SULAT ED SARAY TAGA GALACIA

1 Siak, si Pablo, sakey ya apostol, a say impagmaliw kon apostol et agnanlapud totoo odino diad panamegley na sakey a too, noagta diad panamegley nen Jesu-Kristo+ tan say Dios ya Ama tayo,+ ya amaoli ed sikato manlapud inaatey, 2 tan amin ya agagin kaibak, so nansulat ed saray kongregasyon ed Galacia:

3 Nawalaan kayo komon na agnaparaan a kaabigan tan kareenan a manlalapu ed Dios ya Ama tayo tan ed Katawan a Jesu-Kristo. 4 Inter toy sarili to nisengeg ed saray kasalanan tayo+ pian niliktar to itayo ed sayan mauges a sistema na mundo*+ unong ed linawa na Dios tan Ama tayo,+ 5 a nigloria komon ya anggad angga. Amen.

6 Pankelawan ko ya ibebeneg yo lan tampol so Dios ya anawag ed sikayo diad panamegley na agnaparaan a kaabigan nen Kristo pian tumboken so sananey a klase na maong a balita.+ 7 Agto labay ya ibagan walay sananey a maong a balita; balet walay pigaran manggugulo ed sikayo+ tan labay dan pikeweten so maong a balita nipaakar ed Kristo. 8 Anggaman ontan, anggano sikami odino sakey ya anghel a manlapud tawen so mangiyabawag ed sikayo na maong a balita a midumaan ed samay maong a balita ya inyabawag mi ed sikayo, sikatoy nisamba komon. 9 Singa imbaga mi nensaman, ibagak lamet natan, Siopaman a mangiyaabawag ed sikayo na maong a balita a midumaan ed samay inawat yo, sikatoy nisamba komon.

10 Kasin totoo so sasalien kon tangguyoren natan odino say Dios? Odino kasin labay kon paliketen iray totoo? No saray totoo nin siansia so papaliketen ko, agak magmaliw ya aripen nen Kristo. 11 Ta labay kon naamtaan yo, agagi, a say maong a balitan inyabawag kod sikayo et agnanlapud too;+ 12 ta agko itan inawat ed too odino imbangat itan ed siak, noagta impaamtad siak nen Jesu-Kristo.

13 Seguradon nadngelan yo so kagagawak nensaman ed Judaismo,+ a pinairap* kon maong so kongregasyon na Dios pian naderal itan;+ 14 tan mas inmaligwas ak ed Judaismo nen say dakel a kaedaran ko ed nasyon ko, ta mas maseseg ak ed saray tradisyon na inmuunan atateng ko.+ 15 Balet sanen say Dios, ya angisian ed siak ed eges nen inak tan anawag ed siak ed panamegley na agnaparaan a kaabigan to,+ et nanliketan to 16 ya iparungtal so Anak to diad panamegley ko pian niyabawag kod saray nasyon so maong a balita nipaakar ed sikato,+ agak kinmonsulta a tampol ed siopaman a too;* 17 tan agak linma ed Jerusalem diad saramay apostol ya akauna nen siak, noagta linma ak ed Arabia, tan pinmawil ak ed Damasco.+

18 Insan kayari taloy taon, linma ak ed Jerusalem+ pian bisitaen si Cefas,*+ tan akiayam ak ed sikato diad loob na 15 agew. 19 Balet anggapo lay arum ya anengneng kon apostol, noag si Santiago+ labat ya agi na Katawan. 20 Natan, nipaakar ed saray bengatlan isusulat ko ed sikayo, seseguroen kod sikayo diad arapan na Dios ya agak mantitila.

21 Kayari na satan et linma ak ed saray rehyon na Sirya tan Cilicia.+ 22 Balet agak personal a kabat na saray kongregasyon nen Kristo diad Judea. 23 Say narerengel da labat: “Samay amairap* ed sikatayo nensaman+ et ipupulong to la natan so maong a balita nipaakar ed pananisia a labay ton deralen nensaman.”+ 24 Kanian ginapoan dan igloria so Dios lapud siak.

