SULAT ED SARAY TAGA COLOSAS

1 Siak, si Pablo, ya apostol nen Kristo Jesus diad linawa na Dios, tan si Timoteo+ ya agi tayo, 2 et nansulat ak ed saray masanto tan saray matoor ya agagi a disipulo nen Kristo diad Colosas:

Nawalaan kayo komon na agnaparaan a kaabigan tan kareenan a manlalapud Dios ya Ama tayo.

3 Naynay kamin misasalamat ed Dios, say Ama na Katawan tayon Jesu-Kristo, sano ipipikasi mi kayo, 4 ta nadngelan mi so pananisia yo nipaakar ed si Kristo Jesus tan say panangaro yo ed amin a masanto 5 lapud ilalo a niparaan parad sikayo diad tawen.+ Sayan ilalo et nadngelan yo la nensaman diad panamegley na mensahe na katuaan nipaakar ed maong a balita 6 ya akasabi ed sikayo. No panon a say maong a balita et manbubunga tan onkakayat ed interon mundo,+ satan met so nagagawa ed limog yo, manlapu lad agew a nadngelan yo tan awalaan kayoy suston kakabatan nipaakar ed katuaan na agnaparaan a kaabigan na Dios. 7 Ontan so naaralan yo ed inad-aro tan kapara tayon aripen a si Epafras,+ a matoor a lingkor na Kristo parad sikatayo. 8 Impaamta to met ed sikami so panangaro yo a mitunosan ed espiritu na Dios.*

9 Satan met so rason a manlapu la nen nadngelan mi itan, agkamin balot tinmundan mangipikasi ed sikayo+ tan kekerewen mi a napano kayo komon na suston kakabatan+ nipaakar ed linawa na Dios diad amin a karunongan tan pakatalos a manlalapud masanton espiritu,+ 10 diad ontan et manbilay kayo a manepeg ed si Jehova* pian sikatoy napaliket yon maong legan a manbubunga kayo ed kada maabig a kimey tan naaaruman so suston kakabatan yo nipaakar ed Dios;+ 11 tan makaawat kayo komon na baleg a pakayari unong ed maglorian pakayari to+ pian sigpot kayon makapansungdo a walaay anos tan liket, 12 legan kayon misasalamat ed Ama, a pinagmaliw to kayon kualipikado a mibiang ed tawir na saray masanto+ a walad liwawa.

13 Inliktar to itayo ed autoridad na kabilungetan+ tan inyalis to itayo ed panarian na inad-aro ton Anak, 14 a diad panamegley to et nibulos itayo lapud dondon, salanti, aperdona iray kasalanan tayo.+ 15 Sikato so kaulibay na agnanengneng a Dios,+ say panguloan na amin a pinalsa;+ 16 ta diad panamegley to et apalsa so amin ni ran bengatlan walad tawen tan walad dalin, saray bengatlan nanengneng tan agnanengneng,+ balanglan saratan et trono odino pakauley odino gobierno odino autoridad. Apalsa so amin ni ran bengatla diad panamegley to+ tan parad sikato. 17 Ontan met, sikatoy wala la antis na amin ni ran bengatla,+ tan diad panamegley to et niwala so amin ni ran bengatla, 18 tan sikato so ulo na laman, say kongregasyon.+ Sikato so gapoan, say unonan inmoli manlapud saray inaatey,+ pian sikatoy magmaliw ya unaan ed amin a bengatla; 19 ta labay na Dios a sikatoy magmaliw a nagnap ed amin a bengatla,+ 20 tan diad panamegley nen Kristo et nagawaan na Dios a makapikareenan ed Sikato so amin ni ran bengatla,+ saray bengatlan walad dalin odino saray bengatlan walad tawen. Nagmaliw a posible iyan pikakareenan diad panamegley na dala to+ a nipaagus diad panamairapan a poste.*

21 On, sikayoy nisian tan kakabusol nensaman lapud say pinonot yo et mauges iran gawa, 22 natan et agawaan ton makapikareenan kayo ed sikato diad panamegley na laman na samay sakey ya inatey, pian niyarap to kayo a masanto tan anggapoy pakabalawan tan pakaakusaan diad pakanengneng to+— 23 daput no mantultuloy kayo ed pananisia+ ya akaletneg ed pundasyon+ tan malet,+ ya agkayo niyarawi ed ilalo nipaakar ed maong a balita a nadngel yo tan nipulong ed amin a pinalsa diad silong na tawen.+ Siak, si Pablo, et nagmaliw a ministro nipaakar ed sayan maong a balita.+

