SULAT ED SARAY TAGA EFESO

1 Siak, si Pablo, ya apostol nen Kristo Jesus diad linawa na Dios, et nansulat ak ed saray masanto a walad Efeso+ tan matoor a disipulo nen Kristo Jesus:

2 Nawalaan kayo komon na agnaparaan a kaabigan tan kareenan a manlalapu ed Dios ya Ama tayo tan ed Katawan a Jesu-Kristo.

3 Narayew komon so Dios tan Ama na Katawan tayon Jesu-Kristo, ta inikdan to itayo na amin ya espiritual a bendisyon diad tawen bilang nikasakey ed Kristo,+ 4 ta pinili to itayo a mikasakey ed sikato* antis a niletneg so mundo, pian magmaliw itayon masanto tan anggapoy pakabalawan+ diad arapan to lapud aro. 5 Ta pinili to itayo la nensaman+ pian natagibi bilang dilin ananak to+ diad panamegley nen Jesu-Kristo, unong ed panliketan to tan linawa to,+ 6 pian sikatoy nirayew lapud maglorian agnaparaan a kaabigan to,+ a mabulos ton impagamor ed sikatayo diad panamegley na inad-aro ton Anak.+ 7 Diad panamegley to et dinondon itayo tan nibulos itayo, on, aperdona iray kasalanan tayo+ diad panamegley na dala to,+ unong ed daakan ya agnaparaan a kaabigan na Dios.

8 Iikdan to itayo na daakan ya agnaparaan a kaabigan tekep na amin a karunongan tan pakatalos,* 9 diad impangipaamta tod sikatayo na sagradon sekreto+ na linawa to. Nanliketan to tan mitunosan ed gagala to 10 so sakey ya administrasyon* a nagawa legan a nasusumpal so aturon panaon, salanti, pian tiponen so amin a bengatla diad Kristo, saray bengatla ed tawen tan saray bengatla ed dalin.+ On, diad sikato 11 et nikasakey kami tan aturo kami bilang tomatawir,+ ta pinili kami la nensaman unong ed gagala na Dios, a nagagawaan toy amin a bengatlan denesidi to unong ed linawa to, 12 pian diad panamegley mi ya akaunan nanilalo ed Kristo et narayew tan nigloria so Dios. 13 Balet maniilalo kayo met lad sikato kayari yon nadngel so salita na katuaan, say maong a balita nipaakar ed kililiktar yo. Sanen anisia kayo, diad panamegley to et atatakan kayo+ na insipan a masanton espiritu, 14 a saya so garantiya* na tawir tayo,+ pian nibulos so dilin kayarian na Dios+ diad panamegley na dondon,+ parad kirayewan tan kigloriaan to.

15 Kanian siak met, manlapu la nen nadngelan koy pananisia yo ed Katawan a Jesus tan say aro ya impanengneng yo ed amin a masanto, 16 agak balot tinmundan misalamat lapud sikayo. Naynay ta kayon bibitlaen ed saray pikakasik, 17 a say Dios na Katawan tayon Jesu-Kristo, say maglorian Ama, et ikdan to kayo komon na espiritu na karunongan tan panangiparungtal ed suston kakabatan nipaakar ed sikato.+ 18 Niliwawaan to ray mata na puso yo, pian naamtaan yo no anton ilalo so anawagan to ed sikayo, no anto ran maglorian kayamanan so ipatawir to ed saray masanto,+ 19 tan no panon kabaleg so pakayari ya impatnag tod sikatayo ran mananisia.+ Napatnagan itan ed saray nagagawaan na mabiskeg a pakayari to, 20 a saya so inusar to sanen pinaoli toy Kristo manlapud inaatey tan pinayurong to ed nikawanan to+ diad tawen, 21 a mas atagey ni nen say amin a gobierno tan autoridad tan pakayari tan pakauley tan amin a ngaran,+ aliwan dia labat ed sayan sistema na mundo,* noagta dia met ed samay onsabi. 22 Impasakop to met so amin a bengatla ed salian nen Kristo+ tan sikatoy ginawa ton ulo na amin a bengatla nipaakar ed kongregasyon,+ 23 say laman to,+ a napno na samay mamapano na amin a bengatla ed amin a paraan.