2 Insan kayari 14 a taon, linma ak lamet ed Jerusalem a kaibak si Bernabe+ tan impilak met si Tito.+ 2 Linma ak diman lapud imparungtal itan ed siak na Katawan, tan imbagak ed saray lalakin gagalangen ed kongregasyon so maong a balita ya ipupulong kod saray nasyon. Balet ginawak iya diad pribadon pantitipon, pian nasegurok a say ministeryon gagawaen ko odino agawaan ko la et aliwan andi-kakanaan.* 3 Balet, anggan si Tito+ a kaibak et agpinilit a manpasegat,+ anggaman sikatoy sakey a Griego. 4 Ingen ta linmesa itan ya isyu lapud saray palson agagi ya ag-aliklikas a linmoob+ pian siimen so kawayangan+ tayo bilang disipulo nen Kristo Jesus, pian sigpot da itayon naaripen;+ 5 agkamin balot inmabuloy odino nampasakop ed sikara+ anggan magano labat,* pian mansiansia ed sikayo so katuaan na maong a balita.

6 Balet nipaakar ed saramay ipapasen a respetadon agagi+—anggan siopa ra nensaman et ag-itan importante ed siak, ta ag-onnenengneng so Dios ed itsura na too—saratan a gagalangen a lalaki et anggapoy balon bengatla ya impasabi rad siak. 7 Balet, sanen anengneng da a nimatalek ed siak so maong a balita parad saramay ag-asegat,+ no panon a nimatalek itan ed si Pedro parad saramay asegat— 8 ta samay angiter ed si Pedro na pakayari bilang apostol ed saramay asegat so angiter met ed siak na pakayari bilang apostol ed saray totoo na saray nasyon+— 9 tan sanen saramay ipapasen a lusek na kongregasyon a sikara di Santiago,+ Cefas,* tan Juan et binidbir da a niiter ed siak so agnaparaan a kaabigan,+ pinasamanoan da kami nen Bernabe+ bilang tanda a sankakaiba kami, a sikami so onlad saray nasyon balet sikara so onlad saramay asegat. 10 Say kinerew da labat et nepeg min nonoten iray agagin mairap-bilay, tan nanggunaetan ko met iyan gawaen.+

11 Balet sanen linma ed Antioquia+ si Cefas,*+ sikatoy arap-arapan a binanok* ta talagan aliway ginawa to.* 12 Ta antis ya onsabi so pigaran lalaki ya imbaki nen Santiago,+ sikatoy midudungo ed saray totoo na saray nasyon;+ balet sanen sinmabi la ra, agla akidungo ed sikara tan inarawian to ra, lapud takot to ed saramay kabiangan na saray asegat.+ 13 Sikatoy inalig met na arum nin Judio ed sayan pankunkunwari,* kanian pati si Bernabe et naimpluensyaan da ed pankunkunwari* da. 14 Balet sanen anengneng ko ya aliwan unong ed katuaan na maong a balita so gagawaen da,+ imbagak ed si Cefas* diad arap dan amin: “No sika, anta sakey kan Judio, et manbibilay ka a singa saray totoo na saray nasyon tan aliwan singa saray Judio, panon a kokombinsien mo ray totoo na saray nasyon a manbilay iran singa saray Judio?”+

15 Sikatayo ran niyanak a Judio, ya aliwan singa saray makasalanan a nanlapud saray nasyon, 16 et bibidbiren tayo a say sakey a too et niyabawag a matunong, aliwan diad panamegley na saray gawa a kakaukolanen na ganggan, noagta dia labat ed panamegley na pananisia+ ed si Jesu-Kristo.+ Kanian anisia itayo ed si Kristo Jesus pian niyabawag itayon matunong diad panamegley na pananisia ed Kristo tan aliwan diad panamegley na saray gawa a kakaukolanen na ganggan, ta anggapoy too* a niyabawag a matunong diad panamegley na saray gawa a kakaukolanen na ganggan.+ 17 Natan no naromogan itayo met a makasalanan diad panggugunaet tayon niyabawag a matunong diad panamegley nen Kristo, kasin si Kristo et lingkor na kasalanan? Andin balot! 18 No ipaalagey ko lamet iramay inggebak la nensaman, ipapatnag kon mananumlang ak. 19 Ta diad panamegley na ganggan et inatey ak ed ganggan+ pian magmaliw ak a mabilay ed Dios. 20 Nipasak ak ed poste a kaiba nen Kristo.+ Aliwa lan siak so mabilay,+ noagta si Kristo so mabilay tan nikasakey ed siak. On, bilang too et manbibilay ak natan unong ed pananisia ed Anak na Dios,+ ya angaro ed siak tan inter toy sarili to parad siak.+ 21 Agko ipupulisay so agnaparaan a kaabigan na Dios,+ ta no say inkatunong et nagamoran diad panamegley na ganggan, andi-kakanaan sirin so impatey nen Kristo.+

