Tepetepet ya Itetepet na Totoo Nipaakar ed Alkohol
“SARAY makabat a totoo so ag-oniinum a balot na alak.” Ontan so imbaga na sakey a kleron Nigeriano. Agni abayag, say ontan a balikas so impulisay a bilang mapeget tan masupit-kanonotan. Natan, anggaman kuan, say sumpa-ed-alkohol a sentimento so onlalaganap ed arum a parte na mundo.
Sakey ya agano nin Reader’s Digest/Gallup survey (E.U.), alimbawa, so angiparungtal a “saray Americano so ginmapon oniinum na daiset.” Mipadpara ed imbalita na Time magasin a say “America so mamaparaiset na [uusaren ya alkohol], tan gagawaen to ed maples a kurang nen say anggan anton panaon nanlapulad inyepekto na panangisebel nen 1920.” Inreport na Pransya so inkesay diad nanausar ya alak.
Say rason ed sayan kurang so mamapaarap ed panangontrol? Arum so kinmelyaw na maksil diad teriblen kapapatey ed saray publikon kalsada nisesengeg ed saray buanges a drayber. “Nen 1983,” kuan na Reader’s Digest, “say alkohol . . . so nanlugi ed [Estados Unidos] na $89.5 bilyon diad impakabalang ed impleyo tan inkamabunga, panangasikaso ed bunigas, inkabalang na kayarian tan krimen, tan ontan met ed saray agnasukat a deral ed saray bilay na pamilya na saraman so nalalanor.” Agpankelawan, sirin, a say UN’s World Health Organization so agano nin angirekomenda a saray gobierno so ‘mamepeget ed kiwawala na alkohol diad interes na bunigas tan pankaabigan na populasyon da.’—New Nigerian, Marso 16, 1983.
Arum ni ingen so mangisasangsang a para ed itunda. Say inaon-ed-tagey a kleron Nigeriano so angikuan: “Ibabaga na Uliran 20:1 ya espesipikon saramay oniinum na alak so aliwan makabat.” Tan inkuan ni na sananey a managpulong: “Say Masanton Kasulatan so mangokondena ed alkolhol diad libro nen Isaias,” a tutukoyen toray teksto ed Isaias 5:11, 12, tan 22.
Nisengeg ed ontan iran pangibabaga, manisip iray totoo: Anto so kabaliksan na saratan a teksto na Kasulatan? Kasin peteg ya isesebel na Biblia so iyinum na saray mabayanin iinumen? Agta si Jesus a mismo so inminum na alak, odino kasin say tabol na ubas ya andian na alkohol so nalalanor? Nisesengeg ed saray nasasaglawin mapatnag a kaatapan, agta maabig ed saray Kristianos so itunda a manlapud panag-inum na alkohol? Saray ebat ed sarayan tepet so naromog diad inengneng ed Biblia a mismo.