UNONAN SULAT ED SARAY TAGA TESALONICA

1 Siak, si Pablo, kaibak si Silvano*+ tan si Timoteo,+ et nansulat ak ed kongregasyon na saray taga Tesalonica a nikasakey ed Dios ya Ama tayo tan ed Katawan a Jesu-Kristo:

Nawalaan kayo komon na agnaparaan a kaabigan tan kareenan.

2 Naynay kamin misasalamat ed Dios sano bibitlaen mi kayon amin ed saray pikakasi mi,+ 3 ta diad arapan na Dios tan Ama tayo et sankanonot min naynay so matoor a pankikimey yo, maaron pansasagpot yo, tan pansusungdo yo lapud ilalo yo+ ed Katawan tayon Jesu-Kristo. 4 Ta amta mi so impamili na Dios ed sikayo, agagin inad-aro to, 5 lapud say maong a balita ya ipupulong mi et akasabid sikayo aliwan diad panamegley labat na salita noagta diad panamegley met na pakayari tan masanton espiritu tan baleg a talek. Tan amta yo no anton klase na totoo so nagmaliwan mi parad sikayo. 6 Tan inalig yo kami+ tan say Katawan,+ lapud inawat yo so salita na Dios a walaay liket a manlalapud masanton espiritu, anggano nipaarap kayod dakel a kairapan,+ 7 kanian nagmaliw kayon alimbawa ed amin a mananisia diad Macedonia tan diad Acaya.

8 Diad tua, lapud sikayo et aglabat nadngelan so salita nen Jehova* diad Macedonia tan Acaya, noagta kinmayat ed amin a pasen so nipaakar ed pananisia yod Dios,+ kanian anggapo lay kaukolan min ibaga. 9 Ta sikaran mismo et naynay dan ibabalita so unonan impitongtong mi ed sikayo tan no panon yon inarawian iray idolo yo+ pian manpaaripen kayo ed mabilay tan tuan Dios, 10 tan pian manalagar kayo ed Anak to manlapud tawen,+ samay pinaoli to manlapud inaatey, si Jesus, a mangililiktar ed sikatayo ed onsasabin sanok.+

2 Seguradon amta yo, agagi, a say imbisita mi ed sikayo et agnagmaliw ya anggapoy resulta.+ 2 Ta anggano nanirap kami diad unaan tan maruksay impantratod sikami diad Filipos,+ unong ya amta yo la, tinulongan kami na Dios tayo a manpakpel pian nipulong mid sikayo so maong a balita nipaakar ed Dios+ anggaman dakel so isusumpa.* 3 Ta say iiter min bilin et agmanlalapud lingon ideya odino karutakan tan ag-itan mapalikdo, 4 balet no panon ya inabobonan kami na Dios pian imatalek tod sikami so maong a balita, mansasalita kami aliwan pian paliketen iray totoo, noag say Dios, a manguusisa ed kapusoan mi.+

5 Diad tua, amta yo ya agkamin balot nanlarog tan anggapon balot so iyaamot min inkaagum diad panamegley na pankunkunwari;+ tasian iya na Dios! 6 Tan agmi panggugunaetan ya igloria kami na totoo, balanglan sikayo odino say arum, anggano nayarian mi komon so magmaliw a pabelat ed sikayo diad pinansyal bilang apostol nen Kristo.+ 7 Balet nagmaliw kamin mauyamo ed panagtrato mid sikayo, a singa sakey a manpapasuson ina a maar-aron mangaasikaso* ed ananak to. 8 Kanian lapud maaron panamabli mid sikayo, aliwa labat a say maong a balita nipaakar ed Dios so determinado* min inabang ed sikayo, noag pati say mismon bilay* mi,+ ta inar-aro mi kayo.+

