saray propeta,+ saray salitan nibaga la diad agew ya inletneg so pundasyon na abung nen Jehova na saray armada pian ipaalagey so templo. 10 Ta antis na saman a panaon et agnauupaan so too odino ayep;+ tan mapeligroy ompaway tan onloob lapud saray kalaban, ta panlalabanen ko so amin a totoo.’
11 “‘Balet natan et agko la pidenengan iray akera ed sarayan totoo a singa nensaman,’+ so imbaga nen Jehova na saray armada. 12 ‘Ta itanem da so bini na kareenan; manbunga so kaubasan, tan iter na dalin so bunga to,+ tan iter na tawen so linaew to; tan amin iraya et ipatawir kod saray akera ed sarayan totoo.+ 13 Tan lapud nagmaliw kayon sakey ya ayew ed saray nasyon,+ O sankaabungan na Juda tan sankaabungan na Israel, iliktar ta kayo, tan magmaliw kayon sakey a bendisyon.+ Agkayo natatakot!+ Pabiskeg yo iray lima yo.’*+
14 “Ta oniay inkuan nen Jehova na saray armada, ‘“No panon a nandesisyon ak ya idapo so kadederal ed sikayo lapud pinasanok ak na saray inmuunan atateng yo,” so inkuan nen Jehova na saray armada, “tan agko itan nagbabawian,+ 15 nandesisyon ak met natan a manggaway maabig ed Jerusalem tan ed sankaabungan na Juda.+ Agkayo natatakot!”’+
16 “‘Saraya so nepeg yon gawaen: Mansalita kayoy tua ed balang sakey,+ tan saray panangukom yo diad saray puerta na syudad yo et nepeg a mangipatnag na katuaan tan kareenan.+ 17 Agyo plaplanoen ed puso yo so pamasakit ed balang sakey,+ tan agyo aaroen so palson samba;+ ta kabusol ko irayan amin a bengatla,’+ so imbaga nen Jehova.”
18 Sinmabi lamet ed siak so mensahe nen Jehova na saray armada: 19 “Oniay inkuan nen Jehova na saray armada, ‘Say panag-ayunal ed komapat a bulan,+ ed komaliman bulan,+ ed komapiton bulan,+ tan ed komasamplon bulan+ et magmaliw a maliket tan magayaga iran okasyon parad sankaabungan na Juda—saray piesta na panliliket.+ Kanian aro yoy katuaan tan kareenan.’
20 “Oniay inkuan nen Jehova na saray armada, ‘Onsabi iray totoo tan saray manaayam ed dakel a syudad; 21 tan saray manaayam ed sakey a syudad et onlad saramay walad sananey a syudad, ya ikuan da: “Pampelengan tayoy onla pian kerewen so panangasi* nen Jehova tan anapen tayoy Jehova na saray armada. Onla kami met.”+ 22 Tan onlad Jerusalem so dakel a totoo tan saray mabibiskeg a nasyon pian anapen day Jehova na saray armada+ tan kerewen day panangasi* nen Jehova.’
23 “Oniay inkuan nen Jehova na saray armada, ‘Diad saraman ya agew, samploran lalaki a nanlapud amin a lenguahe na saray nasyon+ et ombemben, on, ombemben a malet ed andukey a kawes* na sakey a Judio,* ya ikuan dan: “Mila kami ed sikayo,+ ta nadngelan min say Dios et walad sikayo.”’”+
9 Sakey ya inyabawag a mensahe:
“Say mensahe nen Jehova et sumpad dalin na Hadrac,
Tan say Damasco so puntirya* na satan+
—Ta iimanoen nen Jehova so katooan+
Tan amin a tribu na Israel—
2 Tan sumpad Hamat+ a walad saray ketegan to,
3 Angipaalagey so Tiro na padir a pinagkadepensa* to,
Sikatoy nantipon na pilak a singa karakel na dabok,
Tan balitok a singa saray dutak ed karsada.+
5 Nanengneng itan na Askelon tan sikatoy ontakot;
Nagonigon a maong so Gaza,
Pati say Ekron, lapud nabaingan so paniilaloan to.
