Makaaral ed Impangarap nen Jesus ed Tukso

Kayarin binautismoan nen Juan si Jesus, intonton na espiritu na Dios si Jesus diad kalawakan na Judea. Dakel so kaukolan ton nonoten. Nen bautismo to, “alukasan so tawen.” (Mateo 3:16) Kanian anonotan to iray naaralan tan ginawa to ed tawen. Talagan dakdakel so dalepdepen to!

Si Jesus et 40 agew tan 40 labi tod kalawakan. Legan na satan et agbalot angan. Insan nen narnarasan la, sikatoy inasinggeran nen Satanas a Diablo pian tuksoen, ya inkuan to: “No anak kay Dios, ibagam ed sarayan bato a magmaliw iran tinapay.” (Mateo 4:3) Lapud amta ton makapuy so pangusar na pakayari ton manggaway milagro pian napenek so sarilin panlabayan to, impulisay to itan a tukso.

Balet agtinmunda so Diablo. Nanisip na sananey nin paraan. Tinukso toy Jesus ya ontaboy manlapud toktok na padir na templo. Balet ag-atukso si Jesus ya manpasikat. Imbaga nen Jesus ya base ed Kasulatan, mauges so panubok ed Dios ed ontan a paraan.

Insan diad komatlon tukso, impanengneng na Diablo ed si Jesus so “amin a panarian na mundo tan say karakpan na saratan” tan inkuan to: “Amin iraya et iter kod sika no ondakmomo ka tan mandayew kad siak a maminsan.” Balet siansian mapekder si Jesus tan kuan to: “Arawi ka, Satanas!” (Mateo 4:8-10) Agnampadaeg ed tukso ta amta ton say sagradon panaglingkor et para labat ed si Jehova. On, pinili toy manmatoor ed Dios.

Makaaral tayo ed saraman a tukso tan say impangarap nen Jesus ed saraman. Talagan agawa iraman ya impanukso, tan paneknek a say Diablo et aliwa labat a mauges ya ugali a singa ibabaga na arum. Talagan wala so Diablo balet agnanengneng. Ipapaamta met na saya a say gobierno na mundo et kayarian na Diablo; kokontrolen to iratan. Akin ya talagan makapatuksoy inyopresi to ed Kristo?

Imbaga na Diablo ya ikdan toy premyo si Jesus no mandayew ed sikato ya anggan maminsan labat, tan iter to ni ingen kuno so amin a panarian na mundo. Ompan ontan met so panukso na Diablo ed sikatayo, nayarin ipanengneng to ray makapaingganyon pankanawnawa pian onyaman, nawalaay pakayari, odino posisyon. On, makabat itayo no tumboken tayoy alimbawa nen Jesus diad panmatoor ed Dios anggan antoy onsabin tukso! Balet tandaan ya tinaynan na Diablo si Jesus tan “nanalagar na arum a pankanawnawa.” (Lucas 4:13) Ompan ontan met so gawaen tod sikatayo, kanian kaukolan a naynay itayon akabantay.