3 O sikayo ran makulangkulang a taga Galacia! Siopay angimpluensya ed sikayo na mauges iran bengatla,+ anta malinlinew lan nipaliwawad sikayo a nipasak si Jesu-Kristo?+ 2 Niay labay kon tepeten* ed sikayo: Kasin inawat yoy espiritu diad panamegley na saray gawa a kakaukolanen na ganggan odino lapud pananisia yo ed samay nadngel yo?+ 3 Kasin ontan lay inkamakulangkulang yo? Ginapoan yo lay manakar unong ed espiritu,* kasin sumpalen yo itan diad panakar unong ed laman?*+ 4 Kasin anggapoy gunggona na asagmak yon dakel ya irap? Agak manisia ya anggapoy gunggona na satan. 5 Sirin, kasin samay mangiiter ed sikayo na espiritu tan manggagawa na makapanyari iran gawa*+ ed limog yo et gagawaen to itan lapud saray gawa a kakaukolanen na ganggan odino lapud pananisia yo ed samay nadngel yo? 6 Singa itan si Abraham ya “impatnag toy pananisia ed si Jehova,* tan sikatoy impasen a matunong lapud satan.”+

7 Seguradon amta yo a saramay manbibilay unong ed pananisia et sikara so ananak nen Abraham.+ 8 Natan ta akauna lan impanengneng na kasulatan ya iyabawag na Dios a matunong iray totoo na saray nasyon lapud pananisia ra, asakbay lan inyabawag na satan iyan maong a balita ed si Abraham: “Diad panamegley mo et nabendisyonan so amin a nasyon.”+ 9 Kanian saramay manbibilay unong ed pananisia et nabebendisyonan met a singa si Abraham, samay walaan na pananisia.+

10 Amin iramay mandedepende ed saray gawa a kakaukolanen na ganggan et naayew, ta nisulat: “Naayew so balang sakey ya agmantutultuloy a manguunor ed amin ya akasulat ed lukot na Ganggan.”+ 11 Niarum ni, mapatnag ya anggapoy niyabawag a matunong ed arap na Dios diad panamegley na ganggan,+ ta “say matunong et manbilay lapud pananisia.”+ 12 Natan say Ganggan et agnibase ed pananisia. Imbes, “siopaman a manggagawa ed sarayan bengatla et manbilay ed panamegley na saratan.”+ 13 Sinaliw itayo nen Kristo,+ ya imbulos to itayo+ ed samba na Ganggan diad impagmaliw ton sakey a nisamba imbes a sikatayo, ta nisulat: “Insamba so balang too ya impasak* ed poste.”+ 14 Say gagala et pian makasabi ed saray nasyon diad panamegley nen Kristo Jesus so bendisyon ya insipan ed si Abraham,+ diad ontan et naawat tayo so insipan ya espiritu+ diad panamegley na pananisia tayo.

15 Agagi, mansalita ak diad panamegley na sakey ya ilustrasyon: Say sakey a sipanan, anggano pinaletan labat itan na too, et agnayarin ibaliwala odino aruman na siopaman. 16 Natan saray sipan et inter ed si Abraham tan ed ilalak* to.+ Ag-imbaga na kasulatan, “tan diad saray kailalakan mo,”* ya ontutukoy ed dakel. Imbes, imbaga na satan, “tan diad ilalak mo,”* ya ontutukoy ed sakey, si Kristo.+ 17 Niarum ni, ibagak iya: Say Ganggan, a niiter kayari 430 taon,+ et agto pinagmaliw ya andi-kakanaan so sipanan ya inter na Dios nensaman, pian paandien so sipan. 18 Ta no say tawir et inter diad panamegley na ganggan, aliwa la itan a diad panamegley na sipan; balet mabulos ya inter itan na Dios ed si Abraham diad panamegley na sakey a sipan.+

19 Akin sirin et walay Ganggan? Inyarum itan pian ompatnag iray impakasumlang,+ anggad isabi na ilalak*+ a parad sikato so sipan; tan impasabi itan ed panamegley na saray anghel+ diad lima na sakey a manamegley.+ 20 Natan anggapoy manamegley no sakey labat so nalalanor, balet say Dios et saksakey. 21 Sirin, kasin say Ganggan et agmitunosan ed saray sipan na Dios? Andin balot! Ta no inter so sakey a ganggan a makapangiter na bilay, nayari itayon ipasen a matunong diad panamegley na ganggan. 22 Balet amin et inyan na Kasulatan ed pakauley na kasalanan, pian say sipan a resulta na pananisia ed si Jesu-Kristo et niiter ed saramay mangipapatnag na pananisia.

