KOMADUAN SULAT ED SARAY TAGA TESALONICA

1 Siak, si Pablo, kaibak si Silvano* tan si Timoteo,+ et nansulat ak ed kongregasyon na saray taga Tesalonica a nikasakey ed Dios ya Ama tayo tan ed Katawan a Jesu-Kristo:

2 Nawalaan kayo komon na agnaparaan a kaabigan tan kareenan a manlalapu ed Dios ya Ama tayo tan ed Katawan a Jesu-Kristo.

3 Obligado kamin naynay a misalamat ed Dios nipaakar ed sikayo, agagi. Manepeg iya, lapud ombibiskeg a maong so pananisia yo tan ombabaleg so panangaro yo ed sakey tan sakey.+ 4 Kanian ipapasirayew mi kayo+ ed saray kongregasyon na Dios lapud panagsungdo tan pananisia yo anggaman makakasagmak kayoy* panamasegsegang tan irap.*+ 5 Saya so paneknek na matunong a panangukom na Dios, kanian sikayoy ipapasen a makanepegan ed Panarian na Dios, a parad saya et maniirap kayo.+

6 Ta petepeteg a matunong parad Dios a balesen to na kairapan iramay mamapairap ed sikayo.+ 7 Balet sikayo ran napapairap et nainawaan a kaiba mi sano omparungtal so Katawan a Jesus+ manlapud tawen a kaiba iray makapanyarin anghel to+ 8 diad mandarlang ya apoy, a legan na satan et sikatoy ombales ed saramay agda kabat so Dios tan ed saramay agmanguunor ed maong a balita nipaakar ed Katawan tayon Jesus.+ 9 Sikaray naukom tan say dusa ra et andi-anggaan a kadederal tan naandi ra+ ed arap na Katawan tan agda la nanengneng so maglorian pakayari to, 10 diad panaon a sikatoy onsabi pian nigloria a kaiba iray masanton lingkor to tan diad satan ya agew et sikatoy pankelkelawan na amin ya angipatnag na pananisia, lapud anisiaan yo so impantasi mi ed sikayo.

11 Lapud satan et naynay mi kayon ipipikasi, a sikayoy ipasen komon na Dios a makanepegan ed samay anawagan tod sikayo+ tan diad panamegley na pakayari to et sigpot ton sumpalen so amin a maabig a panliliketan to tan amin a kimey a gagawaen yo lapud pananisia yo. 12 Diad ontan, say ngaran na Katawan tayon Jesus et nigloria diad panamegley yo tan sikayoy nigloria lapud sikato, unong ed agnaparaan a kaabigan na Dios tayo tan say Katawan a Jesu-Kristo.

2 Balet nipaakar ed kiwawala na Katawan tayon Jesu-Kristo+ tan say panitipon ed sikatayo pian nakaiba to,+ kerewen mid sikayo, agagi, 2 ya agkomon main-inomay a naandi so maabig a panagkatunongan yo odino nabigla kayo lapud saray impuyan a balikas*+ odino mensahen imbagad sikayo odino sulat a singano nanlapud sikami, a mangibabagan asingger lay agew nen Jehova.*+

3 Agyo aabuloyan a walay mangibalang* ed sikayo diad antokaman a paraan, lapud ag-onsabi itan ya agew anggad agni niwala so apostasya+ tan niparungtal so too na kaugsan,+ say anak na kadederal.+ 4 Sikatoy sakey a sumusumpa tan ipapaatagey toy sarili to ed amin a tatawagen a dios odino bengatlan dadayewen,* kanian sikatoy onyuyurong ed templo na Dios, ya ipapanengneng tod arum a sikatoy sakey a dios. 5 Agyo ta nanonotan a naynay kon ibabaga iraya ed sikayo sanen kaiba ta kayo ni?

6 Tan natan et amta yo la no antoy mangaamper, pian sikatoy niparungtal labat diad aturon panaon. 7 Tua, sayan kaugsan to et sakey a misteryo tan nagagawa la,+ balet mansiansia labat ya ontan anggad sano naandi la imay mangaamper natan. 8 Insan niparungtal imay mauges, a deralen na Katawan a Jesus diad panamegley na pakayarin ompapaway ed sangi to*+ tan paandien to sano napatnagan+ lay kiwawala to. 9 Balet say kiwawala na samay mauges et napapatnagan lapud saray gagawaen nen Satanas+ diad panamegley na amin a makapanyarin gawa tan saray palson tanda tan pakelaw+ 10 tan amin ya agmatunong a panamalikdo+ ed saramay nadederal la, bilang panangibales lapud agda inawat tan impatnag so panangaro ed katuaan pian niliktar ira komon. 11 Kanian papaulyan na Dios a naimpluensyaan ira na sakey a katilaan pian panisiaan da so aliwan tua,+ 12 diad ontan et naukom iran amin lapud agda anisiaan so katuaan noagta nanliketan day ag-inkatunong.