24 Manliliket ak natan ed saray paniirap ko parad sikayo,+ tan kulang ni paniirap na laman ko lapud Kristo. Sayan paniirap ko et parad laman nen Kristo,+ say kongregasyon.+ 25 Nagmaliw ak a ministro na sayan kongregasyon unong ed responsabilidad*+ ya inter na Dios ed siak parad pankaabigan yo, a sigpot kon ipulong so salita na Dios, 26 say sagradon sekreto+ a niyamot diad apalabas iran panaon*+ tan diad apalabas iran henerasyon. Balet natan et nipaparungtal la itan ed saray masanton lingkor to,+ 27 a diad sikara et maliket ya impaamta na Dios so maglorian kayamanan na sayan sagradon sekreto+ a nipapaamta ed limog na saray nasyon. Sayan sagradon sekreto et si Kristo a nikasakey ed sikayo, a kabaliksan to a walaan kayoy ilalon nigloria a kaiba to.+ 28 Sikato may ipupulong tayo, a bibilinen tayo so balang sakey tan diad amin a karunongan et ibabangat tayo so balang sakey, pian niyarap tayo ed Dios so kada too bilang nagnap a nikasakey ed Kristo.+ 29 Lapud saya et mansasagpot ak, a manggugunaet ak diad panamegley na pakayari to ya onkikiwas a mabisbiskeg ed siak.+

2 Ta labay kon naamtaan yo so pansasagpot kon maong parad sikayo tan parad saramay walad Laodicea+ tan parad amin ya agni akanengneng ed siak.* 2 Say rason et pian naligliwa so kapusoan da+ tan pian mankakasakey ira ed aro+ tan nawalaan ira na amin a kayamanan a resulta na pakatalos da, a malinew tan segurado, pian nagamoran so suston kakabatan nipaakar ed sagradon sekreto na Dios, salanti, nipaakar ed Kristo.+ 3 Diad sikato niyamot so amin a kayamanan na karunongan tan kakabatan.+ 4 Ibabagak iya pian anggapoy siopaman a mamalikdo ed sikayo diad panamegley na makatangguyor iran panagkatunongan. 5 Anggano anggapo ak ditan ed laman, wadtan ak ed espiritu, a naliliketan ak a nanengneng so inkauksoy yo+ tan say mabiskeg a pananisia yo ed Kristo.+

6 Kanian, no panon ya inawat yoy Kristo Jesus a Katawan, mantultuloy kayon manakar a nikasakey ed sikato, 7 a nilamot tan niletneg ed sikato+ tan mansiasiansian malet ed pananisia,+ unong ya imbangat ed sikayo, tan napnapno na pisasalamat.+

8 Manalwar kayo pian anggapoy makarel* ed sikayo diad panamegley na pilosopiya tan maapan panagpalikdo+ unong ed tradisyon na totoo, unong ed saray inuugaw a bengatla na mundo tan aliwan unong ed Kristo; 9 lapud sikatoy nagnap ed amin a kualidad na Dios.+ 10 Kanian agamoran yoy inkagnap diad panamegley to, samay ulo na amin a gobierno tan autoridad.+ 11 Lapud relasyon yo ed sikato et asegat kayo met, aliwan diad panamegley na lima na too, noagta diad impangekal ed makasalanan a laman,+ lapud ontan so nepeg a pansegat ed saramay lingkor na Kristo.+ 12 Ta niponpon kayo a kaiba to diad panamegley na bautismo a singa ed sikato,+ tan lapud relasyon yo ed sikato et apaoli kayo met+ tan nikasakey ed sikato diad panamegley na pananisia yo ed makapanyarin gawa na Dios, samay amaoli ed sikato manlapud inaatey.+

13 Niarum ni, anggano inatey kayo lapud saray kasalanan yo tan ag-impakasegat na laman yo, binilay kayo na Dios pian nikasakey kayo ed Kristo.+ Maaron pinerdona na Dios so amin a kasalanan tayo+ 14 tan binural* toy insulat a dokumento,+ a nankarga na saray ganggan+ tan sumpad sikatayo.+ Inekal to la itan diad impangipasak to ed satan diad panamairapan a poste.*+ 15 Diad panamegley na satan* et nilakseban to ray gobierno tan saray autoridad tan impanengneng tod publiko ya atalo to ra,+ ya inwanwan to ra diad sakey a parada na pananalo.