Naandi so ari ed Gaza,
Tan agnapanayaman so Askelon.+
7 Ekalen kod sangi to iray adalaan a bengatla
Tan ekalen kod ngipen to iray makapadimlan bengatla,
Tan sikato so natilak parad Dios tayo;
Tan sikatoy magmaliw a singa shik* ed Juda,+
Tan say Ekron et singa say Jebuseo.+
8 Mankampo ak a singa guardia* ed abung ko,+
Pian anggapoy siopaman a makaloob tan makapaway;
Tan anggapo lay makadalan a managganggan,*+
Ta natan et anengneng kon mismo itan.*
9 Manliket kan maong, O anak a bii na Sion.
Iyeyag moy pananalom, O anak a bii na Jerusalem.
Onsabi ed sika so arim.+
10 Ekalen kod Efraim iray karwahen pan-guerra
Tan saray kabayo ed Jerusalem.
Naputerputer iray pana a parad guerra.
Tan iyabawag toy kareenan ed saray nasyon;+
Say pananguley to et manlapud sakey a dayat ya anggad sananey a dayat
11 Balet sika, O bii, diad panamegley na dala na impisipanan mo,
Ibulos ko iray imprisom ed abot ya anggapoy danum.+
12 Pawil kayo ed salimbengan, sikayo ran priso a walaay ilalo.+
Ibagak ed sika natan,
‘O bii, doblin bendisyon so awaten mod siak.+
13 Ta pinaten* koy Juda bilang say panak.
Ibalak so Efraim,*
Tan bangonen ko iray ananak mo, O Sion,
Pian onlaban ed saray ananak mo, O Gresya,
Tan gawaen ta kan singa espada na sakey a sundalo.’
14 Si Jehova et nanengneng a kaiba ra,
Tan ompaway a singa kirmat so pana to.
Paknolen na Soberanon Katawan a Jehova so tambuyog,+
Tan sikatoy onabante a kaiba na saray maksil a dagem na abalaten.
15 Idepensa ira nen Jehova na saray armada,
Tan akmonen da tan daegen da iray baton ibabala ed palsot.+
Oninum ira tan magmaliw iran maingal a singa ra akainum na alak;
Tan napano ra a singa yaong,
Singa saray suyok na altar.+
16 Diad satan ya agew et iliktar ira nen Jehova a Dios da,
A singa pangiliktar na pastol ed saray karnero to;+
Ta onkidyam ira diad dalin to a singa saray ankablin bato ed korona.+
17 Ta agaylay kabaleg na kamaongan to,+
Tan agaylay kabaleg na gloria to!
Ombiskeg iray kalangweran a lalaki lapud ilik,
Tan saray mamarikit lapud balon alak.”+
10 “Kerew kayod si Jehova na uran diad panaon na unor la ran uran.
Si Jehova so manggagawa na saray lurem na bagyo,
Say mangipepelag na uran parad saray totoo,+
Tan mangiiter na saray tanaman ed uma parad amin.
2 Ta saray estatua a terafim* et nansalita na panamalikdo;*
Tan saray managparles et akanengneng na tilan pasingawey.
Anggapoy kakanaan a kugkugip so ibabaga ra,
Tan anggapoy gunggona na impanligliwa ra.
Kanian nanakar-akar labat ira a singa karnero.
Manirap ira lapud anggapoy managpastol.
3 Dinmalang so sanok kod saray managpastol,
Tan mikuentaan ak ed saray lider a managpairap;*
Ta inimano nen Jehova na saray armada so pulok to,+ say sankaabungan na Juda,
Tan impagmaliw to ran singa say makapadinayew a kabayo to ed guerra.
4 Sikato so panlapuan na manunaan a too,*
Sikato so panlapuan na ontulong a manuley,*
Sikato so panlapuan na pana parad guerra;
Sikato so panlapuan na kada manangasikaso,* amin da.
5 Tan magmaliw iran singa saray sundalo,
Ya onggagatin ed pitek ed saray karsada sano guerra.
