Prologue

Pinablin Managbasa:

“Gala magmaliw kan patumbok ko.” (Marcos 10:​21, NW) Sanen imbaga nen Jesu-Kristo iratan a salita, kaiba itayon iimbitaan to ya ontumbok ed sikato. Kasin onkikiwas ka ed imbitasyon to? Say panggawam ed satan so walaay baleg ya epekto ed bilay mo. Akin?

Imbaki nen Jehova so bogbogtong ya Anak to diad dalin a mangiyapay na bilay to bilang dondon. (Juan 3:16) Nilikud ni ed impatey to nisengeg ed sikatayo, impanengneng ed sikatayo na satan ya Anak no panon so pambilay. Diad amin a ginawa to, impansiansia to so integridad to tan apaliket to so puso na Ama to. Impanengneng met nen Jesus ed sikatayo no panon so pangalig ed Ama to. Nagnap a nipatnag iray paraan tan linawa na Ama diad saray salita tan gawa na Anak.​—Juan 14:9.

Si Jesus so ‘uliran,’ kuan na Biblia, “pian tumboken [tayo] so baka’to.” (1 Pedro 2:21) No labay tayoy lalon onapit ed si Jehova, no labay tayoy nawalaan na peteg a makabaliksan a bilay natan, tan no labay tayoy mansiansia ed dalan a mamaarap ed andi-anggaan a bilay, nepeg tayon tumboken a maapit iray bakat nen Kristo.

Pian nagawaan iya, kaukolan a kabisado tayoy kabibilay nen Jesus sanen wadiad dalin. Kanian say deskripsion ed si Jesus ya impreserba ed Biblia so kaukolan tayon aralen a maong. Say pandalepdep ed saray imbaga tan ginawa nen Jesus, tan say pannodnonot no panon tayon naalig so pananalita tan kakikiwas to, so ontulong ed sikatayon lalon nalinewan no panon a sikatoy natumbok tayo.

Komon ta natulongan ka na sayan publikasyon ya ombaleg so panangarom ed si Jesus tan ed si Jehova. Tan komon ta satan a panangaro so mamakiwas ed sika a tumboken a maapit iray bakat nen Jesus, ta pian napaliket mo so puso nen Jehova natan tan ed andi-anggaan.