MALAQUIAS

1 Sakey ya inyabawag a mensahe:

Saya so mensahe nen Jehova ed Israel diad panamegley nen Malaquias:*

2 “Impanengneng koy panangarok ed sikayo,”+ so inkuan nen Jehova.

Balet inkuan yo: “Panoy impangarom ed sikami?”

“Agta agi nen Jacob si Esau?”+ so imbaga nen Jehova. “Balet inarok si Jacob, 3 tan binusol koy Esau;+ tan impagmaliw kon agnapanayaman iray kapalandeyan to+ tan inter koy tawir to ed saray ason jakal ed kalawakan.”+

4 “Anggaman ibabaga na Edom, ‘Aderalderal kami, balet ompawil kami tan ipaalagey mi iray ageraygeray a pasen,’ oniay inkuan nen Jehova na saray armada, ‘Mangipaalagey ira, balet igebak, tan natawag iran “say teritorya na kaugsan” tan “saray totoo a kinondena nen Jehova ed andi-anggaan.”+ 5 Nanengneng yon mismo itan, tan ibaga yo: “Nitandoro komon si Jehova ed teritorya na Israel.”’”

6 “‘Papagalangan na anak so ama to,+ tan papagalangan na aripen so katawan to. Kanian no sakey ak ya ama,+ kawalaay galang a manepeg ed siak?+ Tan no sakey ak a katawan,* kawalaay takot* a manepeg ed siak?’ so inkuan nen Jehova na saray armada ed sikayo ran saserdote a mamapabanday ed ngaran ko.+

“‘Balet inkuan yo: “Panoy impamabanday mi ed ngaran mo?”’

7 “‘Diad impangiyapay yoy marutak a kakanen* diad altar ko.’

“‘Tan inkuan yo: “Panon mi kan dinutakan?”’

“‘Diad pangibabaga yoy: “Say lamisaan nen Jehova+ et sakey a bengatlan napabanday.” 8 Tan no mangibagat kayoy bulag ya ayep, ibabaga yon: “Anggapoy mauges ed saya.” Tan no mangiyapay kayoy piley odino mansasakit ya ayep et ibabaga yon: “Anggapoy mauges ed saya.”’”+

“Sali yo pan iregalo iratan ed gobernador yo. Naliketan kasi ed sikayo, odino marakep kasi pangawat tod sikayo?” so inkuan nen Jehova na saray armada.

9 “Tan natan, ipangasi yo, mikasi kayod* Dios pian kasian to itayo. No ontan iray iyapay yo, marakep kasi so pangawat tod anggan siopa ed sikayo?” so inkuan nen Jehova na saray armada.

10 “Tan siopa ed sikayo so malabay a mangikapot ed saray puerta?*+ Ta agyo anggan selselan so altar ko no anggapoy naawat yon bayar.+ Agak naliliketan ed sikayo,” so inkuan nen Jehova na saray armada, “tan agak naliliketan ed antokaman ya apay yo.”+

11 “Ta manlapud bubutayan na agew ya anggad seselekan na satan* et magmaliw a bantog so ngaran ko ed saray nasyon.+ Diad amin a pasen et paaseweken da iray bagat, tan mangiyapay ira ed ngaran ko, bilang sakey a malinis ya apay; lapud magmaliw a bantog so ngaran ko ed saray nasyon,”+ so inkuan nen Jehova na saray armada.

12 “Balet papabandayen yo itan*+ lapud ibabaga yon, ‘Marutak so lamisaan nen Jehova, tan mabanbanday iray prutas, saray kakanen a wadtan.’+ 13 Inkuan yo ni, ‘Makapaingongot a maong!’ tan binalaw yo itan,” so inkuan nen Jehova na saray armada. “Tan angawit kayoy ayep a tinakew, apiley, tan mansasakit. On, ontan iray inawit yo bilang apay! Awaten ko kasi itan ed lima yo?”+ so inkuan nen Jehova.

14 “Naayew imay masaol, a walay kalakian ya ayep ton andiay depekto, balet say isisipan tan ibabagat tod si Jehova et walaay depekto. Ta siak so makapanyarin Ari,”+ so inkuan nen Jehova na saray armada, “tan magmaliw a makapadinayew so ngaran ko ed saray nasyon.”+

2 “Tan natan, O sikayo ran saserdote, parad sikayo iyan ganggan.+ 2 No agkayo ondengel tan no agyo iya ipapuso pian nigloria so ngaran ko,” so inkuan nen Jehova na saray armada, “idapok ed sikayo so ayew,+ tan pagmaliwen kon ayew iray bendisyon yo.+ On, impagmaliw kon ayew iray bendisyon, lapud agyo ipapapuso.”

