Imbulos ed Prisoan

NENGNENG mo yay anghel ya angilukas ed puerta na prisoan. Sarayay ibubulos to et apostol nen Jesus. Akin et apriso ra?

Agano ni may impangikalbo nen Jesus na masanton espiritu ed saray disipulo to. Tan sakey ya ngarem, linmay Pedro tan Juan ed templo. Diad asingger ed puerta, walay lakin lupoy manlapu lad inkiyanak to. Lanang ya aawiten ditan na totoo pian makapipayabol ed saramay onloloob ed templo. Sanen anengneng toy Pedro tan Juan, akipayabol ed sikara. Antoy ginawa da?

Tinmunda ra tan ninengneng day kaskasian ya laki. Imbaga nen Pedro: ‘Anggapoy kuartak, balet iter kod sikay walad siak. Diad ngaran nen Jesus, akar ka!’ Insan inegnaan nen Pedro so lima na laki, tan tampol ya linmukso tan nanakar. Sanen anengneng na totoo iya, mandinayew tan malikeliket ira ed sayan makapakelaw ya milagro.

Inkuan nen Pedro: ‘Lapud pakayari na Dios ya nambilay ed si Jesus, agawaan mi iyan milagro.’ Legan na saya, sinmabi iray lider na relihyon. Mansyodot ira ta ibabaga nen Pedro tan Juan ya abilay si Jesus. Kanian inerel tan impriso da ra.

Diad sinmublay ya agew, nantitipon iray lider na relihyon. Impatawag day Pedro, Juan, tan samay lakin pinaabig da. ‘Diad anton pakayari ya manggagawa kayo na onyan milagro?’ so intepet na saray lider na relihyon.

Imbaga nen Pedro ya diad pakayari na Dios a nambilay ed si Jesus. Ag-amta na saray saserdote so gawaen da ta agda niyamot ya agawa iyan makapadinayew a milagro. Kanian binilin da ray apostol ya agda la itotongtong so nipaakar ed si Jesus, insan da la ra imbulos.

Diad linmabas iran agew, siansia nin impulong na saray apostol si Jesus tan pinaabig da ray mansasakit. Abalitaan na dakel a totoo irayan milagro. Kanian pati saray kakaabay ya baley ed Jerusalem et inaawit dad sikara iray mansasakit. Akaibeg iray lider na relihyon kanian inerel tan impriso da ra. Balet ag-ira nambayag ditan.

Diad labi, nilukasan na anghel na Dios so puerta na prisoan, ya singa nanenengneng mo diad litrato. Imbaga na anghel: ‘La kayod templo tan itultuloy yoy mitongtong ed totoo.’ Kaimbuasan, sanen angibaki iray lider na relihyon na lalakin mangalad saray apostol diad prisoan, anggapo la ray apostol. Nalmo da ran manbabangat ed templo tan inyakar da rad Sanhedrin.

‘Binilibilin mi kayo ya agkayo la manbabangat nipaakar ed si Jesus. Balet pinano yoy Jerusalem na bangat yo,’ so kuan na saray lider na relihyon. Et inmebat iray apostol: ‘Nepeg ya unoren mi so Dios bilang manuley nen saray totoo.’ Kanian intultuloy dan imbangat so “maong a balita.” Balibalin aligen ya awa?