9 Seguradon nanononotan yo, agagi, so impankimey tan impansagpot mi. Agew-labi kamin nantrabaho pian agkami magmaliw a pabelat ed anggan siopa ed sikayo diad pinansyal,+ sanen impulong mid sikayo so maong a balita nipaakar ed Dios. 10 Natasian yo, ontan met na Dios, ya impatnag mid sikayo ran mananisia a sikami matoor, matunong, tan andiay pakabalawan. 11 Amta yo a naynay min papasesegen tan liligliwaen tan bibilinen so kada sakey ed sikayo,+ a singa gagawaen na ama+ ed ananak to, 12 pian mantultuloy kayon manbilay a manepeg ed Dios,+ a manatawag ed sikayo diad Panarian+ tan gloria to.+

13 Kanian agkami met ontutundan misasalamat ed Dios,+ ta sanen nadngel yo ed sikami so salita na Dios, inawat yo itan, aliwan bilang salita na totoo, noagta bilang salita na Dios, a saya so katuaan, tan walaan met itan na impluensya ed sikayo ran mananisia. 14 Ta inalig yo, agagi, iray kongregasyon na Dios a nikasakey ed si Kristo Jesus a walad Judea, lapud pinairap kayo na saray kabaleyan yo+ a singa saray agagi ed Judea a papairapen na saray Judio, 15 ya amatey ni ingen ed Katawan a Jesus+ tan saray propeta tan amasegsegang ed sikami.+ Sakey ni et agda papaliketen so Dios, noagta sumpa ra ed saray pankaabigan na amin a totoo, 16 ta labay da kamin patundaen a manpulong ed totoo na saray nasyon pian niliktar komon iraya.+ Lapud saya et aaruman day kasalanan da. Balet sinmabin siansiay sanok na Dios ed sikara.+

17 Balet, agagi, sanen nisian* kamid sikayo ed aganon panaon (diad pisikal, aliwan diad puso mi), ginawa mi amin a nayarian mi pian nanengneng kayo* lapud pirpirawat mi itan. 18 Kanian labalabay mi onlad sikayo, on siak, si Pablo, et sinalik so onla aliwa labat ya aminsan noagta amidua; balet sinaraan nen Satanas so dalan mi. 19 Ta antoy ilalo mi odino liket mi odino korona a panggagayagaan mi ed arap na Katawan tayon Jesus diad kiwawala to? Agta sikayo?+ 20 On, sikayo so gloria tan liket mi.

3 Kanian, sanen agmi la nitepel, inisip min mas maabig so mansiansiad Atenas;+ 2 tan imbaki mi Timoteo,+ ya agi tayo tan ministro na Dios* parad maong a balita nipaakar ed Kristo, pian pabiskegen tan ligliwaen to kayo nipaakar ed pananisia yo, 3 pian anggapod sikayo so onkapuy* lapud sarayan kairapan. Ta amta yon agtayo napaliisan irayan bengatla.*+ 4 Ta sanen kaiba mi kayo ni, ibabaga mi lad sikayo a napairap itayo, tan agawa itan, unong ya amta yo la.+ 5 Kanian sanen agko la nitepel, walay imbakik pian naamtaan koy nipaakar ed katooran yo,+ ompan atukso kayo la na Managtukso,+ tan magmaliw ya andi-kakanaan so impansagpot mi.

6 Balet kasabisabi dia natan nen Timoteo a nanlapud sikayo+ tan maong so imbalita tod sikami nipaakar ed katooran tan panangaro yo, a naynay yon nononoten iray maliket ya impanlilimog tayo tan pipirawaten yon nanengneng kami a singa ed pampipirawat min nanengneng kayo. 7 Kanian, agagi, anggano nagogonigon* tan maniirap kami, naliligliwa kami lapud sikayo tan ed ipapanengneng yon katooran.+ 8 Lapud napapabiskeg* kami no mansiasiansian malet so relasyon yo ed Katawan. 9 Ta panon min nipanengneng so pisasalamat mid Dios nipaakar ed sikayo lapud pinasyan liket a nalilikna mid arap na Dios tayo nisengeg ed sikayo? 10 Agew-labi kamin manpipikasi a masimsimoon pian nanengneng mi kayo* tan napanoan mi no antoy kulang ed pananisia yo.+

