Pangapresya ed Mablin Regalo a Bilay

BILAY​—agaylan sakey a mablin kayarian! Anggapo so nagawaan tayo no anggapo itan. Bektan abalang itan, agla nipawil na anggan anton sagpot na too. No say bilay tayo et walad kaatapan, gawaen tayon amin so posiblen paraan pian iliktar itan. Siempre, arum so onkerew ni ingen na atagey-nen-toon tulong sano walad gonigon!

Nipanonot ed sikatayo so salaysay na Biblia ed sakey a barkon asikup na mabiskeg a bagyo ed dayat. Sanen ngalngalilan nagaygay itan, “saray managsakay so tinmakot tan kinmerew na tulong, balang sakey ed dios to.” Diad kaunoran, sikaran amin so tinmawag ed tuan Dios: “A, natan, O Jehova, ipangasim komon ya agkami natawtaw.” Ikuan met na salaysay na Biblia: “Imbantak da ed dayat iray kagawaan a walad barko, pian palemewan itan.”​—Jonas 1:4-6, 14; ipareng so Gawa 27:18, 19.

Saraman a managsakay so akaparaan ni ingen a mangisakripisyo ed saray pinablin kayarian diad gunaet ya iliktar iray bilay da. Saray materyal a kayarian so nasalatan tayo​—ingen say bilay et andi. Tan lapud gendat a pablien tayo so bilay tayo, sikatayo so ompaliis ed kaatapan. Pakanen, kawesan, tan taganoen tayo iray laman tayo. Manpatambal itayo no sikatayo so maniinagem.

Anggaman kuan, say Manangiter na bilay so mankaukolan ed sikatayo na mas nen say basta itumbok ed dilin-mananalimbeng iran nisipor a kakabatan (instincts) tayo. Anggaman kuan, say bilay so agnasaliw a regalo, tan nanlapud sankaimportantian a Persona ed interon talba. Lapud masimoon ya apresasyon tayo namparan ed Manangiter tan say regalo, agta nepeg tayon pablien so bilay? Tan agta isakup na atan so pangimano ed bilay na saray arum?

Kanian, ag-itayo onkelaw a say Ganggan ya inter nen Jehova a Dios ed nasyon na Israel so mangisakup ed saray ganggan ya adesinyon manalimbeng ed bilay tan bunigas na arum. (Exodo 21:29; Deuteronomio 22:8) Saray Kristianos natan so nepeg met a sinononot ed pisikal ya inkaligen. Alimbawa, no walaray ugugaw ed ayaman yo, andi-alwar kasin itilak yo ed pasen a nagawat iray bengatla a singa say abaloryo, sara, aspili, odino makdem iran kagawaan a makarisgo ed sakey ya ugaw ya agsikakabat a manggalaw odino mangakmon ed saratan? Agta saray makarisgon kemikal tan tambal so nepeg ya isinop ed agnagawat na ugugaw? No naibung so danum ed datal, kasin alisto kayon mamunas ed atan pian napaliisan so aksidente? Kasin paapiger yon tampol iray naimanon aderal a kagawaan a makakuryente? Kasin maparanay a nanaasikaso so luluganan yo? Kasin sakey kayon maalwar a managmaneho? No apresyaen yon peteg so kablian na bilay, sikayo so napakiwas a manggawa na makatunongan iran panag-alwar ed saraya tan ed mipadparan kipapasen.

Anggaman kuan, makapaermen ya arum so angibaliwa ni ingen ed dilin bilay da. Alimbawa, siopa natan so agmikabat a say panagsigarilyo et agmakapabunigas? Ingen, nilaksa so naaripen ed bisyo, a kalkalnan onkakapuy so bunigas da diad panusungap da ed makasamal ya asewek. Saray arum so angabuso ed druga, tan siansian arum et say alkohol, amin ed karisgoan da. Say AIDS so managpatey a sakit ya andian ni na tambal. Balet napaliisan komon na dakel so kaalisan ed sakit no impulisay da so seksual ya imoralidad, piho iran nengneng na panag-abuso ed druga, tan panagpasaksak na dala. Agaylan makapasinagem a kakulangan na apresasyon ed bilay!​—Roma 1:26, 27; 2 Corinto 7:1.

Posible so Pananguman!

