SARAY GAWA NA SARAY APOSTOL

1 Say unonan salaysay ya insulat kod sika, O Teofilo, et nipaakar ed amin a ginawa tan imbangat nen Jesus+ 2 anggad agew a sikatoy inala na Dios,+ kayari ton binilin iray pinili ton apostol diad panamegley na masanton espiritu.+ 3 Kayari na impanirap to, sikatoy aminpigapigan nampanengneng ed sikara diad paraan a talagan nakombinse iran sikatoy mabilay.+ Sikatoy anengneng da ed loob na 40 agew, tan imbabaga to iray bengatlan nipaakar ed Panarian na Dios.+ 4 Sanen sikatoy akitipon ed sikara, binilin to ra: “Agkayo ontataynan ed Jerusalem,+ noagta alagar yo imay insipan na Ama,+ ya imbagak ed sikayo; 5 ta tuan nambautismo si Juan ed panamegley na danum, balet nabautismoan kayo ed panamegley na masanton espiritu+ kayari na pigaran agew manlapud natan.”

6 Kanian sanen nantitipon ira lamet, sikatoy tinepetan da: “Katawan, ipawil mo ta so panarian na Israel diad sayan panaon?”+ 7 Inkuan tod sikara: “Agyo nakaukolan ya amtaen iray panaon odino tiempo a wala labat ed pakauley* na Ama.+ 8 Balet makaawat kayo na pakayari sano onsabi ed sikayo so masanton espiritu,+ tan mantasi kayo+ nipaakar ed siak diad Jerusalem,+ diad interon Judea tan Samaria,+ tan diad sankaarawian a pasen* na dalin.”+ 9 Kayari ton imbaga iraya, sikatoy tinmagey legan ya onnenengneng ira, tan sinaniban na sakey a lurem kanian agda la anengneng.+ 10 Tan sanen akatangay ira ed tawen legan a sikatoy ontatagey, walay duaran lalaki ya akakawes na amputi+ a biglan inmalagey ed abay da 11 tan inkuan da: “Lalakin taga Galilea, akin et akatangay kayod tawen? Sayan Jesus ya inawat ed tawen et onsabi lanlamang a singa ed impakanengneng yon insegep tod tawen.”

12 Insan pinmawil irad Jerusalem+ manlapud palandey a tatawagey Palandey na Saray Olibo, ya asingger labat ed Jerusalem, say distansian niyabuloy ya akaren no agew na sabaton.* 13 Sanen akasabi ra, sinmegep irad sakey a kuarto ed tagey a pampupundoan da. Saraya et si Pedro ontan met ed si Juan tan Santiago tan Andres, si Felipe tan Tomas, si Bartolome tan Mateo, si Santiago ya anak nen Alfeo, tan si Simon a maseseg, tan si Judas ya anak nen Santiago.+ 14 Amin da et nantultuloy a nampikasi a walaay saksakey a gagala, a kaiba day pigaran bibii+ tan si Maria ya ina nen Jesus tan saray agagi to.+

15 Diad saraman ya agew, inmalagey si Pedro ed pegley na saray agagi (say bilang* na totoon nantitipon et 120) tan inkuan to: 16 “Agagi, kaukolan a nasumpal so kasulatan, ya impropesiya la na masanton espiritu diad panamegley nen David nipaakar ed si Judas,+ ya angitonton ed saramay angerel ed si Jesus.+ 17 Ta sikatoy kaiba tayo nensaman+ tan nanlingkor a singa sikatayo diad sayan ministeryo. 18 (Kanian angaliw na uma iyan too ed panamegley na upa parad samay agmatunong a ginawa to,+ tan sanen naplag ya inmunay ulo to et abuyak so laman to* tan pinmaway so amin a pait to.+ 19 Akabatan iya na amin a manaayam ed Jerusalem, kanian diad lenguahe ra, say impanawag ed satan ya uma et Akeldama, salanti, “Uma na Dala.”) 20 Ta nisulat itan ed libro na Saray Salmo, ‘Komon ta sigpot a napaulyan so panaayaman to, tan anggapo la komoy manayam ditan,’+ tan, ‘Alaen komon na sananey so betang to bilang manangasikaso.’+ 21 Kaukolan sirin a sikatoy salatan na sakey ed saray lalakin akaiba tayo kaleganan na saramay panaon a ginawa nen Katawan a Jesus iray kimey to,* 22 manlapud samay agew a binautismoan nen Juan+ si Jesus anggad samay agew a sikatoy inala na Dios ed sikatayo.+ Kaukolan a satan a laki et kaiba tayon akatasi ed inkioli to.”+

23 Kanian angirekomenda ra na duara, si Jose a tinawag a Barsabas, a kabkabat met a Justo, tan si Matias. 24 Insan nampikasi ra, ya inkuan da: “O Jehova,* a makaamta ed kapusoan na amin,+ ipanengneng mod sikami no siopa ed sayan duaran lalaki so pinilim 25 a mangawat ed sayan ministeryo tan inka-apostol, ya impulisay nen Judas pian nagawaan toy labay to.”+ 26 Kanian nampapalaranan da ra,+ tan say apili et si Matias, tan sikato so niarum* ed 11 ya apostol.

2 Kaleganan na agew na Piesta na Pentecostes,+ nantitipon iran amin diad saksakey a pasen. 2 Kabekta et walay ungol a nanlapud tawen a singa maksil a siplog na dagem, tan manungol ed loob na interon abung ya akayurongan da.+ 3 Insan akanengneng ira na diladila a singa apoy tan niyutob iraya, tan walay sakey a dinmapo ed kada sakey ed sikara, 4 tan napno ran amin na masanton espiritu+ tan nansalita ray nanduruman lenguahe, unong ya inter na espiritu a salitaen da.+

5 Diad saman et wala ray matakot ed Dios a Judio ed Jerusalem a nanlalapu rad nanduruman nasyon ed interon mundo.+ 6 Kanian sanen agawa iyan ungol, nantitipon so dakel a totoo tan nikelawan ira lapud nadngel dan sasalitaen na saray disipulo so lenguahe ra. 7 On, nikelawan iran maong tan inkuan da: “Nengneng yo, agta amin irayay mansasalita et taga Galilea?+ 8 Akin balet a say narerengel na kada sakey ed sikatayo et say mismon lenguahe to?* 9 Saray taga Partia, saray Medo,+ tan Elamita,+ saray manaayam ed Mesopotamia, Judea tan Capadocia, Ponto tan ed probinsya na Asia,+ 10 Frigia tan Pamfilia, Ehipto tan saray rehyon na Libya ya asingger ed Cirene, saray dinmayo a nanlapud Roma, a saraya et Judio tan proselita,+ 11 saray taga Creta, saray Arabiano—nadngel tayo ran mansasalita na saray lenguahe tayo nipaakar ed makapadinayew iran gawa na Dios.” 12 On, amin da et nikelawan tan awetwet, ya inkuan dad sakey tan sakey: “Antoy kabaliksan na saya?” 13 Balet binalaw ira na arum a totoo, ya inkuan da: “Abuek ira lapud masamit ya alak.”*

14 Balet inmalagey si Pedro a kaiba so Labinsakey+ tan nansalita ed sikara diad maksil a boses: “Lalakin taga Judea tan amin yon manaayam ed Jerusalem, amtaen yo iya tan dengel yon maong iray salitak. 15 Ag-abuek irayan totoo, a singa iisipen yo, ta komatlo ni labat ya oras* ed agew. 16 Balet ta oniay nikuan nensaman ed panamegley nen propeta Joel: 17 ‘“Tan diad kaunoran iran agew,” inkuan na Dios, “ikalbok so espirituk ed amin a klase na laman, tan manpropesiya iray ananak yon lalaki tan bibii tan makanengneng na saray pasingawey iray kalangweran yon lalaki tan mankugip iray mamasiken yo,+ 18 tan anggan diad saray ariripen kon lalaki tan ariripen kon bibii et ikalbok so espirituk diad saratan ya agew, tan manpropesiya ira.+ 19 Tan mangipanengneng ak na saray makapakelaw a bengatla diad tawen tan saray tanda diad dalin—dala tan apoy tan makapal ya asewek. 20 Magmaliw ya ambilunget so agew tan magmaliw a dala so bulan antis ya onsabi so baleg tan nikadkaduman agew nen Jehova.* 21 Tan balang sakey ya ontatawag ed ngaran nen Jehova* et niliktar.”’+

22 “Totoo na Israel, dengel yo irayan salita: Si Jesus a Nazareno et sakey a toon imparungtal na Dios ed sikayo diad panamegley na makapanyari iran gawa tan saray pakelaw tan saray tanda a ginawa na Dios ed limog yo+ diad panamegley to, unong ya amta yo la. 23 Sayan too, a niyawat ed sikayo unong ed linawa* tan pakapikabat lan unona na Dios,+ et impasak yod sakey a poste diad panamegley na saray makasalanan a totoo tan pinatey yo.+ 24 Balet pinaoli na Dios+ diad impangibulos tod sikato manlapud patey,* lapud imposiblin sikatoy mantultuloy a baloren na satan.+ 25 Ta inkuan nen David nipaakar ed sikato: ‘Naynay a walad arapan* ko si Jehova,* agak balot nagalaw lapud sikatoy walad nikawanan ko. 26 Lapud saya et nagmaliw a magayaga so pusok tan nanliket a maong so dilak. Sakey ni, manbilay ak* a walaay ilalo; 27 ta agmo ak itilak* ed Lubok,* tan samay matoor ed sika et agmo abuloyan a nanengneng toy kabubulok.+ 28 Impaamtam ed siak iray dalan na bilay; panoen mo ak na gayaga diad arapan mo.’+

29 “Agagi, abuloyan yo ak pan mansalita a makmakpel ed sikayo nipaakar ed si David ya ulo na pamilya, a sikatoy inatey tan imponpon+ tan anggad natan et walad sikatayo so lubok to. 30 Lapud sikatoy sakey a propeta tan amta ton sinambaan na Dios ed sikato a payurongen tod trono to so sakey ed saray ilalak to,*+ 31 amta to la tan sinalita to so nipaakar ed kioli na Kristo, a sikatoy agpinaulyanan na Dios diad Lubok* tan ag-abulok so laman to.+ 32 Pinaoli na Dios iyan Jesus, tan atasian min amin iya.+ 33 Kanian lapud sikatoy nitandoro lad nikawanan na Dios+ tan inawat to lay insipan a masanton espiritu manlapud Ama,+ inkalbo tod sikami iyan anengneng tan nadngel yo. 34 Ta agsinmegep ed tawen si David, balet sikaton mismo so angibagan, ‘Inkuan nen Jehova* ed Katawan ko: “Yurong kad nikawanan ko 35 anggad iyan ko ray kakabusol mo a toonan na saray salim.”’+ 36 Kanian nepeg ya amtaen na interon sankaabungan na Israel a talagan sikato so ginawa na Dios bilang Katawan+ tan Kristo, sayan Jesus ya impasak yod poste.”+

37 Sanen nadngel da iya, agonigon so puso ra, tan imbaga rad si Pedro tan ed arum ni ran apostol: “Agagi, antoy nepeg min gawaen?” 38 Inkuan nen Pedro ed sikara: “Magbabawi kayo,+ tan manpabautismo so kada sakey ed sikayo+ diad ngaran nen Jesu-Kristo pian naperdona iray kasalanan yo,+ tan makaawat kayo na masanton espiritu bilang regalo. 39 Ta nisipan+ itan ed sikayo tan ed ananak yo, tan ed amin a walad arawi, amin iramay pilien nen Jehova* a Dios tayo.”+ 40 Tan diad dakel ni ran salita et sikatoy sigpot a nantasi tan binilin to ra, ya inkuan to: “Paliisan yoy nalanor ed kaderal na sayan pikewet a henerasyon.”+ 41 Kanian abautismoan iramay maliket ya angawat ed salita to,+ tan diad saman ya agew et niarum so manga 3,000 totoo.*+ 42 Tan nanseetan dan inaral so ibabangat na saray apostol, nanlilimog ira,* saniiba iran mamangan,+ tan manpipikasi ra.+

43 On, tinmakot so amin,* tan dakel a pakelaw tan tanda so agawa ed panamegley na saray apostol.+ 44 Nantitipon so amin a nagmaliw a mananisia tan innabang dad balang sakey so amin a bengatla, 45 tan inlako da ray bengatlan walad sikara tan saray kayarian da+ tan inyutob dad amin so nanlakoan da, unong ed pankaukolan na balang sakey.+ 46 Tan kada agew et naynay a wala rad templo a saksakey so gagala ra, tan mandurungo ra diad nanduruman abung tan inanabang day naakan da, angan ira a malikeliket tan walaay masimoon a puso, 47 ya idadayew da so Dios tan naliliketan ed sikara so amin a totoo. Tan diad inagew-agew et nantultuloy met ya inyarum nen Jehova* ed sikara iramay nilalaban.+

3 Natan, si Pedro tan Juan et linmad templo parad oras na pikakasi, diad komasiam ya oras,* 2 tan sankaawit na totoo so sakey a lakin lupoy manlapu lad inkiyanak to. Sikatoy inagew-agew dan ipuepuesto diad asingger ed puerta na templo a tatawagey Marakep, pian makapipayabol ed saramay onloloob ed templo. 3 Sanen anengneng toy Pedro tan Juan ya onloob lad templo, sikatoy akipayabol ed sikara. 4 Balet sikatoy ninengneng nen Pedro tan Juan, tan imbaga nen Pedro ed sikato: “Nengneng mo kami.” 5 Kanian ninengneng to ra, ya iilaloan ton walay naawat tod sikara. 6 Balet inkuan nen Pedro: “Anggapoy pilak tan balitok ko, balet iter kod sika no antoy walad siak. Diad ngaran nen Jesu-Kristo a Nazareno, akar ka!”+ 7 Diad saman et sikatoy inegnaan nen Pedro ed kawanan a lima tan impaalagey to.+ Tampol a binmiskeg iray sali tan kalitkalit to;+ 8 tan kaalagey to et ginmapon nanakar,+ tan akila ed sikara a linmoob ed templo, a manaakar tan manluklukso tan idadayew toy Dios. 9 Tan anengneng na amin a totoo a sikatoy manaakar tan mangidadayew ed Dios. 10 Tan abidbir da a sikato imay lakin akayurong a mipapayabol diad Marakep a Puerta na templo,+ tan mankelaw iran maong tan panlikliketan day agawa ed sikato.

11 Legan ya akabemben imay laki ed si Pedro tan Juan, amin a totoo et kibatiktik a dinmago ed sikara diad pasen a tatawagey Portiko* nen Solomon,+ tan mankelkelaw ira. 12 Sanen anengneng iya nen Pedro, imbaga tod saray totoo: “Totoo na Israel, akin et pankelawan yo iya, tan akin et nenengnengen yo kami a singano sikatoy apaakar mi ed panamegley na dilin pakayari mi odino maridios a debosyon mi? 13 Say Dios nen Abraham tan Isaac tan Jacob,+ say Dios na saray inmuunan atateng tayo, so angigloria ed Lingkor ton+ si Jesus,+ ya inyawat+ tan impulisay yo ed arapan nen Pilato, anggano labay to lan ibulos. 14 On, impulisay yo itan a masanto tan matunong a too, tan impaibulos yo imay toon managpatey,+ 15 balet ta pinatey yo so Manunan Manangitonton ed bilay.+ Anggaman ontan, sikatoy pinaoli na Dios manlapud inaatey, a saya so atasian mi.+ 16 Tan diad ngaran to, tan lapud pananisia mi ed ngaran to, binmiskeg iyan laki a sankanengneng yo tan kabat yo. Say pananisia mid sikato so sigpot ya amaabig ed sayan laki diad arapan yon amin. 17 Tan natan, agagi, amtak ya agyo amtay ginawa yo,+ a singa ed ginawa na saray manuley yo.+ 18 Balet diad onian paraan et sinumpal na Dios iray imbaga to nensaman diad panamegley na amin a propeta, a manirap so Kristo to.+

19 “Magbabawi kayo+ sirin, tan manguman kayo+ pian naperdona* iray kasalanan yo,+ pian onsabi iray makapainawan panaon a manlapud si Jehova a mismo* 20 tan ibaki to so Kristo ya aturo parad sikayo, si Jesus. 21 Nepeg a sikatoy mansiansia ed tawen anggad panaon na pangipawil ed amin a bengatlan sinalita na Dios diad panamegley na saray masanton propeta to nensaman. 22 Diad tua et inkuan nen Moises: ‘Diad saray agagi yo et manuro si Jehova* a Dios yo na sakey a propeta a singa siak.+ Sikatoy nepeg yon dengelen antokaman so ibaga tod sikayo.+ 23 On, siopaman* ya ag-ondengel ed satan a Propeta et naderal manlapud limog na totoo to.’+ 24 Impakabat na amin a propeta, manlapud si Samuel anggad saramay tinmumbok ni, so nipaakar ed sarayan agew.+ 25 Ananak kayo na saray propeta tan say sipanan ya akisipanan na Dios ed saray inmuunan atateng yo,+ ya inkuan tod si Abraham: ‘Tan diad panamegley na ilalak mo* et nabendisyonan so amin a pamilya diad dalin.’+ 26 Kayarin tinuro na Dios so Lingkor to, sikayo so unonan angibakian tod sikato+ pian bendisyonan to kayo, pian tulongan to kayon ombeneg ed mauges iran gawa yo.”

4 Legan a mansasalitay Pedro tan Juan ed saray totoo, dinago ira na saray saserdote, say kapitan ed templo, tan saray Saduceo.+ 2 Asanokan ira lapud ibabangat na saray apostol iray totoo tan ipapakabat da so inkioli nen Jesus manlapud inaatey.*+ 3 Kanian inerel* tan impriso da ra+ anggad tinmumbok ya agew, ta labi lad saman. 4 Balet anisia so dakel ed saramay dinmengel ed paliwawa ra, tan say bilang na lalaki et asabi toy manga 5,000.+

5 Diad tinmumbok ya agew et nantitipon ed Jerusalem iray manuley, saray mamatatken, tan saray eskriba ra, 6 a kaibay Anas+ a manunan saserdote, si Caifas,+ Juan, Alejandro, tan amin a kakanayon na manunan saserdote. 7 Pinaalagey day Pedro tan Juan ed pegley tan tinepetan da ra: “Diad anton pakayari odino diad siopan ngaran a ginawa yo iya?” 8 Diad saman et inkuan ed sikara nen Pedro, a napno na masanton espiritu:+

“Sikayo ran manuley na totoo tan mamatatken, 9 no uusisaen yo kami natan nipaakar ed maong a ginawa mi ed sakey a toon lupoy,+ tan labay yon naamtaan no siopay amaabig ed sayan too, 10 amtaen yo komon tan amin a totoo na Israel, ya inmabig iyan laki ya akaalagey ed arapan yo diad ngaran nen Jesu-Kristo a Nazareno,+ ya impasak yod poste+ balet pinaoli na Dios manlapud inaatey.+ 11 Saya so ‘bato ya impasen yon anggapoy kakanaan, sikayo ran managpaalagey, balet nagmaliw a manunan bato ed suyok.’*+ 12 Sakey ni, anggapo lay arum a panlapuan na kililiktar, ta anggapoy sananey a ngaran+ diad silong na tawen a niiter ed saray totoo pian nilaban itayo.”+

13 Natan sanen anengneng day inkaprangka* nen Pedro tan Juan, tan atebek da ya abebay-aral* tan ordinaryo iran totoo,+ mankelkelaw ira. Tan abidbir da ra a kakaiba ira nen Jesus nensaman.+ 14 Anggapo lay niyebat dad saya+ legan a sankanengneng da imay apaabig a laki a kaiba ran akaalagey.+ 15 Kanian pinapaway da ra ed Sanhedrin, tan nantetepetan ira, 16 ya inkuan da: “Antoy gawaen tayod sarayan totoo?+ Lapud nanggawa ray sakey a nikadkaduman tanda, a saya so anengneng na amin a manaayam ed Jerusalem,+ tan agtayo itan niburi. 17 Pian agla iya onkayat ed arum a totoo, pagyawen tayo ra tan ibaga tayon agda lan balot itotongtong iyan ngaran* ed anggan siopa.”+

18 Diad saman et tinawag da ra tan binilin da ra ya agda lan balot itongtong odino ibangat so nipaakar ed ngaran nen Jesus. 19 Balet inmebat si Pedro tan Juan: “Sikayo so mangukom no kasin duga ed pakanengneng na Dios so idengel ed sikayo imbes a diad Dios. 20 Balet parad sikami, agkami nayarin ontundan mansalita nipaakar ed saray anengneng tan nadngel mi.”+ 21 Kanian kayari da ran pinagyaw lamet, imbulos da la ra lapud anggapon balot so aromog dan panusaan ed sikara tan natatakot irad saray totoo,+ ta idadayew dan amin so Dios lapud samay agawa. 22 Samay lakin apaabig ed sayan milagro* et mantaon lay masulok ya 40.

23 Sanen nibulos la ra, linma ra ed saray kapananisiaan da tan imbalita da ray imbagad sikara na saray manunan saserdote tan mamatatken. 24 Sanen nadngel da iya, nankakasakey iran nampikasi ed Dios tan inkuan da:

“Soberanon Katawan, sika so nanggawa na tawen tan say dalin tan say dayat tan amin a bengatlan walad saratan,+ 25 tan diad masanton espiritu et sinalitam ed panamegley na ama min David,+ a lingkor mo: ‘Akin et nagogonigon iray nasyon tan dadalepdepen na saray totoo iray andi-kakanaan? 26 Tinmalindeg iray arari na dalin tan nankasakey iray manuley sumpad si Jehova* tan ed samay nilanaan to.’*+ 27 Ta tuan agawa iraya sanen nankakasakey ed sayan syudad si Herodes tan si Poncio Pilato+ pati saray totoo na saray nasyon tan saray totoo na Israel sumpad masanton lingkor mo a si Jesus, a nilanaan mo,+ 28 pian gawaen da ray impasakbay mo. Agawa iraya lapud pakapanyarim tan mitunosan itan ed gagalam.+ 29 Tan natan, Jehova,* imanom iray panamagyaw da, tan ikdan mo komon na pakpel iray ariripen mo pian nitultuloy min niyabawag so salitam, 30 tan iyunat mo komon a naynay so limam pian nagawaan mi so panagpaabig tan saray tanda tan pakelaw+ diad panamegley na ngaran na masanton lingkor mo a Jesus.”+

31 Tan sanen asumpal la ran nampikasin masimoon, yinmegyeg so pasen a nantitiponan da, tan napno ran amin na masanton espiritu+ tan makmakpel dan inyabawag so salita na Dios.+

32 Sakey ni, dakel ed saramay anisia et nankakasakey ed puso tan kamarerwa,* tan anggapon balot so mangibabaga a kayarian ton bukor so antokaman a walad sikato, noagta innabang dad balang sakey so amin a walad sikara.+ 33 Tan diad mabisbiskeg a paraan et nantultuloy a nantasi iray apostol nipaakar ed inkioli na Katawan a Jesus,+ tan walad sikaran amin so daakan ya agnaparaan a kaabigan. 34 Diad tua, anggapoy anggan sakey ed sikara a mankaukolan,+ ta amin iramay walaan na kaumaan odino kaabungan et ilalako da iratan tan aawiten da ray nanlakoan da, 35 tan iyaakar da iratan ed saray apostol.+ Insan bubunogan na saray apostol so kada sakey unong ed pankaukolan to.+ 36 Kanian si Jose a Levitan taga Ciprus, a tinawag met na saray apostol a Bernabe+ (a mankabaliksay, “Anak na Ligliwa”), 37 et angilako na dalin to tan inyakar tod saray apostol so kuarta.+

5 Balet walay lakin manngaray Ananias, a kaibay asawa ton si Safira, ya angilako ed pigaran kayarian to. 2 Ingen ta masekreton imbiig to so arum a nanlakoan, ya amta met na asawa to, tan say kera et inawit to tan inyakar tod saray apostol.+ 3 Balet inkuan nen Pedro: “Ananias, akin ya inabuloyan moy Satanas a pasebegen to kan mantila+ ed masanton espiritu+ tan masekreton mangibiig ed arum a nanlakoan ed uma? 4 Agta kayarian mo itan antis mon inlako? Tan sanen alakom la, agta nayarian mon usaren so nanlakoan ed antokaman a labay mo? Akin et ninonot mon gawaen iyan mauges a bengatla? Say Dios so tinilaan mo, aliwan saray totoo.” 5 Sanen nadngel nen Ananias irayan salita, sikatoy atumba tan inatey. Tan tinmakot a maong iramay amin ya akaamta ed satan. 6 Insan inmalagey iray kalangweran a lalaki, tan sikatoy binalkot day abel, impaway da, tan imponpon da.

