Nobyembre

No sakey kan ateng, tulongan mo iray ugaw nin ananak mo ya manparaan na komento ya matukoy ed edad da. No maminsan, seryoso iray pantotongtongan tayo diad aral, singa saray isyu ed moral odino probleman aarapen na sanasawa. Pero walan-wala seguroy parapo ya nakomentoan na ugugaw. Maabig met no i-explain mod ananak mo no akin ya aliwan sikaran lanang so natawag no mangitagey iray lima. No natatalosan day rason, ag-ira ombarong no dumay napili ya mankomento. (1 Tim. 6:18) Tandaan ya say rason no akin ya mankokomento tayo et labay tayon irayew si Jehova tan napaseseg iray agagi. (Pro. 25:11) Wala ray pagkakataon ya labay tayoy man-share na makapaseseg ya eksperiensya tayo. Pero agtayo komon ipapaarap so atension ed sarili tayo. (Pro. 27:2; 2 Cor. 10:18) Labay tayo ya say natilak ed isip na agagi et no antoy naaralan da ed si Jehova, diad Salita to, tan diad organisasyon to.—Apo. 4:11. w23.04 24-25 ¶17-18

Importante so panangaro pian mansiansia tayon aliing tan alerto. (Mat. 22:​37-39) No inaro tayoy Dios, akaparaan tayon “itepel . . . so irap parad maong a balita.” (2 Tim. 1:​7, 8) Inaro tayo met so kapara tayon too kanian agtayo onsasawan manpulong. Sasalien tayo ingen so arum ya paraan, singa say telephone witnessing tan letter-writing. Ayos labat ed sikatayo anggano paulit-ulit tayo ran pulongan, ta agtayo nanaekalan na pag-asa ya onsabi lanlamang so panaon ya manguman ira tan pilien da so manlingkor ed si Jehova. (Eze. 18:​27, 28) Inar-aro tayo met iray agagi. Nipanengneng tayoy panangaro no “pasesegen tan pabiskegen [tayo] so sakey tan sakey.” (1 Tes 5:11) Singa tayo sundalo ya saniiba ya milalaban. Agtayon balot gagalaen ya sakitan so sakey ya agi. Tan agtayo ombabawi no bilang ta nasakitan da tayo. (1 Tes. 5:​13, 15) Nipanengneng tayo met so panangaro no rerespetoen tayo ray brother ya mangidadaulo ed kongregasyon.—1 Tes. 5:12. w23.06 10 ¶6; 11 ¶10-11

Say sakey ya paraan pian ombiskeg so pananisia tayo et no dalepdepen tayo so dondon. Say dondon so garantiya ya talagan ontua so amin ya insipan na Dios. No isipen tayon maong no akin ya inter nen Jehova so dondon tan no anto ray insakripisyo to, lalon ombiskeg so pananisia tayo ya talagan walay bilay ya andi-anggaan diad balon mundo. Akin et ombiskeg so pananisia tayo no dalepdepen tayoy dondon? No isipen tayon maong, balbaleg pay insakripisyo nen Jehova pian nitarya to so dondon. Imbaki to so panguloan tan inar-aro ton Anak diad dalin. Abaybayag iran saniba diad tawen tan atan so first time ya makapan-arawian ira. Nen wadiad dalin si Jesus, inanosan toy amin ya klase na irap. Insan, ansaki-sakit tan makapabaing so impatey to. Anengneng tan intepel iratan ya amin nen Jehova pian nadondon itayo! Bilay na Anak to so kasalat! Isip mo pa: Kasin sulit so amin ya sakripisyo tan impantepel nen Jehova no antiktikey lanlamang so bilay tayo diad balon mundo? (Juan 3:16; 1 Ped. 1:​18, 19) Mabmabli so imbayar nen Jehova kanian seguradoen to ya manbilay tayo na andi-anggaan diad balon mundo. w23.04 27 ¶8-9

Kasin labalabay nen Jehova ya bilayen iray inaatey? On! Akin et segurado tayo ya labalabay to? Say sakey ya patunay et dakel so propesiyan impaisulat tod Biblia tungkol ed sayan promise to. (Isa. 26:19; Apo. 20:​11-13) Tan no si Jehova so nan-promise, tooren ton tooren. (Jos. 23:14) Diad tua, eksayted si Jehova ya bilayen iray inaatey. Imanoen tayo so imbaga nen Job. Kombinsido si Job ya anggano sikatoy ompatey, “pirawaten” nen Jehova ya nanengneng lamet ya mabilay, kanian paolien toy Job. (Job 14:​14, 15) Ontan so nalilikna nen Jehova ed amin ya lingkor to ya inatey la. Nanailiw to la ra kanian labalabay to la ran bilayen pian nanengneng to ran maliket tan maksil lamet. Panon to balet iray binilyon ya inatey ya agdan balot akabat si Jehova? Lapud maar-aro so Dios, bilayen to met ira. (Gawa 24:15) Gawaen to itan pian walay tsansa ran mikaaro ed sikato tan manbilay ya andi-anggaan diad dalin.—Juan 3:16. w23.04 9 ¶5-6