Saramay mangaapresya ed Engranden Manamalsa ra, si Jehova, so walaan na mabiskeg a rason a manmoria ed bilay bilang mabli. Say bilay so sagradon regalo to. Kanian sikara so mabulos a manggawa na antokaman a nakakaukolan iran pananguman pian tratoen itan bilang sakey a madibinon regalo. Kunsideraen so eksperiensia nen Kwaku, sakey a maestro ed Ghana. Sakey ya andi-alwar a buanges, a dadaraken to so bilay to.

Nanonotan nen Kwaku: “Pinasoot ko so asawak a manrespeto ed siak, a mabetbet itan a nansumpal ed saray sangsangan tan kolkolan, nagkalautla sano abuanges ak. Lapud inkalablabas ed alkohol, mabetbet ak a naandiay kuarta, tan mabetbet ak ya onsaew a mangiter na kuartan panuporta ed pamilya. Kanian, saya so amasanok a tuloy ed asawak. Kapiganman a naandian ak na kuarta (tan saya so mabetbet a tuloy a nagawa), ginawak so antokaman a nayarian ko pian suportaan so bisyok. Aminsan asabin say kuartan kinolektak ed saray estudyantek a parad pangipalista ed sikara ed sakey a publikon eksamen so nilaspag ko. Linmaak ed sakey ya inuman tan angitarok met na alak parad saray kainuman ko. Ag-abayag sinmabi panaon a siak so mikuentaan ed apalabas iran kiwas ko. No aliwa lambengat ed nipanpanaon ya impibali na prinsipal na eskuelaan, nakal ak la komon ed trabahok.

“Say bilay ko so magulo. Siak so nababaingan, balet tinalonaan ko itan a liknaan. Insan ginapoan ko so manisip a manbitkel lapud liknaen kon sinmaew ak ed bilay. Siansian agko naekal so inkailuam ed alkohol. Balet sanen sakey ya agew ed sakey ya inuman et alanor ak ed sakey a gulo tan asaksak, makapaermen ya amoriak ya onsabi agew a say panangarok ed alkohol so pakabalangan ko na bilay ko.

“Legan na atan a panaon, saray Tasi nen Jehova so panapanaon ya ondadalaw ed abung mi, a panggugunaetan da kamin sagyaten ed Biblia. Sikaray mabetbet min iyamotan nen asawak lapud isipen min esturbo ra. Anggaman kuan, aminsan et denisidik so ontalineng ed sikara lapud sibeg ko. Ag-abayag say panagaral na Biblia so angipamoria ed siak ed makapakelaw ya ilalon panbilay na ando lan ando ed balon sistema na Dios. Diad lalon panaaral ko na Biblia ed tulong na saray Tasi nen Jehova, lalon ombabaleg so apresasyon ko ed si Jehova bilang say Manangiter-na-Bilay tayo tan ed regalo ton bilay, tan lalon asagyat ak ed inkapraktikal na simbawa na Biblia. Saya so lalon amaseseg ed siak pian linisan so bilay ko. Aliwan magmainomay iya, unong ta nepeg kon itultuloy a labanan so deneng [ed alak] ontan met ed saray datin kalimog ko. Si Jehova, say Dumerengel na pikakasi, so akanengneng ed determinasyon na pusok tan tinalineng toak.a

“Anggaman si asawak so aliwan sakey ed saray Tasi nen Jehova, natan et siak tan say relihyon ko so igagalang ton tuloy lapud baleg a panamasimbalon nanaimatonan to ed bilay ko tan ed panamaley mi. Saray kakaabay mi so agla kaukolan natan a mibali ed saray kolkolan min sanasawa. Papablien ko so kareenan na nonot a pangagayagaan ko natan. On, say pangapresya ed si Jehova a Dios bilang say Manangiter-na-Bilay tayo, pangadapta ed panmoria to ed kablian na bilay, tan itulok ed saray bilibilin to ed no panon so pambilay so mogmon makabaliksan a dalan na bilay.”

Say Opresi na Dios a Maandon Bilay

Singa si Kwaku, nilibulibo so tinulongan na saray Tasi nen Jehova a “mangisulong ed balon personalidad ya apalsa unong ed linawa na Dios ed tuan inkatunong tan katooran.” (Efeso 4:24) Naapresya ra, aliwa lambengat a say peles a bilay da noagta ontan met ed say ilalon maandon bilay ed sakey a mangaraldalin a paraiso. Isisipan na Biblia a diad atan a Paraison gawa na Dios, anggapo so manaayam ed dalin a managmak lamet na mantultuloy ya eras, lapud “si Jehova na saray ehersito so peteg a manggawa parad amin a totoo na . . . panliliket ed pinataban bengatla.”​—Isaias 25:6.