11 Natan, komon ta say Dios tan Ama tayo tan say Katawan tayon Jesus et manggaway paraan pian makaonla kamid sikayo. 12 Niarum ni, pakiwasen kayo komon na Katawan a lalo yo nin pabalegen so panangaro yo ed sakey tan sakey+ tan ed amin, a singa gagawaen mi met ed sikayo, 13 pian say kapusoan yo et napabiskeg to, a magmaliw ya andiay pakabalawan tan masanto ed arap na Dios+ tan Ama tayo diad kiwawala na Katawan tayon Jesus+ a kaiba so amin a masanton lingkor to.

4 Kaunoran, agagi, unong a binilin mi kayo la no panon kayon manbilay pian napaliket so Dios,+ unong a gagawaen yo la, kekerewen mi tan mikakasi kamid sikayo diad ngaran na Katawan a Jesus ya itultuloy yon gawaen iya a nagkalalo ni. 2 Ta amta yo ray bilin* ya inter mid sikayo diad panamegley na Katawan a Jesus.

3 Ta linawa na Dios a magmaliw kayon masanto+ tan paliisan yoy seksual ya imoralidad.*+ 4 Nepeg ya amtaen na kada sakey ed sikayo no panon ton kontrolen so dilin laman* to+ unong ed kasantosan+ tan kagalangan, 5 ya aliwan diad maagum tan agnakontrol a pantintindek ed sekso+ a singa ed saray nasyon ya agda kabat so Dios.+ 6 Anggapoy nepeg ya onlampas ed nigeter a limitasyon tan anamoten toy agi to nipaakar ed saya, ta dusaen nen Jehova* iramay manggagawa ed sarayan amin, unong ya imbaga mi la nensaman tan impasakbay mi met lad sikayo. 7 Ta tinawag itayo na Dios, aliwan parad karutakan, noagta parad kasantosan.+ 8 Kanian, samay mangibabaliwala ed sayan bangat et aliwan say too so ibabaliwala to noag say Dios,+ a mangiiter ed sikayo na masanton espiritu to.+

9 Balet, nipaakar ed aroan na sanaagi,+ agmi kayo la kaukolan a sulatan, ta imbangat kayo la na Dios ya aroen yoy sakey tan sakey.+ 10 Diad tua et gagawaen yo la itan ed amin ya agagi ed interon Macedonia. Balet papasesegen mi kayo, agagi, ya itultuloy yon gawaen itan a mas nagkalalo ni. 11 Panggunaetan yoy manbilay a mareen+ tan agyo pibabalian so bilay na arum+ tan mankimey kayo,+ unong ya imbilin mid sikayo, 12 pian manbilay kayon desente diad pakanengneng na saray totoo ed paway*+ tan agmankaukolan na antokaman.

13 Niarum ni, agagi, agmi labay ya anggapoy amta yo nipaakar ed saramay naugip ed patey,+ pian agkayo manermen a singa ed saray arum ya andian na ilalo.+ 14 Ta no papanisiaan tayo a si Jesus et inatey tan inmoli,+ panisiaan tayo met a paolien na Dios iramay naugip ed patey a matoor ed si Jesus pian nakaiba to.+ 15 Ta saya so ibabaga mi ed sikayo unong ed salita nen Jehova,* a saramay mabilay ni ed sikatayo legan na kiwawala na Katawan et agdan balot unaan iramay naugip la ed patey; 16 lapud say Katawan a mismo et onleksab manlapud tawen tan mangiganggan, a walaay boses na arkanghel+ tan walaay trumpeta na Dios, tan saramay inaatey a nikasakey ed Kristo so unonan onoli.+ 17 Kayari na satan, sikatayo ran mabilay ni et alaen ed saray lurem+ pian nakaiba ra tan miabet ed Katawan+ diad dagem; diad ontan et naynay tayo lan kaiba so Katawan.+ 18 Kanian itultuloy yon ligliwaen so sakey tan sakey diad panamegley na sarayan salita.

