SULAT ED SARAY TAGA FILIPOS

1 Siak, si Pablo, tan si Timoteo, ya ariripen nen Kristo Jesus, so nansulat ed amin a masanto a disipulo nen Kristo Jesus diad Filipos+ tan ed saray manangasikaso tan ministeryal a lingkor:+

2 Nawalaan kayo komon na agnaparaan a kaabigan tan kareenan a manlalapu ed Dios ya Ama tayo tan ed Katawan a Jesu-Kristo.

3 Naynay ak a misasalamat ed Dios ko sano nanononotan ta kayo 4 kapagno masimoon ak a mangipipikasi ed sikayon amin. Legan kon gagawaen iraya et malikeliket ak,+ 5 lapud tulong yo parad* maong a balita manlapud unonan agew na impangawat yod satan anggad natan. 6 Ta matalek ak a say maabig a kimey ya inggapo na Dios ed sikayo et sumpalen to+ anggad agew nen Kristo Jesus.+ 7 Duga labat ya oniay isipen ko nipaakar ed sikayon amin, lapud wala kayod pusok, sikayo ran sinmuporta ed siak diad impakaprisok+ tan diad panangidepensa tan pakaala na legal a kanepegan a mangipulong na maong a balita.+ Diad ontan et pareho itayon agunggonaan ed agnaparaan a kaabigan.

8 Ta amta na Dios a makakailiw ak lan maong ed sikayon amin, a papablien ta kayo a singa ed panamabli nen Kristo Jesus. 9 Tan saya so naynay kon ipipikasi, a lalo ni komon ya ombaleg so panangaro yo+ tekep na suston kakabatan+ tan aralem a pakatebek;+ 10 a seguroen yo komon no anto ray mas importantin bengatla,+ pian anggapoy nabalaw ed sikayo tan agyo nagapol so arum+ anggad agew nen Kristo; 11 tan napano kayo komon na matunong a bunga, diad panamegley nen Jesu-Kristo,+ parad kigloriaan tan kirayewan na Dios.

12 Natan labay kon naamtaan yo, agagi, a say kipapasen ko et nanresulta laingen ed inyaligwas na maong a balita, 13 kanian akabatan na amin a Guardia na Emperador tan arum nin totoo so nipaakar ed impakaprisok+ nisengeg ed Kristo.+ 14 Natan, karaklan ed saray agagi ed Katawan et nagmaliw a matalek lapud impakaprisok, tan lalo ran makmakpel tan andian na takot a mangipupulong ed salita na Dios.

15 Tua, ipupulong na arum so Kristo lapud ibeg tan pilalaslasan, balet say arum et lapud kaabigay-linawa. 16 Sarayay unor ya abitla et mangipupulong ed Kristo lapud aro, ta amta ra ya aturo ak a mangidepensa ed maong a balita;+ 17 balet saramay unonan abitla et gagawaen da itan lapud inkamakolkol da, ya aliwan malinis so motibo ra, ta labay dan nagonigon ak legan ya akapriso ak. 18 Antoy resulta? Anggapo lay arum noagta nipupulong so Kristo diad amin a paraan, balanglan diad pankunkunwari odino diad katuaan, tan panliliketan ko iya. Diad tua et mantultuloy ak met a manliket, 19 ta amtak a manresulta iya ed kiliktar ko diad panamegley na masimoon a pikakasi yo+ tan diad tulong na espiritu nen Jesu-Kristo.+ 20 Kanian mataletalek ak tan maniilalo ak ya agak balot nabaingan. Balet lapud inkakpel kon mansalita, nitatandoro natan si Kristo, a singa nensaman la, diad panamegley ko,* balanglan mabilay ak odino inatey ak.+

