Kambal ya Mandumaan

BALEG so pandumaan na sarayan duaran ugaw awa? Antam so ngaran da? Sayay manpapana et si Esau, tan sayay mangaasikaso na karnero et si Jacob.

Si Esau tan Jacob et kambal ya anak di Isaac tan Rebeca. Inad-aro nen Isaac si Esau, ta maong ya mangerel na ayep tan mangisesempet na naakan da. Balet mas inaro nen Rebeca si Jacob ta mareen tan maong ya ugaw.

Diad saman et mabilay ni laki dan si Abraham, tan seguro naiimadyin moy Jacob ya ondedengel ed sikato ya mangiistoryay nipaakar ed si Jehova. Inatey si Abraham ed edad ya 175, sanen mantaon na 15 so kambal.

Nen 40 la nen Esau, sikatoy angasawa na duaran Canaanita. Maer-ermen si Isaac tan Rebeca ta agmandadayew ed si Jehova iray inasawa to.

Asabi panaon ya iter la nen Isaac so bendisyon ed panguloan ya anak to. Lapud mas panguloan si Esau, iilaloan ton sikato so nabendisyonan. Balet inlako to lad si Jacob so kanepegan ton mangawat na bendisyon. Sakey ni, nen inyanak ira, imbaga na Dios ya si Jacob so mangawat na bendisyon. Tan ontan so agawa. Inter nen Isaac so bendisyon ed anak ton si Jacob.

Nen naamtaan iya nen Esau, nampasnok ya maong ed si Jacob. Tan imbaga ton pateyen toy Jacob. Aburidoy Rebeca sanen akabatan to iya. Kanian imbaga tod asawa ton si Isaac: ‘Naermenan ak no mangasawa met si Jacob na taga-Canaan.’

Lapud satan, tinawag nen Isaac si Jacob tan imbaga to: ‘Agka mangaasaway taga-Canaan. La kad Haran, diad kinen lakim Betuel. Mangasawa kay sakey ed saray marikit nen Laban.’

Dinengel nen Jacob so ama to, tan linman tampol ed saray kakanayon da diad Haran.