6 Gawaen kon mas mabiskeg so sankaabungan na Juda,
Tan iliktar koy sankaabungan nen Jose.+
Ipawil ko ra,
Ta kasian ko ra;+
Tan magmaliw a singa agko ran balot impulisay;+
Ta siak si Jehova a Dios da, tan ebatan ko ra.
7 Saramay walad Efraim et magmaliw a singa mabiskeg a sundalo,
Tan manliket so kapusoan da a singa ra inminum na alak.+
Nanengneng iya na ananak da tan manggayaga ra;
Say kapusoan da et manliket ed si Jehova.+
8 ‘Paswitan ko ra tan tiponen ko ra;
Ta dondonen ko ra,+ tan ondakel ira,
Tan mantultuloy iran ondakel.
9 Anggaman itayak ko ran singa bini ed kawalaan na totoo,
Nanonotan da ak diad ararawin pasen;
Ombiskeg tan ompawil ira a kaiba iray ananak da.
10 Ipawil ko ra manlapud dalin na Ehipto;
Tan alaen ko rad Asirya tan tiponen ko ra;+
Iyakar ko rad dalin na Gilead+ tan Lebanon,
Tan anggapo lay magenap a pasen parad sikara.+
11 Ondalan ak ed dayat pian guloen itan;
Tan pareenen ko iray daluyon na dayat;+
Namagaan so interon kaaralman na Nilo.
Nipaabeba so ipapasirayew na Asirya,
Tan naandi so setro na Ehipto.+
12 Siak, si Jehova, et gawaen ko ran mas mabiskeg,+
Tan manbilay ira ed paraan a mangigloria ed ngaran ko,’+ so imbaga nen Jehova.”
11 “Lukasan mo iray puertam, O Lebanon,
Pian upoten na apoy iray kiew mon sedro.
2 Ugaog ka, sikan kiew ya enebro, ta atumba la so kiew a sedro;
Aderal la iray sankaabigan a kiew!
Ugaog kayo, sikayo ran kiew a roble* ed Basan,
Ta nagba la so makapal a katakelan!
3 Dengel yo! Manugaog iray managpastol,
Ta naandi lay kagalangan da.
Dengel yo! Managlem iray malangwer a leon,*
Ta aderal lay makapal a kakiewan ed Jordan.
4 “Oniay inkuan nen Jehova a Dios ko, ‘Pastolan mo so pulok a niganan pateyen,+ 5 a papateyen na saramay mangasaliw ed sikara+ balet anggapoy ebatan dan kasalanan. Tan ibabaga na saramay mangilalako ed sikara,+ “Narayew komon si Jehova, ta onyaman ak.” Tan ag-ira kasian na saray managpastol da.’+
6 “‘Ta agko la kasian iray manaayam ed sayan dalin,’ so imbaga nen Jehova. ‘Kanian iyawat ko so kada too ed lima na kapara ton too tan ed ari to; tan buybuyaken da iyan dalin, tan agko ra iliktar ed lima ra.’”
7 Tan pinastolan koy pulok a niganan pateyen,+ parad sikayo, O sikayo ran napapairap a kabiangan na pulok. Kanian angala ak na duaran baston, tan say sakey et tinawag kon Inkarakep, tan samay sakey et tinawag kon Pankakasakey,+ tan pinastolan koy pulok. 8 Tan diad loob na sakey bulan et inekal ko so taloran managpastol, ta agak la* makaanos ed sikara, kanian binusol da ak.* 9 Tan inkuan ko: “Agta kayo la pastolan. Ompatey lay nepeg ya ompatey, tan naandi lay nepeg a naandi. Tan saramay atilak et paulyanan la ran manuupotan na laman.” 10 Kanian inalak imay baston kon tinawag ya Inkarakep+ tan pinuter ko, pian deralen koy impisipanan ko ed saray totook. 11 Kanian aderal itan ed saman ya agew, tan amta na saramay napapairap a kabiangay pulok a makakanengneng ed siak a salita iya nen Jehova.