21 Ta no manbilay ak, manbilay ak parad si Kristo,+ tan no ompatey ak, pakagunggonaan ko itan.+ 22 Natan no mantultuloy ak a manbilay diad sayan laman, manbunga ni so kimey ko; ingen ta agko ibaga no dinan so pilien ko. 23 Agko amtay pilien ko ed sarayan dua, ta say labay ko et say kibulos tan nakaibak so Kristo,+ a saya et seguradon mas maong ni.+ 24 Balet, mas nakaukolan a mansiansia ak ni ed sayan laman nisengeg ed sikayo. 25 Kanian lapud matalek ak ed saya, amtak a mansiansia ak ni tan mantultuloy ak a kaiba yon amin pian onaligwas kayo tan nalikna yoy liket diad pananisia yo, 26 pian manliket kayon maong nipaakar ed si Kristo Jesus lapud siak sano wadtan ak la lamet a kaiba yo.

27 Balet onkiwas kayo komon* diad paraan a manepeg ed maong a balita nipaakar ed Kristo,+ pian balanglan makakar ak ditan tan napinengnengan ta kayo odino anggapo ak ditan, narengelan ko so nipaakar ed sikayo tan naamtaan ko a mansiasiansia kayon mapekder, a walaay saksakey a kanonotan* tan saksakey a puso,*+ a sankakaiba kayon mansasagpot parad pananisia ed maong a balita, 28 tan agkayon balot natataktakot na saray kalaban yo. Saya et paneknek a naderal ira,+ balet paneknek met a niliktar kayo;+ tan saya et manlalapud Dios. 29 Ta niiter ed sikayo so pribilehyo nisengeg ed si Kristo, aliwa labat a pian manisia kayo ed sikato noagta pian manirap kayo met nisengeg ed sikato.+ 30 Ta nipapaarap kayo ed subok a singa anengneng yon nipaarap ed siak,+ a natan et narerengelan yo nin nipapaarap ed siak.

2 No walay niiter yon panamaseseg nisengeg ed Kristo, no walay niiter yon ligliwa nisengeg ed aro, no walay panangiyansakit yo ed sakey tan sakey, no walay masimoon a panamabli tan panangabagey yo, 2 diad ontan et paliket yo ak a maong diad pakawalaan yoy parehon kanonotan tan parehon panangaro, a sigpot kayon mankakasakey,* a saksakey so nononoten yo.+ 3 Agkayo manggagaway antokaman lapud inkamakolkol+ odino inkamapaatagey,+ noagta magmaliw kayon mapaabeba,* ya ipasen yon mas atagey so arum nen say sikayo,+ 4 legan yon aanapen so pankaabigan na arum,+ aliwan say pankaabigan yo labat.+

5 Pansiansia yo ed inkasikayo iyan panagnonot a wala met ed si Kristo Jesus,+ 6 ya anggaman kaparpara toy Dios,+ agto anggan inisip a salien so makapipara ed Dios.+ 7 Andi, noagta tinaynan to so amin a walad sikato tan inawat toy kipapasen na sakey ya aripen+ tan nagmaliw a too.*+ 8 Nagkalalo ni, sanen sikatoy nagmaliw a too, sikatoy nampaabeba tan nagmaliw a matulok anggad ipapatey,+ on, ipapatey ed panamairapan a poste.*+ 9 Lapud saya, sikatoy intandoro na Dios ed mas atagey a posisyon+ tan maaron inikdan to na ngaran ya atagey nen say arum nin ngaran,+ 10 pian diad ngaran nen Jesus et ontalimukor so amin a pueg—saramay walad tawen tan saramay walad dalin tan saramay walad dalem na dalin+— 11 tan ipaamta na amin* a bibidbiren dan si Jesu-Kristo so Katawan+ diad kigloriaan na Dios ya Ama tayo.

