Impormasyon

ATTENDANT Akaparaan iray attendant ya ontulong ed sikayo. Kanian ipangasin unoren iray instruksion da ed paradaan, iloob tan ipaway ed venue, panreserba na yurongan, tan arum ni.

BAUTISMO Walay akareserban yurongan diad bandad arap parad saray manpabautismo. Nepeg ya akayurong la ra ditan antis ya onggapoy paliwawa parad bautismo no Sabado na kabuasan. Kada sakey et kaukolan ya mangawit na tuwalya tan desentin pampabasa.

DONASYON Baleg so ginastos pian naitarya so magenap ya yurongan, sound system, video equipment, tan arum nin serbisyo pian na-enjoy tayoy kombension tan mas onapit tayod si Aman Jehova. Makatulong iray boluntaryon donasyon yo pian nabayaran irayan gastos tan nasuportaan so sankamundoan a kimey. Wala ray kahon ya akapuesto ed kaliberliber na venue, amarkaan iratan pian nabidbir yon tampol ya para itan ed donasyon. Sarag yo met so mandonasyon online diad donate.jw.org. Naapresyan maong iray nanlapud puso ya donasyon yo. Misatsalamat so Mananguley ya Ulop ed inkamaiter yo pian nasuportaan so Panarian.

FIRST AID Tandaan ya parad emergency labat iya.

LOST AND FOUND No bilang ta walay aromog yo tan agyo amta no siopay akanggawa, awit yo itan ed Lost and Found Department. No walay abalang yo, onla kayo ed sayan department tan nengneng yo no wadtan. Saray ugugaw ya abalang et nepeg ya awiten ed sayan department. Balet pian naiwasan so paka-stress o panaburido, ipangasin bantayan iray ananak yo tan agyo ra papaulyanan ya makaarawi ed sikayo.

YURONGAN Magmaliw ya makonsidera. Tandaan ya say nayari yo labat ya ireserbaan na yurongan et say mismon pamilya yo, kaiba yod luganan, kaiba yod abung, odino iyaaralan yoy Biblia. Agyo itatapew iray gamit yo ed saray yurongan ya agyo inreserba.

PAMBOLUNTARYO No labay yoy manboluntaryo pian ontulong ed saray kimey diad kombension, onla ed Information and Volunteer Service Department.

Inorganisa na Mananguley ya Ulop na Saray Tasi nen Jehova