12 Insan inkuan kod sikara: “No labay yo, iter yod siak so upak; balet no andi, agyo la iiter.” Tan inter* da so upak, 30 piraso na pilak.+
13 Insan inkuan nen Jehova ed siak: “Iyan mo itan ed pasen a pangiinay kayamanan—say balbaleg a kantidad na impangikuenta ra ed siak.”+ Kanian inalak so 30 piraso na pilak tan inyan kod pasen a pangiinay kayamanan diad abung nen Jehova.+
14 Insan pinuter ko imay sakey nin baston ko, samay tinawag a Pankakasakey,+ pian naderal so impanaagi na Juda tan Israel.+
15 Tan inkuan nen Jehova ed siak: “Alam natan so kagawaan na anggapoy kanan managpastol.+ 16 Ta manuro ak na managpastol diad dalin. Agto asikasoen iray karneron ompapatey;+ agto anapen iray kilaw, agto tambalen iray karneron apiley,+ tan agto pakanen iray makaalagey ni. Noagta, kanen toy laman na samay mataba+ tan bagoten to iray kuko na karnero.+
17 Pakaskasi la iyan anggapoy kakanaan a managpastol ko,+ a mamapaulyan ed pulok!+
Sugaten na espada so taklay to tan kawanan a mata to.
Onkapuy a maong so taklay to,
Tan nabulag* so kawanan a mata to.”
12 Sakey ya inyabawag a mensahe:
“Saya so mensahe nen Jehova nipaakar ed Israel,” so imbaga nen Jehova,
Say anginatnat ed tawen,+
Say angiletneg ed pundasyon na dalin,+
Tan say amorma ed espiritu* a walad too.
2 “Say Jerusalem et pagmaliwen kon kopa* a sengegay pantugingging na amin a totoo ed kaliberliber; tan nasakop so Juda tan Jerusalem.+ 3 Diad satan ya agew, say Jerusalem et pagmaliwen kon ambelat* a bato ed amin a totoo. Narisgo so amin a mangalsa ed satan;+ tan mantitipon ya onlaban ed sikato so amin a nasyon ed dalin.+ 4 Diad satan ya agew,” so imbaga nen Jehova, “taktakoten ko so amin a kabayo tan gawaen kon ambagel iray akalugan. Bantayan koy sankaabungan na Juda, balet bulagen koy amin a kabayo na saray totoo. 5 Tan ibaga na saray shik* na Juda ed sarili da, ‘Saray manaayam ed Jerusalem so biskeg tayo lapud si Jehova na saray armada a Dios da.’+ 6 Diad satan ya agew, saray shik na Juda et pagmaliwen kon singa apoy ed kakiewan tan singa mandarlang a silew ed dasig na kapampalot a pagey,+ tan upoten da so amin a totoon walad kaliberliber diad nikawanan tan nikawigi;+ tan napanayaman lamet so Jerusalem diad pasen to,* diad Jerusalem.+
7 “Tan iliktar nin unona nen Jehova iray tolda na Juda, pian say karakpan* na sankaabungan nen David tan say karakpan* na saray manaayam ed Jerusalem et agmagmaliw a mas baleg nen say Juda. 8 Diad satan ya agew et si Jehova so magmaliw a salimbeng ed paliber na saray manaayam ed Jerusalem;+ diad satan ya agew et magmaliw a mabiskeg a singa si David imay natutumba* ed sikara, tan magmaliw a makapanyarin singa Dios so sankaabungan nen David, singa say anghel nen Jehova a walad unaan da.+ 9 Tan diad satan ya agew et seguroen kon deralen so amin a nasyon ya onlaban ed Jerusalem.+
10 “Ikalbok ed sankaabungan nen David tan ed saray manaayam ed Jerusalem so espiritu na panangabobon tan pikakasi, tan onnengneng ira ed samay dinuyok da,+ tan manugaog ira lapud sikato a singa panugaog ed alenleneg ya anak; tan manermen iran maong lapud sikato a singa panermen ed panguloan ya anak. 11 Diad satan ya agew et walay pinasyan panugaog diad Jerusalem, a singa say impanugaog ed Hadadrimon diad Patar na Megido.+ 12 Tan manugaog so dalin, a nambibiigan a manugaog so kada pamilya; say pamilya ed sankaabungan nen David, tan saray bibii ed sikara; say pamilya ed sankaabungan nen Natan,+ tan saray bibii ed sikara; 13 say pamilya ed sankaabungan nen Levi,+ tan saray bibii ed sikara; say pamilya na saray Simeita,+ tan saray bibii ed sikara. 14 Nambibiigan a manugaog so amin ya akeran pamilya, pati saray bibii ed sikara.