Antoy gawaen mo pian ombiskeg so pananisiam ed saray sipan nen Jehova? No say ilalom et manbilay ya andi-anggaan diad dalin, basam iray ibabaga na Biblia tungkol ed bilay diad Paraiso tan dalepdep mo itan. (Isa. 25:8; 32:​16-18) Imadyin mo ya wala ka lad balon mundo. No naynay tayon imadyinen iray bendisyon ed balon mundo, magmaliw ya “anlemew” iray problema tayo, tan na-realize tayo ya “magano” o temporaryo labat iratan. (2 Cor. 4:17) On, pabiskegen ka na ilalon inter nen Jehova! Diad tua, si Jehova lay nanggaway paraan pian makaawat kay biskeg. Kanian no akaawat kay responsabilidad, ondadalan kad subok, o nababalang lay liket mo, agka nababaingan ya manpikasi ed si Jehova tan man-personal study ka pian naanap moy ebat to. Manpatulong kad saray agagi tan i-appreciate moy panamaseseg da. Imadyin moy ilalom diad arapen pian mabilabilay itan ed nonot mo. No gawaen mo iratan ya amin, ‘makaawat ka na baleg a pakayari unong ed maglorian pakayari na Dios pian sigpot kan makapansungdo a walaay anos tan liket.’—Col. 1:11. w23.10 17 ¶19-20

Dakel so rason tayon misalamat ed si Jehova. Diad tua, nanlapud sikato so antokaman ya mamapaliket ed sikatayo. (Sant. 1:17) Singa bilang, misalamat tayo ta marakdakep tan makapabilib so impanggawa tod dalin tan ed arum nin pinalsa. Pisalamatan tayo met ta inikdan to tayoy bilay, pamilya, kakaaro, tan pag-asa. Agtayo met lilingwanan so misalamat ed si Jehova ta inawat to tayo bilang kaaro to. Pian niyugali tayoy misalamat ed si Jehova, importante ya sankanonot tayo ray bendisyon tod sikatayo. Diad mundo, maslak ya totoo et agda la amtay misalamat. Imbes ya misalamat ira ed no antoy wala lad sikara, say sankanonot da labat et no panon dan naala so labay da. No naalisan itayo na ontan ya ugali, ompan puros kerew so karga na pikakasi tayo. Agtayo ra labay ya aligen. Kanian komon ta malikas tayo ed saray bendisyon ya iiter nen Jehova, tan agtayo lilingwanan so misalamat ed amin ya gagawaen to parad sikatayo.—Luc. 6:45. w23.05 4 ¶8-9

Maar-aron Ama si Jehova, kanian nasasakitan no nanenengneng ton maniirap tayo. (Isa. 63:9) Pero siempre, agto tayo ipapaliis ed amin ya subok, ya inkompara na Biblia ed ilog tan apoy. (Isa. 43:2) Anggano agto ekalen iratan ya subok, im-promise to ya tulongan to tayo pian ‘makabaliw’ tayod ilog tan ‘makadalan’ tayo ed apoy. Labay ton ibaga, wadtan si Jehova ya onalalay pian nalampasan tayo ray subok ed bilay. Walan-walay gawaen to pian ag-onkapuy so espiritualidad tayo. Ikdan to tayo met na masanton espiritu to pian walay biskeg tayon anosan so antokaman ya subok. (Luc. 11:13; Fil. 4:13) On, makapantiwala tayo ya iter nen Jehova no antoy kailangan tayo pian makapan-anos tan makapanmatoor tayo ed sikato. Labay nen Jehova ya mantiwala tayod sikato. (Heb. 11:6) No nantatabonan lay problema, ompan pakalikna tayo et singa iratan atagtagey ya padir ya agtayo kayan kalaben. Tan ompan pandudaan tayo ni ingen no kasin imamalasakit itayo nen Jehova. Pero ipapaseguro na Biblia ya tulongan itayo na Dios, tan diad pakayari to et “nakalab [tayoy] padir.” (Sal. 18:29) Kanian no manpipikasi tayod si Jehova, dapat nanengneng to ya mabiskeg so pananisia tayod sikato tan mantitiwala tayo ya ebatan to ray pikakasi tayo.—Sant. 1:​6, 7. w23.11 22 ¶8-9