7 Natan kayari na ngalngali taloy oras et linmoob so asawa to, ya agto amta so agawa. 8 Inkuan nen Pedro ed sikato: “Ibagam ed siak, saya lan amin imay nanlakoan yon dua na uma?” Inkuan to: “On.” 9 Kanian inkuan nen Pedro ed sikato: “Akin et nampaknaan yon dua a suboken so espiritu nen Jehova?* Wala lad puerta iramay angiponpon ed asawam, tan ipaway da ka.” 10 Sikatoy atumban tampol ed salian nen Pedro tan inatey. Sanen linmoob iray kalangweran a lalaki, sikatoy anengneng dan inatey la, tan impaway da tan imponpon dad abay na asawa to. 11 Lapud saya et tinmakot a maong so interon kongregasyon pati amin ya akaamta ed sarayan bengatla.

12 Niarum ni, saray apostol et nantultuloy a nanggawa na dakel a tanda tan pakelaw ed limog na saray totoo;+ tan nantitipon iran amin diad Portiko* nen Solomon.+ 13 Tua, saray arum et agmakapampakpel a miulop ed sikara; anggaman ontan et indaydayew ira na totoo. 14 Tan dakel nin lalaki tan bibii so anisia ed Katawan, tan nagmaliw iran disipulo.+ 15 Impapaway da ni ingen iray mansasakit diad saray manunan karsada tan impaparukol da rad angkekelag a dukolan, pian anggan panon et walay arum ed sikara a napetekan na anino nen Pedro sano ondalan.+ 16 Nantultuloy met a sinmasabi so dakel a totoo a manlalapud saray syudad ed kaliberliber na Jerusalem, ya inaawit da iray mansasakit tan saramay papairapen na demonyo,* tan inmabig iran amin.

17 Balet inmalagey so atagey a saserdote, tan amin iramay kaiba to, a membroy sekta na saray Saduceo ed saman a panaon, tan angimon iran maong. 18 Tan inerel* da ray apostol tan inyan da rad prisoan na syudad.+ 19 Balet diad labi et nilukasan na anghel nen Jehova* iray kapot na prisoan,+ impaway to ra, tan inkuan to: 20 “La kayod templo, tan itultuloy yon ibaga ed totoo so amin a salita nipaakar ed sayan bilay.” 21 Kayari ran nadngel iya, angabkabuasan iran linmad templo tan nambangat ira.

Natan sanen sinmabi so atagey a saserdote tan saramay kaiba to, tinipon da so Sanhedrin tan say interon ulop na mamatatken na saray Israelita, tan angibaki rad prisoan pian paawit da iray apostol. 22 Balet sanen sinmabi diman iray opisyal, anggapo la ra ed prisoan. Kanian pinmawil ira tan imbalita ra, 23 ya inkuan da: “Asabian min malmalet ya akatalak so prisoan, tan akaalagey iray guardia diad arap na saray kapot, balet sanen nilukasan mi et anggapoy wadman.” 24 Sanen nadngel iya na kapitan na templo tan saray manunan saserdote, apagaan ira no antoy pansumpalan na saya. 25 Balet walay sinmabin angibalita ed sikara: “Wadman ed templo iramay lalakin impriso yo, ya akaalagey tan babangatan da iray totoo.” 26 Diad saman et linma so kapitan a kaiba iray opisyal to tan inawit da ra, balet agda ra pinuersa, ta tinmakot ira ompan tupaken ira na totoo.+

27 Kanian inawit da ra tan pinaalagey da rad arapan na Sanhedrin. Insan tinepetan ira na atagey a saserdote 28 tan inkuan to: “Binilibilin mi kayon agkayo la manbabangat nipaakar ed sayan ngaran,+ balet siansian pinano yo na bangat yo so Jerusalem, tan talagan labay yon ipakasalanan ed sikami so dala na saman a too.”+ 29 Inmebat si Pedro tan say arum nin apostol: “Nepeg min unoren so Dios bilang manuley imbes a saray totoo.+ 30 Say Dios na saray inmuunan atateng tayo so amaoli ed si Jesus, a pinatey yo diad impangipasak* yod poste.*+ 31 Sikatoy intandoro na Dios diad nikawanan to+ bilang Manunan Manangitonton+ tan Manangiliktar,+ pian makapambabawi so Israel tan naperdona iray kasalanan to.+ 32 Tan atasian mi iraya,+ ontan met na masanton espiritu,+ ya inter na Dios ed saramay manguunor ed sikato bilang manuley.”

33 Sanen nadngel da iya, sinmanok iran maong* tan labay da ran pateyen. 34 Balet inmalagey ed Sanhedrin so sakey a Fariseo a manngaray Gamaliel,+ a gagalangen na amin a totoo bilang managbangat na Ganggan, tan ingganggan ton ipaway dan magano iray lalaki. 35 Insan inkuan tod sikara: “Totoo na Israel, manalwar kayod satay nononoten yon gawaen ed sarayan lalaki. 36 Singa bilang, nensaman et tinmalindeg si Teudas, ya ipapasirayew toy inkasikato, tan manga 400 a totoo so akiulop ed sikato. Balet sikatoy pinatey, tan amin iramay tinmumbok ed sikato et abuybuyak tan anggapoy nansumpalan da. 37 Kayari to et tinmalindeg met si Judas a taga Galilea diad saray agew na panagparehistro, tan atangguyor to ray totoo ya ontumbok ed sikato. Balet sikatoy inatey met, tan nitaytayak ya amin iramay tinmumbok ed sikato. 38 Kanian natan, ibagak ed sikayo, agyo pibabalian irayan lalaki, noagta paulyan yo ra labat. Ta no sayan gagala odino sayan kimey et nanlapud totoo, naderal iya lanlamang; 39 balet no nanlapu iya ed Dios, agyo ra nayarian a deralen.+ Ta ompan say Dios a mismo laingen so lalabanan yo.”+ 40 Diad saman et sikatoy dinengel da, tan impatawag da iray apostol, nilelewet* da ra,+ tan binilin da ra ya ontunda la ran mansalita nipaakar ed ngaran nen Jesus, insan imbulos da ra.

41 Kanian tinmaynan irad arapan na Sanhedrin, a malikeliket ira+ lapud awalaan iray pribilehyo a napabanday nisengeg ed ngaran to. 42 Tan kada agew diad templo tan diad kabkaabungan+ et ag-ira tinmundan nambabangat tan angiyabawag ed maong a balita nipaakar ed Kristo, si Jesus.+

6 Natan diad saraman ya agew, sanen ondarakel la ray disipulo, nanreklamo iray Judion mansasalitay Griego ed saray Judion mansasalitay Hebreo, lapud napapaulyanan iray bibiin balo ed limog da diad inagew-agew a panagbunog.+ 2 Kanian tinawag na Labindua so dakel ed saray disipulo tan inkuan da: “Aliwan manepeg* ya ontunda kamin mangibangat ed salita na Dios pian mangibunog na naakan diad saray lamisaan.+ 3 Kanian agagi, manpili kayo ed limog yo na pitoran lalaki a maabig so reputasyon da,+ a napno ray espiritu tan karunongan,+ pian turoen mi ran mangasikaso ed sayan importantin kimey;+ 4 balet sikami et usaren mi so amin a panaon tan biskeg mi diad panagpikasi tan pambangat mid salita na Dios.” 5 Aliketan so amin a disipulo ed imbaga na saray apostol tan pinili ray Esteban, sakey a lakin napnoy pananisia tan masanton espiritu, tan si Felipe,+ Procoro, Nicanor, Timon, Parmenas, tan si Nicolas a sakey a proselita a taga Antioquia. 6 Inyakar da rad saray apostol, tan kayari ran nampikasi, intapew da iray lima rad sikara.+

7 Lapud saya et nantultuloy a kinmayat so salita na Dios,+ tan dinmakel a maong+ iray disipulo ed Jerusalem; tan dakdakel a saserdote so nagmaliw a mananisia.+

8 Natan si Esteban, a walad sikato so sigpot a panangabobon tan pakayari na Dios, et manggagawa na angkakabaleg iran pakelaw tan tanda ed limog na saray totoo. 9 Balet inmasingger so pigaran lalaki a kabiangan ed grupo a tatawagen a Sinagoga na Saray Imbulos, tan kaibay arum a taga Cirene tan Alejandria, tan pigaran taga Cilicia tan Asia, tan akisuppiatan irad si Esteban. 10 Balet agda nadaeg so karunongan tan say espiritu a mangiwawanwan ed sikato a mansalita.+ 11 Kanian wala ray totoo a masekreto ran kinombinse a mangibagay: “Sikatoy nadngel min mansasalita na panagmudmora sumpad si Moises tan ed Dios.” 12 Tan sinugsogan da iray totoo, saray mamatatken, tan saray eskriba, tan sikatoy dinago ran tampol, tan puersaan dan inerel tan inyakar ed Sanhedrin. 13 Tan angiyarap ira na saray palson testigo, ya angikuan: “Sayan too et ag-ontutundan mansasalita sumpad sayan masanton pasen tan sumpad Ganggan. 14 Singa bilang, nadngel min imbaga ton sayan pasen et igeba nen Jesus a Nazareno tan umanen to met iray kustombre ya inter nen Moises ed sikatayo.”

15 Tan legan a sikatoy sankanengneng na saramay amin ya akayurong diad Sanhedrin, anengneng dan say lupa to et singa lupay anghel.

7 Balet inkuan na atagey a saserdote: “Tua irayay ibabaga ra?” 2 Inmebat si Esteban: “Agagi tan kaamaan, dengel kayo. Nampanengneng so Dios na gloria ed inmunan ateng tayon si Abraham sanen sikatoy walad Mesopotamia, antis a nanayam diad Haran,+ 3 tan inkuan tod sikato: ‘Taynan moy dalin mo tan saray kakanayon mo tan la kad dalin ya ipanengneng kod sika.’+ 4 Kanian tinaynan toy dalin na saray Caldeo tan nanayam diad Haran. Tan manlapu diman, kayari na impatey na ama to,+ sikatoy ingganggan na Dios ya onalis pian manayam ed sayan dalin a panaayaman yo natan.+ 5 Anggaman ontan et anggapoy antokaman ya impatawir tod sikato diad sayan dalin, anggapo anggan pangidakatan toy sali to; balet insipan ton iter to iya ed sikato, insan dia ed ilalak* to,+ anggano anggapo ni ilalak tod saman. 6 Sakey ni, inkuan na Dios a saray ilalak* to et magmaliw a dayo diad dalin ya agda kayarian, tan aripenen tan pairapen* ira na saray totoo ed loob na 400 a taon.+ 7 ‘Tan ukomen ko itan a nasyon a mangaripen ed sikara,’+ inkuan na Dios, ‘tan kayari na saraya et ompaway ira tan mangiyapay ira ed siak na sagradon panaglingkor diad sayan pasen.’+

8 “Inter met ed sikato na Dios so sakey a sipanan nipaakar ed panagsegat,+ tan inilalak toy Isaac+ tan sinegat tod komawalon agew,+ tan inilalak nen Isaac* si Jacob, tan inilalak nen Jacob so 12 ulo na pamilya.* 9 Tan angimon iray ulo na pamilya ed si Jose+ tan sikatoy inlako rad Ehipto.+ Balet say Dios et walad sikato,+ 10 tan inliktar tod amin a kairapan to tan inikdan toy karunongan pian nagamoran toy panangabobon na Faraon ya ari na Ehipto. Tan sikatoy tinuro na Faraon pian manguley ed Ehipto tan ed interon sankaabungan to.+ 11 Balet sinmabi so eras diad interon Ehipto tan Canaan, on, sakey a baleg a kairapan, tan agmakaromog na antokaman a naakan iray inmuunan atateng tayo.+ 12 Balet abalitaan nen Jacob a walay napangalaay naakan* ed Ehipto, tan saya so primeron pankanawnawa ya imbaki to diman iray inmuunan atateng tayo.+ 13 Sanen linma ra diman ed mikaduan pankanawnawa, impaamta nen Jose ed sikara a sikato imay agi ra, tan naamtaan na Faraon so nipaakar ed pamilya nen Jose.+ 14 Kanian angipasabi na mensahe si Jose ed ama ton Jacob tan ed amin a kakanayon to manlapud satan a pasen,+ ya amin da et 75 too.*+ 15 Kanian linmad Ehipto si Jacob,+ tan diman la inatey,+ ontan met ed saray inmuunan atateng tayo.+ 16 Inawit da rad Siquem tan imponpon da rad lubok a sinaliw nen Abraham ed saray ananak nen Hamor ed Siquem diad pigaran pilak a kuarta.+

17 “Sanen asingger lay panaon na pakasumpal na insipan na Dios ed si Abraham, saray Israelita et dinmakerakel diad Ehipto, 18 anggad sanen sananey lay ari ed Ehipto, ya agto kabat si Jose.+ 19 Masilib ya inusar na sayan ari so pakauley to sumpad kapolian tayo tan minaltrato to insan pinasoot to ray kaamaan tayo a paulyanan da iray ananak dan kapangiyanak, ta pian ag-iratan nabilay.+ 20 Diad saman a panaon et niyanak si Moises, tan sikatoy malimlimgas.* Tan sikatoy taloy bulan a kinomisan* diad abung nen ama to.+ 21 Balet sanen sikatoy pinaulyanan* la,+ sikatoy inala na biin anak na Faraon tan pinabaleg to a singa anak ton dili.+ 22 Kanian nibangat si Moises ed amin a karunongan na saray Ehipsio. Diad tua et sikatoy makapanyari ed salita tan gawa to.+

23 “Natan sanen asabi to lay edad ya 40, denesidi ton bisitaen* iray agagi to, saray ananak na Israel.+ 24 Sanen anengneng ton mamaltratoen na Ehipsio so sakey ed sikara, pinatey to imay Ehipsio pian iyagel tan ibawian to. 25 Abaloan ton natalosan na agagi to ya iliktar ira na Dios diad panamegley to, balet ta agda atalosan. 26 Diad tinmumbok ya agew et dinago to ra sanen manlalaban ira, tan sinali to ran aregloen, a kuan to: ‘Sanagi kayo. Akin et sasakitan yoy sakey tan sakey?’ 27 Balet sikatoy impulisay na samay manmamaltrato ed agi to, ya inkuan to: ‘Siopay anuro ed sika bilang manuley tan ukom mi? 28 Labay mo ak met a pateyen a singa ed impamatey mod samay Ehipsio karuman?’ 29 Sanen nadngel iya nen Moises, sikatoy batik tan nanayam bilang dayo diad dalin na Midian, a diman et nanilalak na duaran lalaki.+

30 “Kayari na 40 taon, walay anghel a nampanengneng ed sikato diad kalawakan na Palandey Sinai, diad mandarlang ya apoy ed sakey a masabit a kiew.+ 31 Sanen anengneng nen Moises itan, sikatoy nikelawan. Balet sanen sikatoy onaasingger pian manusisa, nadngel toy boses nen Jehova:* 32 ‘Siak so Dios na inmuunan atateng mo, say Dios nen Abraham tan Isaac tan Jacob.’+ Ginmiwgiw si Moises kanian antakot lan manusisa. 33 Inkuan nen Jehova* ed sikato: ‘Ekal mo ray sandalyas mo, ta say pasen ya akaalageyan mo et masanton dalin. 34 Anengneng kon mismo so paniirap na totook diad Ehipto, tan nadngel koy akis da+ tan linmeksab ak pian iliktar ko ra. Natan gala, ta ibaki ta kad Ehipto.’ 35 Saya imay Moises ya impulisay da, ya inkuan dan: ‘Siopay anuro ed sika bilang manuley tan ukom?’+ ya imbaki na Dios+ bilang manuley tan mangiliktar diad panamegley na anghel a nampanengneng ed sikato diad masabit a kiew. 36 Sayan too so angipaway ed sikara,+ a ginawa to iray pakelaw tan tanda diad Ehipto+ tan diad Ambalangan Dayat+ tan diad kalawakan ed loob na 40 taon.+

37 “Saya imay Moises ya angikuan ed saray ananak na Israel: ‘Diad saray agagi yo, manuro so Dios na sakey a propeta a singa siak.’+ 38 Sikato imay linmad pegley na kongregasyon diad kalawakan a kaiba imay anghel+ ya akitongtong ed sikato+ diad Palandey Sinai tan kaiba iray inmuunan atateng tayo, tan inawat to so mabilay iran sagradon mensahe pian iter ed sikayo.+ 39 Sikatoy ag-inunor na inmuunan atateng tayo, noagta impulisay da,+ tan diad kapusoan da et labay day ompawil ed Ehipto,+ 40 tan inkuan dad si Aaron: ‘Igawaan mo kami na dirios a mangidaulo ed sikami. Ta agmi amta no anto lay agawa ed sayan Moises, ya angipaway ed sikami ed dalin na Ehipto.’+ 41 Kanian diad saraman ya agew et nanggawa ray sakey a kilaw a baka tan nambagat irad sayan idolo tan nanliliket irad saray gawa na saray lima ra.+ 42 Kanian tinaynan ira na Dios tan pinaulyanan to ran mandayew ed saray bengatla ed tawen,+ unong a nisulat ed libro na Saray Propeta: ‘O sankaabungan na Israel, kasin siak so angiyapayan tan nambagatan yo ed loob na 40 taon ed kalawakan? 43 Balet say inawit yo et say tolda nen Moloc+ tan say bitewen na dios a si Refan, saray imahen a ginawa yo pian dayewen yo. Kanian ibantak ta kayo ed lampas ni na Babilonia.’+

44 “Walad saray inmuunan atateng tayo so tolda* na pantasi diad kalawakan, ya impagawa To ed si Moises unong ed pangaligan ya impanengneng tod sikato.+ 45 Tan tinawir itan na saray inmuunan atateng tayo tan kaiba ray Josue ya angiloob ed satan diad dalin a kayarian na saray nasyon,+ a pinataynan na Dios diad arapan na inmuunan atateng tayo.+ Satan so nansiansia ditan anggad saray agew nen David. 46 Agamoran nen David so panangabobon na Dios tan kinerew toy pribilehyon manggawa na ayaman parad Dios nen Jacob.+ 47 Balet si Solomon so angipaalagey ed satan.+ 48 Ingen ta say Sankatagyan et agmanaayam ed saray abung a ginawa na saray lima na too,+ unong ya imbaga na propeta: 49 ‘Say tawen so tronok,+ tan say dalin so toonan na salik.+ Anton klase na abung so ipaalagey yo parad siak? so inkuan nen Jehova.* Odino iner so pasen a panayaman ko? 50 Agta amin iraya et ginawa na limak?’+

51 “Anawet so ulo yo, tan ag-asegat so kapusoan tan kalayagan yo. Naynay yon susumlangen so masanton espiritu; gagawaen yo met so ginawa na inmuunan atateng yo.+ 52 Siopad saray propeta so agpinasegsegang na inmuunan atateng yo?+ On, pinatey da iramay angipasakbay ed isabi na samay sakey a matunong,+ a saya imay inyawat tan pinatey yo,+ 53 sikayon angawat ed Ganggan ya impasabi na saray anghel+ balet ta agyo inunor.”

54 Sanen nadngel da iraya, sinmanok iran maong* tan manngilet ira ed sikato. 55 Balet sikatoy napno na masanton espiritu tan tinmangay ed tawen tan anengneng toy gloria na Dios tan si Jesus ya akaalagey ed nikawanan na Dios,+ 56 tan inkuan to: “Nanenengneng ko ya alukasan so tawen tan akaalagey ed nikawanan na Dios+ so Anak na too.”+ 57 Lapud saya et inmeeyag ira tan pinepetan da ray layag da tan sikatoy inambon da. 58 Sanen nipaway da lad syudad, sikatoy tinutupak da.+ Inggaton na saramay nantestigo+ iray ilalatop dan kawes diad salian na sakey a kalangweran a lakin manngaray Saulo.+ 59 Legan a tutupaken day Esteban, oniay kinerew to: “Katawan a Jesus, awat moy espirituk.” 60 Insan sikatoy tinmalimukor tan inmeyag ed maksil a boses: “Jehova,* agmo ra dudusaen ed sayan kasalanan.”+ Tan kayari ton imbaga iya, sikatoy naugip ed patey.

8 Inabobonan nen Saulo so impamatey dad si Esteban.+

Diad saman ya agew et apasegsegang a maong so kongregasyon diad Jerusalem; nitaytayak iran amin diad interon rehyon na Judea tan Samaria nilikud ed saray apostol.+ 2 Balet si Esteban et imponpon na lalakin matakot ed Dios, tan inakisan dan maong. 3 Ingen ginapoan nen Saulo a buyaken so kongregasyon. Sinansakey ton nilooban iray kaabungan da, inggagayugoy to ray lalaki tan bibii, tan impaipriso to ra.+

4 Balet saramay nitaytayak et linmad nanduruman pasen na dalin ya inyaabawag da so maong a balita nipaakar ed salita na Dios.+ 5 Natan et linmay Felipe ed syudad* na Samaria+ tan impulong tod sikara so Kristo. 6 Saray totoo et nankakasakey a nanimanon maong ed si Felipe legan dan tatalinengen tan nenengnengen iray tandan gagawaen to. 7 Ta dakel so aselepan na demonyo,* tan oneeyag iraya na maksil tan ompapaway ira.+ Tan apaabig so dakel a paralitiko tan piley. 8 Kanian walay baleg a liket ed satan a syudad.