13 “Diad satan ya agew et nalukasan so sakey a bobon parad sankaabungan nen David tan parad saray manaayam ed Jerusalem pian nalinisan so kasalanan da tan say inkarutak da.+
2 “Diad satan ya agew,” so imbaga nen Jehova na saray armada, “buralen koy kangaranan na saray idolo diad sayan dalin,+ tan agla ra nanonotan; tan paandien kod sayan dalin iray propeta+ tan say espiritu na karutakan. 3 Tan no manpropesiya lamet so sakey a too, ibaga ed sikato na ama tan ina to a nanilalak ed sikato, ‘Agka nepeg a manbilay, ta nansalita ka na katilaan ed ngaran nen Jehova.’ Tan lapud pampropropesiya to, sikatoy duyoken na ama tan ina to a nanilalak ed sikato.+
4 “Diad satan ya agew et nabaingan so kada propeta lapud pasingawey to sano manpropropesiya; tan agla ra mansulong na gawad bago a kawes parad propeta+ pian mangibalang ira. 5 Tan ibaga na kada sakey ed sikara, ‘Aliwa ak a propeta. Managdalus ak ed uma, lapud sinaliw ak na sakey a too nen ugaw ak ni.’ 6 Tan no walay mantepet ed sikato, ‘Anto irayan sugat a walad nanleetan na saray takeb mo?’* iyebat to, ‘Asugat-sugat ak diad abung na kakaarok.’”*
7 “O espada, liing ka sumpad managpastol ko,+
Sumpad laki a kaibak,” so imbaga nen Jehova na saray armada.
“Patey mo so managpastol,+ tan paulyan mon nitaytayak so pulok;*+
Tan ipanengneng koy pabor ko ed saramay angkekelag.”
8 “Tan diad interon dalin,” so imbaga nen Jehova,
“Naderal tan naandi* so duaran kakatlo na satan;
Tan kakatlo so natilak ditan.
9 Tan idalan kod apoy so kakatlo;
Tan linisan ko ra a singa panaglinis ed pilak,
Tan surien ko ra a singa panagsuri ed balitok.+
Ontawag irad siak ed ngaran ko,
Tan ebatan ko ra.
Ibagak, ‘Sikara so totook,’+
Tan ibaga ra, ‘Si Jehova so Dios mi.’”
14 “Onsabi so agew, sakey ya agew a parad si Jehova, sano apag-apagen ed arapan mo iray asamsam ed sika.* 2 Tiponen koy amin a nasyon pian miguerra ed Jerusalem; tan nasakop so syudad tan nasamsaman iray kaabungan tan puersaan dan akdolan iray bibii. Tan nibantak ed arum a pasen so kapaldua ed saray manaayam ed syudad, balet mansiansia ed syudad iray akeran totoo.