Marakdakep itan ya deskripsion ed tuan panangaro! Singa ibabaga na Biblia ya anggano onlabas ni so dakel ya taon, posible ya mansiansian malet so aroan na sanasawa. Say aroan na sanasawa et akadepende lanlamang ed sikaran dua. Singa itan apoy, mansiansia itan ya marlang no tuloytuloy ya sungloran. Pero no napaulyanan, kalkalnan onkuyep ya anggad naerep la. Ontan met ed aroan na sanasawa. Mansiansian mabiskeg so aroan da no manggawa iray paraan pian ag-itan onkapuy. No ag-ira man-effort, ompan ombetel so aroan da, lalo la no walay problema dad kuarta, walay mansakit ed sikara, o nanairapan ira ed pamapabaleg dad ananak da. Importante sirin ya pabiskegen na sanasawa so relasyon da ed si Jehova pian napansiansia ran marlang so “apoy nen Jah.” w23.05 20 ¶1-3

Antoy gawaen mo pian magmaliw kan makpel? Ompan lanang kan bibilinen na saray atateng mo ya agka ontatakot ed saray totoo, tan nanenengneng mon mismo ed alimbawa ra ya makpel ira. Pero tandaan mo ya agnamana so pakpel. Kailangan moy man-effort pian naaralan moy magmaliw ya makpel. Singa itan panaral na balon skill. Antoy gawaen mo pian magmaliw kan marunong ed sakey ya skill? Obserbaan tan bantayan mon maong so gagawaen na trainer mo, insan mo aligen. Ontan met ed pagiging makpel. Kaukolan mon obserbaan iray ginawa na saray makpel ya lingkor nen Jehova tan alig moy alimbawa ra. Singa si Daniel, importante ya lanang mon aralen tan basaen so Biblia. Lanang ka met ya manpikasi ed si Jehova tan ibagam ed sikato so amin ya walad pusom pian naliknam ya talagan sankaaro kayo. Tandaan mo ya lanang to kan suportaan basta mantiwala ka ed sikato. No gawaen mo iratan ya amin, magmaliw kan makpel no nasubok lay pananisiam. Respetoen ka na totoo no nanengneng dan makpel ka, tan ompan atan so rason pian labay da met lan kabaten si Jehova. On, dakdakel so maong ya resulta no manpakpel ka. w23.08 2 ¶2; 4 ¶8-9

Say salitan Greek ya in-translate ya “seguroen” et nayari met ya i-translate ya “pruebaan.” Uusaren itan ya salita no say tutukoyen et say pansuri ed saray mablin metal, singa say gold o silver, no kasin tua itan o peke. Ontan met so nepeg tayon gawaen no walay narengel tayon balita o nabasa tayon impormasyon. Amtaen tayo no kasin tua itan o fake news labat. Mas kailangan tayon gawaen itan natan ta manasingger lay baleg ya kairapan. Imbes ya panisiaan tayo so amin ya balita o impormasyon, manisip tayo nin maong ta ompan kontra itan ed ibabaga na Biblia tan na organisasyon nen Jehova. No agtayo bastabasta manisia, ag-itayo naloko ed saray propaganda ya ikalat na saray demonyo. (Pro. 14:15; 1 Tim. 4:1) Bilang sakey ya grupo, saray lingkor nen Jehova et makaligtas ed baleg ya kairapan. Pero bilang indibidual, “[agtayo] amta no antoy nagawa ed bilay [tayo] nabuas.” (Sant. 4:14) Balanglan mabilay tayo ni no onsabi so baleg ya kairapan o andi la, tandaan tayo ya awaten tayo so bilay ya andi-anggaan basta manmatoor tayo. Lanang komon ya mabilabilay ed isip tayo so ilalo tayo tan mansiansia tayon akaparaan parad agew nen Jehova! w23.06 13 ¶15-16

Agtayo amta no panon ya nagawa so arum ya propesiya ed Biblia. (Dan. 12:​8, 9) Pero anggano agtayo amta so eksakton pakasumpal na saray propesiya, segurado tayo ya nagawan-nagawa iratan. Mantiwala tayo ya ipaamta lanlamang iratan nen Jehova ed sikatayo diad dugan panaon, ya singa ginawa to la nensaman. Asingsingger lan ideklara na saray bansa so “kareenan tan kaligenan.” (1 Tes. 5:3) Insan, atakien na saray gobierno so amin ya palson relihyon tan deralen da iratan. (Apo. 17:​16, 17) Tan isublay dan atakien iray lingkor na Dios. (Eze. 38:​18, 19) Ditan la onggapo so guerra na Armagedon. (Apo. 16:​14, 16) Segurado tayo ya asingsingger lan nagawa irayan amin. Misatsalamat tayod si Aman Jehova ta patiuna to lan impaamta iraya ed sikatayo. Itultuloy tayo sirin ya aralen tan talaranan so pakagawa na saray propesiya ed Biblia, tan tulongan tayo so arum ya ontan met so gawaen da. w23.08 13 ¶19-20