16 Kanian anggapo komon so mangukom ed sikayo no antoy kanen tan inumen yo+ odino nipaakar ed panagselebra yoy piesta odino balon bulan+ odino sabaton.+ 17 Saratan a bengatla et anino na saray bengatlan onsabi,+ balet say tudtua et say Kristo.+ 18 Anggapo komon so toon mangamper ed sikayon naalay premyo yo,+ a panliliketan toy kunkunwarin panagpaabeba tan panagdayew ed* saray anghel, a “tatalindegan to”* iray anengneng to. Diad tua et sikatoy manpapaatagey ya anggapoy makatunongan a rason lapud makalaman a panagnonot to, 19 tan sikatoy ag-ontutumbok ed samay ulo,+ a diad panamegley to et natataryaan so interon laman tan mantutunosan a sankakaiba so amin a parte na satan diad panamegley na saray langolangoan tan ula-ulat, tan ombabaleg so interon laman unong ed pamapabaleg na Dios.+

20 No inatey kayo la a kaiba nen Kristo nipaakar ed saray inuugaw a bengatla na mundo,+ akin et manbibilay kayo a singano kabiangan kayo ni na mundo diad pampapasakop yo ni ed saray ganggan ya:+ 21 “Agmo eegnaan, odino tatawayan, odino didiwiten,” 22 ya ontutukoy ed saray bengatlan naderal kayarin usaren, unong ed saray ganggan tan bangat na totoo?+ 23 Anggano saratan a bengatla et ompatnag a singa karunongan, anggapoy kakanaan na saratan pian nadaeg iray pilalek na laman. Ta sayan klase na panagdayew et unong ed panlabayan na sakey tan kunkunwarin panagpaabeba, sakey a panamairap ed laman.+

3 Balet, no binilay kayo la a kaiba na Kristo,+ itultuloy yon anapen iray bengatlan walad tawen, a ditan et akayurong so Kristo diad nikawanan na Dios.+ 2 Iyapasakey yoy nonot yo ed saray bengatlan walad tawen,+ aliwan diad saray bengatlan walad dalin.+ 3 Ta inatey kayo, tan say bilay yo et niyamot ed Kristo unong ed linawa na Dios. 4 Sano nipatnag so Kristo, salanti, say bilay tayo,+ nipatnag kayo met a kaiba to tan mibiang kayo ed gloria to.+

5 Kanian, patey yo ray kabiangan na laman yo*+ nipaakar ed seksual ya imoralidad,* karutakan, agnakontrol a pantintindek ed sekso,+ makapasakit a pilalek, tan inkaagum, a saya et idolatriya. 6 Nisengeg ed saratan a bengatla et onsabi so sanok na Dios. 7 Ontan met so kagagawa yo nensaman* diad datin kabibilay yo.*+ 8 Balet natan, amin iraya et nepeg yon ekalen ed inkasikayo: say sanok, pasnok, kaugsan,+ makapasakit iran salita,+ tan mabanday a panagsalita,+ a saya et agnepeg ya ompaway ed sangi yo. 9 Agkayo mantitilaan.+ Lakseb yoy daan a personalidad*+ pati saray kagagawa na satan, 10 tan isulong yoy balon personalidad,+ a diad panamegley na suston kakabatan et napapasimbalo itan pian niyaninag so personalidad na Dios ya amalsa ed satan.+ 11 Diad satan et anggapoy Griego odino Judio, panagsegat odino agpanagsegat, dayo, Escita,* aripen, odino bulos a too; balet si Kristo so amin a bengatla tan sikatoy walad amin.+

12 Unong ed saya, bilang pinili na Dios,+ masanto tan inad-aro, isulong yo so maaron panangabagey,+ kaabigan, inkamapaabeba,*+ inkaulimek,+ tan anos.+ 13 Itultuloy yon itepel so sakey tan sakey tan mabulos a perdonaen so sakey tan sakey+ anggano walay rason na sakey ya ireklamo imay sakey.+ No panon a si Jehova* et mabulos to kayon pinerdona, ontan met so gawaen yo.+ 14 Balet likud ni ed sarayan amin a bengatla, isulong yo so aro,+ ta saya so perpekton bedber na pankakasakey.+

15 Ontan met, say kareenan na Kristo so manuley komon ed puso yo,*+ ta atawag kayo ed satan a kareenan pian magmaliw a sakey a laman. Tan ipanengneng yon misalsalamat kayo. 16 Komon ta sigpot a manayam ed sikayo so salita na Kristo pati say amin a karunongan na satan. Itultuloy yon ibangat tan pasesegen* so sakey tan sakey diad panamegley na saray salmo,+ panangirayew ed Dios, tan espiritual a kansion a kakansionen a walaay pisasalamat, ya impapuso yon kansionen iratan parad si Jehova.*+ 17 Antokaman so gagawaen yo, diad salita odino gawa, komon ta gawaen yo so amin a bengatla diad ngaran na Katawan a Jesus, a pisalamatan yo so Dios ya Ama tayo diad panamegley to.+