3 “Ompaway si Jehova tan miguerra ed saraman a nasyon+ a singa impiguerra tod saray kalaban to nensaman.+ 4 Diad satan ya agew et sikatoy onalagey diad Palandey na Saray Olibo,+ a satan et akaarap ed Jerusalem diad bandad bukig; tan napaldua so Palandey na Saray Olibo, manlapud bukig* ya anggad sagur,* kanian walay naporman maawa-awang a lawak; tan niyalis diad bandad amianen so kapaldua na palandey, tan say kapaldua et diad bandad abalaten. 5 Ombatik kayo ed lawak a walad baetan na saray palandey ko, lapud onsabi ya anggad Azel so lawak a walad baetan na saray palandey. Ombatik kayo, a singa imbatik yo lapud yegyeg ya agawa ed panaon nen Arin Uzias na Juda.+ Tan onsabi si Jehova a Dios ko, tan kaiba to so amin a masanto.+
6 “Diad satan ya agew et anggapo so masnag a liwawa+—onkigtel* iray bengatla. 7 Tan magmaliw itan a nikadkaduman agew a kabkabat bilang say agew nen Jehova.+ Aliwa itan ya agew odino labi; tan maliwawa ni anggano labi la. 8 Diad satan ya agew et onagus manlapud Jerusalem iray danum a mabilay,+ a say kapaldua et mamaarap ed dayat ed bukig*+ tan say kapaldua et mamaarap ed dayat ed sagur.*+ Nagawa itan ed panaoy tiagew tan panaoy ambetel. 9 Tan si Jehova so magmaliw ya Ari ed interon dalin.+ Diad satan ya agew, si Jehova labat so bidbiren na amin,+ tan say ngaran to et saksakey.+
10 “Satan ya interon dalin et magmaliw a singa say Araba,+ manlapud Geba+ ya anggad Rimon+ diad bandad abalaten na Jerusalem; tan sikatoy onalagey ed pasen to tan sikatoy panayaman,+ manlapud Puerta na Benjamin+ ya anggad kawalaan na Unonan Puerta, ya anggad Suyok a Puerta, tan manlapud Tori nen Hananel+ ya anggad saray panagpespesay ubas* a kien na ari. 11 Tan manayam ed sikato iray totoo; tan anggapo lay nisamba parad kadederal,+ tan maligen lan panayaman so Jerusalem.+
12 “Tan saya so salot ya idapo nen Jehova ed amin a totoo a miguerra ed Jerusalem:+ Nabulok so laman da legan ya akaalagey ni ra, nabulok iray mata ra diad abot a kawalaan na saratan, tan nabulok so dila ra diad sangi ra.
13 “Diad satan ya agew et dakdakel ed sikara so wetweten nen Jehova; tan singkaten na balang sakey so kaulop to, tan manlalaban ira tan atakien day sakey tan sakey.+ 14 Miguerra met so Juda diad Jerusalem; tan natipon so kayamanan na amin a nasyon ed kaliberliber, saray dakerakel a balitok tan pilak tan saray kawes.+
15 “Tan mipadparan salot so ondapo ed saray kabayo, mula,* kamelyo, asno, tan ed amin ya ayayep a walad saraman a kampo.
16 “Amin ya akera ed amin a nasyon ya onlaban ed Jerusalem et tinaon ya onla pian ondakmomo*+ ed Ari, si Jehova na saray armada,+ tan selebraan day Piesta na Saray Alolong.*+ 17 Balet no walay siopaman ed saray pamilya ed dalin ya ag-onlad Jerusalem pian ondakmomo ed Ari, si Jehova na saray armada, anggapoy uran ya ompelag ed sikara.+ 18 Tan no say pamilya na Ehipto et ag-onla tan ag-onloob, anggapoy uran ya ompelag ed sikara. Imbes, onsabi ed sikara so salot ya idadapo nen Jehova ed saray nasyon ya ag-oonla pian manselebray Piesta na Saray Alolong. 19 Saya so dusa parad kasalanan na Ehipto tan ed kasalanan na amin a nasyon ya ag-oonla pian selebraan so Piesta na Saray Alolong.
20 “Diad satan ya agew et nisulat ed saray kampanilya na saray kabayo iray salitan ‘Si Jehova so masanto!’+ Tan saray banga*+ diad abung nen Jehova et magmaliw a singa saray yaong+ ed arap na altar. 21 Tan amin a banga* a walad Jerusalem tan Juda et magmaliw a masanto tan kayarian nen Jehova na saray armada, tan onloob so amin a manbabagat tan usaren dan panlambongan so arum ed saratan. Diad satan ya agew et anggapo lay Canaanita* ed abung nen Jehova na saray armada.”+
Kabaliksan toy “Anonotan nen Jehova.”