Nen sinulatan nen apostol Pablo iray agagi ed Corinto tungkol ed pananisia, ilalo, tan aro, imbaga to ya “say sankaimportantian ed saraya et say aro.” (1 Cor. 13:13) Akin et ontan so imbaga nen Pablo? On ta no balon mundo la, agtayo la kaukolan so pananisia ta agawa la iray sipan na Dios. Agtayo met la kaukolan iratan ya ilaloan o talaranan ta asumpal lan amin. Pero say panangaro et permanente tan anggapoy sampot to. Tuloytuloy tayon aroen si Jehova tan say kapara tayon too. Diad tua, lalon onelet so panangaro tayod sikara diad anggad angga. Ontan met, say panangaro so pakanengnengan ya sikatayo so tuan Kristiano. Oniay imbaga nen Jesus ed saray apostol to: “Diad saya et naamtaan na amin a sikayo iray disipulok—no manaaroan kayo.” (Juan 13:35) Sakey ni, kailangan so panangaro pian mansiansia so pankakasakey tayo. Imbaga nen Pablo ya say aro so “perpekton bedber na pankakasakey.” (Col. 3:14) Oniay insulat nen apostol Juan: “Siopaman a mangaaro ed Dios et nepeg ya aroen to met so agi to.” (1 Juan 4:21) On, no inaro tayo ray agagi tayo, patunay itan ya inaro tayoy Dios. w23.11 8 ¶1, 3

Say bilay tayo ran Kristiano et inkompara na Biblia ed lumbay batik. Saramay makasabi ed finish line et awaten day premyo ya bilay ya andi-anggaan. (2 Tim. 4:​7, 8) Itultuloy tayo sirin so ombatik, lalo la ta amta tayon asingsingger tayo la ed finish line. Oniay imbaga nen apostol Pablo ya gawaen tayo pian manalo tayo ed sayan lumba: “Ekalen tayo . . . so amin a pakakabelatan . . . tan mananos itayon ombatik ed lumba.” Labay kasin ibaga nen Pablo ya anggapo lan balot so awiten tayo? Andi, aliwan ontan so punto to. Say labay ton ibaga et ekalen tayoy amin ya agtayo kailangan ed lumba ta makabela-belat labat iratan. No agtayo iratan ekalen, ombagal tayo tan maganggano tayon onkesaw. Usisaen tayo sirin so sarili tayo ta ompan wala ra manayay awit tayon makapabelat. Kaukolan tayon ibantak iratan ya tampol. Pero siempre, seguradoen tayo met ya awit tayo iray kailangan tayo ed lumba. Ta no andi, na-disqualify tayo.—2 Tim. 2:5. w23.08 26 ¶1-2

No makatunongan tayo, respetoen tayoy opinyon tan panlabayan na arum. Singa bilang, wala ray sister ya labalabay day man-makeup, say arum balet et agda labay. Wala ray agagi ya ayos labat ed sikaray oninum na alak basta dugaruga labat, say arum balet et agda anggan labay ya timtiman itan. Tan anggano labay tayon amin ya mansiansian maksil so laman tayo, nanduruma balet ya paraan na panagpatambal so pipilien tayo. No ipilit tayoy opinyon tayo ed arum ya agagi, ompan nagapol ira tan naderal so pankakasakey ed kongregasyon. (1 Cor. 8:9; 10:​23, 24) Singa bilang, no panangawes tan panag-ayos so pantongtongan, agto tayo inikdan nen Jehova na detalyadon ganggan no anto ray nayari tan agnayarin isulong, pero inikdan to tayo ray prinsipyo ya makatulong ed sikatayon mandesisyon. Ibabaga na Biblia ya dapat et nanengneng ed panangawes tayo ya ministro itayo na Dios. Importantin nanengneng met ed panangawes tayo ya masimpit itayo tan ‘limpioy kanonotan’ tayo. (1 Tim. 2:​9, 10) Kanian agtayo labay ya mangala na atension so panangawes tayo. Makatulong met ed saray elder iray prinsipyo na Biblia pian ag-ira manggawa na sarili dan batas tungkol ed panangawes tan katli na buek. w23.07 23-24 ¶13-14

Labay nen Jehova ya maong so pansumpalan tayo. Saray angawat ed imbitasyon na maingal tan “makulangkulang a bii” et singa “masamsamit” so bilay da lapud panggagawa day imoral. Pero diad tua, aliwliway pansumpalan da ta say laen da et diad “kaaralman na Lubok.” Labay ton ibaga, saray gagawaen da natan et mansumpal ed ipapatey. (Pro. 9:​13, 17, 18) Duma balet so pansumpalan na saramay angawat ed imbitasyon na “tuan karunongan”! (Pro. 9:1) Lapud dedengelen tayo iray bilin nen Jehova, naaralan tayon busolen so kaugsan tan aroen so kamaongan. (Sal. 97:10) Malikeliket tayo met ya iimbitaan so arum pian nawalaan iray tuan karunongan. Singa tayo ‘ontatawag manlapud atagey iran pasen na syudad’ tan iyeeyag tayo: “Siopaman ya andian na kakabatan, ondago dia.” On, amin tayo ya angawat ed imbitasyon na “tuan karunongan” et nabendisyonan natan tan diad arapen. “Manbilay” tayo ya andi-anggaan tan “manakar [tayo] a diretso ed dalan na pakatalos.”—Pro. 9:​3, 4, 6. w23.06 24-25 ¶17-18