9 Diad satan a syudad et walay sakey a lakin manngaray Simon, ya antis na saya et sikatoy manmamahiko tan pankekelawen to so nasyon na Samaria, ya ibabaga ton sikatoy makapanyari. 10 Amin da, manlapud sankaabebaan ya anggad sankatageyan et maniimanon maong ed sikato tan ibabaga ran: “Sayan too so Pakayari na Dios, a tatawagen a Baleg a Pakayari.” 11 Kanian sikatoy tutumboken da lapud abayag la ran mankelaw ed panmamahiko to. 12 Balet sanen anisia rad si Felipe, a mangiyaabawag na maong a balita nipaakar ed Panarian na Dios+ tan ed ngaran nen Jesu-Kristo, lalaki tan bibii so nampabautismo.+ 13 Nagmaliw met a mananisia si Simon, tan sanen abautismoan et akiulop a naynay ed si Felipe,+ tan nikelawan ed pakakanengneng tod saray nagagawan tanda tan angkakabaleg iran makapanyarin gawa.

14 Sanen nadngelan na saray apostol ed Jerusalem ya inawat na saray totoo ed Samaria so salita na Dios,+ imbaki ra ditan si Pedro tan Juan; 15 tan linma iraya ed saray taga Samaria tan impikasi da ra pian makaawat ira na masanton espiritu.+ 16 Ta anggapo nid sikara so akaawat ed satan, noagta abautismoan labat ira diad ngaran na Katawan a Jesus.+ 17 Diad saman et intapew da iray lima rad sikara,+ kanian akaawat ira na masanton espiritu.

18 Natan, sanen anengneng nen Simon a makakaawat na masanton espiritu so siopaman a pangitapewan na saray apostol ed lima ra, inopresian to ray kuarta, 19 ya inkuan to: “Iter yo met ed siak iyan autoridad, pian siopaman a pangitapewan koy limak et makaawat na masanton espiritu.” 20 Balet inkuan nen Pedro ed sikato: “Naderal komon so pilak mo a pati sika, lapud iisipen mo a nakayarian moy regalo na Dios diad panamegley na kuarta.+ 21 Anggapon balot so betang mod saya, ta aliwan maptek so pusom ed pakanengneng na Dios. 22 Magbabawi ka sirin ed sayan kaugsan mo, tan mikasi kad si Jehova,* a no nayari et perdonaen to komon so mauges ya intension na pusom, 23 ta nanenengneng ko a sakey kan ampait a samal* tan aripen na ag-inkatunong.” 24 Inmebat si Simon: “Ipikasi yo ak sirin ed si Jehova* pian anggapo komon ed sarayan imbaga yo so nagawad siak.”

25 Diad saman, sanen sigpot la ran akapantasi tan nipasabi da lay salita nen Jehova,* pinmawil ira ed Jerusalem tan inyabawag da so maong a balita ed dakel a baryo na saray Samaritano.+

26 Balet akitongtong so anghel+ nen Jehova* ed si Felipe, ya inkuan to: “Alagey ka tan la kad abalaten diad dalan a manlapud Jerusalem a paarap ed Gaza.” (Sakey iyan dalan diad desierto.) 27 Diad saman et sikatoy inmalagey tan linma, tan walay Etiopen eunoko,* a walaay autoridad tan panlilingkoran to so Candace a reyna na saray Etiope, tan mangaasikaso ed amin a kayamanan to. Sikatoy linmad Jerusalem pian mandayew,+ 28 tan pasempet la tan akayurong ed karwahe to, tan babasaen ton maksil so libro nen propeta Isaias. 29 Kanian imbaga na espiritu ed si Felipe: “La ka tan asinggeran mo iyan karwahe.” 30 Batik si Felipe a binansagan to itan tan nadngel ton babasaen a maksil na eunoko so libro nen propeta Isaias, tan inkuan to: “Natatalosan moy babasaen mo?” 31 Inkuan to: “Panon kon natalosan no anggapoy mangipaliwawa ed siak?” Kanian pinalugan toy Felipe tan pinayurong tod abay to. 32 Natan et saya so kabiangay Kasulatan a babasaen ton maksil: “Sikatoy singa sakey a kordero ya inyakar ed panagpateyan, tan singa sakey a karneron marendeen ed arapan na managkiskis na bago, ya agto biswaten so sangi to.+ 33 Sanen sikatoy papabandayen, agnaikdan na hustisya.+ Siopay mangibagad saray detalye nipaakar ed henerasyon to? Ta say bilay to et inekal ed dalin.”+

34 Insan inkuan na eunoko ed si Felipe: “Ibagam pad siak, siopay tutukoyen dia na propeta? Sikaton mismo odino arum a too?” 35 Nansalitay Felipe, ya inggapo tod sayan parte na kasulatan tan impulong tod sikato so maong a balita nipaakar ed si Jesus. 36 Legan a manbiabiahe rad dalan, akasabi rad kawalaan na danum, tan inkuan na eunoko: “Wala diay danum; antoy makasbel ed pakabautismoan ko?” 37 *—— 38 Diad saman et pinatunda toy karwahe, tan linmasur ed danum si Felipe tan say eunoko, tan sikatoy binautismoan to. 39 Sanen sinmakbit la ra, tampol ya inwanwan na espiritu nen Jehova* si Felipe pian ontaynan la, kanian agla anengneng na eunoko, balet sikatoy malikeliket ya amaarap ed dalan to. 40 Linma balet si Felipe diad Asdod tan intultuloy ton inyabawag so maong a balita diad amin a syudad anggad sikatoy akasabi ed Cesarea.+

9 Balet si Saulo, a siansia nin mamapagyaw ed saray disipulo na Katawan+ tan labalabay to ran pateyen, et linmad atagey a saserdote 2 tan kinmerew na saray sulat ya iter tod saray sinagoga ed Damasco, pian sarag ton baloren tan awiten ed Jerusalem so siopaman a laki odino bii a naromog ton kabiangan na Say Dalan.+

3 Legan a sikatoy manbiabiahe tan manasingger lad Damasco, biglan walay liwawan nanlapud tawen a sinminag ed kaliberliber to,+ 4 tan sikatoy atumba tan nadngel toy sakey a boses ya angikuan ed sikato: “Saulo, Saulo, akin et papasegsegangen mo ak?” 5 Intepet to: “Siopa ka, Katawan?” Inkuan to: “Siak si Jesus,+ a papasegsegangen mo.+ 6 Balet alagey ka tan la kad syudad, tan nibaga ed sika no antoy nepeg mon gawaen.” 7 Natan et ag-akaskasel iray lalakin kaiba ton manaakar, lapud walay narerengel dan boses, balet anggapoy nanenengneng dan mansasalita.+ 8 Insan inmalagey si Saulo, tan anggano akalimata et anggapoy nanengneng to. Kanian sikatoy intabin da tan inyakar dad Damasco. 9 Tan sikatoy taloy agew ya agmakanengneng,+ tan ag-angan odino inminum.

10 Diad Damasco et walay disipulo a manngaray Ananias+ tan inkuan na Katawan ed sikato diad pasingawey: “Ananias!” Inkuan to: “Wadia ak, Katawan.” 11 Inkuan na Katawan ed sikato: “Alagey ka, la kad dalan a tatawagen a Maptek, tan anap mod abung nen Judas so toon manngaray Saulo, a taga Tarso.+ Ta sikatoy manpipikasi, 12 tan anengneng tod pasingawey a linmoob so sakey a lakin manngaray Ananias tan intapew toy lima tod sikato pian ompawil so pakanengneng to.”+ 13 Balet inmebat si Ananias: “Katawan, dakel lay akadngelan ko nipaakar ed sayan too, nipaakar ed amin a makapasakit a ginawa tod saray masanton totoom diad Jerusalem. 14 Tan sikatoy linma dia a walay autoridad ton nanlapud saray manunan saserdote pian arestoen* to so amin ya ontatawag ed ngaran mo.”+ 15 Balet inkuan na Katawan ed sikato: “La ka! ta sayan too et sakey a pananginan a pinilik+ a mangawit na ngaran ko ed saray nasyon+ ontan met ed saray arari+ tan ed saray anak na Israel. 16 Ta ipaliwawak a maong ed sikato no kaunongan karakel ya irap so nepeg ton itepel lapud ngaran ko.”+

17 Kanian linmay Ananias tan linmoob ed abung, tan intapew tod sikato iray lima to tan inkuan to: “Saulo, agik, imbaki ak na Katawan a Jesus a nampanengneng ed sika diad dinalanan mo, pian ompawil so pakanengneng mo tan napano kay masanton espiritu.”+ 18 Tampol a walay apagpag a singa siksik manlapud saray mata to, tan pinmawil so pakanengneng to. Insan sikatoy inmalagey tan abautismoan, 19 tan sikatoy angan tan kinmasil.

Sikatoy akiulop ed saray disipulo ed Damasco+ diad loob na pigaran agew, 20 tan impulong ton tampol ed saray sinagoga a si Jesus so Anak na Dios. 21 Balet nikelawan iramay amin ya akadngel ed sikato tan imbaga ran: “Agta saya imay toon maruksan amasegsegang ed saramay walad Jerusalem ya ontatawag ed sayan ngaran?+ Agta sikatoy linma dia pian arestoen tan iyakar ira* ed saray manunan saserdote?”+ 22 Balet lalon nagmaliw ya epektiboy Saulo ed ministeryo to tan agmakaebat ed sikato iray Judio a manaayam diad Damasco sanen makatunongan ton pinaneknekan a si Jesus so Kristo.+

23 Natan sanen apalabas lay dakel ya agew, nantotongtongan na saray Judio so pamatey ed sikato.+ 24 Balet akabatan nen Saulo so plano rad sikato. Agew-labi met a babantayan dan maong iray puerta pian sikatoy napatey da. 25 Kanian diad labi et sikatoy inala na saray disipulo to tan inlugan dad sakey a buksot insan da inleksab ya indalan ed sakey a bintana na padir.+

26 Kasabi tod Jerusalem,+ nanggunaetan toy miulop ed saray disipulo, balet natatakot iran amin ed sikato, ta ag-ira manisian sikatoy sakey lan disipulo. 27 Kanian sikatoy tinulongan nen Bernabe+ tan inyakar tod saray apostol, tan inistorya ton amin ed sikara no panon ya anengneng nen Saulo so Katawan+ diad dalan tan akitongtong ed sikato, tan no panon a sikatoy makmakpel a nansalita ed ngaran nen Jesus diad Damasco.+ 28 Kanian sikatoy nantultuloy ya akilad sikara, a bulos a nanliber ed* Jerusalem, tan makmakpel a nansalita diad ngaran na Katawan. 29 Sikatoy mitotongtong tan misusuppiatan ed saray Judion mansasalitay Griego, balet sikatoy aminpiga ran implano a pateyen.+ 30 Sanen naamtaan iya na saray agagi, sikatoy inyakar dad Cesarea tan pinaonla rad Tarso.+

31 Kanian diad saman a panaon et awalaay kareenan so kongregasyon diad interon Judea tan Galilea tan Samaria,+ ya apabiskeg ira; tan nantultuloy iran dinmakel lapud manbibilay iran walaay takot ed si Jehova* tan naliligliwa ira na masanton espiritu.+

32 Natan sanen liliberen nen Pedro so interon rehyon, nila to met iray masanto a manaayam ed Lida.+ 33 Diman et walay aromog ton laki a manngaray Eneas, a waloy taon lan akarukol ed dukolan to, ta sikatoy paralitiko. 34 Imbaga nen Pedro ed sikato: “Eneas, paabigen ka nen Jesu-Kristo.+ Alagey ka tan sinop moy dukolan mo.”+ Tan sikatoy inmalagey a tampol. 35 Sanen sikatoy anengneng na amin a manaayam ed Lida tan ed Patar na Saron, anisia ra ed Katawan.

36 Natan diad Joppe et walay disipulo a manngaray Tabita, a no ipatalos et mankabaliksay “Dorcas.”* Dakdakel so agawaan ton kaabigan tan inter ton regalo lapud panangasi. 37 Balet legan a walad Lida si Pedro et nansakit si Dorcas tan inatey. Kanian sikatoy inames da tan inyan dad sakey a kuarto ed tagey. 38 Lapud asingger so Lida ed Joppe, sanen nadngelan na saray disipulo a wadiad sayan syudad si Pedro, angibaki ray duaran lalaki a mikasi ed sikato: “Ipangasim pay onlan tampol ed sikami.” 39 Diad saman et inmalagey si Pedro tan akilad sikara. Tan kasabi to, sikatoy inyakar dad kuarto ed tagey; tan sikatoy inabet na amin a balon bibii, a manakis ira tan impapanengneng da so amin a klase na kawes a ginawa nen Dorcas sanen kaiba to ni ra. 40 Insan pinapaway nen Pedro so amin,+ tan sikatoy tinmalimukor a nampikasi. Insan inmarap ed bangkay, ya inkuan to: “Tabita, bangon ka!” Inlukas to ray mata to, tan kanengneng tod si Pedro, sikatoy yinmurong.+ 41 Binembenan nen Pedro so lima to tan pinaalagey to, tan tinawag to ray masanto tan saray balon bibii tan sikatoy inyawat ton mabilay.+ 42 Akabatan iya diad interon Joppe, tan dakel so anisia ed Katawan.+ 43 Tan diad Joppe et pigay agew ya akiayam si Pedro ed si Simon a managkurti na katat.+

10 Natan diad Cesarea et walay lakin manngaray Cornelio, sakey ya opisyal na armada* ed tropa* ya Italyano. 2 Sikato tan say interon sankaabungan to et matakot ed Dios, tan iikdan toy dakel a regalo iray totoo lapud panangasi tan naynay a mikakasi ed Dios. 3 Nen manga komasiam ya oras,*+ malinlinew ya anengneng tod pasingawey so sakey ya anghel na Dios a linmad sikato tan inkuan to: “Cornelio!” 4 Sikatoy ninengneng nen Cornelio, tan natatakot a nantepet: “Anto man, Katawan?” Inkuan tod sikato: “Saray pikakasim tan saray regalom lapud panangasi et sinmabi ed Dios bilang sakey a pakanodnonotan.+ 5 Kanian mangibaki ka natan na lalaki diad Joppe tan patawag moy Simon a manngaran met na Pedro. 6 Sayan too et miaayam ed si* Simon, a managkurti na katat, a say abung to et walad gilig na dayat.” 7 Kasipot na anghel ya akitongtong ed sikato, tinawag toy duara ed saray lingkor to tan sakey a matakot ed Dios a sundalo manlapud saramay manlilingkor ed sikato, 8 tan insalaysay tod sikara so amin a bengatla tan imbaki to rad Joppe.

9 Diad tinmumbok ya agew, legan iran manbiabiahe tan asingger la rad syudad, sinmegep si Pedro ed toktok na abung diad manga komanem ya oras* pian manpikasi. 10 Balet sikatoy narnarasan tan labay to lay mangan. Legan dan ipaparaan so naakan, sikatoy akanengneng na pasingawey+ 11 tan anengneng ton alukasan so tawen tan onleleksab diad dalin so sakey a bengatla* a singa abalbaleg ya ules a linen a nibitin ed apatiran suyok; 12 tan wadtan so amin a klase na ayep ya apatiray sali tan saray onkukurong ya ayayep* ed dalin tan saray ontitikyab a manok. 13 Insan walay nadngel ton boses: “Alagey ka, Pedro, mamakger ka tan mangan ka!” 14 Balet inkuan nen Pedro: “Andi, Katawan, ta agak nin balot angan na antokaman a marutak.”+ 15 Tan nadngel to lamet so boses diad komaduan pankanawnawa: “Agmo la tatawagen a marutak iray nilinisan la na Dios.” 16 Nadngel to lamet iya diad komatlon pankanawnawa, tan tinmagey itan* a tampol ed tawen.

17 Legan a nawewetwet ni Pedro no anto kasi kabaliksan na pasingawey ya anengneng to, diad saman a mismon oras et nantepet iramay lalakin imbaki nen Cornelio no iner so abung nen Simon tan akaalagey irad puerta.+ 18 Tinmawag ira tan tinepet da no walay sangkaili diman a manngaray Simon a tatawagen met a Pedro. 19 Legan a nononoten ni nen Pedro so nipaakar ed pasingawey, inkuan na espiritu:+ “Walay taloran lalaki a manaanap ed sika. 20 Alagey ka, lasur ka tan mila kad sikara, ya agkan balot manduaruwa, ta imbakik ira.” 21 Kanian linmasur si Pedro tan inkuan tod saramay lalaki: “Siak imay aanapen yo. Antoy nila yo dia?” 22 Inkuan da: “Si Cornelio,+ ya opisyal na armada, a sakey a toon matunong tan matakot ed Dios tan maong so ibabaga na interon nasyon na saray Judio nipaakar ed sikato, et binilin na Dios diad panamegley na sakey a masanton anghel pian ipatawag to kad abung to tan ondengel ed saray ibagam.” 23 Kanian pinaloob tan sinangkaili to ra.

Diad tinmumbok ya agew et sikatoy akila ed sikara, tan akila met ed sikato so pigara ed saray agagin taga Joppe. 24 Diad sinmublay ya agew et sikatoy akasabi ed Cesarea. On, tatalaranan la ra nen Cornelio tan tinipon to ray kakanayon to tan maapit a kakaaro to. 25 Kaloob nen Pedro, sikatoy inabet nen Cornelio, a tinmalimukor diad salian to, tan angigalang* ed sikato. 26 Balet sikatoy pinaalagey nen Pedro, ya inkuan to: “Alagey ka; sakey ak met labat a too.”+ 27 Legan iran mantotongtong, sikatoy linmoob tan anengneng toy dakel a totoon nantitipon. 28 Inkuan tod sikara: “Amta yon aliwan manepeg ed sakey a Judio so miulop odino onasingger ed sakey a toon sananey so rasa to,+ balet impanengneng ed siak na Dios ya agko nepeg a tawagen a marutak so siopaman a too.+ 29 Kanian akila ak a tampol sanen impatawag yo ak. Tepeten ko sirin no akin ya impatawag yo ak.”

30 Insan inkuan nen Cornelio: “Apat agew lay apalabas manlapud sayan oras, manpipikasi ak diad abung ko ed komasiam ya oras;* kabekta et walay inmalagey ed arapan ko a lakin masmasnag so kawes to 31 tan inkuan to: ‘Cornelio, dinengel na Dios so pikakasim, tan anonotan to iray regalom lapud panangasi. 32 Kanian mangibaki ka sirin diad Joppe tan patawag moy Simon, a manngaran met na Pedro. Sayan too et sasangkailien nen Simon, a managkurti na katat, a say abung to et walad gilig na dayat.’+ 33 Kanian angibaki ak a tampol na manawag ed sika, et maong ta linma ka dia. Kanian diad arapan na Dios et wadia kamin amin natan pian dengelen so amin a papaibaga nen Jehova.”*

34 Diad saya et nansalitay Pedro: “Natatalosan ko la natan ya anggapoy lalabien na Dios,+ 35 noagta diad balang nasyon et makapaliket ed sikato so toon ontatakot ed sikato tan manggagaway duga.+ 36 Impasabi toy mensahe ed ananak na Israel pian niyabawag ed sikara so maong a balita na kareenan+ diad panamegley nen Jesu-Kristo, a sikato so Katawan na amin.+ 37 Amta yoy pantotongtongan ed interon Judea, a ginmapo ed Galilea+ kayarin impulong nen Juan so nipaakar ed bautismo: 38 nipaakar ed si Jesus a taga Nazaret, no panon a sikatoy nilanaan na Dios ed panamegley na masanton espiritu+ tan pakayari, tan nanliber ed nanduruman pasen, a nanggaway maong tan pinaabig ton amin iramay papairapen na Diablo,+ tan agawaan ton amin iya lapud walad sikato so Dios.+ 39 Tan atasian min amin so ginawa to diad dalin na saray Judio tan diad Jerusalem; balet sikatoy pinatey da, ya impasak dad sakey a poste.* 40 Sikatoy pinaoli na Dios diad komatlon agew+ tan inabuloyan ton manpanengneng, 41 aliwan diad amin a totoo, noagta ed saray tasi a tinuro la nensaman na Dios, diad sikami a kaiba ton angan tan inminum kayari na inkioli to manlapud inaatey.+ 42 Ontan met, ingganggan to kamin manpulong ed totoo tan sigpot a mantasi+ a sikato imay tinuro na Dios a magmaliw ya ukom na saray mabilay tan inaatey.+ 43 Sikatoy tinasian na amin a propeta,+ pian amin a manisia ed sikato et naperdona iray kasalanan da diad panamegley na ngaran to.”+

44 Legan a sasalitaen ni nen Pedro iraya, linmeksab so masanton espiritu ed saramay amin ya onderengel ed salita na Dios.+ 45 Tan nikelkelawan iray asegat a mananisia* ya akilad si Pedro, lapud nikalbo met ed saray aliwan Judio so masanton espiritu, a regalo na Dios. 46 Ta nadngel da ran mansasalita na nanduruman lenguahe tan mangiglogloria ed Dios.+ Lapud saya et inkuan nen Pedro: 47 “Wala tay makasbel pian agnabautismoan ed danum+ irayan akaawat na masanton espiritu a singa sikatayo?” 48 Diad saman et ingganggan to ran manpabautismo diad ngaran nen Jesu-Kristo.+ Insan kinerew dan sikatoy mansiansia ni diman a pigay agew.

11 Natan et naamtaan na saray apostol tan saray agagi ed Judea ya inawat met la na saray aliwan Judio so salita na Dios. 2 Kanian sanen linmad Jerusalem si Pedro, sikatoy binalaw na saray* manusuporta ed panagsegat,+ 3 ya inkuan da: “Linmoob kad abung na totoon ag-asegat tan akirungo kad sikara.” 4 Diad saya et impaliwawa nen Pedro ed sikara iray detalye, ya inkuan to:

5 “Wadman ak ed syudad na Joppe a manpipikasi, tan anengneng kod pasingawey ya onleleksab manlapud tawen so sakey a bengatla* a singa abalbaleg ya ules a linen a nibitin ed apatiran suyok, tan dinmapo itan ed arapan ko.+ 6 Sanen nenengnengen kon maong itan, wala ray naimanok ya ayayep ya apatiray sali ra, atap ya ayayep, onkukurong ya ayayep,* tan saray manok. 7 Walay nadngel ko met a boses ya angikuan ed siak: ‘Alagey ka, Pedro, mamakger ka tan mangan ka!’ 8 Balet inkuan ko: ‘Andi, Katawan, lapud agak nin balot angan na marutak a bengatla.’ 9 Diad komaduan pankanawnawa et inkuan na boses a nanlapud tawen: ‘Agmo la tatawagen a marutak iray nilinisan la na Dios.’ 10 Agawa iya ed komatlon pankanawnawa, tan amin iraman a bengatla et ingguyor a papawil ed tawen. 11 Diad saman met a bekta et walay taloran lalaki ya akaalagey diad abung a pampupundoan mi. Imbaki ra na lakin taga Cesarea pian anapen da ak.+ 12 Insan imbagad siak na espiritu a mila ak ed sikara, ya agak balot manduaruwa. Balet akila met ed siak irayan anemiran agagi, tan linma kamid abung na saman a too.