Odino “pawil kayo manlapud.”
Nengnengen so Apendise B15.
Andian na akapaliber a padir.
Literal, “kayari na gloria.”
Odino “katooan.”
Odino “kasalanan mo.”
Odino “opisyal a kawes.”
Odino “walaay pakauley; guardia.”
Odino “patar.”
Odino “baton akatapew.”
Odino “melag iran bengatla?”
Literal, “bato, lata.” Sayan instrumento ya akabitin ed lubir et uusaren pian naseguron maptek so kipaalagey na sakey a bengatla.
Saray sanga a napnoy bunga.
Say sakey a kasiko et 44.5 sentimetro (17.5 pulgada). Nengnengen so Apendise B14.
Literal, “say efa,” say tutukoyen dia et sakey a kargaan odino baskit ya uusaren pian nasukat so sakey ya efa. Say sakey ya efa et 22 litro. Nengnengen so Apendise B14.
Say Babilonia.
Say karwahe.
Odino “marakdakep a korona.”
Saray betang to bilang manuley tan saserdote.
Odino “marakdakep a korona.”
Odino “panonot.”
Nengnengen so Apendise B15.
Odino “palemeken so lupa.”
Odino “templo.”
Odino “say ulila.”
Odino posiblin, “anaw-awet a bato,” a singa say baton emery.
Odino “bilin.”
Literal, “sikatoy tinmawag.”
Odino “inkamatoor.”
Literal, “lapud karakel na saray agew.”
Odino “ed dalin a bubutayan na agew tan ed dalin a seselekan na agew.”
Odino “inkamatoor.”
Odino “Manpakpel kayo.”
Odino “Manpakpel kayo.”
Odino “palemeken so lupa.”
Odino “palemeken day lupa.”
Odino “saloy na kawes.”
Literal, “Judion laki.”
Literal, “so pasen a pampainawaan.”
Odino “panag-amotan.”
Say shik et sakey a pangulo na tribu.
Odino “akapueston sundalo.”
Odino “managpairap.”
Mapatnag a say paniirap na totoo to.
Odino “tan mananalo; tan angilaban.”
Odino “sakey a kalakian ya asno.”
Say Eufrates.
Literal, “gatinan.”
Singa sakey a pana.
Odino “saray dirios ed abung; saray idolo.”
Odino “misteryoso; nipaakar ed mahiko.”
Literal, “saray kalakian a kanding.”
Literal, “tori ed suyok,” a mangililitrato ed importantin too; sakey a pangulo.
Literal, “palpal,” mangililitrato ed sakey ya ontutulong; sakey a manuley.
Odino “managganggan.”
Sakey iyan klase na angkabaleg a kiew. Diad Ingles et oak.
Odino “iray mabiskeg tan malangwer a leon.”
Odino “say kamarerwak et agla.”
Odino “binusol ak na kamarerwa ra.”
Literal, “sinimbang.”
Literal, “onkuyep.”
Odino “linawa.”
Odino “yaong.”
Odino “makapabelat.”
Say shik et sakey a pangulo na tribu.
Odino “diad manepeg a pasen to.”
Odino “karlangan.”
Odino “karlangan.”
Odino “sankakapuyan.”
Literal, “nanleetan na saray limam?” Salanti, diad pagew odino diad beneg.
Odino “na saray mangaaro ed siak.”
Odino “iray karnero.”
Odino “ompatey.”
Say syudad ya atukoy ed bersikulo 2.
Odino “bubutayan na agew.”
Literal, “dayat.”
Odino “agmakagalaw,” a singa inmawet ed betel.
Say Inatey a Dayat.
Say Dayat a Mediteraneo.
Odino “saray pananginan na apespes ya ubas.”
Say Hebreon salita et manutukoy ed nanlaok a poli na asno tan kabayo.
Odino “mandayew.”
Odino “Saray Temporaryon Siroman.”
Odino “saray banga a baleg so sangab da.”
Odino “banga a baleg so sangab to.”
Odino posiblin, “negosyante.”