Antoy naliknam no tepetan ka na katrabahom o classmate mo tungkol ed saray papanisiaan tayo? Seguro, mannerbiyos ka. Natural met labat so ontan ya reaksion. Pero maong met no walay mantepet ta diman tayo naamtaan no antoy iisipen o papanisiaan to man ya too. Tan tsansa tayo la iman pian ibaga ed sikato so maong a balita. Pero ompan wala ray situasyon ya mantepet ira ta labay da labat so midebati. Agtayo la balet nabibigla no wala ray mankuestion ed saray papanisiaan tayo. Ompan walay abalitaan da ya aliwan tuan impormasyon tungkol ed saray Tasi. (Gawa 28:22) Sakey ni, manbibilay tayo la ed “kaunoran iran agew” tan maslak ya totoo et “masesebeg ira.” (2 Tim. 3:​1, 3) Ompan isipen mo, ‘Anto kasi gawaen ko pian malumanay ak ya onebat no walay mankuestion ed saray papanisiaan ko?’ Walay makatulong ya ugali, say inkaulimek. Say toon maulimek o mahinahon et aliwan misasanok tan sarag ton kontrolen so sarili to anggano tensionado lay situasyon. Kalmado labat anggano medyo aburido no panoy iyebat to. w23.09 14 ¶1-2

Mabetbet itayon bibilinen na organisasyon ta agda tayo labay ya napahamak. Singa bilang, wawarningan da tayo tungkol ed materyalismo tan ed saray kagagawa ya mangipeligro ed espiritualidad tayo. Parad pankaabigan tayo lanlamang iratan ya simbawa. (Isa. 48:​17, 18; 1 Tim. 6:​9, 10) Seguradon mangusar nin siansiay Jehova na saray totoo ya mangigiya ed sikatayo diad baleg a kairapan ya anggad Sanlibon Taon ya Uley nen Kristo. Kasin unoren moy instruksion da? No natan ni labat et maunor ka la, agka la nairapan diad arapen. Komon ta lanang tayon unoren so panangigiya nen Jehova, kaiba la ray instruksion ya ipapadalan to ed saray brother ya pinili ton mangasikaso ed sikatayo. (Isa. 32:​1, 2; Heb. 13:17) No mapasakop tayo, makapantiwala tayo ya kaiba tayon lanang si Jehova, tulongan to tayon makaiwas ed saray mameligro ed espiritualidad tayo, tan tuloytuloy to tayon igiya anggad naawat tayoy bilay ya andi-anggaan diad balon mundo. w24.02 25 ¶17-18

Malikeliket ya nanlingkor si apostol Pablo ed si Jehova anggano dakdakel so dinalan ton subok. Arawrawi so biniahe to bilang misionero. Agaylay irap na panagbiahe nensaman ta dakel so “kapeligroan,” tan no maminsan et wala ray matakew ed dalan. Asali to met so minaltrato na saray onkokontra ed pampupulong to. (2 Cor. 11:​23-27) Tan wala ray agagi ya manbabalaw ed sikato imbes ya pablien da komon so itutulong tod sikara. (2 Cor. 10:10; Fil. 4:15) Antoy akatulong ed si Pablo pian ag-ontabang ed panlilingkor to? Inaral ton maong so Kasulatan kanian anengneng to ya maomaong ya Dios si Jehova. Apatunayan to met diad mismon eksperiensya to ya sikatoy inar-aro na Dios, kanian naar-aro to met si Aman Jehova. (Roma 8:​38, 39; Efe. 2:​4, 5) Atan ya panangaro to ed si Jehova so nampakilos ed sikato ya ‘tuloytuloy ya manlingkor ed saray masanto.’—Heb. 6:10. w23.07 9 ¶5-6