2 Niarum ni, binilay kayo na Dios, anggano inatey kayo lapud saray impakasumlang tan kasalanan yo,+ 2 ya ontan so kabibilay yo nensaman unong ed sistema* na sayan mundo,+ unong ed manuley a walaay pakayarin mangontrol ed dagem,+ say espiritun+ ipapatnag natan na saramay agmatulok. 3 On, onkikiwas itayon amin nensaman unong ed saray pilalek na laman tayo,+ a gagawaen tayo ray labalabay na laman tan kanonotan tayo,+ tan manlapu nen inyanak itayo et manepeg itayo ed sanok na Dios+ a singa saray arum. 4 Balet say Dios et daakan so panangasi to,+ tan lapud baleg a panangaro to ed sikatayo,+ 5 binilay to itayo a kaiba na Kristo, anggan sanen inatey itayo lapud saray impakasumlang tayo+—niliktar kayo diad panamegley na agnaparaan a kaabigan. 6 Niarum ni, bilang nikasakey ed si Kristo Jesus et binilay to itayo a kaiba to tan pinayurong to itayo a kaiba to diad tawen,+ 7 pian diad saray onsabin panaon* et nipanengneng toy daakan ya agnaparaan a kaabigan to lapud kaabigay-linawa* to ed sikatayo ran nikasakey ed si Kristo Jesus.

8 Diad sayan agnaparaan a kaabigan et niliktar kayo diad panamegley na pananisia,+ aliwan lapud saray sagpot yo; imbes, regalo itan na Dios. 9 Andi, aliwa itan a resulta na saray gawa,+ kanian anggapoy rason na siopaman a manpasirayew. 10 Ta sikatayoy ginawa na Dios* tan pinalsa itayo+ bilang nikasakey ed si Kristo Jesus+ parad maabig iran gawa, ya asakbay lan imparaan na Dios pian manbilay itayo unong ed saratan.

11 Kanian nonot yo a nensaman, sikayo ran totoo na saray nasyon manlapu lad inkiyanak so tatawagen ya “ag-asegat” na saramay tatawagen ya “asegat” ed laman diad panamegley na saray lima na too. 12 Diad saman a panaon et agyo kabat so Kristo, a nisian kayo ed nasyon na Israel, tan agkayo kabiangan ed saray paknaan ya unong ed sipan na Dios;+ diad mundo et anggapoy ilalo yo tan agyo kabat so Dios.+ 13 Balet, sikayo ran niyarawi nensaman et nikasakey la natan ed si Kristo Jesus tan akaasingger kayo la ed panamegley na dala na Kristo. 14 Ta sikatoy amawalay kareenan ed sikatayo,+ ya impankasakey toy duaran grupo+ tan inggeba toy padir a walad baetan da.+ 15 Diad panamegley na laman to et pinaandi toy sengegan na busolan, say Ganggan a tutugyopen na saray bilin tan totontonen, pian say duaran grupo a nikasakey ed sikato et magmaliw a sakey a balon too+ tan napawala toy kareenan, 16 tan sigpot a makapipulangan ed Dios so duaran grupo bilang sakey a laman diad panamegley na panamairapan a poste,*+ lapud inekal to lay busolan+ diad panamegley na laman to. 17 Tan sikatoy sinmabi tan inyabawag toy maong a balita na kareenan ed sikayo ran niyarawi tan ed saramay asingger, 18 ta diad panamegley to, sikatayo a duaran grupo et bulos a makaasingger ed Ama diad panamegley na sakey ya espiritu.