5 Natan, agagi, nipaakar ed saray panaon tan tiempo,* agla nakaukolan ya isulat iyad sikayo. 2 Ta kabkabat yo a say agew nen Jehova*+ et onsabin singa matakew ed labi.+ 3 Diad panaon ya ibabaga ran, “Kareenan tan kaligenan!” diad satan et tampol ya onsabid sikara so biglan kadederal,+ a singa pampasakit na biin malukon, tan ag-iran balot makaliktar. 4 Balet sikayo, agagi, anggapo kayod kabilungetan pian nasabian na satan ya agew, aliwan singa saray matakew a nasabian na liwaway agew, 5 ta sikayon amin et ananak na liwawa tan ananak na agew.+ Anggapo itayo ed labi odino diad kabilungetan.+

6 Kanian sirin, ag-itayo la komon nanaugip a singa gagawaen na arum,+ noagta mansiansia itayon aliing+ tan mantultuloy itayon manlikas.+ 7 Ta saramay nanaugip et onuugip no labi, tan saramay manbuebuek et abuek no labi.+ 8 Balet sikatayo ya ananak na agew, komon ta mantultuloy itayon manlikas tan isulong tayoy samben ed pagew a pananisia tan aro tan say ilalon kililiktar bilang hilmit+ 9 ta sikatayoy pinili na Dios, aliwan pian mangawat na sanok to, noagta pian niliktar+ diad panamegley na Katawan tayon Jesu-Kristo. 10 Sikatoy inatey parad sikatayo,+ pian balanglan mansiasiansia itayon aliing odino naugip,* manbilay itayon kaiba to.+ 11 Kanian itultuloy yon pasesegen* tan pabiskegen so sakey tan sakey,+ a singa gagawaen yo la.

12 Natan et kerewen mid sikayo, agagi, respeto yo iramay mansasagpot ed limog yo tan mangidadaulo ed sikayo ed kimey na Katawan tan manisimbawa ed sikayo; 13 tan ipatnag yod sikara so mas nagkalalon konsiderasyon tan panangaro lapud kimey da.+ Pansiansia yoy kareenan ed limog yo.+ 14 Balet, bilinen mi kayo, agagi, a pasakbayan* yo iramay masunggay,+ ligliwa yo iramay maer-ermen,* tulongan yo iramay makapuy, anosan yo so amin.+ 15 Seguroen yon anggapod sikayo so ombales na mauges ed mauges a ginawa na arum,+ noag ingen manggawa kayon naynay na maabig ed balang sakey tan ed amin.+

16 Lawas kayon manliket.+ 17 Naynay kayon manpikasi.+ 18 Pisalamatan yo so amin a bengatla.+ Saya so linawa na Dios ed sikayo diad panamegley nen Kristo Jesus. 19 Agyo eerepen so apoy na espiritu.+ 20 Agyo leleglemewen iray propesiya.+ 21 Seguroen yo so amin a bengatla;+ itultuloy yon gawaen so maabig. 22 Paliisan yoy antokaman a klase na kaugsan.+

23 Komon ta say Dios na kareenan et sigpot to kayon pasantosen. Tan say interon kabiangan na espiritu tan kamarerwa* tan laman yo, agagi, et mansiansia komon ya andiay pakabalawan diad kiwawala na Katawan tayon Jesu-Kristo.+ 24 Say Dios a manatawag ed sikayo et matoor, tan seguradon gawaen to itan.

25 Agagi, itultuloy yo kamin ipikasi.+

26 Ibano yo so amin ya agagi diad panamegley na inaagin angob.*

27 Iikdan ta kayoy seryoson responsabilidad diad ngaran na Katawan ya ibasa yo iyan sulat ed amin ya agagi.+

28 Niwala komon ed sikayo so agnaparaan a kaabigan na Katawan tayon Jesu-Kristo.