Dios Kasin Sikato So Peteg a Persona?

“TALAGAN wala so sakey a Dios” so inkuan na Agosto 14, 1981, a paway na Daily Express. Ibabalita na peryodiko so mapatnag ya inkakumberte na duaran prominentin sientista diad pananisia ed Dios. Say balon-aromogan a kumbiksion so pinmaway kayari na impakadiskobre ra ed nikadkaduman matimatika a sumpad impatnag na bilay ed inkasikaton-dili. Anggaman kuan, anto so labay ya ibaga na sarayan duaran balon mananisia sanen inkuan da so “Dios”? Inreport na Daily Express: “Isusuhiri ra a say Dios, ET say talba.”

No sikayo so manisia ed Dios, anto so kaisipan yo ed sikato? Kasin sikayo met so manmoria ed sikato a bilang sakey ya agnipaliwawan intelihensya, sakey ya andian na personan lawas-presentin puersa, sakey a baleg a “Bengatla”? Odino kasin sikato so moriaen yo a bilang nipaliwawa, intelihentin Persona?

Arum so makaromog a mairap so panisip ed Dios a bilang Persona. Nayarin liknaen da ni a say panggawa na ontan so mamakesay ed sikato dia lambengat ed singa-toon persona​—a singa diad inuugaw a talintao na sakey a masiken ya asukbongan na kawes tan walaan na andukey ya amputin balbas, a manyudyurong ed lurem. Odino, a singa impangiretrato nen Michelangelo ed Dios diad bantog a pintura to ed kubida na kapelya ed Sistine​—a sakey a maskulado, dinamikon masiken a patawpataw ed dagem.

Tua, sano narengel tayo so salitan “persona,” nayarin automatikon isipen so sakey a too. Say Webster’s Third New International Dictionary, alimbawa, so mangipapaliwawa ed “persona” a bilang “sakey ya indibidual a toon persona.” Balet sasalaysayen to met so “persona” a bilang “sakey a personan inyugali na makaliknan pakatebek, rasyonalidad, tan sentido moral.” Sirin, nayarian na sakey a suston isipen so Dios a bilang sakey a Persona ya agla iretrato a bilang sakey a too.

Balet nayarin isuppiat na arum: ‘Anton pidumaan so gawaen to, balanglan moriaen yo so Dios a bilang sakey ya abstrakton puersa odino bilang sakey a Persona?’ Bueno, no say Dios so sakey lambengat a puersa, sakey a “Bengatla,” agta kabaliksan na saya a say atooan a bilay so peteg met a mekanikal? Say too sirin so mansumpal ed sakey a “satan,” sakey a piesa ed baleg a makina. Balet no say Dios so sakey ya intelihentin Persona, agta satan so mangiter ed bilay na babaleg a kabaliksan? Peteg, lukasan to so posibilidad diad pakawalaan na relasyon ed Dios​—sakey a relasyon aliwan diad baetan na duaran ‘saratan’ noagta baetan na duaran persona.

Mapatnag, say persona-ed-personan relasyon ed Dios so kalikaliktan a tuloy. Balet diad ununan lugar, panon so pikabat tayo no kasin say Dios so sakey a Persona odino andi? Tan, no sikato so ontan, panon so pakawalaan tayo na ontan a relasyon? Onnengneng itayo ed walan ibaga na Biblia ed sayan pamaakaran.