23 Balet antis ya onsabi so pananisia,* sikatayoy babantayan na ganggan, tan wala itayo ed pakauley na satan, a maniilalo itayo ed pananisia a magano lan niparungtal.+ 24 Kanian say Ganggan so nagmaliw a manag-asikaso* tayo pian nitonton itayo ed Kristo,+ pian niyabawag itayon matunong diad panamegley na pananisia.+ 25 Balet natan ta sinmabi lay pananisia,*+ agtayo la kaukolan so manag-asikaso.*+

26 Diad tua, sikayon amin et ananak na Dios+ lapud pananisia yo ed si Kristo Jesus.+ 27 Ta amin yo ya abautismoan ed Kristo et angisulong la ed Kristo.+ 28 Anggapoy Judio odino Griego,+ anggapoy aripen odino bulos a too,+ anggapoy laki odino bii,+ ta amin yo et saksakey bilang disipulo nen Kristo Jesus.+ 29 Niarum ni, no kayarian kayo nen Kristo, sikayoy peteg ya ilalak* nen Abraham,+ saray tomatawir+ nipaakar ed sipan.+

4 Natan ibagak a no say tomatawir et sakey a melag nin ugaw, anggapoy pidumaan to ed sakey ya aripen, anggano sikatoy katawan na amin a bengatla, 2 balet sikatoy walad pudir na saray manag-asikaso ed ugugaw tan manag-asikaso ed sankaabungan anggad agew ya inggana na ama to. 3 Mipadpara, sanen ugugaw itayo ni, aripen itayo met na saray inuugaw a bengatla na mundo.+ 4 Balet sanen asumpal lay niganan panaon, imbaki na Dios so Anak to, ya inyanak na sakey a bii+ tan sakop na ganggan,+ 5 pian nibulos to iramay sakop na ganggan diad pangaliw tod sikara,+ diad ontan et natagibi itayo bilang ananak.+

6 Natan lapud ananak kayo, imbaki na Dios so espiritu+ na Anak to ed kapusoan tayo,+ tan ibabaga na satan: “Abba,* Ama!”+ 7 Kanian aliwa ka lan aripen noagta anak; tan no anak ka, tomatawir ka met diad panamegley na Dios.+

8 Balet, sanen agyo ni kabat so Dios, aripen kayo na saramay aliwan peteg a dirios. 9 Balet natan ta kabat yo lay Dios, odino kabat kayo la na Dios, akin et ompapawil kayo lamet ed saray makapuy+ tan andi-kakanaan ya inuugaw iran bengatla tan labay yo lamet so manpaaripen ed saratan?+ 10 Estrikto yon ngingilinan iray agew tan saray bulan+ tan saray panaon tan saray taon. 11 Napapagaan ak ed sikayo, ompano pinerdik labat iray sagpot kod sikayo.

12 Agagi, mikakasi ak ed sikayo, magmaliw kayon singa siak, lapud ontan ak met nensaman ed sikayo.+ Anggapoy makapuy a ginawa yod siak. 13 Balet amta yo a lapud sakit ko et nipulong kod sikayo so maong a balita diad unonan pankanawnawa. 14 Tan anggano sakey a subok ed sikayo so kondisyon na laman ko, agyo ak nileglemew odino dinimla;* noagta inawat yo ak a singa sakey ya anghel na Dios, singa si Kristo Jesus. 15 Kawalaan la na liket ya alikna yo nensaman? Ta segurado ak a no nayari labat komon et sinukit yo la ray mata yo tan inter yod siak.+ 16 No ontan sirin, kasin nagmaliw ak a kabusol yo lapud ibabagak ed sikayo so katuaan? 17 Maseseg ira a manatangguyor ed sikayo, balet aliwan maabig so gagala ra; labay da kayon iyarawi ed siak, pian sikara so tumboken yo. 18 Balet, aliwan mauges no say sakey et maabig so gagala to ed maseseg a panatangguyor ed sikayo, aliwa labat lan sano wadtan ak a kaiba yo. 19 Inad-arok ya ananak,+ lapud sikayo et naliliknak lamet so irap na sakey a biin manpapasakit, tan mantultuloy iya anggad nipatnag yo so Kristo. 20 Labay ko komon a wadtan ak natan tan umanen koy paraan na pitotongtong ko, ta napapagaan ak ed sikayo.