19 Kanian aliwa kayo lan estranghero tan dayo,+ noagta kabaleyan kayo+ na saray masanto tan kabiangan kayo na sankaabungan na Dios,+ 20 tan akaletneg kayo ed pundasyon na saray apostol tan saray propeta,+ tan si Kristo Jesus so pinagkapundasyon a bato ed suyok.+ 21 Bilang nikasakey ed sikato, say interon paalagey, a pinantutugyop pian mantutunosan so amin a parte na satan,+ et niletneg pian magmaliw a masanton templo parad si Jehova.*+ 22 Bilang nikasakey ed sikato, nipapaalagey kayo met a sankakaiba pian magmaliw a sakey a pasen a panayaman na Dios diad panamegley na espiritu.+

3 Kanian siak, si Pablo, a nipriso+ nisengeg ed si Kristo Jesus parad sikayo ran totoo na saray nasyon— 2 no talagan nadngel yo la ya inawat ko so responsabilidad+ a tulongan kayon nagunggonaan ed agnaparaan a kaabigan na Dios, 3 a diad panamegley na panangiparungtal et nipaamta ed siak so sagradon sekreto, a singa insulat ko la ed antikey. 4 Kanian sano nabasa yo iya, naamtaan yoy pakatalos ko ed sagradon sekreto+ nipaakar ed Kristo. 5 Diad apalabas iran henerasyon, sayan sekreto et ag-impaamta ed saray totoo a singa ed pangipaparungtal natan ed saray masanton apostol tan ed saray propeta na Dios diad panamegley na espiritu,+ 6 salanti, saray totoo na nasyon, a nikasakey ed si Kristo Jesus diad panamegley na maong a balita, et nepeg a magmaliw a tomatawir tan kabiangan met ed sakey a laman+ tan kaiba min mangawat ed sipan. 7 Nagmaliw ak a ministro na sayan sekreto lapud regalon agnaparaan a kaabigan na Dios ya inter tod siak bilang panangipatnag na pakayari to.+

8 Sayan agnaparaan a kaabigan et niiter ed siak, a sakey a toon sankaabebaan ed amin a masanto,+ pian iyabawag ko ed saray nasyon so maong a balita nipaakar ed agnasukat a kayamanan na Kristo 9 tan ipanengneng ko ed amin so pangaasikaso ed sagradon sekreto+ ya abaybayag lan panaon ya inyamot na Dios, say amalsa ed amin a bengatla. 10 Agawa itan pian natan, diad panamegley na kongregasyon,+ et naamtaan na saray gobierno tan saray autoridad ed tawen so karunongan na Dios a napapatnagan ed dakel tan nanduruman paraan.+ 11 Saya et unong ed agmanganggan gagala to nipaakar ed Kristo,+ si Jesus a Katawan tayo, 12 a diad panamegley to et bulobulos itayon makapansalita tan matalek itayon makaasingger ed Dios+ diad panamegley na pananisia tayo ed Kristo. 13 Kanian mikakasi ak ya agkayo komon onsusuko lapud saray irap ya asagmak ko nisengeg ed sikayo, ta saraya et kigloriaan yo.+

14 Lapud saya et ontatalimukor ak ed Ama, 15 a sikato so panlalapuay ngaran na balang pamilya ed tawen tan diad dalin. 16 Ipipikasik ed sikato, samay walaan na baleg a gloria, a pabiskegen to komon so walad dalem ya inkatoo yo+ diad panamegley na pakayari na espiritu to, 17 tan diad panamegley na pananisia yo et manayam komon so Kristo ed kapusoan yo pati say aro.+ Komon ta nilamot+ tan niletneg kayo diad pundasyon,+ 18 pian singa say amin a masanto et sigpot yon natalosan so kaawang tan karukey tan kaatagey tan kaaralem, 19 tan naamtaan yoy aro na Kristo,+ a napapalumbasan toy kakabatan, pian sigpot a niwala ed sikayo so amin a kualidad na Dios ya iiter to.

