“Tanda a Nanlapu ed Tawen”

KUAN na sakey a daan a rima nipaakar ed klima: “Say ambalangan tawen ed labi et mangiyaabawag na maabig a panaon, say ambalangan tawen ed kabuasan so mangipapanengneng ya onsabiy mauges a panaon.”

Natan, saray satellite, diad tulong na computer iran panag-aral na temperatura, Doppler radar, tan arum niran sientipikon kagawaan so uusaren pian nipasakbay so panaon. Saray kaplesan-agew a prediksyon so mitunosan ed riman kapkapanaon.

Aminsan a sinalita nen Jesus ed saray relihyoson kakabusol to a mangiter na “tanda a nanlapu ed tawen,” sakey a nikadkaduman pangipanengneng pian paneknekan a sikato so Mesias. Inkuanto: “No ngarem, kuan yo, maong naani panaon: ta say tawen ambalanga. Tan no cabuasan, mauges so panaon natan: ta say tawen ambalanga tan malurem. Amta yo ya ibiig so nengneng na tawen; bangbalet agyo nayari’n ibiig iray tanda na saray panaon. Sakey a kapolian a mauges tan mikakalugoran onkerew na sakey a tanda; et angapo’y niiter ya tanda ed sikato, no ag say tanda nen Jonas.”​—Mateo 16:1-4.

Nayarian ya ipasakbay na kakabusol nen Jesus so panaon balet ta agda sarag a talosan iray espiritual a pamaakaran. Alimbawa, komusta so nipaakar ed “say tanda nen Jonas”? Kayari impanayam a ngalngali taloran agew ed eges na baleg a sira, nanpulong so propeta na Dios a si Jonas diad Ninive tan sirin nagmaliw a tanda ed saman a kabiseran syudad na Asiria. Say kapolian nen Jesus so awalaan na “tanda nen Jonas” sanen wala ed dalem na dalin si Kristo ed taloran agew tan apaoli. Inyabawag na saray babangatan to so ebidensya na saman ya ebento, tan si Jesus sirin so sakey a tanda ed saman a kapolian.​—Mateo 12:39-41.

Diad sananey nin inkagawa, kinmerew iray babangatan nen Jesus ed sikato na “say tanda” na arapen a “kiwawala” to diad pakayari na Panarian. Diad ebat et angiter na atibkel a tanda a tibukelen na nambabangil a kabiangan, a pati agnaparaan iran bakal, ankabaleg a yegyegyeg, kakisiran na tagano, tan sankadalinan a panagpulong nipaakar ed niletneg lan mangatatawen a Panarian na Dios.​—Mateo 24:3-14.

Kasin nabidbir yo so tanda na kiwawala nen Kristo bilang agnanengneng a mangatatawen ya Ari? Saray kabiangan to so nasusumpal ed sayan kapolian. (Mateo 24:34) Tan komusta so nipaakar ed arapen? Aglambengat ipaparungtal na Biblia ya asingsingger la’y anggaan na sayan sistema na bengabengatla noagta ipapasakbay to met so nisipan a balon agew na Dios ya asingger lan ompelnak tan onsinag parad katooan.​—2 Pedro 3:13.