12 Kanian inad-arok ya agagi, no panon a naynay kayon ontutulok, aliwa labat a sano wadtan ak noagta nagkalalo la natan ya anggapo ak, itultuloy yon pansagpotan so pakaliktar yo tekep na takot tan giwgiw. 13 Ta say Dios so mamapabiskeg ed sikayo, ya iiter tod sikayo so panlabay tan pakayarin onkiwas, a saya et panliliketan to. 14 Itultuloy yon gawaen so amin a bengatla ya anggapoy panmeremere+ tan pansusuppiatan,+ 15 pian magmaliw kayon andiay pakabalawan tan andiay kasalanan, ananak na Dios+ ya andiay mantsa ed limog na pikewet tan mauges a henerasyon,+ a diad sikara et onsisinag kayon singa silew ed mundo,+ 16 ya ombebemben kayon malet ed salita na bilay.+ Diad ontan et walay rason kon manliket diad agew nen Kristo, ta amtak ya aliwan andi-kakanaan so impanbatik odino impansagpot ko. 17 Balet anggano singa ak apay ya iinumen ya iyiibung+ ed bagat+ nipaakar ed masanton panaglingkor* a gagawaen yo lapud pananisia yo, maliket ak tan mililiket ak ed sikayon amin. 18 Diad ontan a paraan, manliket kayo met tan miliket kayo ed siak.

19 Natan, maniilalo ak ed Katawan a Jesus a nibakik la komon a tampol ed sikayo si Timoteo,+ pian napaseseg ak sano nakabatan koy nipaakar ed sikayo. 20 Ta anggapo lay arum a nibakik a walaan na awawey a singa sikato a peteg a mangasikaso ed sikayo. 21 Ta say aanapen na arum et say nipaakar ed dilin pankaabigan da, aliwan say nipaakar ed si Jesu-Kristo. 22 Balet amta yo ya apaneknekan to lan sikatoy makanepegan, a sikatoy nampaaripen a kaibak pian nikayat so maong a balita a singa sakey ya anak+ a kaibay ama to. 23 Kanian sikato so iilaloan kon ibaki sano naamtaan ko la no antoy nagawad siak. 24 On, matalek ak ed Katawan a magano ak met lan onlad sikayo.+

25 Balet natan et iisipen kon kaukolan ya ibakik ed sikayo si Epafrodito, say agik tan kakimeyan ko tan kaparak a sundalo, tan say ibabaki yo a manlingkor ed siak parad pankaukolan ko,+ 26 lapud labalabay to kayon nanengneng ya amin tan maer-ermen lapud nadngelan yon sikatoy nansakit. 27 On, sikatoy nansakit anggad ngalngali la ompatey; balet sikatoy kinasian na Dios, tan aliwan sikato labat noagta siak met, pian agla naaruman so ermen ko. 28 Kanian magangganat ak lan mangibaki ed sikato, pian manliket kayo lamet tan agak la masyadon manpaga sano sikatoy nanengneng yo. 29 Kanian sikatoy awat yo a malikeliket unong a niyugali yo lan gawaen ed saray manlilingkor ed Katawan, tan itultuloy yon pablien iray ontan a lalaki,+ 30 ta nisengeg ed kimey na Kristo* et sikatoy inatey lawari, ya impeligro toy bilay* to pian napanlingkoran to ak, a saya et agyo nagawaan lapud anggapo kayo dia.+

3 Kaunoran, agagik, mantultuloy kayon manliket ed Katawan.+ Aliwan ambelat ed siak so pangisulat ed sikayo na saraya lanlamang a bengatla, tan para iyad pankaabigan yo.

2 Manalwar kayo ed saray aso; manalwar kayo ed saramay manederal; manalwar kayo ed saramay manusuporta ed panagsegat.*+ 3 Ta sikatayo iramay tuan asegat,+ a manggagawa na sagradon panaglingkor diad panamegley na espiritu na Dios tan mangipapasirayew ed si Kristo Jesus+ tan agmanmamatalek unong ed laman, 4 anggaman wala ray rason ko nen say siopaman pian manmatalek ed laman.