18 Asawan bibii, magmaliw kayon mapasakop ed kaasawaan yo,+ ta manepeg itan ed saray papatumbok na Katawan. 19 Asawan lalaki, itultuloy yon aroen so kaasawaan yo+ tan agkayo magmamaliw a mapaspasnok* ed sikara.+ 20 Ananak, magmaliw kayon maunor ed atateng yo diad amin a bengatla,+ ta makapaliket iya ed Katawan. 21 Kaamaan, agyo papasyodoten iray ananak yo,+ pian ag-ira nadismaya. 22 Ariripen, diad amin a bengatla et magmaliw kayon matulok ed saray katawan yo diad dalin,+ aliwa labat a sano akanengneng ira, pian labat paliketen iray totoo, noagta diad masimoon a puso tan walaay takot ed si Jehova.* 23 Antokaman so gagawaen yo, gawa yo itan ed interon kamarerwa* a singa parad si Jehova,*+ tan aliwan parad totoo, 24 ta amta yo a si Jehova* so panlapuan na tawir ya awaten yo bilang tumang.+ Manpaaripen kayo ed Katawan, si Kristo. 25 Segurado a samay manggagaway mauges et nadusa ed mauges a gagawaen to,+ ta anggapoy lalabien na Dios.+

4 Sikayo ran katawan, trato yo ray ariripen yo diad matunong tan patas a paraan, ta amta yo a wala met so Katawan yo ed tawen.+

2 Manseet kayod pikakasi,+ mansiansia kayon aliing nipaakar ed satan a walay katekep ton pisasalamat.+ 3 Tan ipikasi yo kami met,+ ya ilukas komon na Dios so sakey a puerta parad sikami pian nipulong so salita to, diad ontan et niyabawag mi so sagradon sekreto nipaakar ed Kristo, a saya so sengegan na impakaprisok,+ 4 tan malinew ko komon a nipulong itan unong ed nepeg kon gawaen.

5 Mantultuloy kayon manbilay a walaay karunongan diad pidedeneng yo ed saramay walad paway,* ya usar yod sankaabigan so panaon yo.*+ 6 Naynay komon a maabig iray salita yo, ya atimplaan na asin,+ pian amta yo no panon so nepeg yon iyebat ed kada too.+

7 Amin a nagagawad siak et ipaamta ed sikayo nen Tiquico,+ say inad-arok ya agi tan matoor a lingkor tan kaparak ya aripen na Katawan. 8 Sikatoy ibakik ed sikayo pian naamtaan yoy kipapasen mi tan naligliwa toy kapusoan yo. 9 Onla ditan a kaiba toy Onesimo,+ say matoor tan inad-arok ya agi, a nanlapud sikayo; ipaamta ra ed sikayo so amin a nagagawa dia.

10 Manpapakumusta ed sikayo si Aristarco+ a kaparak a priso, ontan met si Marcos+ a kapinsan nen Bernabe (sikato may imbilin mi ya awaten yo+ sano onlad sikayo), 11 tan si Jesus a tatawagen a Justo. Kabiangan iraya ed saramay asegat. Sikara labat so kakimeyan ko parad Panarian na Dios, tan makapaligliwa iran maong* ed siak. 12 Manpapakumusta ed sikayo si Epafras,+ a nanlapud sikayo tan sakey ya aripen nen Kristo Jesus. Panseseetan ton naynay so mangipikasi ed sikayo, pian makapansiansia kayon nagnap tan walaay malet a kombiksion diad amin a bengatla nipaakar ed linawa na Dios. 13 Ta tatasian ko a sikatoy mansasagpot a maong parad sikayo tan parad saramay walad Laodicea tan Hierapolis.

14 Manpapakumusta ed sikayo si Lucas+ ya inad-aron doktor, tan ontan met si Demas.+ 15 Ikumustaan yo ak ed saray agagi ed Laodicea tan ed si Nimfa tan say kongregasyon a walad abung to.+ 16 Tan sano nibasa la ed sikayo iyan sulat, iyuksoy yo a basaen met iya+ diad kongregasyon na saray taga Laodicea tan basa yo met imay nanlapud Laodicea. 17 Ontan met, ibaga yo ed si Arquipo:+ “Imanom a maong so ministeryo ya inawat mod Katawan, pian nasumpal mo itan.”

18 Awat yoy panangumustak. Siak, si Pablo, so nansulat ed saya.+ Itultuloy yon nonoten so impakaprisok.+ Niwala komon ed sikayo so agnaparaan a kaabigan.