21 Ibaga yod siak, sikayo ran malabay a walad sakop na ganggan, Agyo ta narerengel so Ganggan? 22 Alimbawa, nisulat a si Abraham et awalaay duaran anak a lalaki, say sakey et diad aripen a bii+ tan say sakey et diad bulos a bii;+ 23 balet say anak na aripen a bii et niyanak diad natural a paraan*+ tan say anak na bulos a bii et diad panamegley na sakey a sipan.+ 24 Walaan iraya na simbolikon kabaliksan; ta sarayan bibii et mankabaliksay duaran sipanan, say sakey et ginawa ed Palandey Sinai,+ a mamapawala na saray anak a magmaliw ya ariripen tan satan a sipanan et si Hagar. 25 Sayan Hagar et mankabaliksan na Sinai,+ sakey a palandey ed Arabia, tan irerepresenta toy Jerusalem natan, ta sikatoy aripen a kaiba iray anak to. 26 Balet say Jerusalem ed tagey et bulos, tan sikato so ina tayo.

27 Ta nisulat: “Manliket ka, sikan lepes a bii ya agnin balot nananak; eyag kad liket, sika ya agni nampasakit; ta saray anak na biin pinaulyanan et mas dakel nen saray anak na biin walaay asawa.”+ 28 Natan, agagi, sikayoy ananak diad panamegley na sipan, a singa si Isaac.+ 29 Balet no panon a pinasegsegang na samay niyanak diad natural a paraan* imay niyanak diad panamegley na espiritu,+ ontan met natan.+ 30 Anggaman ontan, antoy ibabaga na kasulatan? “Pataynan moy aripen a bii tan say anak to, ta say anak na aripen a bii et agbalot magmaliw a tomatawir a kaibay anak na bulos a bii.”+ 31 Kanian agagi, aliwa itayon ananak na aripen a bii, noagta ananak na bulos a bii.

5 Imbulos itayo nen Kristo parad satan a kawayangan. Kanian bembenan yo itan a malet,+ tan agyo aabuloyan a napegetan kayo lamet na pako na inkaaripen.+

2 Siak lan mismo so mangibabagad sikayo a no nasegat kayo et anggapoy kakanaan nen Kristo ed sikayo.+ 3 Ibabagak lamet ed balang toon manpasegat a sikatoy obligadon manumpal ed interon Ganggan.+ 4 Sikayo ran malabay a niyabawag a matunong ed panamegley na ganggan et nisian ed Kristo;+ tinaynan yoy agnaparaan a kaabigan to. 5 Sikatayo balet, diad panamegley na espiritu et maanos itayon manaalagar ed samay iilaloan tayon pagmaliw a matunong lapud pananisia tayo. 6 No nipaakar ed si Kristo Jesus, say importante et aliwan say pampasegat odino agpampasegat,+ noagta say pananisia a wala ray nagagawaan to diad panamegley na aro.

7 Maabig lay gagawaen yo nensaman.*+ Siopay angamper ed sikayo diad panguunor yo ed katuaan? 8 Say onian panatangguyor et agnanlapud Dios a manatawag ed sikayo. 9 Say daiset a lebadura et palebagen toy interon masa.+ 10 Matalek ak a sikayo ran disipulo na Katawan+ et mipaknad siak; balet samay manggugulo ed sikayo,+ siopaman itan, et awaten toy panangukom a kanepegan to. 11 Balet, agagi, no ipupulong ko ni panagpasegat, akin et napapasegsegang ak ni? No ontan, say panamairapan a poste*+ et agla pakagapolan. 12 Komon ta saramay lalaki a mangogonigon ed sikayo et manpakapon.*

13 Agagi, atawag kayo ed kawayangan; balet agyo uusaren iyan kawayangan pian unoren iray pilalek na laman yo,+ noagta manpaaripen kayo ed balang sakey lapud aro.+ 14 Ta say interon Ganggan et asumpal* ed saksakey a ganggan: “Arom so kaparam a too a singa ed sikan dili.”+ 15 Balet, no mantultuloy kayon mankeketketan tan manaakmonan,+ manalwar kayo ya agkayo manuupotan.+

16 Balet saya so ibagak, Mantultuloy kayon manakar unong ed espiritu+ pian agyon balot gawaen so pilalek na laman.+ 17 Ta say pilalek na laman et sumlang ed espiritu, tan say espiritu et sumlang ed laman; mansumlangan iraya, kanian agyo gagawaen iray bengatlan labay yon gawaen.+ 18 Niarum ni, no iwawanwan kayo na espiritu, agkayo la sakop na ganggan.