13 “Inistorya tod sikami no panon ton anengneng so anghel ya inmalagey ed abung to ya angikuan: ‘Mangibaki kay lalaki diad Joppe tan patawag moy Simon a manngaran met na Pedro,+ 14 tan ibaga tod sika iray bengatlan kilabanan mo tan say interon sankaabungan mo.’ 15 Balet sanen nansalita ak la, linmeksab ed sikara so masanton espiritu a singa met agawa ed sikatayo diad gapo.+ 16 Diad saman et anonotan ko may salita na Katawan, ya ibabaga to nensaman: ‘Si Juan et nambautismo ed panamegley na danum,+ balet nabautismoan kayo ed panamegley na masanton espiritu.’+ 17 Kanian no inter na Dios ed sikara so ontan met a regalo a singa inter tod sikatayo ya anisia ed Katawan a Jesu-Kristo, siopa ak a sebelan koy Dios?”*+

18 Sanen nadngel da iraya, agla ra kinmontra,* tan inggloria ray Dios, ya inkuan da: “No ontan sirin et inabuloyan met la na Dios a makapambabawi iray aliwan Judio pian nagamoran da so bilay.”+

19 Natan, saramay nitaytayak+ lapud agawan kairapan nisengeg ed impatey nen Esteban et akasabi anggad Fenicia, Ciprus, tan Antioquia, balet saray Judio labat so pinulongan da.+ 20 Anggaman ontan, wala ray arum a lalaki ed sikara a taga Ciprus tan Cirene a linmad Antioquia tan akitongtong irad saray totoon mansasalitay Griego, ya inyaabawag day maong a balita nipaakar ed Katawan a Jesus. 21 Niarum ni, si Jehova* et walad sikara, tan dakdakel so nagmaliw a mananisia tan tinmumbok ed Katawan.+

22 Naamtaan na kongregasyon ed Jerusalem so balita nipaakar ed sikara, tan imbaki ray Bernabe+ ya anggad Antioquia. 23 Sanen sinmabi tan anengneng toy agnaparaan a kaabigan na Dios, sikatoy nanliket tan pinaseseg to ran amin a manmatoor ed Katawan a walaay impapuson determinasyon;+ 24 ta sikatoy maong a too tan napnoy masanton espiritu tan pananisia. Tan dakdakel a totoo so anisia ed Katawan.+ 25 Kanian sikatoy linmad Tarso pian anapen si Saulo.+ 26 Sanen aromog to, sikatoy impila tod Antioquia. Kanian diad interon sakey taon et akitipon irad kongregasyon tan imbangat day dakdakel a totoo, tan diad Antioquia et atawag a Kristiano iray disipulo ed unonan pankanawnawa lapud panangiwanwan na Dios.+

27 Diad saraman ya agew, linmad Antioquia iray propeta+ a nanlapud Jerusalem. 28 Inmalagey so sakey ed sikara a manngaray Agabo+ tan impakabat tod panamegley na espiritu a walay baleg ya eras a magano lan nagawa ed interon dalin,+ a satan et tuan agawa ed panaon nen Claudio. 29 Kanian nandesisyon iray disipulo a mangipawit na tulong+ ed saray agagin manaayam diad Judea, kada sakey unong ed nasarag to,+ 30 tan ontan so ginawa ra, ya impawit da itan ed si Bernabe tan Saulo pian iter dad saray mamatatken.+

12 Diad saman a panaon et pinairap nen Herodes ya ari so arum a membro na kongregasyon.+ 2 Pinatey tod espada+ si Santiago ya agi nen Juan.+ 3 Sanen anengneng ton agustoan itan na saray Judio, inerel to met si Pedro. (Agawa iya ed saray agew na Andi-lebaduran Tinapay.)+ 4 Sikatoy inerel to tan impriso to,+ ya inyawat tod apatiran grupo na saray sundalo a mansusublayan a manbantay, a sanepat so kada grupo, lapud labay ton ipaway* si Pedro diad arapan na saray totoo kayari na Paskua. 5 Kanian walad prisoan si Pedro; balet sikatoy masimsimoon ya impikasi na kongregasyon.+

6 Diad saman a labi antis ya ipaway nen Herodes si Pedro, sikatoy nanaugip ya abalor na duaran gulonggulong diad pegley na duaran sundalo, tan say prisoan et babantayan na saray guardia a walad arap na kapot. 7 Balet akaalagey diman so anghel nen Jehova,*+ tan sinminag so liwawa diad selda na prisoan. Tinapik toy Pedro ed diking pian bangonen to, ya inkuan to: “Alagey kan tampol!” Tan nakal iray gulonggulong ed lima to.+ 8 Inkuan na anghel ed sikato: “Manparaan* ka tan isulong mo ray sandalyas mo.” Ontan so ginawa to. Insan inkuan to ni: “Isulong moy ilalatop mon kawes, tan tumbok kad siak.” 9 Tan sikatoy pinmaway tan tinmumbok, balet agto amta a tua so ginawa na anghel. Abaloan to et sikatoy makakanengneng na pasingawey. 10 Nen alabsanan da lay unona tan komaduan grupo na guardia, akasabi rad balatyang a puerta a mamaarap ed syudad, tan linmukas iyan bukor. Kapaway da et nanakar irad sakey a karsada, tan kabebekta et sinmian lad sikato imay anghel. 11 Sanen atebek la nen Pedro so nagagawa, inkuan to: “Segurado ak la natan ya imbaki nen Jehova* so anghel to tan inliktar to ak ed lima nen Herodes tan ed amin a labay na saray Judio a nagawad siak.”+

12 Nen atebek to itan, sikatoy linmad abung nen Maria ya ina nen Juan a tatawagen met a Marcos,+ a diman et walay dakel a nantitipon tan manpipikasi. 13 Sanen sikatoy tinmoktok diad puerta, dinmago so biin lingkor a manngaray Roda pian nengnengen no siopay ontatawag. 14 Sanen abosesan toy Pedro, agto la alukasan so puerta lapud liket to, noag ingen batik ed loob tan imbaga ton walad puerta si Pedro. 15 Inkuan dad sikato: “Natatapis ka la.” Balet impasoot to a tuay ibabaga to. Inkuan da: “Anghel to man sirin.” 16 Balet wadman nin siansia si Pedro ya ontotoktok. Sanen nilukasan day puerta, sikatoy anengneng da tan mankelkelaw ira. 17 Balet sininyasan to ran mandeen ira tan inistorya ton amin ed sikara no panon a sikatoy impaway nen Jehova* ed prisoan, tan inkuan to: “Ipasabi yo iraya ed si Santiago+ tan ed saray agagi.” Diad saman et sikatoy inmalis la tan linmad sananey a pasen.

18 Natan sanen agew la, agulon maong iramay sundalo no antoy agawad si Pedro. 19 Sikatoy impaanap nen Herodes, tan sanen agda naromog, tinepetan ton maong iramay guardia tan impadusa to ra;+ tan manlapud Judea et linmad Cesarea si Herodes tan nanayam diman ya agano.

20 Natan et ampetang so ulo to* ed saray totoo ed Tiro tan Sidon. Kanian nankakasakey iran linmad sikato, tan kayari ran kinombinse si Blasto a mangaasikaso ed saray gagawaen diad abung na ari* pian tulongan to ra, akiareglo ra ed ari lapud say panlalapuan na naakan na nasyon da et diad dalin na ari. 21 Diad sakey ya espisyal ya okasyon, nansulong si Herodes na kawes na ari tan yinmurong ed panangukoman tan nampaliwawa ed arapan na totoo. 22 Insan inyeyag na saray nantitipon a totoo: “Boses na dios, aliwan boses na too!” 23 Tampol a sikatoy kinabil na anghel nen Jehova,* lapud inala toy gloria a parad Dios, tan sikatoy kinan na saray bigis tan inatey.

24 Balet nantultuloy a binmulaslas tan linmaknab so salita nen Jehova.*+

25 Nipaakar ed si Bernabe+ tan si Saulo, sanen niiter da lan amin iray nakaukolan a tulong ed Jerusalem,+ pinmawil irad Antioquia tan impila ray Juan,+ a manngaran met na Marcos.

13 Natan diad Antioquia et wala ray propeta tan managbangat ed kongregasyon:+ si Bernabe, si Simeon a tatawagen a Negro, si Lucio a taga Cirene, si Manaen a nanaral a kaiba nen Herodes a manuley na distrito, tan si Saulo. 2 Sanen manlilingkor ira ed si Jehova* tan manaayunal ira, inkuan na masanton espiritu: “Ibiig yo parad siak si Bernabe tan si Saulo+ pian gawaen da so kimey ya anawagan kod sikara.”+ 3 Insan nanayunal tan nampikasi ira tan intapew dad sikara iray lima ra tan pinaonla da la ra.

4 Kanian linmad Seleucia irayan lalaki ya imbaki na masanton espiritu, tan manlapu diman et nambarko ran amaarap ed Ciprus. 5 Kasabi rad Salamis, impulong da so salita na Dios diad saray sinagoga na saray Judio. Kaiba ra met si Juan bilang lingkor.*+

6 Sanen aliber da lay interon isla anggad Pafos, aromog day sakey a Judion laki a manngaray Bar-Jesus, a managsalamangka tan palson propeta. 7 Sikatoy kaiba na prokonsul* a si Sergio Paulo, sakey ya intelihentin laki. Impatawag na sayan laki si Bernabe tan Saulo lapud labalabay toy ondengel ed salita na Dios. 8 Balet sinmumpad sikara si Elimas* a managsalamangka (ta ontan so kabaliksan na ngaran to), lapud labay ton iyarawi ed pananisia so prokonsul. 9 Insan sikatoy ninengneng a maong nen Saulo, a tinawag met a Pablo, a napnoy masanton espiritu, 10 tan inkuan to: “O sikan too a napno na amin a klase na panagsaol tan amin a klase na kaugsan, anak na Diablo,+ tan kabusol na amin a bengatlan matunong, agmo ta tundaan a pikeweten iray maptek a dalan nen Jehova?* 11 Dusaen ka nen Jehova,* tan nabulag ka tan mabayag ya agmo nanengneng so sinag na agew.” Tampol a sinmakbong ed sikato so makapal a kelpa tan kabilungetan, tan nananap na mangitabin ed sikato. 12 Tan sanen anengneng na prokonsul so agawa, sikatoy nagmaliw a mananisia lapud nikelawan ed bangat nen Jehova.*

13 Natan et nambarko manlapud Pafos si Pablo tan saray kakaiba to tan akasabi rad Perga diad Pamfilia. Balet tinaynan ira nen Juan+ tan pinmawil ed Jerusalem.+ 14 Anggaman ontan, intultuloy day nambiahe manlapud Perga tan akasabi ra ed Antioquia diad Pisidia. Tan linmoob ira ed sinagoga+ diad agew na Sabaton, tan yinmurong ira. 15 Kayari na impanbasa ed Ganggan+ tan sulsulat na saray Propeta diad arap na totoo, oniay impaibaga na saray manangasikaso na sinagoga ed sikara: “Agagi, no walaan kayoy antokaman a salitan makapaseseg ed saray totoo, ibaga yo.” 16 Kanian inmalagey si Pablo, tan sininyasan to ra, ya inkuan to:

“Lalaki, sikayo ran Israelita tan sikayo met ya ontatakot ed Dios, dengel kayo. 17 Say Dios na saray totoo na Israel so amili ed inmuunan atateng tayo, tan pinabiskeg to ra sanen manaayam ira bilang dayo ed dalin na Ehipto tan impaway to ra ditan diad panamegley na mabiskeg a pakapanyari.*+ 18 Tan diad loob na manga 40 taon et inanosan to ra diad kalawakan.+ 19 Kayari ton dineral so pitoran nasyon ed dalin na Canaan, inter tod sikara so dalin bilang tawir da.+ 20 Agawa itan ya amin diad loob na manga 450 taon.

“Kayari na saya et inikdan to ra na saray ukom anggad panaon nen propeta Samuel.+ 21 Balet kayari na saman et kinerew dan nawalaan ira na ari,+ kanian inter na Dios ed sikara si Saul ya anak nen Kis, sakey a laki ed tribu nen Benjamin,+ diad loob na 40 taon. 22 Kayarin inekal na Dios si Saul, tinuro toy David bilang ari+ ra, a sikato imay tinasian to, ya inkuan to: ‘Aromog koy David ya anak nen Jesse,+ a sakey a lakin makapaliket ed pusok;+ gawaen to so amin a panlabayan ko.’ 23 Manlapud ilalak* na sayan too et inter na Dios ed Israel so manangiliktar, si Jesus, unong ed sipan to.+ 24 Sakbay na insabi to, impulong nen Juan ed amin a totoo na Israel so bautismo bilang simbolo na panagbabawi.+ 25 Balet sanen magano lan nasumpal nen Juan so ministeryo to, ibabaga to: ‘Siopa ak unong ed iisipen yo? Aliwan siak iman. Balet walay sakey ya onsabin katumbokan ko ya agak makanepegan a mangukbar ed sandalyas to.’+

26 “Agagi, sikayo ran kailalakan ed pamilya nen Abraham tan saray arum nid limog yo ya ontatakot ed Dios, sayan mensahe na kilalaban et nipasabi lad sikatayo.+ 27 Ta sayan too et ag-abidbir na saray manaayam ed Jerusalem tan saray manuley da, balet sanen uukomen da, sinumpal da iray sinalita na saray Propeta,+ a babasaen a maksil kada sabaton. 28 Anggano anggapoy aromog dan sengegay pamateyan dad sikato,+ kinerew dad si Pilato a sikatoy pateyen.+ 29 Tan sanen asumpal da lay amin a bengatlan nisulat nipaakar ed sikato, sikatoy inleksab dad poste* tan imponpon dad sakey a lubok.*+ 30 Balet sikatoy pinaoli na Dios manlapud inaatey,+ 31 tan diad dakel ya agew et sikatoy nampanengneng ed saramay kaiba ton tinmatdang ed Jerusalem manlapud Galilea. Sikara natan so mantatasi ed totoo nipaakar ed sikato.+

32 “Kanian iyaabawag mid sikayo so maong a balita nipaakar ed samay insipan na Dios ed inmuunan atateng tayo. 33 Sigpot a tinoor itan na Dios ed sikatayo ran ananak da, diad impamaoli tod si Jesus;+ unong a nisulat diad komaduan salmo: ‘Sika so ana’ko; diad sayan agew et nagmaliw ak ya amam.’+ 34 Tan say katuaan a sikatoy pinaoli To manlapud inaatey, ya aglan balot ompawil ed kabubulok, et impasakbay To ed onian balikas: ‘Ipatnag kod sikayo so matoor a panangaro ya insipan kod si David, a satan et napanmatalkan.’*+ 35 Kanian inkuan met na sananey a salmo: ‘Samay matoor ed sika et agmo abuloyan a nanengneng toy kabubulok.’+ 36 Nanlingkor ed Dios si David* legan na impanbilay to, naugip ed patey, imponpon a kaiba na inmuunan atateng to, tan abulok so laman to.+ 37 Balet samay pinaoli na Dios et ag-abulok so laman to.+

38 “Kanian ipupulong kod sikayo, agagi, a diad panamegley na impatey nen Jesus et naperdona iray kasalanan yo,+ 39 tan saramay manisia et niyabawag ya andiay kasalanan diad panamegley to.+ Balet agkayo niyabawag ya andiay kasalanan diad panamegley na Ganggan nen Moises.+ 40 Seguroen yo sirin ya agnagawa ed sikayo imay walad sulsulat na saray Propeta: 41 ‘Nengneng yo ray gagawaen ko, sikayo ran mababalaw, tan pankelawan yo, tan naandi kayo, ta diad saray agew yo et manggagawa ak na sakey a kimey ya agyon balot panisiaan anggano detalyado nin isalaysay ed sikayo.’”+

42 Natan sanen ompapaway la ray totoo, akikasi ran salitaen da lamet irayad sikara diad ontumbok a Sabaton. 43 Kanian sanen asumpal la so pantitipon ed sinagoga, dakel ed saray Judio tan saray proselita a nandayew ed Dios so tinmumbok ed si Pablo tan Bernabe, tan legan dan mitotongtong ed sikara et pinaseseg da ran mansiansian makanepegan ed agnaparaan a kaabigan na Dios.+

44 Diad tinmumbok a Sabaton et nantitipon so intero lawarin syudad pian ondengel ed salita nen Jehova.* 45 Sanen anengneng na saray Judio iray totoo, nanimon iran maong tan kinontra day Pablo tan minudmora day imbaga to.+ 46 Diad saman et makmakpel a nansalita ed sikara si Pablo tan Bernabe: “Kaukolan a nipulong nin unona ed sikayo so salita na Dios.+ Balet lapud agyo itan aawaten tan agyo ipapanengneng a makanepegan kayod bilay ya andi-anggaan, kanian diad saray aliwan Judio so nila mi.+ 47 Ta oniay ingganggan ed sikami nen Jehova:* ‘Tinuro ta ka bilang sakey a liwawa na saray nasyon, pian sika so onkanan kiliktaran anggad saray sampot na dalin.’”+

48 Sanen nadngel iya na saramay aliwan Judio, nanliket ira tan inggloria ray salita nen Jehova,* tan nagmaliw a mananisia iramay amin a walaan na dugan kipapasen na puso parad bilay ya andi-anggaan. 49 Ontan met, say salita nen Jehova* et nantultuloy a kinmayat ed saman ya interon pasen. 50 Balet sinugsogan na saray Judio iray gagalangen a bibiin matakot ed Dios tan saray manunaan a lalaki ed syudad, tan pinasegsegang+ day Pablo tan Bernabe tan imbantak da rad paway na syudad. 51 Kanian impagpag dan dua iray dabok na saray sali ra* tan linma rad Iconio.+ 52 Tan saray disipulo et nantultuloy a napno na gayaga+ tan masanton espiritu.

14 Natan diad Iconio et linmoob ed sinagoga na saray Judio si Pablo tan Bernabe tan alay abig so impansalita ra kanian dakdakel a Judio tan Griego so nagmaliw a mananisia. 2 Balet saray Judio ya ag-anisia et sinugsogan tan inimpluensyaan da ray aliwan Judio pian busolen da iray agagi.+ 3 Kanian nambayag ni rad Iconio tan pinabiskeg ira nen Jehova* pian makpel iran makapansalita nipaakar ed agnaparaan a kaabigan to, ya inabuloyan to ran manggawa na saray tanda tan pakelaw.+ 4 Balet naapag so karaklan a walad syudad; say arum et dinmapag ed saray Judio balet say arum et diad saray apostol. 5 Sanen si Pablo tan Bernabe et implanon maltratoen tan tupaken na saray aliwan Judio tan saray Judio pati saray manuley da,+ 6 nipaamta iya ed sikara, kanian batik ira ed saray syudad na Licaonia, Listra tan Derbe, tan diad pasen a walad kaliberliber.+ 7 Intultuloy dan inyabawag diman so maong a balita.

8 Natan diad Listra et walay sakey a lakin lupoy. Sikatoy piley manlapu lad inkiyanak to tan agmakaakar. 9 Sikatoy akayurong tan ondedengel ed si Pablo legan a mansasalita. Sanen sikatoy ninengneng nen Pablo tan atebek ton walay pananisia na laki pian onabig,+ 10 inkuan tod maksil a boses: “Alagey ka.” Kanian sikatoy inmalagey tan nanakar.+ 11 Sanen anengneng na saray totoo so ginawa nen Pablo, inyeyag da ed salitan Licaonia: “Nagmaliw a singa totoo iray dirios tan linmeksab ira ed sikatayo!”+ 12 Tan si Bernabe et tinawag dan Zeus, balet si Pablo et Hermes, lapud sikato so manunan mansasalita. 13 Tan say saserdote nen Zeus, a say templo to et walad lolooban na syudad, et angiyakar na saray kalakian a baka tan saray koronan rosas diad saray puerta tan labay toy mangiyapay na saray bagat a kaiba iray totoo.

14 Balet sanen naamtaan itan na saray apostol a si Bernabe tan Pablo, pinilat da ray kawes da tan linma ran tampol ed pegley na totoo, tan inyeyag da: 15 “Akin et oniay gagawaen yo? Totoo kami met a walaan na saray kakapuyan a singa sikayo.+ Tan iyaabawag mid sikayo so maong a balita, pian taynan yo irayan andi-kakanaan a bengatla tan dayewen yo so mabilay a Dios, a nanggawa ed tawen tan say dalin tan say dayat tan amin a bengatlan walad saratan.+ 16 Diad apalabas iran henerasyon et inabuloyan toy amin a nasyon a gawaen day labay da,+ 17 balet sikatoy angiter na pantasi+ diad panamegley na saray maong a ginawa to, ya iikdan to kayoy uran manlapud tawen tan mabunga iran panaon,+ a pepeneken to kayoy naakan tan paliliketen toy kapusoan yo.”+ 18 Balet anggano imbaga da iraya, nairapan iran mamatunda ed saray totoo a mangiyapay na bagat ed sikara.

19 Balet sinmabi iray Judio manlapud Antioquia tan Iconio tan kinombinse da ray totoo,+ tan tinutupak day Pablo tan inggayugoy dad paway na syudad, ya inisip dan sikatoy inatey la.+ 20 Anggaman ontan, sanen sikatoy pinaliberan na saray disipulo, sikatoy inmalagey tan linmoob ed syudad. Diad tinmumbok ya agew et sikatoy inmalis a kaiba nen Bernabe tan linma rad Derbe.+ 21 Kayari ran inyabawag so maong a balita diad satan a syudad tan angibangat na dakel a totoo pian magmaliw a disipulo, pinmawil ira ed Listra, Iconio, tan diad Antioquia. 22 Pinabiskeg da iray disipulo*+ ditan tan pinaseseg da ran mansiansia ed pananisia, ya inkuan da: “Nepeg itayon ondalan ed dakel ya irap pian makaloob itayo ed Panarian na Dios.”+ 23 Niarum ni, anuro ra na mamatatken diad kada kongregasyon,+ tan kayari ran nampikasi tan nanayunal,+ inmatalek da rad si Jehova,* a sikato so anisiaan da.