13 Balet, obligado kamin naynay a misalamat ed Dios nipaakar ed sikayo, agagin inad-aro nen Jehova,* ta manlapud gapo et pinili kayo la na Dios+ parad kililiktar diad impamasanto tod sikayo+ ed panamegley na espiritu to tan diad pananisia yo ed katuaan. 14 Tinawag to kayo parad saya diad panamegley na maong a balita ya iyaabawag mi, pian nigloria itayo met a singa say Katawan tayon Jesu-Kristo.+ 15 Kanian sirin, agagi, magmaliw kayon mapekder+ tan itultuloy yon tumboken iray tradisyon ya imbangat ed sikayo,+ balanglan diad panamegley na mensahen imbagad sikayo odino sulat a nanlapud sikami. 16 Niarum ni, komon ta say Katawan tayon Jesu-Kristo tan say Dios ya Ama tayo, a mangaaro ed sikatayo+ tan angiter na agmanganggan ligliwa tan alay abig ya ilalo+ diad panamegley na agnaparaan a kaabigan, 17 so manligliwa ed kapusoan yo tan mamabiskeg ed sikayo diad amin a maabig a gawa tan salita.

3 Kaunoran, agagi, itultuloy yon ipikasi a diad panamegley mi+ et maples komon ya onkayat tan nigloria so salita nen Jehova,*+ a singa nagagawa la ed sikayo, 2 tan niliktar kami komon ed saray maruksa tan mauges a totoo,+ ta aliwan amin et walaan na pananisia.+ 3 Balet matoor so Katawan, tan pabiskegen to kayo tan protektaan to kayo ed samay mauges. 4 Sakey ni, bilang papatumbok na Katawan et walay talek mid sikayo, a gagawaen yo tan itultuloy yon gawaen iray bilin mid sikayo. 5 Komon ta itultuloy ya iwanwan na Katawan so kapusoan yo pian nipatnag yoy panangaro ed Dios+ tan makapansungdo kayo+ parad Kristo.

6 Natan et bibilinen mi kayo, agagi, diad ngaran na Katawan tayon Jesu-Kristo, ya arawian yo so balang agi a masunggay+ tan ag-ontutumbok ed samay tradisyon* ya inawat yo* ed sikami.+ 7 Ta amta yo no panon so pangalig yo ed sikami,+ lapud agkami nagmaliw a masunggay ed limog yo, 8 tan agkami kinmerew ed anggan siopa na kanen mi ya agmi binayaran.+ Balet agew-labi kamin nankimey tan nansagpot pian agkami magmaliw a pabelat ed anggan siopa ed sikayo diad pinansyal.+ 9 Aliwan lapud anggapoy kanepegan min mangawat,+ noagta labay mi magmaliw ya alimbawa pian aligen yo.+ 10 Diad tua, sanen kaiba mi kayo, oniay naynay min ibibilin ed sikayo: “No walay siopaman ya agto labay so mankimey, agyo papakanen.”+ 11 Ta narerengelan mi a wala ray masunggay ed limog yo,+ ya ag-iran balot mankikimey, noagta pibabalian day agda nepeg a pibabalian.+ 12 Diad ngaran na Katawan a Jesu-Kristo et bibilinen tan sisimbawaen mi iratan a totoo a mankimey ira ya agda guguloen so arum, tan kanen da imay nansagpotan da.+

13 Balet sikayo, agagi, agkayo ontutundan manggaway maong. 14 Balet no walay aliwan matulok ed saray ibabaga mi diad sayan sulat, sikatoy markaan yo tan agyo la pipiulopan,+ pian sikatoy nabaingan. 15 Ingen ta agyo ipapasen a kabusol, noagta itultuloy yon simbawaen+ bilang sakey ya agi.

16 Natan, komon ta say Katawan na kareenan et naynay a mangiter ed sikayo na kareenan diad amin a paraan.+ Niwala komon so Katawan ed sikayon amin.

17 Awat yoy panangumustak. Siak, si Pablo, et insulat ko yan mismo,+ a pakabidbiran ed amin a sulat ko; oniay panagsulat ko.

18 Niwala komon ed sikayon amin so agnaparaan a kaabigan na Katawan tayon Jesu-Kristo.