20 Natan, say Dios, a sarasarag ton gawaen so mas ni nen say amin a bengatlan kekerewen odino iisipen tayo,+ unong ed pakayari to a napapatnagan ed sikatayo,+ 21 et nigloria komon diad panamegley na kongregasyon tan diad panamegley nen Kristo Jesus, diad amin a henerasyon ya anggad angga. Amen.

4 Kanian siak, a nipriso+ nisengeg ed Katawan, et mikakasi ak ed sikayo a manbilay kayo komon a manepeg+ unong ed samay anawagan ed sikayo, 2 a walaan kayo komon a naynay na kapaabebaan*+ tan inkaulimek, tan anos,+ ya itepel yoy balang sakey lapud aro,+ 3 tan gawaen yoy anggaay nayarian yon pansiansiaen so pankakasakey yo ed espiritu tan manbilay kayo a walay kareenan.+ 4 Wala labat so sakey a laman,+ tan sakey ya espiritu,+ unong a saksakey so ilalo+ ya anawagan ed sikayo; 5 sakey a Katawan,+ sakey a pananisia, sakey a bautismo; 6 sakey a Dios tan Ama na amin, a manuuley ed amin tan mankikimey diad panamegley na amin tan say pakayari to et onkukurang ed amin.

7 Natan, say agnaparaan a kaabigan et niiter ed kada sakey ed sikatayo unong ed impanukat na Kristo ed sayan regalo.+ 8 Ta inkuan to: “Sanen sikatoy sinmegep ed tagey, angawit na saray narel; sikatoy angiter na saray regalo a lalaki.”+ 9 Et antoy labay ya ibaga na balikas a “sikatoy sinmegep”? Kabaliksan na satan a sikatoy linmeksab met diad abeba iran pasen, salanti, diad dalin. 10 Samay mismon linmeksab et sikato met imay sinmegep+ ed pasen a mas atagey ni nen say tawen,*+ pian diad panamegley to et nasumpal so amin a bengatla.

11 Tan inter toy arum bilang apostol,+ say arum bilang propeta,+ say arum bilang ebanghelisador,*+ say arum bilang pastol tan managbangat,+ 12 pian nipetek* da iray masanto, pian manlingkor irad arum, pian pabiskegen day laman na Kristo,+ 13 anggad mankakasakey tayo lan amin ed pananisia tan ed suston kakabatan nipaakar ed Anak na Dios, a magmaliw itayon singa baleg* lan too,+ ya anggad nasabi tayo lay nagnap ya inkatatken, a mipara ed Kristo. 14 Kanian ag-itayo la nepeg a magmaliw ya ugaw ya unor-unor ed saray palson bangat na totoo+ diad panamegley na panagsaol, diad panamegley na kasiliban ed panaggaway mapalikdo iran pakana, pian ag-itayo magmaliw a singa baloton iyaanor-anor na saray daluyon tan ipapalirpalir na dagem. 15 Balet, legan tayon sasalitaen so katuaan, nisengeg ed aro et ombaleg itayo komon ed amin a bengatla a mitunosan ed samay ulo, si Kristo.+ 16 Lapud sikato, say interon laman+ et ginawan mantutunosan tan kada kabiangan et mantutulongan pian iter no antoy nakaukolan na laman. Sano susumpalen na kada kabiangan so betang to, ontulong itan ed ibaleg na laman legan ya ombibiskeg ed aro.+

17 Kanian, saya so ibagak tan paneknekan ko ed sikayo diad arapan na Katawan, ya agkayo la nepeg a manbilay a singa ed saray nasyon+ a manbibilay unong ed andi-kakanaan* a panagnonot da.+ 18 Ambilbilunget so kanonotan da tan nisian ira ed bilay a manlalapud Dios, lapud anggapoy amta ra tan agmakaliknay puso ra. 19 Lapud agla ran balot makakaliknay kababaingan, inlebleb day inkasikara ed anggapoy-baing a kagagawa*+ pian gawaen so amin a klase na karutakan ya ag-iran balot napepenek.