No iisipen na arum a too a wala ray rason to pian manmatalek ed laman, mas lalo ak ni: 5 asegat ak ed komawalon agew,+ nanlapu ak ed nasyon na Israel, diad tribu nen Benjamin, sakey ak a Hebreo tan saray atateng ko et Hebreo;+ nipaakar ed ganggan, sakey ak a Fariseo;+ 6 nipaakar ed inkaseseg, pinasegsegang ko so kongregasyon;+ nipaakar ed inkatunong base ed ganggan, pinaneknekan kon anggapoy nabalaw ed siak. 7 Ingen ta saray bengatlan makagunggona ed siak et impasen kon andi-kakanaan* nisengeg ed Kristo.+ 8 Niarum ni, ipapasen ko met ya andi-kakanaan so amin a bengatla nisengeg ed agnaparaan a kablian na kakabatan nipaakar ed si Kristo Jesus a Katawan ko. Nisengeg ed sikato et agko kawkawanan so impakaandi na amin a bengatla tan impasen ko iratan bilang dakel a basura, pian nagamoran koy Kristo 9 tan napaneknekan a nikasakey ak ed sikato, aliwan lapud dilin inkatunong ko diad panutumbok kod Ganggan, noagta lapud inkatunong diad panamegley na pananisia+ ed Kristo,+ say inkatunong a manlalapud Dios a based pananisia.+ 10 Say gagalak et pian sikatoy nakabat ko tan naamtaan koy pakayari nipaakar ed inkioli to+ tan sagmaken met iray irap ya asagmak to,+ ya akaparaan ak ya ompatey a singa impatey to,+ 11 pian nanengneng ko no kasin posible a sakey ak ed saray unonan paolien* manlapud inaatey.+

12 Aliwan lapud inawat ko la itan odino perpekto ak la, noagta gagawaen koy anggaay nayarian ko+ pian nanengneng ko no kasin nabembenan ko met itan, a parad satan et pinili ak* nen Kristo Jesus.+ 13 Agagi, agko ni ipapasen a sankabembenan ko la itan; balet nia so segurado: Lilingwanan ko la ray bengatlan walad benegan+ tan aaboten ko ray bengatlan walad unaan,+ 14 a manggugunaet ak a nadampot so gagalak, salanti, pian naawat ko so premyo+ a panatawag na Dios ed tawen+ diad panamegley nen Kristo Jesus. 15 Kanian, onia met komon so panagnonot tayo ran matatken ed espiritual,+ tan no bilang ta dumay panagnonot yo diad antokaman a paraan, iparungtal na Dios ed sikayo so dugan panagnonot. 16 Anggaman ontan, antokaman so inaligwasan tayo la, mantultuloy tayo komon ya onabante diad saya lanlamang a dalan.

17 Mankakasakey kayo a mangalig ed siak,+ agagi, tan imano yon maong iramay ontutumbok ed alimbawa ya impanengneng mid sikayo. 18 Ta dakel so manbibilay bilang kakabusol na panamairapan a poste* na Kristo—mabetbet ko ran sasalambiten nensaman balet natan et sasalambiten ko met ira tekep na saray lua. 19 Say pansumpalan da et kadederal, tan say dios da et say eges da, tan say ipapasen dan kagalangan et kababaingan da, tan say sankanonot da et saray bengatlan walad sayan mundo.+ 20 Balet sikatayo, say peteg ya ayaman tayo+ et diad tawen,*+ tan manpirpirawat itayon manaalagar ed sakey a manangiliktar a manlapu ditan, say Katawan tayon Jesu-Kristo,+ 21 a walaay baleg a pakayarin mangipasakop na amin a bengatla ed sikato+ tan diad panamegley na sayan pakayari et pasimbaloen to so makapuy a laman tayo pian magmaliw a singa maglorian laman to.+

4 Lapud saya, agagin inad-arok tan il-iliwen ko, a liket ko tan koronak,+ diad onian paraan et mansiansia kayon mapekder+ nipaakar ed Katawan.