Diad Biblia, saray gobierno et atawag ya “atagey ya autoridad.” Bibidbiren met na dakel ya totoo ya kailangan tayoy gobierno tan uunoren da so arum ya batas. Pero wala ray batas ya agda uunoren ta ag-ira kompormi tan iisipen da ya singa nalalabas lay gobierno. Tua, ibabaga na Biblia ya say pamamahala na totoo et lapuan no maminsan na paniirap. Nabasa met ditan ya saray gobierno et kontrolado nen Satanas tan asingsingger la iratan ya naderal. (Sal. 110:​5, 6; Ecl. 8:9; Luc. 4:​5, 6) Pero nia so warning na Biblia: “Siopaman ya onsusumpa ed autoridad et onsusumpa ed uksoyan na Dios.” On, labay nen Jehova ya unoren tayo so gobierno lapud kaiba itan ed temporaryon uksoyan to natan pian anggan panon et walay deen tan naiwasan so gulo. Kanian “iter [tayoy] kanepegan da”—manbayar tayoy buis, respetoen tayo ra, tan unoren tayo iray ipapatupad dan batas. (Roma 13:​1-7) Anggano say sakey ya batas et singa makapabelat, aliwan makatarungan, o nagastosan tayo no unoren tayo itan, gawaen tayoy anggaay nayarian tayon onunor. Labay tayon unoren si Jehova, tan sikaton mismo so angiganggan ya unoren tayo so gobierno basta aliwan kontra ed ganggan to so ipapagawa ra.—Gawa 5:29. w23.10 8 ¶9-10

Nen inyanak si Samson, saray Filisteo so manuuley ed bansan Israel. (Ukom 13:1) Maruksa iray Filisteo kanian agaylay irap na bilay na saray Israelita. Si Samson so pinili nen Jehova ya “mangidaulo ed pangiliktar ed Israel ed lima na saray Filisteo.” (Ukom 13:5) Kaukolan nen Samson so mantiwala ed si Jehova pian nagawaan to itan. Aminsan, wala ray sundalon Filisteo ya linmusob pian erelen si Samson diad Lehi, sakey ya lugar ya posiblin sakop na Juda. Lapud takot na saray taga Juda, implano da ya iyawat si Samson ed saray kalaban. “Binalor day duaran balon lubir,” insan da inawit ed saray Filisteo. (Ukom 15:​9-13) Pero “sikatoy pinabiskeg na espiritu nen Jehova” kanian akablos. Insan “akaromog na sakey a panga na kalakian ya asno ya agano nin inatey.” Atan so inusar to pian pateyen so 1,000 ya lalakin Filisteo!—Ukom 15:​14-16. w23.09 2-3 ¶3-4

Impaisulat nen Jehova diad Biblia so “agmanganggan gagala to” tan no panon to itan ya kalkalnan susumpalen. “Pakukurangen [o gagawaen] nen Jehova so amin a bengatla pian nasumpal so gagala to.” (Pro. 16:4) Agmangangga so gagala nen Jehova ta say resulta na satan et mansiansia anggad angga. Anto so gagala nen Jehova, tan anto ran paraan so ginawa to pian nasumpal itan? Imbaga nen Jehova ed si Adan tan Eva no antoy gagala to parad sikara. Kuan to: “Manbunga kayo tan manparakel kayo, pano yoy dalin tan uleyan yo [so] amin a mabilay a pinalsa” diad dalin. (Gen. 1:28) Pero nanrebelde si Adan tan Eva tan impatawir dad ananak da so kasalanan. Kasin akahadlang itan ed gagala nen Jehova? Andi. Sikatoy nanggawan tampol na paraan pian nasumpal nin siansia so gagala to. Nandesisyon si Jehova ya mangiletneg na Panarian ed tawen. Atan ya gobierno so usaren to pian nasumpal so gagala to parad dalin tan parad saray totoo.—Mat. 25:34. w23.10 19-20 ¶6-7

Si Jehova ya mismo so ontulong ed sikatayo pian agtayo onsuko. Amta to ya aliwan mainomay ya labanan iray kakapuyan tayo, lalo la no pawil-pawil itan. No maminsan, wala ra ingey kakapuyan tayo ya mas mairap ya labanan no ikompara ed saray kakapuyan nen apostol Pedro. Pero tandaan tayo ya ikdan itayo nen Jehova na biskeg pian ag-itayo onsawan milaban. (Sal. 94:​18, 19) Singa bilang, walay brother ya datin homoseksual. Nen naamtaan toy katuaan, inuman toy bilay to tan intunda to la so amin ya imoral ya kagagawa to. Pero inamin to ya no maminsan et ompapawil nin siansia iray makalaman ya pilalek to. Anto balet so akatulong ed sikato pian ag-onsukon milaban ed kakapuyan to? Oniay imbaga to: “Papabiskegen ak nen Jehova . . . Apaneknekan kon mismo ya diad tulong na espiritu nen Jehova . . . , sarag tayoy manmatoor. Misatsalamat ak ta anggano wala ray lalabanan kon kakapuyan, uusaren ak nin siansia nen Jehova tan tuloytuloy to ak ya papabiskegen.” w23.09 23 ¶12