20 Balet naaralan yo ya aliwan ontan so Kristo, 21 no talagan nadngel yo tan nibangat kayo diad panamegley to, unong ed katuaan ya imbangat nen Jesus. 22 Imbangat kayo a nepeg yon lakseben so daan a personalidad+ a mitunosan ed datin kabibilay yo tan nadederal lapud mapalikdo iran pilalek na satan.+ 23 Tan nepeg yon itultuloy a pasimbaloen so paraan na panagnonot yo,*+ 24 tan nepeg yon isulong so balon personalidad+ a pinalsa unong ed linawa na Dios tan mitunosan ed saray kakaukolanen na tuan inkatunong tan katooran.

25 Kanian, natan ta nilakseb yo lay katilaan, kada sakey ed sikayo so mansalita na katuaan ed kapara ton too,+ lapud amin tayo et kabiangan na saksakey a laman.+ 26 No onsasanok kayo, agkayo komon mankakasalanan;+ agyo aabuloyan ya onselek so agew a wala ni pasnok yo;+ 27 agyo iikdan na pankanawnawa so Diablo.*+ 28 Komon ta say matakew et agla mantakew; imbes, sikatoy mansagpot, a manggawa na maabig a kimey diad panamegley na saray lima to,+ pian walay inabang to ed siopaman a mankaukolan.+ 29 Agkomon ompaway ed sangi yo so abulok a salita,+ noag say maabig a salita labat a makapabiskeg unong a nakaukolan, pian nagunggonaan iray ondedengel ed satan.+ 30 Ontan met, agyo papaermenen so masanton espiritu na Dios,+ a satan so intatak ed sikayo+ parad agew na kibulos diad panamegley na dondon.+

31 Ekal yod inkasikayo so amin a klase na paneem-em na sakit na linawa,+ pasnok, sanok, paneyag, tan makapasakit a salita,+ pati say amin a bengatlan makaderal.+ 32 Balet ipanengneng yoy kaabigan ed sakey tan sakey, magmaliw kayon maabagey,+ a mabulos kayon manpeperdonaan no panon a sikayoy mabulos a pinerdona met na Dios diad panamegley nen Kristo.+

5 Kanian, alig yoy Dios,+ bilang inad-aro ton ananak, 2 tan mantultuloy kayon manbilay diad aro,+ no panon a say Kristo et angaro met ed sikatayo*+ tan inter toy sarili to parad sikatayo* bilang apay tan bagat ya ambalbalingit ed Dios.+

3 Komon ta say seksual ya imoralidad* tan amin a klase na karutakan odino inkaagum et ag-anggan nabitla ed limog yo,+ ta ontan so manepeg ed masanton totoo;+ 4 anggan say makapabaing a kagagawa odino andi-kakanaan a pantotongtong odino mabanday a panaglurey+—saray bengatlan agmanepeg—imbes, ibalikas yoy pisasalamat ed Dios.+ 5 Ta amta yo, on, bibidbiren yon mismo ya anggapo so toon manggagawa na seksual ya imoralidad*+ odino agmalinis a too odino maagum a too,+ a miparad sakey a mandadayew ed idolo, a walaan na tawir ed Panarian na Kristo tan say Dios.+

6 Anggapo komon so toon mamalikdo ed sikayo ed panamegley na saray andi-kakanaan a salita, ta makasengeg ed sarayan bengatla et onsabi so sanok na Dios ed saray agmatulok. 7 Kanian, agkayo mibibiang ed sikara; 8 ta nensaman et wala kayod kabilungetan, balet natan et wala kayo lad liwawa+ nipaakar ed Katawan.+ Mantultuloy kayon manbilay bilang ananak na liwawa, 9 ta say bunga na liwawa et say amin a klase na kamaongan tan inkatunong tan katuaan.+ 10 Itultuloy yon seguroen no antoy makapaliket+ ed Katawan; 11 tan tundaan yo lay mibiang ed andi-kakanaan iran gawa a nipaakar ed kabilungetan;+ imbes, iparungtal yo no anto iratan. 12 Ta saray bengatlan gagawaen da ed amot et makapabaing anggan bitlaen. 13 Natan, amin a bengatlan nipaparungtal et ipapatnag na liwawa, ta amin a bengatlan mapatpatnag et liwawa. 14 Kanian oniay nikuan: “Liing ka, O sikan maugip, tan bangon ka manlapud inaatey,+ tan onsinag ed sika so Kristo.”+