Diad kaplesan, say bilay, anggaman makapakelaw a regalo et temporaryo lambengat. Balang sakey so ompatey, tan agaylan maudiem a dapmeg so ipapatey! Aliwan ed pansalitan alablabas, say inengneng ed kaandi na sakey ya inadaro yo ed limog na mabilay a mamaarap ed lubok et makapagonigon a tuloy. Balet diad silong na Panarian na Dios, ya uleyan nen Kristo, say sipan nen Jehova so nasumpal: “Anggapo la so ipatey, nisay pannangis nisay panermen nisay ot-ot. Saray gendat a bengatla so linmabas la.”​—Apocalipsis 21:4.

Diad atan a panaon say regalon bilay so ninatnat ed makapakelaw a nengneng. Saray niliktar ed unor a kairapan ed sayan dalin so nawalaan na pankanawnawan makaloob ed inkasigpot na bilay. Kayari to, diad panamegley na kioli, kipawil lamet ed bilay, ipawil nen Jehova a Dios so agnasaliw a regalo to ed saramay naugip ed patey. (Juan 5:24, 28, 29) Kabaliksan na saya so kipawil na saray inadaron inaatey tan matakot-ed-Dios iran totoo nensaman!

Kasin amin iya et kugip lambengat? Andi, lapud “anggapoy panangiyabawag ya imposible ed Dios.”​—Lucas 1:37; ipareng so Job 42:2.

Niarum ni, inter nen Jehova a Dios a mismo ed katooan so paseguro ya amin iya et nagawa. Panon? Diad impangibagat ed sakey a sankablian ed puso to, say inadaro ton Anak, si Jesu-Kristo, a manondon ed sikatayo ed kasalanan tan patey. Ipapaseguro ed sikatayo na Roma 8:32: “Sikato [si Jehova a Dios] agto kinawanan so dilin Anak to noagta inyawat to parad sikatayon amin, agto kasi iter met ed sikatayo so amin a ganagana diad panamegley to?” Ibabaga na Biblia ed sikatayo ya isakup na saya so panlinis ed katooan manlapud inkagba ed moral tan pangekal ed amin a nengneng na ag-inkahustisya, krimen, tan karawalan. (Isaias 11:9) Aglan balot namoria so bilay a bilang mamora.

Anggan natan, diad silong na ag-ayadyarin kipapasen, say bilay so nayarin makapagayagan tuloy. Siopa so agmanliket ed makapasagyat a balingit na tagano, say pakalikna ed matamoy a palayupoy na dagem ed ampetang ya agew, say nengneng na engranden palandey, marakerakep ya iseselek na agew, maulimek a karayan, makaingganyo iran rosas a napno na kolor, say tanol na marakep a musika, odino say kanta na saray manok? Ontundan magano. Isipen pa, anto kasi so nengneng diad pangayaga ed saratan a bengatla diad ando lan ando?

Kanian, makabaliksan kasi so pangipulisay ed mablin pribelihyo a manbilay na ando lan ando lapud antokaman a temporaryon liket a nayarin iyopresi na andi-liknaan, dilin-inkalablabas a kurso na bilay? (Ipareng so Hebreos 11:25.) Sikakabat, papasesegen itayo na Biblia a ‘saray nakdaan ya agew ed bilay tayo so panbilay tayo komon, aliwan ed saray pilalek na totoo, noagta diad linawa na Dios.’ (1 Pedro 4:2) Impapuson pasesegen mi kayo, on, sagyaten mi kayo, a gawaen so ontan diad panaral ed Salita na Dios, say Biblia, tan agamilen iray bengatlan nanaaralan yo. (Juan 13:17) Sirin nitarok kayo ed maabig a siglaotan ed si Jehova, say Dios a manlepwas ed kamaongan tan panangasi, a manumang ed sikayo na andi-anggaan a bilay!

[Paimano ed leksab]

[Litrato ed pahina 5]

Kasin idadalangirang na estiloy-bilay yo so panamabli ed bilay?

[Litrato ed pahina 7]

Say balon mundo na Dios so mangiyabuloy ed sikatayon pangayagaan a maando iray liket ed bilay!