3 “Deralen* ko so intanem yon bini lapud sikayo,+ tan ipuranis kod lupa yo so dutak na saray ayep ya imbagat yo diad saray piesta yo; tan nibantak kayo ditan.* 4 Insan naamtaan yo ya inter ko ed sikayo iyan ganggan pian mansiansia so impisipanan ko ed si Levi,”+ so inkuan nen Jehova na saray armada.

5 “Say impisipanan kod sikato et nipaakar ed bilay tan kareenan ya inter kod sikato, a kaiba so takot.* Sikatoy tinmakot ed siak, on, sikatoy inmalagey a mandinayew ed ngaran ko. 6 Walad sangi to so ganggan* na katuaan,+ tan anggapoy naromog a kaugsan ed bibil to. Sikatoy nanakar a kaibak diad kareenan tan kaptekan,+ tan dakel so pinabeneg to ed kasalanan. 7 Ta obligasyon na saserdote ya ibangat so pikakabat nipaakar ed Dios, tan nepeg ya anapen na totoo so ganggan* manlapud sangi to,+ ta sikato so mensahero nen Jehova na saray armada.

8 “Balet tinaynan yo so dalan. Sikayoy sengegan na impakagapol na dakel nipaakar ed ganggan.*+ Dineral yoy impisipanan nen Levi,”+ so inkuan nen Jehova na saray armada. 9 “Kanian pagmaliwen ta kayon balbalawen tan abebbeba ed arap na amin a totoo, lapud agyo tinumbok iray dalan ko, noagta walay papaboran yo diad pangiyaaplika yoy ganggan.”+

10 “Agta saksakey so ama tayon amin?+ Agta saksakey so Dios ya amalsa ed sikatayo? Kanian akin et agtayo manmamatoor ed balang sakey,+ a papabandayen tayoy impisipanan na inmuunan atateng tayo? 11 Agnanmatoor so Juda, tan walay makapadimlan agawa ed Israel tan ed Jerusalem; ta pinabanday na Juda so inkasanto* nen Jehova,+ a satan et pinabli To, tan inala to bilang nobya so anak a bii na sananey a dios.+ 12 Paandien nen Jehova ed saray tolda nen Jacob so siopaman a manggagawa ed satan, anggan siopa itan,* anggano sikatoy mangiyaapay ed si Jehova na saray armada.”+

13 “Tan wala ni arum* a gagawaen yo, a sengegan no akin a napnoy lua tan pannangis tan panermen so altar nen Jehova, kanian agto la iimanoen iray apay yo tan agto la aabobonan so antokaman a manlapud lima yo.+ 14 Tan inkuan yo, ‘Antoy rason?’ Lapud nantasi si Jehova sumpad sika, ta agka nanmatoor ed bii ya asawam ed inkaugaw mo, anggaman sikato so kaibam tan asawam ya akisipanan mo.*+ 15 Balet walay sakey ya agnanggawa ed satan, lapud walad sikato so akera ed nikalbon espiritu na Dios. Tan antoy aanapen to? Say ananak* na Dios. Kanian alwaran yoy awawey yo, tan manmatoor kayod asawa yo ed inkaugaw yo. 16 Ta kabusol ko* so panagdiborsyo,”+ so inkuan nen Jehova a Dios na Israel, “tan samay sasakbongan to na inkaruksa so kawes to,”* so inkuan nen Jehova na saray armada. “Tan alwaran yoy awawey yo, tan manmatoor kayo.+

17 “Pinakesaw yoy Jehova ed saray salita yo.+ Balet inkuan yon, ‘Diad anton paraan a sikatoy pinakesaw mi?’ Diad pangibabaga yoy, ‘Amin a manggagaway mauges et maong ed pakanengneng nen Jehova, tan panliliketan to ra,’+ odino, ‘Kawalaay Dios na inkahustisya?’”

3 “Ibakik so mensaherok, tan linisan* toy dalanen ko.+ Tan say tuan Katawan ya aanapen yo et biglan onsabi ed templo to;+ tan onsabi so mensahero na sipanan a maliket yon aalagaren. Sikatoy seguradon onsabi,” so inkuan nen Jehova na saray armada.

2 “Balet siopay makapansiansia ed agew na isabi to, tan siopay makaalagey sano sikatoy ompatnag? Ta sikatoy magmaliw a singa apoy na managpino na metal tan singa sabon+ na saray managpesak. 3 Tan sikatoy onyurong bilang managpuro tan managlinis na pilak+ tan linisan to iray ananak nen Levi; tan pagmaliwen to ran puro* a singa balitok tan pilak, tan mangiyapay ira na bagat ed si Jehova diad inkatunong. 4 Tan magmaliw a makapaliket* ed si Jehova so apay na Juda tan Jerusalem, a singa ed saray agew nensaman tan singa ed saray taon ed abayag lan panaon.+

5 “Onla ak ed sikayo pian mangukom, tan tampol ak a mantasi sumpad saray managsalamangka,+ mikakalugoran, mansasamba na tila,+ sumpad saray mansasaol ed uupaan a trabahador,+ abalon bii, tan ugaw ya ulilad ama,*+ tan sumpad saramay agda labay a tulongan so* dayo.+ Ag-ira tinmakot ed siak,” so inkuan nen Jehova na saray armada.