15 Kanian manalwar kayon maong a say kagagawa* yo et aliwan singa saray agmarunong noagta singa saray marunong a totoo, 16 ya usar yod sankaabigan so panaon yo,*+ lapud mauges iray agew. 17 Kanian, agkayo la magmamaliw ya agmakatunongan, noagta itultuloy yon tebeken no antoy linawa nen Jehova.*+ 18 Ontan met, paliisan yoy manbuek ed alak,+ ta mansumpal itan ed inkaalablabas,* noag ingen napano kayo komon a naynay na masanton espiritu. 19 Kansionan yo so balang sakey* na saray salmo, panangirayew ed Dios, tan espiritual a kansion, a mangansion kayo+ tan mantogtog kayon+ impapuso parad si Jehova,*+ 20 a naynay yon pisalamatan+ so Dios tan Ama tayo lapud amin a bengatla diad ngaran na Katawan tayon Jesu-Kristo.+

21 Manpasakop kayo ed sakey tan sakey+ lapud takot ed Kristo. 22 Komon ta saray asawan bibii et manpasakop ed kaasawaan da+ a singa pampapasakop da ed Katawan, 23 lapud say asawan laki et ulo na asawa to+ a singa say Kristo et ulo na kongregasyon,+ a sikato so manangiliktar ed sayan laman. 24 Diad tua, no panon a say kongregasyon et manpapasakop ed Kristo, ontan met komon iray asawan bibii ed kaasawaan da diad amin a bengatla. 25 Asawan lalaki, itultuloy yon aroen so kaasawaan yo,+ no panon a say Kristo et inaro to met so kongregasyon tan inter toy sarili to parad satan,+ 26 pian napasanto to itan, a lilinisan to itan, ya uurasan to na danum, salanti, say salita na Dios,+ 27 lapud labay ton magmaliw a marakep ed pakanengneng to so kongregasyon, ya andian na mantsa odino kumanet odino anggan dinan ed saratan a bengatla,+ noagta masanto tan andian na pakabalawan.+

28 Diad ontan a paraan et nepeg ya aroen na saray asawan lalaki so kaasawaan da a singa ed dilin laman da. Say lakin mangaaro ed asawa to et mangaaro ed sarili to, 29 ta anggapoy toon bubusolen toy dilin laman to, noag ingen papakanen tan papablien to itan, a singa gagawaen na Kristo ed kongregasyon, 30 lapud kabiangan itayo na laman to.+ 31 “Lapud saya et taynan na laki so ama tan ina to tan iyamong toy* asawa to, tan sikaran dua et magmaliw a sakey a laman.”+ 32 Importante iyan sagradon sekreto.+ Natan et mansasalita ak nipaakar ed Kristo tan say kongregasyon.+ 33 Anggaman ontan, kada asawan laki ed sikayo et nepeg ton aroen so asawa to+ a singa ed dilin laman to; ontan met, say asawan bii et nepeg a walaan na aralem a respeto ed asawa to.+

6 Ananak, magmaliw kayon maunor ed atateng yo+ unong ed linawa na Katawan, ta saya so duga ed pakanengneng to.2 “Igalang moy amam tan inam”+ so unonan ganggan a walay katekep ton sipan: 3 “Pian maabig so pansumpalan mo* tan mansiansia kad dalin diad andukey a panaon.” 4 Tan sikayo ran kaamaan, agyo papasyodoten iray ananak yo,+ noagta itultuloy yo ran pabalegen diad disiplina+ tan panamilin* nen Jehova.*+