Sikayo ran kabataan ya brother, tandaan yo ya aliwan automatic so itatken ed espiritual. Alig yo iray lalakin maong so alimbawa ra. Usar yoy abilidad yon mannonot. Magmaliw kayon responsable. Aral yo iray skill ya mausar ed bilay, tan iparaan yo lay sarili yo parad saray responsabilidad ya gampanan yo diad arapen. Agmo komon iisipen ya mairap irayan gawaen. Tandaan mo ya labalabay kan tulongan nen Jehova pian nagawaan mo iratan. (Isa. 41:​10, 13) Agmo met lilingwanan ya wadtan iray kakongregasyon mo ya onsuporta ed sika. Diad ilabas na saray taon, no nalikas mon matatken ka lad espiritual, seguradon malikeliket ka ta antam ya sulit so amin ya effort mo. Sikayo ran kabataan ya brother, tandaan yo ya inar-aro mi kayo! Komon ta bendisyonan nen Jehova so amin ya gagawaen yo natan pian ontatken kayo ed espiritual. w23.12 29 ¶19-20

Isip mo pa ya wala kad gathering kaiba iray agagi. Malikeliket kayo tan nampa-picture kayo. Diad cellphone mo et angala ka na taloran shot pian walay pampilian. Pero apansin mo ya walay shot ya akasibangot imay sakey ya brother. Seguradon i-delete mo la itan, ta wala met ni duara ya marakep so inkaala to tan akaimis kayon amin. Di ba, masaya tayo no kaiba tayo ray agagi? Panon to balet no asakitan ka ed imbaga o ginawa na sakey ya brother o sister, antoy gawaen mo? Imbes ya atan ya lanang so sankanonot mo, mas marakep no palabasen mo la itan tan lingwanan mo la. Ekal mo la o “i-delete” mo la itan ed memoryam. (Efe. 4:32) Labay ton ibaga, itepel mo lay lingo na agim. Sabagay, seguradon mas dakel so maliket ya pinagsamahan yo—aman la so nonot mo. w23.11 12-13 ¶16-17

Base ed saray Griegon salita ya inusar nen apostol Pablo ed sayan teksto, singa to ibabaga ya say sakey ya bii et nepeg ya desente so panangawes to tan kaukolan ton ikonsidera no antoy isipen na arum ed sulong to. Proud tayo ed saray sister ya masimsimpit so panangawes da! Pian ontatken ed espiritual so sakey ya sister, kailangan toy pakatebek. Anto tay pakatebek? Atan may abilidad ya sarag mon ibiig so duga ed aliwa, tan onkilos ka pian nagawaan moy duga. Imanoen so alimbawa nen Abigail. Walay aliwan desisyon nen asawa to ya lapud satan et nayarin ompatey so amin ya walad sankaabungan da. Atebek nen Abigail ya walay kailangan ton gawaen tan kinmilos ya tampol, kanian aligtas so amin ya walad pudir da. (1 Sam. 25:​14-23, 32-35) Singa si Abigail, no walay pakatebek mo, antam no kapigan ka mansalita tan no kapigan mo kontrolen so dilam. Makatulong met so pakatebek pian balanse tayo ed pangipanengneng na personal ya interes—walay malasakit tayod agagi pero agtayo pibabalian so bilay da.—1 Tes. 4:11. w23.12 20 ¶8-9

Insulat iya nen apostol Pablo parad saray agagi diad kongregasyon ed Roma. Nen naamtaan day tungkol ed si Jehova tan Jesus, impatnag da so pananisia tan nandesisyon iran magmaliw ya Kristiano, kanian ‘inyabawag ira na Dios ya matunong lapud pananisia ra’ tan nilanaan to ra na masanton espiritu. (Roma 5:1) Lapud satan, awalaan ira na mabmablin ilalo. Nen sinulatan nen Pablo iray agagi ed Efeso, imbaga to no anto tay ilalo ya inter na Dios ed saray alanaan ya Kristiano. Indeskribe to itan ya ‘maglorian kayamanan ya tawiren na saray masanto.’ (Efe. 1:18) Nen sinulatan nen Pablo iray agagi ed Colosas, imbaga to no iner da awaten itan ya ilalo—atan ya ilalo et ‘akaparaan parad sikara diad tawen.’ (Col. 1:​4, 5) On, say ilalo na saray alanaan ya Kristiano et napaoli ra diad tawen, manbilay ira ditan na andi-anggaan, tan manuley ira kaiba nen Kristo.—1 Tes. 4:​13-17; Apo. 20:6. w23.12 9 ¶4-5