24 Insan niliber day Pisidia tan sinmabi rad Pamfilia,+ 25 tan kayari ran inyabawag so salita na Dios diad Perga, linma rad Atalia. 26 Manlapu diman et nambarko ran amaarap ed Antioquia, a ditan et nipanengneng ed sikara so agnaparaan a kaabigan na Dios parad kimey ya asumpal da la natan.+

27 Sanen akasabi la rad Antioquia tan atipon da lay kongregasyon, insalaysay da so dakel a ginawa na Dios diad panamegley da, ya inlukas to lad saray nasyon so puerta a mangitonton ed pananisia.+ 28 Kanian nansiansia ni ra diman pian nakaulop da ray disipulo.

15 Natan et wala ray lalakin nanlapud Judea a mangibabangat ed saray agagi: “Agkayo nilaban no agkayo nasegat unong ed ganggan nen Moises.”+ 2 Balet kayari na andukey ya impikatunongan tan impisuppiatan ed sikara nen Pablo tan Bernabe, nandesisyon iray agagi ya ibaki si Pablo, Bernabe, tan say arum ed sikara ya onla ed saray apostol tan mamatatken ed Jerusalem+ pian pantongtongan iyan isyu.*

3 Kanian sanen nipatnubang la ra na kongregasyon, nambiahe irayan lalaki tan sinmamar ira ed Fenicia tan Samaria, tan inistorya day nipaakar ed impakakomberte na saray aliwan Judio, a sengegay panliket a maong na amin ya agagi. 4 Kasabi rad Jerusalem, maabig so impangawat ed sikara na kongregasyon tan saray apostol tan saray mamatatken, tan insalaysay da so dakel a ginawa na Dios ed panamegley da. 5 Balet inmalagey so arum ed saramay mananisia a datin membroy sekta na saray Fariseo tan inkuan da: “Kaukolan iran segaten tan bilinen iran mangunor ed Ganggan nen Moises.”+

6 Kanian nantitipon iray apostol tan saray mamatatken pian pantongtongan da iya. 7 Kayari na abayag ya impantongtong,* inmalagey si Pedro tan imbaga tod sikara: “Agagi, kabkabat yo a manlapu la nen inmuuna iran agew et pinili ak na Dios diad sikayo pian diad panamegley ko et narengelan na saray aliwan Judio so salita na maong a balita tan manisia ra.+ 8 Tan say Dios, a makaamta na walad puso,+ so nantasi ed impangiter tod sikara na masanton espiritu,+ a singa ginawa to met ed sikatayo. 9 Tan parehoy impangipasen tod sikatayo tan ed sikara,+ tan nilinisan toy kapusoan da lapud pananisia ra.+ 10 Akin sirin et susuboken yoy Dios, ya ipapasakbat yod saray disipulo so sakey a pako+ ya agnayarian a sakbaten na inmuunan atateng tayo odino sikatayo?+ 11 Balet natan, walaan itayoy pananisia a nilaban itayo ed panamegley na agnaparaan a kaabigan na Katawan a Jesus+ a singa sikara.”+

12 Diad saman et dinmeen iran amin, tan dinmengel irad si Bernabe tan Pablo legan dan isasalaysay iray dakel a tanda tan pakelaw a ginawa na Dios ed limog na saray nasyon diad panamegley da. 13 Sanen asumpal la ran nansalita, imbaga nen Santiago: “Agagi, dengel yo ak. 14 Malinlinew ya insalaysay nen Simeon*+ no panon ya aawaten la natan na Dios iray aliwan Judio pian manpili ed sikara na totoon parad ngaran to.+ 15 Tan mitunosan ed saya iray salita na saray Propeta, unong a nisulat: 16 ‘Kayari na sarayan bengatla et ompawil ak tan ipaalagey ko so nagban tolda* nen David; tan ipaalagey ko lamet iray geray na satan tan apigeren ko itan, 17 pian saramay akera et masimoon dan anapen si Jehova,* pati saray totoo na amin a nasyon, saray totoon tinawag ed ngaran ko, inkuan nen Jehova,* a manggagawad sarayan bengatla,+ 18 ya amta la nensaman.’+ 19 Kanian say desisyon* ko et agla pamproblemaen iramay aliwan Judio ya ontutumbok ed Dios,+ 20 noagta sulatan tayo ra ya arawian da ray bengatlan adutakan na saray idolo,+ say seksual ya imoralidad,*+ saray abikkel ya ayayep,* tan say dala.+ 21 Ta manlapu la nensaman et naynay a walay mangipupulong nipaakar ed si Moises diad kada syudad, lapud babasaen a maksil iray insulat to diad saray sinagoga kada sabaton.”+

22 Diad saman, nandesisyon iray apostol tan saray mamatatken pati say interon kongregasyon a mangibaki ra na pinilin lalaki ed limog da ya onlad Antioquia, a kaiba nen Pablo tan Bernabe; imbaki ray Judas a tinawag a Barsabas tan si Silas,+ a lalakin mangidadaulo ed saray agagi. 23 Oniay walad sulat ya impawit dad sikara:

“Saray apostol tan saray mamatatken, ya agagi yo, parad saramay agagi ed Antioquia,+ Sirya, tan Cilicia a nanlapud saray nasyon: Pinablin Agagi! 24 Lapud naamtaan min wala ray nanlapu dia a manggugulo ed sikayo diad ibabaga ra,+ a dederalen da kayo,* anggano anggapon balot so inter min bilin ed sikara, 25 nankakasakeyan mi so mamili na lalaki ya ibaki ed sikayo a kaiba na saray inad-aro tayo, si Bernabe tan si Pablo, 26 ya inrisga ray bilay* da lapud ngaran na Katawan tayon Jesu-Kristo.+ 27 Imbaki mi sirin si Judas tan si Silas, pian nisalaysay da met iraya ed sikayo.+ 28 Ta tinulongan kami na masanton espiritu+ pian makapandesisyon kami ya agla aruman so sasakbaten yo, nilikud ed sarayan nakaukolan: 29 ya itultuloy yon arawian iray bengatlan imbagat ed saray idolo,+ say dala,+ saray abikkel ya ayayep,*+ tan say seksual ya imoralidad.*+ No maalwar yon paliisan irayan bengatla, onaligwas kayo. Mansiansian maabig komon so kipapasen yo!”

30 Kanian sanen nibaki la irayan lalaki, linma rad Antioquia, tan tinipon day dakel a disipulo tan inter dad sikara so sulat. 31 Kayari ran binasa itan, aliketan ira ed panamaseseg. 32 Tan lapud propeta met si Judas tan Silas, pinaseseg da iray agagi ed panamegley na dakel a paliwawa tan pinabiskeg da ra.+ 33 Kayari na aganon impanayam diman, pinasipot ira na saray agagi tan pinirawat dan makapawil iran mareen ed saramay angibaki ed sikara. 34 *—— 35 Balet nansiansia nid Antioquia si Pablo tan Bernabe, tan nambabangat ira tan impulong day maong a balita nipaakar ed salita nen Jehova* a kaiba so dakel ya agagi.

36 Kayari pigaran agew, inkuan nen Pablo ed si Bernabe: “Ompawil ta la natan* tan bisitaen ta ray agagi ed kada syudad ya angipulongan tay salita nen Jehova* pian nanengneng tay kipapasen da.”+ 37 Pursigido si Bernabe ya ipilay Juan, a tinawag a Marcos.+ 38 Balet aglabay nen Pablo ya ipila ra, ta tinaynanan to rad Pamfilia tan agto la ra inibaan ed kimey.+ 39 Lapud saya et walay agawan ampetang a sangsangan, kanian nansian iran dua; tan impila nen Bernabe+ si Marcos tan nambarko ran amaarap ed Ciprus. 40 Pinili nen Pablo si Silas tan linma la ra kayarin impikasi na agagi ya ipatnag ed sikato nen Jehova* so agnaparaan a kaabigan.+ 41 Niliber toy Sirya tan Cilicia, a pinapabiskeg to iray kongregasyon.

16 Kanian sikatoy akasabi ed Derbe tan ontan met ed Listra.+ Tan wadman so disipulo a manngaray Timoteo,+ a say ina to et mananisian Judio balet say ama to et Griego, 2 tan alay abig so ibabaga na saray agagi ed Listra tan Iconio nipaakar ed sikato. 3 Imbaga nen Pablo a labay ton ipilay Timoteo, kanian sikatoy intagar to balet sinegat to ni lapud saray Judio ed saraman a pasen,+ ta kabkabat dan amin a say ama to et Griego. 4 Legan iran manbiabiahe diad saray syudad, ipapasabi rad saray agagi a nepeg dan unoren iray totontonen a denisisyonan na saray apostol tan saray mamatatken a walad Jerusalem.+ 5 Lapud saya, nantultuloy a binmiskeg ed pananisia iray kongregasyon tan ondarakel so bilang da ed kada agew.

6 Niliber da met so Frigia tan say dalin na Galacia,+ lapud ag-ira inabuloyan na masanton espiritu ya ipulong so salita diad probinsya na Asia. 7 Niarum ni, sanen akasabi la rad Misia, nanggawa ray paraan pian makaonla rad Bitinia,+ balet ag-ira inabuloyan na espiritu nen Jesus. 8 Kanian nilabsanan* day Misia tan linma rad Troas. 9 Tan diad labi et akanengneng si Pablo na pasingawey—walay lakin taga Macedonia ya akaalagey tan mikakasi ed sikato, ya inkuan to: “Gala dia ed Macedonia tan tulongan mo kami.” 10 Kayari ton anengneng so pasingawey, sinali mi so onlad Macedonia, a ninonot min tinawag kami na Dios pian iyabawag ed sikara so maong a balita.

11 Kanian nambarko kami manlapud Troas tan dinmiretso kami ed Samotracia, balet diad tinmumbok ya agew et linma kamid Neapolis; 12 tan manlapu diman et linma kamid Filipos,+ a syudad ya uuleyan na Roma tan manunan syudad ed distrito na Macedonia. Pigaran agew kamid sayan syudad. 13 Diad agew na Sabaton et linma kamid paway na puerta na syudad diad abay na ilog, ta iisipen min wala diman so pasen a pampikasian, tan yinmurong kami tan akitongtong kamid saramay wadman a bibiin nantitipon. 14 Tan ondedengel so sakey a biin manngaray Lidia, a managlako na kolor-uben abel.* Sikatoy taga syudad na Tiatira+ tan mandadayew ed Dios, tan nilukasan nen Jehova* so puso to pian manimano ed saray ibabaga nen Pablo. 15 Natan sanen sikato tan say sankaabungan to et abautismoan,+ sikatoy akikasi ed sikami: “No ipapasen yo ak a matoor ed si Jehova,* gali tan tuloy kayod abung ko.” Tan pinilit to kamin onla.

16 Natan sanen onla kami lad pasen a pampikasian, walay inmabet ed sikamin lingkor a bii ya aselepan na sakey ya espiritu, sakey a demonyo na panagparles.+ Sikatoy napipinabangan a maong na saray katawan to lapud panagparles to. 17 Tumbotumbok ed sikami di Pablo iyan bii, tan oniay ibabando to: “Sarayan lalaki et ariripen na Sankatagyan a Dios+ tan ipupulong dad sikayo so dalan na kilalaban.” 18 Pigay agew lan oniay gagawaen to. Diad saman et agla naanosan nen Pablo kanian inarap to tan imbaga tod espiritu: “Diad ngaran nen Jesu-Kristo, paway kad sikato.” Tan pinmaway itan ed saman a mismon oras.+

19 Sanen anengneng na saray katawan to a naandi la imay pinanabangan da,+ inerel day Pablo tan Silas tan inggayugoy da ra diad tindaan pian iyakar ed saray manuley.+ 20 Sanen niyarap da la rad saray mahistrado na syudad, inkuan da: “Guguloen na sarayan lalaki so syudad tayo.+ Judio ra, 21 tan ibabangat da iray kustombre ya agtayo manepeg a tumboken odino gawaen, lapud Romano itayo.” 22 Tan nankakasakey iray totoo a sinmumpad sikara, tan impapilat na saray mahistrado na syudad iray kawes da, insan impalewet da ra.+ 23 Kayari da ran nilelewet, impriso da ra tan binilin day guardia a bantayan to ran maong.+ 24 Lapud ontan so bilin ed sikato, inyan to rad sankadaleman a prisoan tan sinigpit tod panangipangawan iray sali ra.

25 Balet diad pegley-labi et manpipikasi si Pablo tan Silas tan mangakansion iray panangidayew ed Dios,+ tan dedengelen ira na saray priso. 26 Insan biglan yinmegyeg a maksil, kanian agalaw iray pundasyon na prisoan. Tampol met ya alukasan so amin a kapot, tan naukbar iray balor dan amin.+ 27 Sanen abangon so guardia tan anengneng ton alukasan iray kapot na prisoan, inuyos toy espada to tan manbikkel la lawari, lapud abaloan to et akablos iray priso.+ 28 Balet inyeyag nen Pablo: “Agmo sasakitan so laman mo, ta wadia kamin amin!” 29 Kanian sikatoy nampaala na silew tan batik ed loob, tan sikatoy manggiwgiw a dinmakmomo ed arapan nen Pablo tan Silas. 30 Impaway to ra tan inkuan to: “Kakatawan, antoy nepeg kon gawaen pian nilaban ak?” 31 Inkuan dad sikato: “Manisia kad Katawan a Jesus, tan nilaban ka, sika tan say sankaabungan mo.”+ 32 Insan impaliwawa rad sikato so salita nen Jehova* tan ed amin a wadman ed abung to. 33 Tan diad saman ya oras ed labi et intagar to ra tan inurasan to iray sugat da. Insan tampol iran abautismoan ya amin, sikato tan say sankaabungan to.+ 34 Pinaloob to rad abung to tan imparaanan to ray naakan da, tan sikatoy nanliket a maong pati say interon sankaabungan to lapud sikatoy manisia lad Dios.

35 Sanen kabuasan la, imbaki na saray mahistrado na syudad iray managguardia ra pian mangibaga: “Ibulos yo iraman a totoo.” 36 Kanian impasabi iya na guardia ed si Pablo, ya imbaga to: “Angibaki na lalaki iray mahistrado na syudad pian ibulos da kayon dua. Kanian paway kayo la natan tan niwala komon ed sikayo so kareenan.” 37 Balet inkuan nen Pablo ed sikara: “Nilewet da kami ed arapan na totoo ya agkami ni asentensiaan, anggano Romano kami,+ tan impriso da kami. Insan natan et papataynanen da kamin anggapoy makaamta? Andi! Sikaran mismo so onla dia a mangipaway ed sikami.” 38 Impasabi iraya na saray managguardia ed saray mahistrado na syudad. Tinmakot iray mahistrado sanen nadngel dan Romano iraman a totoo.+ 39 Kanian linma ra tan akikasi rad sikara, tan sanen nipaway da la ra, kinerew da ya ontaynan la rad syudad. 40 Balet kapaway dad prisoan, linma rad abung nen Lidia; tan sanen anengneng da iray agagi, pinaseseg da ra+ insan la ra tinmaynan.

17 Natan et nambiahe ra a dinmalan ed Amfipolis tan Apolonia tan akasabi rad Tesalonica,+ a diman et walay sinagoga na saray Judio. 2 Kanian unong a niyugali la nen Pablo+ et sikatoy linmoob diman, tan diad taloran nantutumbokan a sabaton et sikatoy akikatunongan ed sikara manlapud Kasulatan,+ 3 ya impaliwawa tan pinaneknekan tod panamegley na saray sulsulat a say Kristo et kaukolan a manirap+ tan onoli manlapud inaatey,+ ya inkuan to: “Saya so Kristo, sayan Jesus ya ipupulong kod sikayo.” 4 Lapud saya et nagmaliw a mananisia so arum ed sikara tan akila rad si Pablo tan Silas,+ tan ontan met so ginawa na dakerakel a Griego a mandadayew ed Dios, a kaiba so dakel a maimpluensyan bibii.

5 Balet lapud angimon iray Judio,+ tinipon da so pigaran mauges a lalaki ya akar-akar labat ed tindaan, tan anugyop ira na sakey a grupo tan ginulo ray syudad. Nilooban day abung nen Jason tan inanap day Pablo tan Silas pian awiten da rad saray magulon totoo. 6 Sanen agda ra aromog, inggayugoy day Jason tan say pigaran agagi pian awiten da rad saray manuley na syudad, ya iyeeyag da: “Wadia la iramay lalakin manggugulo ed mundo,+ 7 tan sayan Jason so amarawes ed sikara. Susumpaen na sarayan amin a totoo iray ganggan na Cesar, ya ibabaga ran walay sananey ya ari, si Jesus.”+ 8 Agulo iray totoo tan saray manuley na syudad sanen nadngel da iraya; 9 tan sanen akala la ray magenap a garantiya* ed si Jason tan ed arum ni ra, imbulos da ra.

10 Diad saman a labi et tampol ya imbaki na saray agagi si Pablo tan Silas diad Berea. Kasabi ra et linmoob irad sinagoga na saray Judio. 11 Magmaong so kanonotan na saray Judio ed Berea nen saramay walad Tesalonica, ta akaparaan a maong so nonot dan angawat ed salita, a maalwar dan uusisaen so Kasulatan ya inagew-agew pian naseguro da no kasin tua iray nadngel da. 12 Kanian dakel ed sikara so nagmaliw a mananisia, ontan met ed dakel a gagalangen a Griegon bibii tan pigaran lalaki. 13 Balet sanen akabatan na saray Judio ed Tesalonica a say salita na Dios et inyabawag met nen Pablo diad Berea, linma ra met diman pian sugsogan tan guloen iray totoo.+ 14 Diad saman et tampol a pinaonla na saray agagi si Pablo anggad baybay,+ balet tinmilak ni si Silas tan si Timoteo. 15 Balet saramay angipatnubang ed si Pablo et akila ya anggad Atenas, tan kayari to ran binilin a patumboken da lan tampol ed sikato si Silas tan Timoteo,+ sinmipot la ra.

16 Natan legan ya aalagaren ira nen Pablo diad Atenas, sikatoy naalipanesan diad impakanengneng tod syudad a napno na saray idolo. 17 Kanian sikatoy akikatunongan ed saray Judio tan ed arum nin totoo a mandadayew ed Dios diad sinagoga tan diad saramay inagew-agew a nababanaan tod tindaan. 18 Balet akisuppiatan ed sikato so pigara ed saray pilosopon Epicureo tan Estoico, tan ibabaga na arum: “Antoy ibabaga na sayan malabir?” Say imbaga na arum: “Sikatoy singa sakey a managpulong na agkabat iran dirios.” Imbaga da iya ta iyaabawag toy maong a balita nipaakar ed si Jesus tan say kioli.+ 19 Kanian sikatoy inerel da tan inyakar dad Areopago,* ya inkuan da: “Ibagam pad sikami no anto iyan balon bangat a sasalitaen mo? 20 Ta wala ray ibabagam a duma ed pakadngel mi, tan labay min naamtaan no antoy kabaliksan na saraya.” 21 Diad tua, amin a taga Atenas tan saray dayon manaayam* diman et anggapoy arum a panguusaran day libren panaon da noag say pangibaga odino pandengel na balon bengatla. 22 Inmalagey natan si Pablo ed pegley na Areopago+ tan inkuan to:

“Lalakin taga Atenas, nanenengneng kod amin a gagawaen yo a mas matakot kayo ed saray dirios* nen say arum.+ 23 Singa bilang, legan ya ondadalan ak tan iimanoen kon maong iray dadayewen yo, anengneng koy sakey ya altar a walay akasulat ‘Parad Sakey a Dios ya Agkabat.’ Kanian samay agyo kabat a dadayewen yo, saya so ipupulong kod sikayo. 24 Say Dios a nanggawa na mundo tan amin a bengatlan wadia, say Katawan na tawen tan dalin,+ et agmanaayam ed saray templo a ginawa na lima;+ 25 tan agto met nakaukolan a sikatoy panserbian na totoo a singano walay nakaukolan to,+ lapud sikaton mismo so mangiiter ed amin a totoo na bilay tan linawa+ tan amin a bengatla. 26 Tan manlapud sakey a too+ et ginawa toy amin a nasyon na totoo pian manayam diad interon dalin,+ tan inggeter to iray aturon panaon tan saray ketegan na panayaman na totoo,+ 27 pian anapen day Dios. Ta sikatoy naromog da no sikatoy pansagpotan dan anapen.+ Diad tua et sikatoy ag-arawi ed balang sakey ed sikatayo. 28 Ta lapud sikato et walay bilay tayo tan onggagalaw itayo tan wala itayo, a singa imbaga na arum ed saray manag-anlong ed limog yo, ‘Ta ananak to itayon amin.’

29 “Kanian lapud ananak itayo na Dios,+ agtayo nepeg ya isipen a say Dios et singa balitok odino pilak odino bato, singa sakey a bengatlan inukit lapud dunong tan desinyo na too.+ 30 Tua ya inabuloyan na Dios ya onlabas iray panaon a saray totoo et anggapoy amta rad sikato;+ balet iyaabawag tod amin a totoo natan ed inerman a pasen a nepeg day magbabawi. 31 Ta inggeter to so sakey ya agew pian ukomen+ toy mundo diad patas a paraan ed panamegley na toon tinuro to, tan sikatoy angiter na garantiya ed amin a totoo diad impamaoli tod sikato manlapud inaatey.”+

32 Natan sanen nadngel da so nipaakar ed kioli na saray inaatey, sikatoy binalaw na arum,+ balet imbaga na arum: “Dengelen mi ka lamet ed saya diad arum a pankanawnawa.” 33 Kanian tinaynan la ra nen Pablo, 34 balet akilad sikato so pigaran lalaki tan nagmaliw iran mananisia. Kaiba ra met si Dionisio, a huis ed korte na Areopago, tan sakey a biin manngaray Damaris, tan arum ni ra.

18 Kayari na saya, tinaynan toy Atenas tan linmad Corinto. 2 Tan aromog toy sakey a Judion manngaray Aquila,+ a niyanak ed Ponto, a kasabisabi ton nanlapud Italya a kaibay asawa ton si Priscila, lapud ingganggan nen Claudio a taynan na amin a Judio so Roma. Kanian nila ira nen Pablo, 3 tan lapud parehoy anapan da, sikatoy akiayam ed abung da tan nankimey a kaiba ra,+ ta managgaway tolda so anapan da. 4 Sikatoy manpapaliwawa* diad sinagoga+ kada sabaton+ tan nakokombinse ton manisia iray Judio tan saray Griego.