5 Sikayo ran ariripen, magmaliw kayon matulok ed saray katawan yo diad dalin,+ tekep na takot tan panggiwgiw diad masimoon a puso yo, a singa katutulok yod Kristo, 6 aliwa labat a sano walay makakanengneng, pian labat paliketen iray totoo,+ noagta bilang ariripen nen Kristo ya interon kamarerwa* a manggagaway linawa na Dios.+ 7 Manpaaripen kayo a walaay maong ya awawey, a singa kayo manpapaaripen ed si Jehova*+ aliwan diad totoo, 8 ta amta yo a tumangan nen Jehova* so kada sakey lapud amin a maabig a gagawaen to,+ balanglan sikatoy aripen odino bulos a too. 9 Tan sikayo ran katawan, itultuloy yo ran tratoen ed ontan a paraan, ya agyo ra tataktakoten, ta amta yo a say Katawan yon amin et walad tawen,+ tan anggapoy lalabien to.

10 Kaunoran, mantultuloy kayon onggamor na biskeg+ ed Katawan diad panamegley na baleg a pakayari to. 11 Isulong yoy kompleton armas+ ya inter na Dios pian nalabanan yo iray masilib a pakana na Diablo; 12 lapud mipupuligesgesan itayo,+ aliwan diad totoo,* noagta diad saray gobierno, saray autoridad, saray manuley na sayan ambilunget a mundo, saray armada na mauges ya espiritu+ ed tawen. 13 Lapud saya, isulong yo so kompleton armas ya inter na Dios,+ pian makalaban kayo sano onsabi so mauges ya agew, tan sano agawaan yo lan amin so kaukolan yon gawaen et makatalindeg kayo.

14 Kanian nepeg ya akaparaan kayon milaban, ya akasulong ed awak yo so balkes na katuaan,+ tan say pagew yo et walaay samben na inkatunong,+ 15 tan saray sali yo et akasandalyas pian akaparaan kayon mangiyabawag na maong a balita na kareenan.+ 16 Nilikud nid saraya, ala yoy baleg a samper na pananisia,+ a diad panamegley na satan et naerep yoy amin a mandarlang a pana na samay mauges.+ 17 Ontan met, awat yoy hilmit na kililiktar,+ tan say espada na masanton espiritu, salanti, say salita na Dios,+ 18 tan diad amin a paraan na panagpikasi+ tan masimoon a pikekerew et mantultuloy kayon manpikasi ed amin a pankanawnawa diad pakayari na espiritu.+ Pian nagawaan iya, mansiansia kayon aliing ed amin a panaon, a masimoon kayon onkerew parad amin a masanto. 19 Ipikasi yo ak met, pian natulongan ak a makapansalita, diad ontan et makpel ak a makapanpulong nipaakar ed sagradon sekreto na maong a balita,+ 20 a nipaakar ed saya et sakey ak ya embahador+ ya akagulonggulong, tan pian makpel ak a makapansalita nipaakar ed satan, ta ontan so nepeg a pansalitak.

21 Natan, pian naamtaan yo met so nipaakar ed siak tan no anto lay gagawaen ko, ipaamta nen Tiquico,+ ya inad-aron agi tan matoor a lingkor na Katawan, so amin a bengatla ed sikayo.+ 22 Lapud saya et sikatoy imbakik ed sikayo, pian naamtaan yoy kipapasen mi tan naligliwa toy kapusoan yo.

23 Komon ta saray agagi et nawalaan na kareenan tan aro tekep na pananisia a manlalapu ed Dios ya Ama tayo tan ed Katawan a Jesu-Kristo. 24 Niwala komon so agnaparaan a kaabigan ed amin a walaay ag-onkupas a panangaro ed Katawan tayon Jesu-Kristo.