Say salitan impatalos ya “manbantay” et termino diad militar. Ontutukoy itan ed saray sundalo ya mangguaguardia ed sakey ya syudad tan aka-ready ira no walay onlusob ya kalaban. Maligen so nonot na saramay manaayam ed satan ya syudad tan masamit so ugip da ta amta ra ya wala ray sundalo ya manbabantay. Ontan met so gagawaen na kareenan na Dios. Atan so manbabantay ed puso tan nonot tayo. Kalmado tayo labat anggano wala ray problema ta amta tayon kaiba tayoy Jehova. (Sal. 4:8) Singa si Hana nensaman, anggano agni asolusyonan so problema tayo, mareen so nonot tayo. (1 Sam. 1:​16-18) No kalmado tayo, mas limpioy panagnonot tayo tan makapandesisyon tayoy duga. Anto sirin so gawaen tayo? No maguloy nonot mo, tawag mo may guardia, ya singa panangibaga. Panon mo itan ya gawaen? Manpikasi ka, tan agka ontutundan manpikasi anggad naliknam so kareenan na Dios. (Luc. 11:9; 1 Tes. 5:17) No ondadalan ka met ed subok, seetan moy manpikasi, tan seguradon bantayan na kareenan nen Jehova so nonot tan pusom.—Roma 12:12. w24.01 21 ¶5-6

Pian napasanto nen Jesus so ngaran nen Ama to, inanosan toy amin ya panamairap, panag-insulto, tan kababaingan. Pero diad puso to, amta to ya anggapoy nepeg ton ibaing lapud inunor toy amin ya ipapagawa nen Ama to. (Heb. 12:2) Amta to met ya si Satanas so walad benegan na sarayan amin. (Luc. 22:​2-4; 23:​33, 34) Ginawa lan amin nen Satanas pian traidoren nen Jesus so Ama to. Pero abaibaingan si Satanas ta nanmatoor si Jesus anggad patey! Pinaneknekan nen Jesus ya aliwan tua imay imbaga nen Satanas ya anggapoy manmatoor ed Dios no ondalan lad sankairapan ya subok. On, malinlinew ton pinatunayan ya sankatilaan si Satanas! Kasin labay mo ya naliketan si Jesus ed sika? No on, itultuloy mo sirin ya idayew so ngaran nen Jehova tan ibagam ed arum iray balibalin ugali to. No ontay gawaen mo, ‘tutumboken moy bakat’ na Ari tayo. (1 Ped. 2:21) Napaliket moy Jehova tan napatunayan mo ya sankatilaan si Satanas! w24.02 11-12 ¶11-13

Diad apalabas labat ya limaran taon, masulok ya sakey milyon so nampabautismo bilang Tasi nen Jehova. No idedikam lay sarilim ed si Jehova, labay ton ibaga et labay mo lay magmaliw ya disipulo nen Jesu-Kristo tan desidido ka la ya iyuna ed bilay mo so panlabayan na Dios. Oniay imbaga nen Jesus: “Siopaman a labay toy ontumbok ed siak, iburi toy sarili to.” (Mat. 16:24) Diad lenguahen Greek, amay “iburi toy sarili to” et nayari met ya i-translate ya “kailangan ton tanggian so sarili to.” No dedikado ka la ed si Jehova, tanggian mo la so antokaman ya kontra ed panlabayan to. (2 Cor. 5:​14, 15) Kaibad satan iray “gawa na laman,” singa say seksual ya imoralidad. (Gal. 5:​19-21; 1 Cor. 6:18) No unoren moy panlabayan nen Jehova, kasin singa sisibletan moy sarilim? Aliwan ontan so naliknam no inarom si Jehova tan no kombinsido ka ya parad pankaabigan mo iray ganggan to.—Sal. 119:97; Isa. 48:​17, 18. w24.03 2 ¶1; 3 ¶4

Saray iikdan nen Jehova na masanton espiritu et saramay inar-aro to. (Mat. 12:18) Tepetan moy sarilim, ‘Kasin ipapanengneng ko iray ugali tan kualidad ya kaiba ed bunga na masanton espiritu?’ Singa bilang, ompan alikas mod sarilim ya mas maanos ka la natan kompara nen agmo ni kabat si Aman Jehova. No ipapanengneng mo ray kualidad ya kaiba ed bunga na masanton espiritu, labay ton ibaga, walad sika so pabor nen Jehova tan inar-aro to ka! Lapud dondon, peperdonaen nen Jehova so kasalanan na saramay inar-aro to. (1 Tim. 2:​5, 6) Panon to balet no say pakalikna tayo et ag-itayo karapat-dapat ya aroen nen Jehova anggano walay pananisia tayo ed dondon tan abautismoan tayo la? Tandaan tayo ya aga napantiwalaan so ididikta na emosyon tan puso tayo, pero napantiwalaan tayoy Aman Jehova. Diad pakanengneng to, matunong tan malinis so sakey ya toon walay pananisia to ed dondon. Im-promise to ya bendisyonan toy ontan iran totoo.— Sal. 5:12; Roma 3:26. w24.03 30 ¶15; 31 ¶17