5 Natan, sanen sinmabi lay Silas+ tan Timoteo+ manlapud Macedonia, inusar nen Pablo so amin a panaon to parad salita na Dios, a pinulongan to iray Judio pian paneknekan a si Jesus so Kristo.+ 6 Balet sanen naynay la ran onsusumpa ed sikato tan mansasalita ray mauges, impagpag to iray kawes to+ tan inkuan tod sikara: “Ebatan yon mismo* so dala yo.+ Anggapoy kasalanan ko.+ Manlapud natan et onla ak lad saray aliwan Judio.”+ 7 Kanian sikatoy tinmaynan diman* tan linmad abung na toon manngaray Titio Justo, sakey a mandadayew ed Dios, a say abung to et walad abay na sinagoga. 8 Balet si Crispo+ a manangasikaso na sinagoga et nagmaliw a mananisia ed Katawan, ontan met ed interon sankaabungan to. Tan dakel ed saray taga Corinto ya akadngel so anisia tan abautismoan. 9 Tan diad labi et inkuan na Katawan ed si Pablo diad panamegley na pasingawey: “Agka natatakot, noagta mantultuloy kan mansalita tan agka ontutunda, 10 ta wala ak ed sika+ tan anggapoy mamasakit ed sika; ta dakel so totook ed sayan syudad.” 11 Kanian sikatoy nanayam diman a sakey taon tan anem bulan, ya imbabangat tod sikara so salita na Dios.

12 Legan a si Galio so prokonsul* na Acaya, nankakasakey iray Judio a sinmumpad si Pablo tan sikatoy inyakar dad panangukoman, 13 ya inkuan da: “Sayan too et kokombinsien to ray totoo a mandayew ed Dios diad paraan a kontra ed ganggan.” 14 Balet sanen mansalita lay Pablo, inkuan nen Galio ed saray Judio: “No talagan sakey itan a kasalanan odino sakey a krimen, O sikayo ran Judio, anosan ta kayon dengelen. 15 Balet no sangsangan labat itan nipaakar ed saray salita tan kangaranan tan ganggan yo,+ akauley kayo lad satan. Agko labay so magmaliw ya ukom ed saratan a bengatla.” 16 Diad saman et pinataynan to rad panangukoman. 17 Kanian amin da et inerel day Sostenes+ a manangasikaso na sinagoga, tan pinepekpek dad arap na panangukoman. Balet agbalot akibabali si Galio ed saratan a bengatla.

18 Balet kayari na dakel nin agew ya impanayam nen Pablo diman, sikatoy nampatanir ed saray agagi tan nambarko ya amaarap ed Sirya, a kaiba toy Priscila tan Aquila. Diad Cencrea+ et impakatli toy buek to, ta walay sinambaan to. 19 Kanian akasabi rad Efeso, tan intilak to ra diman; balet sikatoy linmoob ed sinagoga tan akikatunongan ed saray Judio.+ 20 Anggaman naynay dan kekerewen a sikatoy manbayag ni diman, sikatoy ag-inmabuloy 21 noagta nampatanir la tan inkuan tod sikara: “Ompawil ak lamet ed sikayo, no linawa nen Jehova.”* Tan sikatoy nambarko manlapud Efeso 22 tan akasabid Cesarea. Insan sikatoy tinmatdang* tan kinumusta toy kongregasyon, insan linmad Antioquia.+

23 Kayari ton nanayam ya agano diman, sikatoy tinmaynan tan linmad nanduruman pasen diad Galacia tan Frigia,+ a pinapabiskeg toy amin a disipulo.+

24 Natan et sinmabi ed Efeso so Judion manngaray Apolos,+ a niyanak ed Alejandria; sikatoy maong a mansalita tan kabkabisado toy Kasulatan. 25 Sayan too et nibangat ed dalan nen Jehova,* tan marmarlang ed espiritu, susto so sasalitaen tan ibabangat to nipaakar ed si Jesus, balet say amta to labat et nipaakar ed bautismo nen Juan. 26 Makpel a nansalita iyan too diad sinagoga, tan sanen sikatoy nadngel nen Priscila tan Aquila,+ sikatoy impila ra tan tinulongan dan nawalaay mas suston pakatalos ed dalan na Dios. 27 Sakey ni, lapud labay toy onlad Acaya, nansulat iray agagi ed saray disipulo, a binilin da ra a maong komon so pangawat dad sikato. Kanian sanen sikatoy akasabi diman, baleg so nitulong tod saramay nagmaliw a mananisia lapud agnaparaan a kaabigan na Dios; 28 ta mapuersa ton pinaneknekan ed arap na karaklan ya aliway ibabangat na saray Judio, tan impanengneng tod panamegley na Kasulatan a si Jesus so Kristo.+

19 Sanen walad Corinto si Apolos,+ dinmalan si Pablo ed nipalandey iran rehyon tan akasabi ed Efeso.+ Aromog to diman so pigaran disipulo 2 tan intepet tod sikara: “Akaawat kayoy masanton espiritu sanen nagmaliw kayon mananisia?”+ Inmebat ira: “Andi, agmi nin balot nadngelan so nipaakar ed masanton espiritu.” 3 Kanian inkuan to: “Anto sirin a klase na bautismo so impakabautismoan yo?” Inkuan da: “Bautismo nen Juan.”+ 4 Inkuan nen Pablo: “Nambautismo si Juan ed panamegley na bautismo a simbolo na panagbabawi,+ ya imbaga tod totoo a panisiaan da imay onsabi kayari to,+ salanti, si Jesus.” 5 Sanen nadngel da iya, nampabautismo ra diad ngaran nen Katawan a Jesus. 6 Tan sanen intapew nen Pablo iray lima tod sikara, linmeksab ed sikara so masanton espiritu,+ tan nansalita ray nanduruman lenguahe tan nampropesiya ra.+ 7 Ami-amin et walay manga 12 lalaki.

8 Taloy bulan a sikatoy oonlad sinagoga,+ a makmakpel a mansasalita, tan manpapaliwawa tan mankakatunongan ed makakombinsin paraan nipaakar ed Panarian na Dios.+ 9 Balet sanen wala ray agdan balot labay so manisia,* a papaugesen dad arap na dakel a totoo so Say Dalan,+ tinaynan to ra+ tan intagar to iray disipulo, tan inagew-agew a nampaliwawa diad auditoryum na eskuelaan nen Tirano. 10 Duay taon ya ontay ginawa to, kanian say salita na Katawan et nadngel na amin a manaayam ed probinsya na Asia, saray Judio tan saray Griego.

11 Tan nantultuloy a nanggawa so Dios na makapanyari iran gawa ed panamegley nen Pablo,+ 12 kanian anggan saray panyo tan tapis a nidiwit ed laman to et inyakar dad saray totoon mansasakit,+ tan naandi iray sakit da, tan pinmaway iray mauges ya espiritu.+ 13 Balet arum ed saray Judio a manliliberliber pian mamapaway na saray demonyo et sinali ra met ya usaren so ngaran nen Katawan a Jesus diad saramay sinelepay mauges iran espiritu; ibabaga ra: “Diad panamegley nen Jesus ya ipupulong nen Pablo et iganggan ta kayon ompaway.”+ 14 Natan et gagawaen met iya na pitoran lalaki ya ananak na Judion manunan saserdote a manngaray Seva. 15 Balet inmebat ed sikara so mauges ya espiritu: “Kabat koy Jesus+ tan kabat ko met si Pablo;+ balet siopa kayo?” 16 Diad saman et nilukso ira na samay toon aselepay mauges ya espiritu, tan sansakey to ran dinegkeman, tan sinakitan to ra, kanian batik iran lakseb tan asugat-sugat a pinmaway ed saman ya abung. 17 Akabatan iya na amin a Judio tan Griego a manaayam ed Efeso; tan ataktakot iran amin, tan nantultuloy a nitandoro so ngaran na Katawan a Jesus. 18 Tan dakel ed saramay nagmaliw a mananisia so dinmadago tan impapatua tan impapaamta da no anto iray gagawaen da. 19 On, dakel ed saramay datin manmamahiko et tinipon da ray libro ra tan pinoolan dad arapan na amin.+ Tan sanen kinuenta ray bili na saratan ya amin, mankantidad iratan na 50,000 a piraso na pilak. 20 Kanian diad makapanyarin paraan et nantultuloy a binmulaslas tan tinmalona so salita nen Jehova.*+

21 Sanen asumpal la iraya, nandesisyon si Pablo ya onlad Jerusalem+ kayari ton liberen so Macedonia+ tan Acaya. Inkuan to: “Kayarik ya onla diman, onla ak met ed Roma.”+ 22 Kanian imbaki tod Macedonia so duara ed saramay nanlingkor ed sikato, si Timoteo+ tan Erasto,+ balet sikatoy tinmilak nin agano diad probinsya na Asia.

23 Diad saman a panaon et walay agawan baleg a gulo+ nipaakar ed Say Dalan.+ 24 Ta walay sakey a lakin manngaray Demetrio, a panday na pilak, tan diad panggagawa toy pilak iran altar nen Artemis et dakel so nanaalmo na saray marunong a komikimey.+ 25 Tinipon to ra tan saray arum nin ontan met so kimey da, tan inkuan to: “Lalaki, amta yo ya onaasenso tayo lapud sayan anapan. 26 Nanenengneng tan narerengel yo met no panon a kinombinse na sayan Pablo so dakdakel a totoo, aliwa labat a diad Efeso+ noagta diad intero lawarin probinsya na Asia, tan impaarap to ra ed sananey a pananisia, ya imbaga ton aliwan tuan dirios iramay dirios a ginawa na saray lima.+ 27 Sakey ni, ompan balawen na totoo so anapan tayo, tan ipasen da met lan anggapoy kakanaan so templo na makapanyarin diosa a si Artemis, tan naandi lay karakpan na sayan diosa a dadayewen ed interon probinsya na Asia tan ed mundo.” 28 Sanen nadngel iya na saray lalaki, sinmanok iran maong tan inyeyag da: “Makapanyari si Artemis na saray taga Efeso!”

29 Kanian agulo so interon syudad, tan linmoob iran amin ed teatro, ya inggayugoy day Gayo tan Aristarco,+ a taga Macedonia, a kakaiba nen Pablo a manbiabiahe. 30 Labay komon nen Pablo so onloob ed kawalaay totoo, balet sikatoy ag-inabuloyan na saray disipulo. 31 Anggan say arum ed saray manag-organisa na saray piesta tan pagalaw, a makaaro ed sikato, et angipasabi na mensahe ed sikato tan akikasi ra ya agto ipepeligroy bilay to diad iloob tod teatro. 32 Diad tua, nandurumay iyeeyag na totoo; ta agulo la iramay nantitipon, tan karaklan ed sikara et agda amta no akin a nantitipon ira diman. 33 Kanian inala day Alejandro manlapud totoo, a sikatoy intulak na saray Judio pian makaonlad arapan; tan sininyasan ira nen Alejandro ta labay toy mansalita diad arapan na totoo. 34 Balet sanen abidbir dan sikatoy sakey a Judio, saksakey so inyeyag dan amin ed loob na manga duay oras: “Makapanyari si Artemis na saray taga Efeso!”

35 Sanen saray totoo et apareen a siansia na managrekord na saray nagagawa ed syudad, inkuan to: “Lalakin taga Efeso, wala ta ed saray totoo so agmakaamta a say syudad na saray taga Efeso so manag-asikaso na templo na makapanyarin Artemis tan say imahen a naplag manlapud tawen? 36 Lapud agnakuestion irayan bengatla, nepeg a mansiansia kayon kalmado tan agkayo bengatbengat ya onkikiwas. 37 Ta inyakar yo dia irayan lalaki ya agmet mantatakew ed templo tan agmanmumudmora ed diosa tayo. 38 Kanian no walay kason iyarap nen Demetrio+ tan saray kaiba ton marunong a komikimey sumpad siopaman, wala ray agew a lukas so korte tan wala ray prokonsul;* paulyanan yo ran mangiyarap ed saray akusasyon dad balang sakey. 39 Balet no wala ni so aanapen yo nilikud ed satan, nepeg a desisyonan la itan ed sakey a pantitipon unong ed ganggan. 40 Ta ompan sikatayo la ingen so naakusaan a manrerebelde ed gobierno lapud agawad sayan agew, ta anggapoy anggan sakey a basiyan a nipresenta tayo no akin a nagagawa iyan panggugulo na saray totoo.” 41 Kayari ton imbaga iya, pinasempet to la ray totoo.

20 Sanen tinmunda lay gulo, impatawag nen Pablo iray disipulo, tan sanen apaseseg to la ra tan akapampatanir la, sikatoy nambiahen paarap ed Macedonia. 2 Kayari ton niliber iraman a rehyon tan pinaseseg iray disipulo diman diad panamegley na dakel ya imbalikas to, sikatoy akasabid Gresya. 3 Taloy bulan to diman, balet lapud walay mauges a plano ed sikato na saray Judio+ sanen ngalngali la onlugan ed barko a paonlad Sirya, ninonot toy ompawil a diad Macedonia so dalanen to. 4 Sikatoy inibaan nen Sopatro ya anak nen Pirro a taga Berea, si Aristarco+ tan Segundo a taga Tesalonica, si Gayo a taga Derbe, si Timoteo,+ tan si Tiquico+ tan Trofimo+ a taga probinsya na Asia. 5 Inmuna la irayan lalaki tan inalagar da kamid Troas; 6 balet nambarko kami manlapud Filipos kayari na saray agew na Andi-lebaduran Tinapay,+ tan kayari na limay agew et akasabi kamid sikara diad Troas, tan pitoy agew mi diman.

7 Diad unonan agew na simba, sanen nantitipon kami pian mangan, nampaliwawa si Pablo ed saramay nantitipon, ta sikatoy onla la diad ontumbok ya agew; tan dinukeyan toy paliwawa to anggad pegley-labi. 8 Kanian dakel so lamparaan diad kuarto ed tagey a nantitiponan mi. 9 Akayurong diad bintana so sakey a kalangweran a lakin manngaray Eutico, tan sikatoy akaugip legan a manpapaliwawa si Pablo, tan lapud akateglep la et sikatoy naplag manlapud komatlon grado tan sikatoy inatey lan inalsa ra. 10 Balet inmepas si Pablo, tan sikatoy dinago ton nilakap+ tan inkuan to: “Agkayo la maingal, ta sikatoy mabilay.”*+ 11 Insan sikatoy sinmegep tan inggapo toy pangdem* tan angan. Abayag so impitongtong to nid sikara, anggad palbangon, insan sikatoy tinmaynan la. 12 Kanian impawil dan mabilay so kalangweran a laki tan aligliwa ran maong.

13 Natan et inmuna kami lad barko tan amaarap kamid Asos, a diman so pangiluganan mid si Pablo, ta imbilin ton labay toy manakar la tan manbana kami la diman. 14 Kanian sanen nabotan to kamid Asos, sikatoy inlugan mi tan amaarap kamid Mitilene. 15 Tan diad tinmumbok ya agew et nambarko kami manlapu diman, tan akasabi kami ed baybay na Kios, balet diad tinmumbok ya agew et tinmunda kamin agano diad Samos, tan diad sinmublay ya agew et sinmabi kami ed Mileto. 16 Nandesisyon si Pablo a labsanan so Efeso+ pian agla manbayag ed probinsya na Asia, ta sikatoy manaapuran makasabi ed Jerusalem+ diad agew na Piesta na Pentecostes no nayarian to.

17 Balet manlapud Mileto et sikatoy angipasabi na mensahe diad Efeso pian patawag to iray mamatatken na kongregasyon. 18 Sanen sinmabi ra, inkuan tod sikara: “Amta yo no panoy impanbilay ko manlapud unonan agew na insabik ed probinsya na Asia,+ 19 a mapaabeba ak* a nampaaripen ed Katawan+ tekep na saray lua tan subsubok ya agawa ed siak lapud saray mauges a getma na saray Judio, 20 tan agko met insiblet so pangibaga ed sikayo na dinanman ed saray bengatlan makagunggona* odino say pangibangat ed sikayo diad arapan na totoo+ tan diad kabkaabungan.+ 21 Balet sigpot ak a nantasi ed saray Judio tan ed saray Griego nipaakar ed panagbabawi+ ed arapan na Dios tan pananisia ed Katawan tayon Jesus.+ 22 Tan natan et onla ak ed Jerusalem, ta binalor* ak na espiritu, anggano agko amtay nagawa ed siak diman, 23 noag say amtak labat et aminpigan papasakbayan ak na masanton espiritu diad kada syudad, ya ibabaga na saya a manaalagar ed siak so kaprisok tan panirap ko.+ 24 Anggaman ontan, agko ipapasen ya importante* ed siak so bilay ko,* basta nasumpal ko labat so babatiken ko+ tan say ministeryon inawat kod Katawan a Jesus, pian sigpot kon ipulong* so maong a balita nipaakar ed agnaparaan a kaabigan na Dios.

25 “Tan natan, amtak a sikayon amin ya angipulongan koy Panarian et agyo ak la nanengneng lamet. 26 Kanian tinawag ta kayo pian tasian yod sayan agew a malinis ak ed dala na amin a totoo,+ 27 ta agko insiblet ya ibagad sikayo so amin a simbawa* na Dios.+ 28 Imano yoy sarili yo+ tan say interon pulok, a lapud satan et tinuro kayo na masanton espiritu bilang manangasikaso,+ pian pastolan yo so kongregasyon na Dios,+ a sinaliw tod panamegley na dala na mismon Anak to.+ 29 Amtak a sano anggapo ak la et onloob ed limog yo iray masesebeg a lobo+ tan agda kasian so pulok, 30 tan diad limog yo et wala ray lalakin ontalindeg tan pikeweten da so katuaan pian kombinsien iray disipulo ya ontumbok ed sikara.+

31 “Kanian mansiansia kayon aliing, tan nodnonot yo a diad loob na taloy taon,+ labi tan agew, agak tinmundan nambilin ed kada sakey ed sikayo tekep na saray lua. 32 Tan natan et imatalek ta kayod Dios tan ed panamaseguro* na agnaparaan a kaabigan to, a saya so mamabiskeg ed sikayo tan mangiter ed sikayo na tawir a parad amin a pinasanto.+ 33 Agko pinilalek so pilak odino balitok odino kawes na siopaman a too.+ 34 Amta yon mismo a nankimey ak pian naasikaso iray pankaukolan ko+ tan saramay kaibak. 35 Impanengneng kod sikayo ed amin a bengatla a diad pansagpot yod onian paraan+ et nepeg yon tulongan iray makapuy tan nepeg yon tandaan iray salita na Katawan a Jesus, sanen inkuan to: ‘Mas makapaliket so mangiter+ nen say mangawat.’”

36 Tan sanen nibaga to la iraya, tinmalimukor iran amin tan nampikasi ra. 37 Diad tua et manak-akis iran amin, tan nilalakap day Pablo* tan inangoban da, 38 ta naermenan iran maong ed samay imbaga to a sikatoy agda la nanengneng lamet.+ Insan sikatoy impatnubang da la ed barko.

21 Sanen sinmian kami lad sikara tan nambarko kami, diretso kamin nambiahe tan akasabi kamid Cos, tan diad tinmumbok ya agew et diad Rodas, insan diad Patara. 2 Sanen walay aromog min barko a mamaarap ed Fenicia, linmugan kami insan kami la binmuat. 3 Sanen abantag mi so isla na Ciprus diad bandad kawigi, nilabsanan mi labat itan tan amaarap kamid Sirya tan sinmakbit kamid Tiro, a ditan so pangiyepasan ed saray kargamento na barko. 4 Inanap mi ray disipulo tan aromog mi ra, tan pitoy agew mi diman. Balet lapud mensahen impasabi ed sikara na masanton espiritu et aminpiga ran imbagad si Pablo ya agla oonlad Jerusalem.+ 5 Kanian sanen asabi lay agew na isipot mi, linma kami lan nambiahe balet amin da, kaiba iray bibii tan ugugaw, so angipatnubang ed sikami anggad paway na syudad. Tan tinmalimukor kami diad gilig na dayat, tan nampikasi 6 tan nampapataniran kami. Insan linmugan kami lad barko, tan sinmempet la rad saray ayaman da.

7 Manlapud Tiro et akasabi kamin siansia diad Tolemaida, tan kinumusta mi ray agagi tan sakey agew kamin akiayam ed sikara. 8 Diad tinmumbok ya agew et binmuat kami tan akasabi kamid Cesarea, tan linma kamid abung nen Felipe ya ebanghelisador, a sakey ed saramay pitoran lalaki,+ tan akiayam kamid sikato. 9 Sikatoy walaan na apatiran anak a mamarikit,* a manpropropesiya.+ 10 Balet legan kamin wadman a pigay agew, sinmabi manlapud Judea so propetan manngaray Agabo.+ 11 Tan nila to kami tan inala toy balkes nen Pablo insan to binalor iray sali tan lima ton dili tan inkuan to: “Oniay inkuan na masanton espiritu, ‘Say lakin makankayarian ed sayan balkes et oniay pamalor ed sikato na saray Judio diad Jerusalem,+ tan iyawat dad saray totoo na saray nasyon.’”+ 12 Natan sanen nadngel mi iya, sikami tan saramay wadman et akikasi ed sikato ya agla oonlad Jerusalem. 13 Insan inmebat si Pablo: “Akin et onaakis kayo tan pakakapuyen yoy determinasyon ko?* Agkayo mapaga ta akaparaan ak lan nabalor tan ompatey diad Jerusalem lapud ngaran na Katawan a Jesus.”+ 14 Sanen sikatoy agmi nakombinse, pinaulyanan mi la,* tan inkuan mi: “Nagawa komon so linawa nen Jehova.”*

15 Natan, kayari na sarayan agew et namparaan kami parad pambiahe tan amaarap kamid Jerusalem. 16 Akila met ed sikami so arum ed saray disipulo a nanlapud Cesarea, tan inibaan da kamin onlad abung na samay lakin manangkaili ed sikami, a manngaray Minason a taga Ciprus, sakey ed saray inmunan disipulo. 17 Sanen akasabi kamid Jerusalem, malikeliket iray agagi ya angawat ed sikami. 18 Balet diad tinmumbok ya agew, kaiba mi si Pablo a linmad si Santiago,+ tan wadman so amin a mamatatken. 19 Tan kinumusta to ra tan insalaysay ton amin so ginawa na Dios diad saray nasyon ed panamegley na ministeryo to.

20 Sanen nadngel da iya, inggloria ray Dios, balet inkuan dad sikato: “Nanenengneng mo, agi, a piganlibo lay mananisia ed limog na saray Judio, tan maseseg iran amin a manguunor ed Ganggan.+ 21 Balet nadngelan day labilabir nipaakar ed sika ya ibabangat moy panag-apostasya ed si Moises diad amin a Judio a walad saray nasyon, ya ibabagam ya agda la nepeg a segaten so ananak da tan agda met la nepeg a tumboken iray abaybayag lan kustombre.+ 22 Anto sirin so nepeg a gawaen? Seguradon nabalitaan dan sinmabi ka la. 23 Kanian gawam sirin iyan ibaga mid sika: Walay apatiran lalaki dia a walay sinambaan da. 24 Itagar mo irayan lalaki tan linisan moy sarilim unong ed Ganggan a kaiba ira tan bayaran mo iray gastosen da, pian napakiskisan da iray ulo ra. Diad ontan et naamtaan na amin ya aliwan tua iray nadngelan dan labilabir nipaakar ed sika, noagta maong so gagawaen mo, tan uunoren mo met so Ganggan.+ 25 No nipaakar ed saray aliwan Judio a mananisia, wala lay impawit min sulat a mangipasabi ed desisyon mi a kaukolan dan paliisan so antokaman ya imbagat ed saray idolo+ ontan met ed dala,+ tan abikkel ya ayayep,*+ tan ed seksual ya imoralidad.”*+

26 Diad tinmumbok ya agew, intagar nen Pablo iraman a lalaki tan nilinisan toy sarili to unong ed Ganggan a pati sikara,+ tan linmoob irad templo pian ipaamta ra no kapigan nasumpal iray agew na panaglinis da unong ed Ganggan tan no kapigan iyapay so bagat ya onkana parad kada sakey ed sikara.

