Libron Kaukolan a Basaen
“Agmo sisisiaen a maong so Biblia.” Ontan so inkuan na sakey a propesor na unibersidad ed prangkan malangwer a bii.
“No ontan abasa yo la so Biblia?” intepet to.
Diad inkabigla, inaksobi na propesor ya agto ni abasa.
“Panon yon ukomen so sakey a libron agyo nin balot abasa?”
Walay punto na bii. Dinisidi na laki a basaen so Biblia insan makatibukel na opinyon nipaakar ed satan.
SAY Biblia, a tugyop na 66 a sulsulat, so nadidiskribin “nayarin say sankaimpluensyaan a koleksion na saray libro ed awaran na too.”1 Diad tua et, inimpluensyaan toy pigara ed sankatalonggaringan ya arte, literatura, tan musika na mundo. Baleg so epekto to’d ley. Nitatandoro itan lapud istilo na inkisulat to tan nandinayewan na dakel a de-aral a maong iran indibidual. Say epekto to ed bilay na nanduruman totoo ed sosyedad so nagkalautlan aralem. Makapakelkelaw a katooran so napapawala na satan ed dakel a managbasa. Arum ni ingen so angirisga’d bilay da ed ipapatey pian nabasa labat itan.
Ontan met, walay panduaruwa nipaakar ed Biblia. Walaray totoon ginmalet lay opinyon da’d satan anggaman agda nin balot mismon abasa itan. Nayarin bidbiren day kinaabig na inkisulat to odino kablian to’d awaran, balet ta panuumamengan da: Panon ya onaplika so libron nisulat ed nilibon taon lay apalabas ed sayan modernon mundo? Manbibilay itayo ed “panaon na impormasyon.” Kakaala iray peles a tuloy ya impormasyon ed nagagawgawa tan teknolohiya. Say “eksperton” simbawa ed ngalngalin amin a problema ed modernon kabibilay et akaparaan lawas. Peteg kasin lugan na Biblia so impormasyon a praktikal natan?
Panggugunaetan na sayan brosyur ya ebatan iratan a tepet. Ag-iya denisinyo pian ipilit ed sikayo iray relihyoson panmoria odino sisisiaen, noagta ginetma pian ipanengneng a sayan maimpluensyan libro ed awaran, say Biblia, et makanepegan labat a sukimaten yo. Naimano na sakey a report a nipalapag nen 1994 a sisiaen a tuloy na pigaran edukado a say Biblia et ontanlan nilamot ed Mamasagur a kultora a “siopaman, a mananisia odino agmananisia, ya agmikabisado ed Biblikal iran bangat tan salaysay et anggapoy amta to’d kultora.”2
Anganko, kayari pakabasa ed walan nipalapag dia, onabobon kayo a—balanglan relihyoso odino andi so sakey a too—say Biblia so, anggan panon et sakey a libron kaukolan a basaen.
[Kahon/Litrato ed pahina 3]
“Talagan otang koy impakaliwawaan ko ed libron abasak.—Libro? On, tan satan et daan a simplin libro, simpli a singa satan a mismo so akapalsaan, tan natural . . . Tan say ngaran na sayan libro et simsimpli, say Biblia.”—Heinrich Heine, koma-19 siglon managsulat ya Aleman.3