2 Bilinen koy Euodias tan bilinen koy Sintique a magmaliw a saksakey so nonot da nipaakar ed Katawan.+ 3 On, kerewen ko met ed sika, a tuan kakimeyan ko,* ya itultuloy mon tulongan irayan bibii a kaibak a nansagpot parad maong a balita, pati si Clemente ontan met iray arum nin kakimeyan ko, a say kangaranan da et walad libro na bilay.+

4 Manliket kayon naynay ed Katawan. Uliten ko, Manliket kayo!+ 5 Naamtaan komon na amin a totoo a makatunongan kayo.+ Asingger so Katawan. 6 Agkayo mapagpaga ed antokaman,+ noagta diad amin a bengatla et ipaamta yo ed Dios iray kerew yo diad panamegley na pikakasi tan masimoon a pikekerew tekep na pisasalamat;+ 7 tan say kareenan+ na Dios a palumbasan toy amin a pakatalos so manbantay ed saray puso+ tan nonot yo diad panamegley nen Kristo Jesus.

8 Kaunoran, agagi, amin a bengatlan tua, amin a bengatlan importante, amin a bengatlan matunong, amin a bengatlan malinis, amin a bengatlan managyat na panangaro, amin a bengatlan positibo, amin a bengatlan maong, tan amin a bengatlan makapadinayew, itultuloy yo irayan nodnonoten.*+ 9 Itultuloy yon gawaen iray naaralan yo pati saray inawat, nadngel, tan anengneng yo nipaakar ed siak,+ tan niwala ed sikayo so Dios na kareenan.

10 Malikeliket ak bilang lingkor na Katawan ta ipapanengneng yo lamet a nononoten yo ak.+ Anggano sankanonot yo ak nensaman, anggapoy pankanawnawa yon ipanengneng itan. 11 Agko ibabaga iya lapud mankaukolan ak, ta naaralan ko la a pasaragen no antoy wala,* antokaman so kipapasen ko.+ 12 Amtak no panon so manbilay ed dagdaiset+ tan no panon so manbilay ed dakdakel. Diad amin a bengatla tan diad amin a kipapasen et naaralan koy sekreto no panon so manbilay, balanglan naksel odino narasan ak, balanglan walaan ak na dakdakel odino mankaukolan ak. 13 Walay biskeg kon arapen so amin a bengatla lapud samay mangiiter ed siak na pakayari.+

14 Anggaman ontan, maabig so ginawa yon panusuporta ed siak diad kairapan ko. 15 Diad tua et amta yo met, sikayo ran taga Filipos, a sanen unonan naaralan yo so nipaakar ed maong a balita, tan sanen tinmaynan ak ed Macedonia, anggapoy kongregasyon a sinmuportad siak nipaakar ed panangiter tan panangawat, noagta sikayo labat;+ 16 ta legan a wala ak ed Tesalonica, aliwa labat ya aminsan noagta amidua kayon angipawit na tulong a nakaukolan ko. 17 Aliwan lapud manaanap ak na regalo, noagta labay kon nanengneng so bunga a mangarum na kayamanan* yo. 18 Balet, amin a nakaukolan ko et wala lad siak tan sobra ni ingen. Anggapo lay kulang ko ta naawat ko la iramay impawit yod si Epafrodito,+ a satan et ambalbalingit,+ naabobonan a bagat, a makapaliket ed Dios. 19 Diad ontan, say Dios ko et iter toy amin a nakaukolan yo+ unong ed magloria iran kayamanan to diad panamegley nen Kristo Jesus. 20 Say Dios tan Ama tayo et nigloria komon ya anggad angga. Amen.

21 Ikumustaan yo ak ed balang masanto a disipulo nen Kristo Jesus. Manpapakumusta met ed sikayo iray agagin kakaibak. 22 Manpapakumusta ed sikayo so amin a masanto, nagkalalo la ed saramay walad sankaabungan na Cesar.+

23 Niwala komon so agnaparaan a kaabigan na Katawan a Jesu-Kristo ed espiritun ipapatnag yo.