19 Natan et mapatpatnag iray gawa na laman, tan saraya et say seksual ya imoralidad,*+ karutakan, anggapoy-baing a kagagawa,*+ 20 idolatriya, espiritismo,*+ pambubusolan, pankokolkol, imon, sanok, sangsangan, inkaapag-apag, saray sekta, 21 ibeg, panagbuanges,+ mabanday a panliliket, tan arum nin singa saraya.+ Papasakbayan ta kayo nipaakar ed saraya, a singa impasakbay ko la ed sikayo, a saramay manggagawa ed saraya et agda natawir so Panarian na Dios.+

22 Balet, say bunga na espiritu et aro, liket, kareenan, anos,* kaabigan, kamaongan,+ pananisia, 23 inkaulimek, panangontrol ed sarili.+ Anggapoy ganggan a sumpad saraya. 24 Niarum ni, saramay kayarian nen Kristo Jesus et impasak da lad poste so laman a kaiba iray mabiskeg a liknaan tan pilpilalek na satan.+

25 No manbibilay itayo unong ed espiritu, mantultuloy itayo met komon a manakar unong ed panangiwanwan na espiritu.+ 26 Ag-itayo komon magmaliw a mapaatagey,+ a mangilalagyat na panlalaslasan+ tan paniibegan.

6 Agagi, anggano say sakey a too et agto amta ya aliwa la manayay aarapen to, sikayo ran walaan na espiritual iran kualipikasyon et panggunaetan yon ipetek iyan too diad espiritu na inkaulimek.+ Balet bantayan moy sarilim,+ ompan natukso ka met.+ 2 Itultuloy yon sakbaten so ambelat ya awit na balang sakey,+ tan diad onian paraan et nasumpal yo so ganggan na Kristo.+ 3 Ta no iisipen na siopaman a sikatoy importante anta andi met,+ papalikdoen toy sarili to. 4 Balet usisaen komon na kada sakey so gagawaen to,+ tan kayari na satan et sikatoy nawalaay rason a manliket nipaakar ed sarili to labat, aliwan diad pangikokompara toy sarili to ed arum.+ 5 Ta kada sakey et nepeg ton sakbaten so dilin responsabilidad to.*+

6 Niarum ni, siopaman a babangatan ed salita na Dios et mibiang komon ed amin a maong a bengatla a kaiba na samay mangibabangat.+

7 Agkayo palilingo: Say Dios et agnayarin napalikdo. Ta antokaman so itatanem na sakey a too, saya met so anien to;+ 8 lapud say sakey a mantatanem parad laman to et manani na kadederal manlapud laman to, balet say sakey a mantatanem parad espiritu et manani na bilay ya andi-anggaan manlapud espiritu.+ 9 Kanian ag-itayo ontutundan manggawa na maabig, ta diad manepeg a panaon et manani itayo no ag-itayo onkesaw.*+ 10 Kanian sirin, legan a walay pankanawnawa* tayo, manggawa itayo na maabig ed amin, balet nagkalalo la ed saray kapananisiaan tayo.

11 Nengneng yo no panon kakabaleg so letra na insulat kod sikayo.

12 Amin iramay malabay a pandinayewen so arum nipaakar ed laman da* et sikara may mamapasoot ed sikayon manpasegat, a gagawaen da labat itan pian ag-ira napasegsegang parad panamairapan a poste* na Kristo. 13 Ta anggan saramay manpapasegat et agda uunoren a mismo so Ganggan,+ balet labay da kayon nasegat pian makapanpasirayew ira nipaakar ed laman yo. 14 Balet komon ta agak balot manpasirayew no aliwan nipaakar ed panamairapan a poste* na Katawan tayon Jesu-Kristo,+ a diad panamegley to et inatey* so mundo diad pakanengneng ko tan inatey ak diad pakanengneng na mundo. 15 Ta say importante et aliwan say pampasegat odino agpampasegat,+ noagta say sakey a balon pinalsa.+ 16 Diad amin a manbibilay unong ed sayan totontonen nipaakar ed kondukta, niwala komon so kareenan tan panangasi ed sikara, salanti, say Israel na Dios.+

17 Manlapud natan et anggapo komon so manggulo ed siak, ta walad laman ko iray marka a pakabidbiran a sakey ak ya aripen nen Jesus.+

18 Agagi, niwala komon so agnaparaan a kaabigan na Katawan tayon Jesu-Kristo ed espiritun ipapatnag yo. Amen.