Say Naani na Sakey a Tuan Ebanghelisador

SI William R. Brown so inmunan linma ed Aprika nen 1923. Kaiba so asawa to tan anak to, sikato so ‘nanggaway kimey na sakey ya ebanghelisador’ ed Say Gambia, Ghana, Liberia, Nigeria, tan Sierra Leone. (2 Timoteo 4:5) Say bunga na kimey to so ekstraordinaryo.

Sayan tubo ed Sagur ya Indies so aliwan membro na sakey ed saray iglesia na Kakristianoan tan seguradon ag-akibiang ed pulitika. Imbes, inalig to si Jesus tan saray apostol diad impangiyabawag ed ngaran tan inkasoberano nen Jehova, ya indanet to so kaimportantian na dondon, tan panagpulong na maong a balita na Panarian. (Mateo 9:35; 20:28; Juan 17:4-6) Lawas inusar nen William R. Brown so Biblia, ya inturo to itan bilang say pinal ya autoridad diad saray pamaakaran na doktrina tan pananisia. (2 Timoteo 3:16) Sikato so ontanlan mapekder ed saya kanian sikatoy akabatan bilang Bible Brown.

Diad panamendisyon nen Jehova, saray bukel ya intanem nen Bible Brown so sinmimit tan binmaleg. Natan, diad daldalin a ditan inggapo to so dalan, ngalngalin 200,000 iran Aprikano so angidedika na saray bilay da ed Manamalsa ra tan, ag-abayag, angipulong ed maong a balita na Panarian diad arum. (Mateo 24:14; 1 Corinto 3:6-9) Sarayan aktibon Kristianos so kabkabat a tuloy ed inkamatua tan inkanapanmatalkan da. Ikinon da so impagmaliw dan Tastasi nen Jehova tan uuleyan nen Kristo, say manuuley ya Ari.

Say ontan a naani so resulta na tuan Kristianon ebanghelismo. Say mipadparan aanien so nanaani ed interon mundo diad kada panaayaman a kontinente. Diad masulok a 200 daldalin, masulok ya apatiran laksan mauyamon-impanpuson lalaki tan bibii so “naani” tan diad arum et uuliten daray salita na manag-ebanghelyon anghel: “Takotan so Dios tan iter ed sikato so gloria, lapud say oras na panangukom to so sinmabi la.” (Apocalipsis 14:7) Diad tua, say mogmon dalan diad pakaromog na ilalo ed magulon panaon tayo et say itupleg ed Dios tan panpasakup ed uley na Panarian to.