27 Natan sanen manampot lay pitoran agew, ginulo na saray Judio a nanlapud Asia iray totoo sanen sikatoy anengneng dad loob na templo, tan sikatoy inerel da, 28 ya iyeeyag da: “Lalaki na Israel, tulongan yo kami! Saya imay toon mangibabangat ed amin a totoo ed nanduruman pasen na saray bengatlan sumpad totoo tayo tan ed Ganggan tayo tan ed sayan pasen. Tan sakey ni et pinaloob tod templo iray Griego tan dinutakan to iyan masanton pasen.”+ 29 Ta anengneng da nensaman a kaiba tod syudad si Trofimo+ a taga Efeso, tan inisip dan sikatoy pinaloob nen Pablo ed templo. 30 Aguloy interon syudad, tan nanuulop a binmatik iray totoo tan inerel day Pablo tan inggayugoy dad paway na templo, tan tampol dan inkapot iray puerta. 31 Sanen sikatoy sasalien dan pateyen, akabatan na komandante na tropa na armada a magulo lay interon Jerusalem; 32 kanian intagar ton tampol iray sundalo tan saray opisyal na armada tan batik irad sikara. Sanen anengneng day komandante na militar tan saray sundalo, intunda ray pamepekpek dad si Pablo.

33 Diad saman et inmasingger so komandante na militar tan sikatoy inala to tan impabalor toy duaran gulonggulong;+ insan tinepet to no siopa iyan too tan no antoy ginawa to. 34 Balet nandurumay iyeeyag na saray totoo. Kanian lapud agto naseguro no dinan so tua lapud gulo, sikatoy impaiyakar tod kuartel na saray sundalo. 35 Balet sanen akasegep lad takayan, sikatoy inalsa la na saray sundalo lapud magulogulo la iray totoo, 36 ta dakdakel so tinmutumbok, ya iyeeyag da: “Patey yo!”

37 Sanen iloob da lad kuartel na saray sundalo, imbaga nen Pablo ed komandante na militar: “Wala pay ibagak ed sika, no nayari?” Inkuan to: “Makapansalita ka manayay Griego? 38 Aliwan sika sirin imay Ehipsio a diad agano ni et insugsog toy panrebelde ed gobierno tan inyakar tod kalawakan so 4,000 lalaki a managpatey?” 39 Kanian inkuan nen Pablo: “Diad tua et Judio ak,+ a taga Tarso+ ed Cilicia, tan mibabaley ak ed kabkabat a syudad. Kanian ipangasim pan abuloyan mo ak a mansalita ed totoo.” 40 Sanen inmabuloy, sininyasan nen Pablo iray totoo legan a sikatoy akaalagey ed takayan. Sanen dinmeen la ra, sikatoy nansalita ed sikara diad lenguahen Hebreo,+ ya inkuan to:

22 “Agagi tan kaamaan, dengel yo so ibagak bilang depensak.”+ 2 Sanen nadngel dan sikatoy mansasalita ed sikara diad lenguahen Hebreo, lalo ran dinmeen, tan inkuan to: 3 “Judio ak,+ tan niyanak ak ed Tarso na Cilicia,+ balet nanaral ed sayan syudad tan imbangat a mismo nen Gamaliel,+ abangatan ya ontumbok a maong ed Ganggan na inmuunan atateng,+ tan maseseg parad Dios a singa sikayon amin natan.+ 4 Pinasegsegang tan impapatey ko iramay ontutumbok ed sayan Dalan, a binabalor tan impaiprisok iray lalaki tan bibii,+ 5 tan napaneknekan iya na atagey a saserdote tan amin ya ulop na mamatatken. Angala ak met ed sikara na saray sulat parad saray agagi tayo ed Damasco, tan diad saman et wala ak lad dalan pian baloren ko iramay wadman tan iyakar ko ra diad Jerusalem pian nadusa ra.

6 “Balet sanen mamapaarap ak la tan asingger ak lad Damasco, a ngalngali la kaagwan, biglan sinminag ed kaliberliber ko so masmasnag a liwawa manlapud tawen,+ 7 tan atumba ak tan walay nadngel kon boses ya angikuan ed siak: ‘Saulo, Saulo, akin et papasegsegangen mo ak?’ 8 Inmebat ak, ‘Siopa ka, Katawan?’ Tan inkuan tod siak, ‘Siak si Jesus a Nazareno, a papasegsegangen mo.’ 9 Natan et anengneng na saramay kaibak a lalaki so liwawa balet ta agda nadngel so imbaga na samay mitotongtong ed siak. 10 Diad saman et inkuan ko: ‘Antoy gawaen ko, Katawan?’ Inkuan na Katawan: ‘Alagey ka, la kad Damasco, tan diman et nibaga ed sika so amin a nepeg mon gawaen.’+ 11 Balet lapud anggapon balot so nanengneng ko ta masmasnag iman a liwawa, intabin ak na saramay kaibak kanian akasabi ak ed Damasco.

12 “Insan walay lakin manngaray Ananias, a matakot ed Dios unong ed Ganggan, tan maabig so ibabaga na amin a Judion manaayam diman nipaakar ed sikato, 13 so linmad siak. Sikatoy inmalagey ed abay ko tan inkuan tod siak: ‘Saulo, agi, makanengneng ka lamet!’ Tan diad saman a mismo et tinmangwa ak tan sikatoy anengneng ko.+ 14 Inkuan to: ‘Pinili ka na Dios na inmuunan atateng tayo pian naamtaan moy linawa to tan nanengneng mo imay sakey a matunong+ tan narengel moy boses to, 15 lapud magmaliw kan tasi to ed amin a totoo nipaakar ed saray anengneng tan nadngel mo.+ 16 Natan sirin, akin et manpapaleen ka? Alagey ka, manpabautismo ka, tan urasan mo iray kasalanan mo+ diad itawag mod ngaran to.’+

17 “Balet sanen akapawil ak ed Jerusalem+ tan manpipikasi ak diad templo, akanengneng ak na sakey a pasingawey 18 tan sikatoy anengneng ko tan imbaga tod siak: ‘Apuram, paway kan tampol ed Jerusalem, ta agda awaten so pantasim nipaakar ed siak.’+ 19 Tan inkuan ko: ‘Katawan, amta ran mismo ya impaiprisok tan impalewet kod kada sinagoga iramay manisia ed sika;+ 20 tan sanen pinatey day Esteban a tasim, akaalagey ak diman, tan inabobonan koy ginawa da, legan kon babantayan iray ilalatop a kawes na saramay mamapatey ed sikato.’+ 21 Balet inkuan tod siak: ‘La ka, lapud ibaki ta ka diad saray ararawin nasyon.’”+

22 Balet anggad sayan salita labat so dinengel dad sikato. Insan inyeyag da: “Patey yo itan a too, ta agmanepeg a manbilay!” 23 Lapud maingal ira, tan imbabantak da ray ilalatop dan kawes, tan angisabuyag iray dabok,+ 24 ingganggan na komandante na militar ya iloob day Pablo diad kuartel na saray sundalo tan inkuan ton sikatoy nepeg a tepetan legan a sisiplatan, pian naamtaan to no anton talaga so rason no akin ya oniay iyeeyag dad si Pablo. 25 Balet sanen niyunat da lay laman to pian siplatan da, imbaga nen Pablo ed samay opisyal na armada ya akaalagey diman: “Manepeg kasin siplatan yoy sakey a Romano* ya agni naukom?”*+ 26 Sanen nadngel iya na opisyal na armada, sikatoy linmad komandante na militar tan impaamta to, ya inkuan to: “Antoy nononoten mon gawaen? Ta sayan too et sakey a Romano.” 27 Kanian inmasingger so komandante na militar tan inkuan tod sikato: “Ibagam ed siak, Romano ka?” Inkuan to: “On.” 28 Inmebat so komandante na militar: “Mabmabli so impangaliw kod sarayan kanepegan na sakey a mibabaley.” Inkuan nen Pablo: “Balet wala lad siak iratan manlapu nen niyanak ak.”+

29 Kanian inmarawin tampol ed sikato iramay lalakin mantepet tan mamairap komon ed sikato; tan tinmakot so komandante na militar sanen naamtaan ton si Pablo et sakey a Romano tan lapud inggulonggulong to.+

30 Kanian diad tinmumbok ya agew, sikatoy imbulos to tan ingganggan ton mantitipon iray manunan saserdote tan say interon Sanhedrin lapud labay ton naseguro no akin a sikatoy aakusaan na saray Judio. Insan inyakar to diman si Pablo tan pinaalagey tod pegley da.+

23 Legan ya onnenengneng si Pablo ed Sanhedrin, inkuan to: “Agagi, onkikiwas ak ed arapan na Dios a malinlinis so konsiensiak+ anggad sayan agew.” 2 Diad saya et ingganggan na atagey a saserdoten si Ananias a sikatoy tampalen na saramay akaalagey ed abay to. 3 Kanian inkuan nen Pablo ed sikato: “Kabilen ka na Dios, sikan pinaputin padir. Kasin yinmurong kan mangukom ed siak unong ed Ganggan insan sumlangen mo lanlamang itan, diad pangigaganggan mon tampalen da ak?” 4 Inkuan na saramay akaalagey: “Iinsultoen moy atagey a saserdote na Dios?” 5 Inkuan nen Pablo: “Agagi, agko amta a sikatoy atagey a saserdote. Ta walan nisulat, ‘Agmo nepeg a pansalitaan na mauges so sakey a manuley ed kabaleyan mo.’”+

6 Natan, lapud amta nen Pablo a say kapaldua ed Sanhedrin et Saduceo tan say arum et Fariseo, oniay imbaga tod sikara: “Agagi, sakey ak a Fariseo,+ anak na saray Fariseo. Uukomen ak lapud manisia ak ed kioli na saray inaatey.” 7 Sanen imbaga to iya, nansasangsangan iray Fariseo tan saray Saduceo, tan naapag ira. 8 Ta ibabaga na saray Saduceo ya anggapoy kioli odino anghel odino espiritu, balet sarayan amin et aawaten* na saray Fariseo.+ 9 Kanian walay agawan baleg a gulo, tan inmalagey so arum ed saray eskriba a walad dapag na saray Fariseo tan mapaspasnok iran akisangsangan, ya inkuan da: “Anggapoy naromog min kasalanan na sayan too, balet no akitongtong ed sikato so sakey ya espiritu odino sakey ya anghel+—.” 10 Natan sanen ampetang lay sangsangan, tinmakot so komandante na militar ompan pangguguyoran day Pablo, kanian ingganggan to iray sundalo a dagoen da tan alaen da, insan iyakar dad kuartel na saray sundalo.

11 Balet diad saman a labi et inmalagey so Katawan ed abay to, ya inkuan to: “Manpakpel ka!+ Ta no panon a sigpot mon tatasian ed Jerusalem so nipaakar ed siak, ontan met so nepeg a pantasim diad Roma.”+

12 Sanen kabuasan la, nankokomplot iray Judio tan nansamba ran amin, ya inkuan dan ag-ira mangan odino oninum anggad agda napatey si Pablo. 13 Masulok ya 40 totoo so nansamba. 14 Linma irayan totoo ed saray manunan saserdote tan mamatatken tan inkuan da: “Masimsimoon kamin nansamba ya agkamin balot mangan anggad agmi napatey si Pablo. 15 Kanian natan, sikayo tan say Sanhedrin et ipaamta yod komandante na militar a sikatoy nepeg ton iyakar dia, ya ibaraan yon walay labay yo nin linewen a maong ed kaso to. Balet antis a sikatoy makaasingger dia, akaparaan kami lan mamatey ed sikato.”

16 Balet sayan plano ran pansabat et nadngelan na anak na biin agi nen Pablo, tan sikatoy linmoob ed kuartel na saray sundalo tan imbaga tod si Pablo. 17 Diad saman et tinawag nen Pablo so sakey ed saray opisyal na armada tan inkuan to: “Iyakar mod komandante na militar iyan kalangweran a laki, ta walay ibaga to.” 18 Kanian sikatoy inyakar tod komandante na militar tan inkuan to: “Tinawag ak na samay prison si Pablo tan kinerew tod siak ya iyakar kod sika iyan kalangweran a laki, ta walay ibaga tod sika.” 19 Sikatoy inegnaan na komandante na militar tan inyarawi to, tan sanen sikara labat la et tinepetan to: “Antoy ibagam ed siak?” 20 Inkuan to: “Nampapaknaan na saray Judio a kerewen dad sika ya iyakar mo nabuas ed Sanhedrin si Pablo, ya ibaraan dan walay labay da nin linewen ed kaso to.+ 21 Balet agka komon pakokombinse ed sikara, ta walay masulok ya 40 totoo ra a manabat ed sikato, tan nansamba ra ya ag-ira mangan odino oninum anggad agda napatey;+ tan akaparaan la ra natan, tan aalagaren dan abobonan moy kerew da.” 22 Kanian pinapawil la na komandante na militar so kalangweran a laki kayari ton binilin: “Agmo ibabaga ed anggan siopa ya impaamtam iya ed siak.”

23 Tan impatawag toy duara ed saray opisyal na armada tan inkuan to: “Iparaan yoy 200 a sundalo a manakar ya anggad Cesarea, ontan met ed 70 sundalon de-kabayoan tan 200 ya akaawit na gayang, diad komatlon oras na labi.* 24 Mangitarya kayo met na saray kabayo a luganan nen Pablo, pian sikatoy naawit dan maligen ed si Felix a gobernador.” 25 Tan sikatoy nanggawa na sulat ya oniay nabasa:

26 “Siak, si Claudio Lisias, so nansulat ed sika, Kagalgalang a Gobernador Felix: Awat moy panangumustak! 27 Sayan laki et inerel na saray Judio tan ngalngali da la pateyen, balet sinmabi ak a tampol a kaibak iray sundalo tan inliktar ko,+ lapud naamtaan kon sikatoy sakey a Romano.+ 28 Tan lapud labay kon naamtaan no akin a sikatoy aakusaan da, sikatoy inyakar kod Sanhedrin da.+ 29 Nalmoan kon sikatoy inakusaan nipaakar ed saray bengatlan pansusuppiatan ed Ganggan da,+ balet anggapon balot so niyakusa ra pian sikatoy manepeg a pateyen odino ipriso. 30 Balet lapud nipaamta ed siak so mauges a plano rad sikato,+ sikatoy impaiyakar kon tampol ed sika, tan ingganggan ko ray mangaakusa ed sikato a mansalita rad arapan mo.”

31 Kanian inala na sarayan sundalo si Pablo+ unong a niganggan ed sikara tan diad labi et sikatoy inawit dad Antipatris. 32 Diad tinmumbok ya agew, inabuloyan da iray sundalon de-kabayoan a mangulop ed sikato, balet pinmawil irad saray kuartel na saray sundalo. 33 Linmad Cesarea iray sundalon de-kabayoan tan inyawat dad gobernador so sulat tan inyarap da met ed sikato si Pablo. 34 Kanian binasa to itan tan tinepet to no anton probinsya so nanlapuan to, tan naamtaan ton sikatoy nanlapud Cilicia.+ 35 Inkuan to: “Dengelen kon maong so kasom sano wadia met la ray mangaakusa ed sika.”+ Tan sikatoy impabantayan ton maong diad palasyo nen Herodes a panaayaman na gobernador.

24 Kayari limay agew, sinmabi so atagey a saserdoten si Ananias+ a kaibay pigaran mamatatken tan sakey a managsalita ed publiko* a manngaray Tertulo, tan inyarap dad gobernador so kaso ra sumpad si Pablo.+ 2 Sanen atawag lay Tertulo pian mansalita, inakusaan toy Pablo ed arapan nen Felix, ya inkuan to:

“Lapud panliliketan mi so baleg a kareenan diad panamegley mo tan nagagawa iray panagreporma diad sayan nasyon lapud masakbay a panagplanom, 3 bibidbiren mi iraya ed amin a panaon tan ed amin met a pasen tekep na balbaleg a pisasalamat, Kagalgalang a Felix. 4 Balet pian agta ka la naabala, mikasi ak ed sika a diad kamaongan mo et dengel mo kamin magano. 5 Ta nalmoan mi a sayan too et sakey a peste,*+ a susugsogan+ toy amin a Judio diad amin a pasen pian manrebelde ra ed gobierno, tan idadaulo toy sekta na saray Nazareno.+ 6 Sasalien to met a pabandayen so templo, kanian sikatoy inerel mi.+ 7 *—— 8 No sikatoy usisaen mon mismo, naamtaan mo irayan amin a pangaakusaan mid sikato.”

9 Diad saman et akibiang met la iray Judio ya angataki, ya impilit dan tua irayan bengatla. 10 Sanen tinangeran na gobernador si Pablo pian mansalita, inkuan to:

“Kabkabat kon pigay taon ka lan ukom ed sayan nasyon, kanian maliket ak a mangidepensa ed inkasiak.+ 11 Ta naamtaan mo no usisaen mon mismo, ya agni linmabas so 12 agew manlapud samay intatdang kod Jerusalem pian mandayew;+ 12 tan agda ak anengneng a misusuppiatan ed anggan siopa diad templo odino manitipon na sakey a grupon manggulo, balanglan diad saray sinagoga odino diad interon syudad. 13 Tan agda met napaneknekan ed sika iray pangaakusaan dad siak natan. 14 Balet ipatuak iya ed sika, a manlilingkor ak ed Dios na inmuunan atateng ko+ unong ed paraan a tatawagen dan sekta, ta papanisiaan ko so amin a walad Ganggan tan nisulat ed saray Propeta.+ 15 Tan walay ilalok ed Dios, a sayan ilalo et aalagaren met na sarayan totoo, a walay kioli+ na saray matunong tan saray agmatunong.+ 16 Kanian naynay kon pansasagpotan a napansiansiay malinis* a konsiensia ed arapan na Dios tan totoo.+ 17 Natan, kayari na dakel a taon et pinmawil ak ed nasyon ko pian mangiter ak na kuarta+ ed saray kabaleyan ko tan manbagat ed Dios. 18 Legan kon gagawaen iraya, anengneng da ak ya alinisan diad templo unong ed Ganggan,+ balet agak kaiba ed sakey a grupo na totoo tan agak manggagaway gulo. Ingen wala ray pigaran Judio a nanlapud probinsya na Asia, 19 a nepeg a wadia ra komon ed arapan mo pian akusaan da ak no walan talagay isumpa rad siak.+ 20 Odino, abuloyan mo ray totoon wadia ya ibaga ran mismo no antoy nalmoan dan kasalanan ko legan ya akaalagey ak ed arapan na Sanhedrin, 21 likud ed sayan imbagak legan ya akaalagey ak ed pegley da: ‘Uukomen ak natan ed arapan yo lapud manisia ak ed kioli na saray inaatey!’”+

22 Balet lapud dakel lan impormasyon so amta nen Felix nipaakar ed sayan Dalan,+ impanalagar to ni ray totoo tan inkuan to: “Sano onsabi lay Lisias a komandante na militar, insan ko la desisyonan irayan bengatla nipaakar ed sikayo.” 23 Tan ingganggan toy opisyal na armada ya agni ibulos si Pablo balet ag-eeletan so pambantay ed sikato, tan agto sebelan so siopaman ed saray agagi to a mangasikaso ed pankaukolan to.

24 Kayari na pigaran agew, sinmabi si Felix a kaiba toy asawa ton si Drusila, a sakey a Judio, tan impatawag toy Pablo tan dinmengel ed sikato nipaakar ed pananisia ed Kristo Jesus.+ 25 Balet sanen intongtong nen Pablo so nipaakar ed inkatunong tan pangontrol ed sarili tan say onsabin panangukom,+ tinmakot si Felix tan inkuan to: “Nayarian mo lay onalis natan, balet patawag ta ka lamet sano walay pankanawnawak.” 26 Ingen ta sikatoy maniilalo met a pasuksokan nen Pablo. Kanian sikatoy mabetbet a patatawag to tan mitotongtong ed sikato. 27 Balet kalabas na duay taon, sinalatan nen Porcio Festo si Felix; tan lapud pinirawat nen Felix a naawat so pabor na saray Judio,+ pinaulyanan to lay Pablo ya akapriso.

25 Kanian kasabi nen Festo+ ed probinsya tan kagapo ton manuley, sikatoy linmad Jerusalem manlapud Cesarea kayari na taloy agew. 2 Tan inter ed sikato na saray manunan saserdote tan manunaan a lalaki na saray Judio so impormasyon sumpad si Pablo.+ Kanian akikasi rad si Festo 3 ya ikdan to ra na pabor* a paonlaen to komon ed Jerusalem si Pablo. Ta plaplanoen dan sabaten si Pablo diad dalan pian pateyen da.+ 4 Balet inmebat si Festo a nepeg a pansiansiaen ya akapriso si Pablo diad Cesarea, tan sikatoy magano met lan ompawil diman. 5 Inkuan to, “Kanian milad siak iramay mangidadaulo ed sikayo tan akusaan da iyan laki, no talagan walay kasalanan to.”+

6 Kanian kayari ton akilimog ed sikara diad ag-onsulok a walora odino samploran agew, sikatoy linmad Cesarea, tan diad tinmumbok ya agew et yinmurong ed panangukoman tan ingganggan ton iloob day Pablo. 7 Sanen niloob da, sikatoy pinaliberan na saray Judio a nanlapud Jerusalem, tan impresenta da so amayamay tan ambebelat ya akusasyon ya agda lanlamang napruebaan.+

8 Balet oniay depensa nen Pablo: “Anggapoy antokaman a kasalanan a ginawak sumpad Ganggan na saray Judio odino sumpad templo odino sumpad Cesar.”+ 9 Lapud labay nen Festo a naalay pabor na saray Judio,+ inebatan toy Pablo: “Labay moy onlad Jerusalem pian diman so pangukoman ed sika diad arapan ko nipaakar ed sarayan bengatla?” 10 Balet inkuan nen Pablo: “Wadia ak la natan ed arap na panangukoman na Cesar, a nepeg a pangukoman ed siak. Anggapoy ginawak a kasalanan ed saray Judio, unong a napapaneknekan mo met la. 11 No talagan walay kasalanan ko tan walay ginawak a makanepegan na ipapatey,+ akaparaan ak ya ompatey; balet no anggapoy katuaan na saray akusasyon ed siak na sarayan totoo, anggapoy kanepegan na siopaman a mangiyawat ed siak ed sikara pian pagustoan ira labat. Onapela ak ed Cesar!”+ 12 Kanian kayarin kinatongtong nen Festo so ulop na saray mananimbawa, sikatoy inmebat: “Lapud inmapela kad Cesar, onla ka sirin ed Cesar.”