6 “Ta siak si Jehova; agak manguman.*+ Tan sikayo so ananak nen Jacob; agni sinmabi anggaan yo. 7 Manlapu lad saray agew na inmuunan atateng yo et tinaynan yo iray totontonen ko tan agyo inunor.+ Pawil kayo ed siak, tan ompawil ak ed sikayo,”+ so inkuan nen Jehova na saray armada.

Balet inkuan yo: “Panoy ipawil mi?”

8 “Nayarian ta na too a takewan so Dios? Balet tatakewan yo ak.”

Tan inkuan yo: “Panon mi kan tinakewan?”

“Diad saray kakaplo tan diad saray kontribusyon. 9 Naayew kayo,* ta tatakewan yo ak—on, gagawaen itan na interon nasyon. 10 Iyakar yod pasen a panagsimpenan so amin a kakaplo,+ pian walay naakan ed abung ko;+ tan ipangasi yo, subok yo ak ed saya,” so inkuan nen Jehova na saray armada, “insan nengneng yo no agko lukasan ed sikayo iray puerta na danum ed tawen+ tan ikalbok* ed sikayo so dakerakel a bendisyon ya anggad anggapo lay napanginan ed satan.”+

11 “Patundaen ko parad sikayo imay mangaakmon,* tan agderalen na satan so bunga na dalin yo, tan agnaandiay bunga so sengeg na ubas diad uma yo,”+ so inkuan nen Jehova na saray armada.

12 “Iyabawag na amin a nasyon a maliket kayo,+ ta magmaliw kayon makapaliket a nasyon,” so inkuan nen Jehova na saray armada.

13 “Ansakit iray salita yod siak,” so inkuan nen Jehova.

Tan inkuan yo: “Antoy sinalita mid sika?”+

14 “Inkuan yon, ‘Anggapoy kakanaan na panlingkor ed Dios.+ Antoy agunggona tayo diad impanumpal tayo ed saray obligasyon ed sikato tan diad impanermen tayo lapud saray kasalanan tayo ed arapan nen Jehova na saray armada? 15 Natan et ipapasen tayon maliket iray mapaatagey. Sakey ni, maaligwas iramay manggagaway mauges.+ Makpel dan susuboken so Dios tan ag-ira nadudusa ed satan.’”

16 Diad saman et nantotongtong iramay ontatakot ed si Jehova, balang sakey ed kaulop to, tan maniimano tan onderengel si Jehova. Tan sakey a libro na pakanodnonotan so nisulat diad arapan to+ parad saramay ontatakot ed si Jehova tan ed saramay mandadalepdep* ed ngaran to.+

17 “Tan magmaliw iran kayarian ko,”+ so inkuan nen Jehova na saray armada, “diad agew a gawaen ko ran espisyal a kayarian* ko.+ Tan kasian ko ra, no panon a kakasian na sakey a too so anak ton manlilingkor ed sikato.+ 18 Tan nanengneng yo lamet so pandumaan na matunong a too tan mauges a too,+ samay manlilingkor ed Dios tan samay agmanlilingkor ed sikato.”

4 “Ta onsabi so agew a mandarlang a singa hurnoan,+ sano amin a mapaatagey tan amin a manggagaway kaugsan et magmaliw a singa dayami. Say agew ya onsabi so mangakmon ed sikara,” so inkuan nen Jehova na saray armada, “tan anggapoy natilak ed sikaran lamot odino sanga. 2 Balet sikayo ran mamapagalang* ed ngaran ko, onsinag ed sikayo so agew na inkatunong, a makapaabig iray sinag* to; tan manlukso kayon singa saray pinataban kilaw a baka.”

3 “Tan gatin-gatinan yo iray mauges, ta magmaliw iran singa dabok ed saray sali yo diad agew na ikiwas ko,” so inkuan nen Jehova na saray armada.

4 “Nonot yo so Ganggan nen Moises a lingkor ko, saray totontonen tan saray panangukom ya ingganggan ko diad Horeb pian unoren na interon Israel.+

5 “Ibakik ed sikayo si propetan Elias+ antis ya onsabi so baleg tan makapataktakot ya agew nen Jehova.+ 6 Tan papawilen toy puso na kaamaan ed ananak,+ tan papawilen toy puso na ananak ed kaamaan, pian agak onsabin maneral ed dalin.”

(Sampot na patalos na Hebreo-Aramaikon Kasulatan, a tumbokan na Kristianon Griegon Kasulatan)