13 Kalabas na pigaran agew, binmisita ed Cesarea si Agripa ya ari tan si Bernice pian pagalangan si Festo. 14 Lapud wadman ira ed pigaran agew, impresenta nen Festo ed ari so kaso nen Pablo, ya inkuan to:

“Walay sakey a priso a pinaulyanan la nen Felix, 15 tan sanen wala ak ed Jerusalem, saray manunan saserdote tan mamatatken na saray Judio et angiter na impormasyon nipaakar ed sikato,+ a papaukom dad siak pian nadusa. 16 Balet inebatan ko ra ya aliwan kagagawa na Romano so pangiyawat ed siopaman a toon aakusaan bilang pabor no sikatoy agni akapiarapan ed saray mangaakusa ed sikato tan agni akapandepensa nipaakar ed reklamo.+ 17 Kanian agak la nampaleen sanen sinmabi ra dia, noagta diad tinmumbok ya agew et yinmurong ak lad panangukoman tan ingganggan kon iloob da iyan too. 18 Sanen inmalagey iray mangaakusa, anggapo lanlamang so nidalem dan anggan sakey ed saray mauges a bengatla ya abaloan kon ginawa to.+ 19 Wala labat manayay pisusuppiatan dad sikato nipaakar ed dilin panagdayew dad dios*+ tan nipaakar ed samay toon manngaray Jesus ya inatey la balet ipipilit na sayan Pablo a sikatoy mabilay.+ 20 Lapud agko amta no antoy gawaen kod onian pansusuppiatan, intepet ko no labay toy onlad Jerusalem pian diman so pangukoman ed sikato nipaakar ed saraya.+ 21 Balet sanen inmapela si Pablo a sikatoy bantayan ni legan ya aalagaren so desisyon na Augusto,*+ ingganggan kon sikatoy bantayan ni anggad sikatoy paonlaen kod Cesar.”

22 Insan imbaga nen Agripa ed si Festo: “Labay kon dengelen iyan too.”+ Inyebat to: “Nabuas, sikatoy narengel mo.” 23 Kanian diad tinmumbok ya agew, sinmabi si Agripa tan Bernice ya inulop na mapasirayew a parada tan linmoob irad kuarton kawalaan na saray dumerengel a kaiba iray komandante na militar ontan met ed saray prominentin lalaki ed syudad; insan ingganggan nen Festo ya iloob da lay Pablo. 24 Tan inkuan nen Festo: “Arin Agripa tan amin yon wadia, nanenengneng yo iyan too ya indalem ed siak dia na dakdakel a Judio tan ed Jerusalem, ya iyeeyag dan sikatoy agla manepeg a manbilay.+ 25 Balet atalosan ko ya anggapon balot so ginawa na sayan too a makanepegan na ipapatey.+ Kanian sanen labay toy onapela ed Augusto,* nandesisyon ak a sikatoy paiyakar ko. 26 Balet agko naseguro no antoy isulat kod Emperador* nipaakar ed sikato. Kanian sikatoy inawit kod arapan yo, tan nagkalalo ed arapan mo, Arin Agripa, pian walay nisulat ko kayari na panusisa ed kaso to. 27 Ta parad siak et singano aliwan makatunongan no ibakik so sakey a priso ya anggapoy nipanengneng kon akusasyon sumpad sikato.”

26 Inkuan nen Agripa+ ed si Pablo: “Nayari ka lan mansalita pian mandepensa.” Kanian inyunat nen Pablo so lima to tan nansalita:

2 “Arin Agripa, nipaakar ed amin a pangaakusaan ed siak na saray Judio,+ maliket ak ta diad sayan agew et makapandepensa ak ed arapan mo, 3 nagkalalo la ta kabkabat mo so amin a kustombre tan saray pansasangsangan ed limog na saray Judio. Kanian ipangasim, anosan mo ak pan dengelen.

4 “On, say paraan na impanbilay ko manlapud inkaugaw ko diad limog na saray kabaleyan* ko tan diad Jerusalem et amta na amin a Judio+ 5 a dati lan makapikabat ed siak, no bilang ta labay dan tasian, a nambilay ak bilang Fariseo+ unong ed sankaestriktoan a paraan na panagdayew tayo.+ 6 Balet natan et akaalagey ak dia ya uukomen lapud paniilalok ed samay insipan na Dios ed inmuunan atateng tayo;+ 7 iilaloan met na 12 tribu tayo so kasumpalan na sayan sipan, kanian masimoon iran manlilingkor ed Dios diad labi tan agew. Kanian aakusaan ak na saray Judio lapud maniilalo ak ed saya met a sipan,+ O Ari.

8 “Akin et iisipen* yon imposible so pamaoli na Dios ed saray inaatey? 9 Nensaman et kombinsido ak a nepeg kon gawaen so amin a paraan pian sumpaen so ngaran nen Jesus a Nazareno. 10 Ontan so ginawak diad Jerusalem, tan impaiprisok so dakel ed saray masanto,+ ta akaawat ak na autoridad manlapud saray manunan saserdote;+ tan onsusuporta ak sano pateyen la ra. 11 Diad mabetbet a panudusak ed sikara ed amin a sinagoga, pinasoot ko ran taynan day pananisia ra; tan lapud agaylay sanok kod sikara, pinasegsegang ko ra anggan diad arum iran syudad.

12 “Sanen gagawaen ko iya diad pambiahek a mamaarap ed Damasco ya awit koy autorisasyon tan ganggan manlapud saray manunan saserdote, 13 legan na kaagwan et akanengneng ak ed dalan, O Ari, na liwawan nanlapud tawen a masmasnag nen say agew a sinminag ed kaliberliber ko tan ed saramay kaibak a manbiabiahe.+ 14 Tan sanen atumba kamin amin, nadngel koy boses ya angikuan ed siak diad lenguahen Hebreo: ‘Saulo, Saulo, akin et papasegsegangen mo ak? Papairapen mo labat so sarilim diad pangidedepak mo ed saray panagdugsol.’* 15 Balet inkuan ko: ‘Siopa ka, Katawan?’ Tan inkuan na Katawan: ‘Siak si Jesus, a papasegsegangen mo. 16 Ingen, bangon ka tan alagey ka. Nampanengneng ak ed sika lapud pilien ta ka bilang lingkor tan tasi ed saray anengneng mo la tan ed saray ipanengneng kod sika nipaakar ed siak.+ 17 Tan iliktar ta kad sayan nasyon tan ed arum a nasyon a pangibakian kod sika+ 18 pian lukasan moy kamataan da,+ ya iyakar mo rad liwawa+ manlapud kabilungetan+ tan papawilen mo ra ed Dios manlapud pakauley nen Satanas,+ pian naperdona iray kasalanan da+ tan naawat day tawir a kaiba na saramay pinasanto lapud pananisia rad siak.’

19 “Lapud saya, Arin Agripa, agko sinumlang so anengneng kon pasingawey ed tawen, 20 noagta impasabik so mensahe, unona diad saramay walad Damasco+ tan ed saramay walad Jerusalem,+ tan diad interon dalin na Judea, tan ed amin met a nasyon, pian magbabawi ra tan ompawil ira ed Dios, ya ipanengneng dad gawa ra so panagbabawi ra.+ 21 Nisengeg ed saya et inerel ak na saray Judio diad templo tan implano ra ak a pateyen.+ 22 Balet lapud tutulongan ak na Dios et makakapanpulong ak ya anggad sayan agew ed saray abeba tan atagey so kipapasen da, ya anggapo lay arum ya ibabagak noag say imbaga na saray Propeta tan si Moises a nagawa+— 23 a say Kristo et nepeg a manirap,+ tan bilang say unonan napaoli manlapud inaatey,+ ipulong toy liwawa ed saray Judio tan ed saray nasyon.”+

24 Natan legan ya ibabaga iraya nen Pablo diad pandedepensa to, inyeyag nen Festo: “Natatapis ka la, Pablo! Natatapis ka la lapud karakel na kakabatan mo!” 25 Balet imbaga nen Pablo: “Agak natatapis, Kagalgalang a Festo, noagta saray salitan ibabagak et katuaan tan manlalapud limpion kanonotan. 26 Diad tua et amta iraya na ari a makpel kon pitotongtongan natan; ta matalek ak ya anggapoy anggan sakey ed saraya ya agto naimano, lapud ag-iraya ginawa ed maamot.+ 27 Manisia kad saray Propeta, Arin Agripa? Amtak a manisia ka.” 28 Balet imbaga nen Agripa ed si Pablo: “Maganom ak lan nakombinse a magmaliw a Kristiano.” 29 Diad saya et inkuan nen Pablo: “Ipikasik ed Dios a diad magano odino mabayag a panaon et aliwan sika labat noagta pati sarayay amin ya ondedengel ed siak natan so magmaliw a Kristiano a singa siak, balet agko labay a nabalor met ira na gulonggulong.”

30 Insan inmalagey lay ari tan say gobernador tan si Bernice tan saray lalakin akayurong a kaiba ra. 31 Balet sanen ontataynan la ra, inkuan dad sakey tan sakey: “Anggapoy gagawaen na sayan too a manepeg ed ipapatey odino kipriso.”+ 32 Insan inkuan nen Agripa ed si Festo: “Nibulos la komon iyan too no agla inmapela ed Cesar.”+

27 Natan ta adesisyonan la a manbarko kamin onlad Italya,+ si Pablo tan saray arum nin priso et inyawat dad sakey ya opisyal na armada a manngaray Julio a kabiangan ed tropa nen Augusto. 2 Kalugan mid sakey a barko a nanlapud Adramito a mamaarap lad saray daongan ya asingger ed baybay na probinsya na Asia, sinmipot kami; kaiba mi si Aristarco+ a taga Macedonia, diad Tesalonica. 3 Diad tinmumbok ya agew et sinmakbit kami ed Sidon, tan maomaong so impitoo nen Julio ed si Pablo tan inabuloyan ton onlad saray kakaaro to pian naasikaso ra.

4 Tan sanen manbiabiahe kami lad dayat manlapu diman, dinmalan kamid sanib na Ciprus pian agmi nasubay dagem. 5 Insan binaliw mi so maawang a dayat, diad petek na Cilicia tan Pamfilia tan dinmaong kami ed Mira diad Licia. 6 Say opisyal na armada et akaromog diman na barkon nanlapud Alejandria a paonlad Italya, tan ditan to kami pinalugan. 7 Insan kayari na matantan ya impanbiahe mid dakel ya agew, nairapan kamin sinmabi ed Cinido. Agkami makatuloy lapud dagem, kanian dinmalan kamid sanib na Creta ed petek na Salmone. 8 Nairapan kamin dinmalan ed baybay tan akasabi kamid pasen a tatawagey Mararakep a Daongan, ya asingger ed syudad na Lasea.

9 Andukey lan panaon so linmabas tan mapeligro lay pambiahe, ta linmabas met lay panag-ayunal ed Agew na Pananakbong,+ kanian oniay inrekomenda nen Pablo 10 ed sikara: “Kakaaro, nanenengneng ko a sayan pambiabiahe tayo et manresulta ed pakaderal tan baleg a pakaperdi, aliwa labat a saray kargamento tan say barko noagta pati saray bilay* tayo.” 11 Balet, say dinengel na opisyal na armada et say kapitan tan say makankayarian na barko imbes a say imbaga nen Pablo. 12 Lapud aliwan maabig a pamalabasan na panaoy ambetel so daongan, imbaga na karaklan a kaukolan lay ombuat pian salien da no kasin makasabi rad Fenix, a daongan ed Creta ya akaarap diad amianen-bukig tan diad abalaten-bukig, tan diman lay pamalabasan da na panaoy ambetel.

13 Sanen makalna lay siplog na dagem a manlalapud abalaten, inisip dan nagawaan da la imay gagala ra, tan inagwat da so angkla tan indalan da so barko ed gilig na Creta. 14 Balet agnambayag et binmasig ed satan so makmaksil a dagem a tatawagey Euroaquilo.* 15 Binmasig itan ed barko tan sanen agla makasuba ed dagem, pinaulyan mi lan niyanor-anor kami. 16 Insan niyakar kami ed sanib na sakey a melag ya isla a tatawagey Cauda, balet ngalngali agmi nakontrol so melag a baloto a walad beneg na barko. 17 Sanen naagwat da la itan, angusar ira na saray panagtaker pian paeleten so dalem na barko; tan lapud natatakot ira ompano onsadsar ira ed Sirtis,* inyabeba da lay panaglayag tan nampaanor la ra. 18 Lapud ipapalirpalir kami na maksil a bagyo, pinalemewan da so barko diad tinmumbok ya agew. 19 Tan diad komatlon agew et imbabantak da lay arum iran kagawaan ed barko.

20 Sanen pigay agew lan agmi anengneng so agew tan saray bitewen tan ombabasig ed sikami so maksil* a bagyo, naandian kami lay ilalo a makaliktar ni. 21 Kayari na abayag ya ag-ira angan, inmalagey si Pablo ed pegley da tan inkuan to: “Kakaaro, dinengel yo komon so imbagak tan agtayo la komon nambiahe manlapud Creta pian agla agawa iyan impakaderal tan impakaperdi.+ 22 Anggaman ontan, kerewen kod sikayo natan a manpakpel kayo, ta anggapoy anggan sakey* a nabalang ed sikayo, noag say barko. 23 Nen kalabian et inmalagey ed abay ko so sakey ya anghel+ na Dios a dadayewen ko tan panlilingkoran ko 24 tan inkuan to: ‘Agka natatakot, Pablo. Nepeg kan onarap ed Cesar,+ tan iliktar na Dios so amin a kaibam ed barko.’ 25 Kanian manpakpel kayo, kakaaro, ta manisia ak ed Dios a nagawan nagawa imay nibagad siak. 26 Balet kaukolan a nisadsar itayo ed gilig na sakey ya isla.”+

27 Natan sanen koma-14 lan labi tan niyaanor-anor kami diad Dayat na Adria, diad pegley-labi et inisip na saray marino ya asingger la rad dalin. 28 Tinukor da so kaaralem tan nalmoan dan 20 depa* itan, kanian inmabante ni ray daiset tan tinukor da lamet tan nalmoan dan 15 depa* itan. 29 Tan lapud natatakot kami ya ompan ombasig kami ed kabatoan, impelag day apatiran angkla ed beneg na barko insan pinirawat dan onkabuasan la komon. 30 Balet sanen implano na saray marino ya ibatikan so barko tan inleksab dad dayat so melag a baloto a kunkunwarin mangipelag ira na saray angkla ed arap na barko, 31 inkuan nen Pablo ed opisyal na armada tan saray sundalo: “No taynanan na sarayan lalaki so barko, agkayo makaliktar.”+ 32 Diad saman et pinultot na saray sundalo iray lubir na melag a baloto tan impelag da la itan.

33 Sanen onkakabuasan la, kinerew nen Pablo ed sikaran amin a mangan ira, ya inkuan to: “Koma-14 lan agew natan na panaalagar yo, tan anggapo nin balot so kinan yo. 34 Mangan kayo la sirin; parad pankaabigan yo, ta anggapoy anggan sakey ed sikayo a nabalangan na sakey a buek na ulo to.” 35 Kayari ton imbaga iya, sikatoy angala na tinapay, akisalamat ed Dios diad arapan dan amin, pinisag to itan, insan angan. 36 Kanian nampakpel iran amin tan angan ira. 37 Amin mi a walad barko et 276 a totoo.* 38 Sanen naksel la ra, imbantak dad dayat iray trigo pian napalemewan so barko.+

39 Sanen kabuasan la, agda nabidbir iman a dalin,+ balet akanengneng ira na sakey a baybay a kabueran, tan ninonot dan isadsar ditan so barko no nayarian da. 40 Kanian pinultot da iray lubir na saray angkla, tan pinaulyanan dan napelag iratan ed dayat, legan dan uukbaran iray singer na saray begsay a pinagka-timon; tan kayari ran inyarap ed dagem so panaglayag ed unaan, amaarap ira ed baybay. 41 Sanen akasabi rad atapew a lugar a sisipwakan na dayat ed biek tan biek, insadsar da so barko tan nikutep so arap na satan tan agla makaalis, tan agaygay so beneg na satan lapud daluyon.+ 42 Diad saman et denesidi na saray sundalo a pateyen iray priso pian anggapoy onlangoy ya ontakas. 43 Balet labay na opisyal na armada ya iliktar si Pablo kanian inamper toy plano ran gawaen. Pinataboy tod dayat iramay makalangoy tan unona la ran onsakbit, 44 insan ontumbok iray atilak, a say arum et manpaletaw ed saray tabla tan say arum et diad saray parte na barko ya agaygay. Kanian akasakbit a maligen so amin.+

28 Sanen akasabi kamin maligen, naamtaan min say isla et tatawagey Malta.+ 2 Tan nikadkaduman pitotoo so impanengneng ed sikami na saray totoon mansasalita na duman lenguahe.* Namparlang ira na apoy tan alay abig so impangawat dad sikamin amin, lapud onuuran tan ambetebetel ed saman. 3 Balet sanen nantipon si Pablo na dakel a sanga tan inyan tod apoy, pinmaway so sakey ya uleg lapud petang tan kinmetket ed lima to. 4 Sanen anengneng na saray totoon manaayam diman* so maditan uleg ya akabitin ed lima to, inkuan dad sakey tan sakey: “Seguradon managpatey iyan too, ta anggano akaliktar ed dayat et ag-inyabuloy na Hustisya* a sikatoy manbilay ni.” 5 Balet impagpag tod apoy so uleg tan anggapoy mauges ya agawad sikato. 6 Balet aalagaren dan sikatoy onlarag odino biglan nabaktar tan ompatey. Kayari na abayag ya impanalagar da tan anengneng dan anggapoy mauges ya agawad sikato, inuman day nononoten da tan inkuan dan sikatoy sakey a dios.

7 Natan, diad asingger ed saman a lugar et wala ray dalin a kayarian na laki a manuuley ed isla, a manngaray Publio, tan sinangkaili to kami tan inasikaso to kamin maong ed loob na taloy agew. 8 Diad saman et mansasakit so ama nen Publio, sikatoy akarukol a napepetang tan ansakit a maong so eges to, tan linmoob si Pablo ed kawalaan to tan nampikasi, ya intapew tod sikato iray lima to, tan pinaabig to.+ 9 Kayari iyan agawa, linma met ed sikato so arum ed saray mansasakit a totoo ed isla pian napaabig ira.+ 10 Pinagalangan da kami met diad impangiter day dakel a regalo, tan pinabalonan da kami na saray nakaukolan mi sanen manbiahe kami la.

11 Kayari na taloy bulan, nambiahe kamid panamegley na barkon walaay simbolo ya “Ananak nen Zeus.” Sayan barko et nanlapud Alejandria tan amalabas na panaoy ambetel diad isla. 12 Sanen dinmaong kami ed Siracusa, taloy agew kamin nansiansia diman; 13 insan binmuat kami tan akasabi kamid Regio. Kayari sakey agew, sinmiplog so dagem manlapud abalaten tan akasabi kami ed Puteoli diad komaduan agew. 14 Wala ray agagin aromog mi dia tan akikasi ran mansiansia kami ed sikara a pitoy agew, tan kayari na satan et amaarap kami lad Roma. 15 Sanen abalitaan na saray agagi diman so nipaakar ed sikami, linma ra anggad Tindaan nen Appio tan diad Taloran Taberna* pian minengneng ira ed sikami, tan sanen anengneng ira nen Pablo, sikatoy akisalamat ed Dios tan apabiskeg.+ 16 Sanen akaloob kamin siansia ed Roma, naabuloyan si Pablo a manayam a bukor diad abung ya inabangan to a kaibay sakey a sundalon manbabantay ed sikato.

17 Balet kayari na taloy agew, tinawag to iramay manunaan a lalaki na saray Judio. Sanen atipon la ra, inkuan tod sikara: “Agagi, anggano anggapon balot so ginawak sumpad totoo odino ed saray kustombre na inmuunan atateng tayo,+ inyawat ak ed saray Romano bilang priso a nanlapud Jerusalem.+ 18 Tan kayari na impangusisa ra,+ labay da ak lan ibulos ta anggapoy sengegay pamateyan dad siak.+ 19 Balet sanen ag-inmabuloy iray Judio, apasootan ak ya onapela ed Cesar,+ balet aliwan lapud akusaen koy nasyon ko. 20 Kanian saya so rason no akin ya akikasi ak pian napinengnengan tan nakatongtong ta kayo, ta akagulonggulong ak lapud samay iilaloan na Israel.”+ 21 Inkuan dad sikato: “Anggapoy naawat min sulat manlapud Judea nipaakar ed sika, tan anggapo met so imbalita odino mauges ya imbaga na saray agagin nanlapu diman nipaakar ed sika. 22 Balet iisipen min manepeg labat a narengel mid sika no anto ray nononoten mo, ta amta min sayan sekta+ et pansasalitaan na mauges diad amin a pasen.”+

23 Angiyuksoy ira natan na sakey agew pian sikatoy napinengnengan da, tan amayamay iran linmad sikato diad panaayaman to. Tan manlapud kabuasan anggad labi et sikatoy nampaliwawad sikara, a sigpot a nantasi nipaakar ed Panarian na Dios, pian natangguyor to ran manisia ed si Jesus+ base ed Ganggan nen Moises+ tan ed saray Propeta.+ 24 Wala ray anisia ed saray imbaga to; balet agmanisia so arum. 25 Lapud ag-ira makapanpapaknaan, tinmaynan la ra, tan oniay imbaga nen Pablo:

“Matukoy so sinalita na masanton espiritu ed inmuunan atateng yo diad panamegley nen propeta Isaias, 26 ya inkuan to: ‘La ka ed sarayan totoo tan ibagam: “Narengel yo balet agyon balot natalosan, tan onnengneng kayo balet agyon balot nanengneng.+ 27 Ta nagmaliw ya agmaawat so puso na sarayan totoo, tan nadngel na kalayagan da balet ag-ira kinmiwas, tan inlikdem day kamataan da, pian agbalot makanengneng iray mata ra tan makarengel iray layag da tan makatalos iray puso da pian makapawil ira, tan paabigen ko ra.”’+ 28 Kanian amtaen yo komon a nipapasabi lad saray nasyon so panangilaban na Dios;+ seguradon ondengel irad saya.”+ 29 *——

30 Kanian duay taon a sikatoy nanayam ed abung ya inabangan to,+ tan maabig so pangaawat tod amin ya oonlad sikato, 31 ya impulong tod sikara so Panarian na Dios tan makmakpel ton imbangat so nipaakar ed Katawan a Jesu-Kristo,+ ya anggapoy makasbel.