Siopa so Manisisia ed Marelmeng Iran Espiritu?

KASIN sisiaen mo a saray agnanengneng ya espiritu so makaimpluensya ed bilay mo? Dakel so onebat na maranet ya andi. Bangta bibidbiren so kiwawala na Dios, leleglemewen da so ideya na labas-nen-too iran managgawa na kaugsan.

Say sakey a rason na kasmak ya agpanisia ed saray espiritu ed Mamasagur a mundo so lapud impluensya na Kakristianoan, a diad nilasus lan taon et angibangat a say dalin so walad sentro na sankatalbaan, a nipasen ed baetan na tawen tan sakey a maapuy ya impierno. Unong ed sayan bangat, naeeksperiensia na saray anghel so anggapoy-kaparan liket ed tawen legan a saray demonyo so mangipapakurang ed impierno.

Legan a saray diskobre ed siensia so sengegan na pangipupulisay na totoo ed lingo iran ideya nipaakar ed inka-sangal na sankatalbaan, say panisia ed saray pinalsan espiritu so andi la’d panaon. Onia so kuan na The New Encyclopædia Britannica: “Kayari na Copernican revolution nen koma-16 a siglo (a nibase’d saray teorya na astronomon Polako a si Copernicus), a diman . . . say Dalin so ag-ikuekuentan sentro na kosmo balet, imbes, sakey lambengat a planeta na sisteman solar a melmelag a kabiangan na sakey a galaksi ed singano andi-anggaan a sankatalbaan​—saray ideya nipaakar ed saray anghel tan demonyo so ompatnag ya agla matukoy.”

Bangta dakel so agmanisia ed marelmeng iran espiritu, minilyon so manisia. Saray nankasalanan ya anghel so walaan na importantin betang ed dakel a relihyon, namparan diad apalabas tan ed kaplesan. Nilikud ed betang da bilang managderal na espiritualidad, sarayan mauges ya angheles so ipapasen bilang ahente na desyang, a singa say bakal, eras, tan yegyegyeg, ontan met bilang sengegan na sakit, inkadismaya, tan patey.

Si Satanas a Diablo, say manunan mauges ya espiritu ed Inkakristiano tan Judaismo, so tatawagen ya Iblis na saray Muslim. Diad kadaanan a relihyon a Zoroastrianismo na saray taga Persia, sikatoy ompapatnag bilang si Angra Mainyu. Diad relihyon a Gnostiko, ya inmaligwas nen komadua tan komatlon siglo K.P., sikato so abaloan a Demiurge, say terminon niiter ed sakey a maimon tan abebbeban dios tan agnamamamtaan na dakel a totoo a sikato so dadayewen da.

Saray abebbeban espiritu na inkauges so prominenti ed saray relihyon ed Mamabukig. Sisiaen na saray Hindu a saray asura (dedemonyos) so sumpa ed saray deva (dirios). Say nagkalautlan tatakotan na saray asura et saray rakshasa, aliwliwa iran bengatlan walad saray sementeryo.

Saray demonyo so ipapasen na saray Budista bilang puersan walaan na personalidad a mangaamper ed too ed pakagamor na Nirvana, say pakaandi na pilalek. Say manunan managtukso ed sikara et si Mara, a kaiba iray taloran mamarikit to a si Rati (Pilalek), Raga (Panliliket), tan si Tanha (Kapagaan).

Saray managdayew ya Intsik so manguusar na saray dangdangan, torch, tan saray paputok pian onkanan salimbeng sumpad kuei, odino saray demonyo na palsa. Wala met so sisisiaen na saray relihyon na Hapon a walaray dakel a demonyo, pati say makapataktakot a tengu, saray espiritun onseselep ed totoo ya anggad agpakapaway na sakey a pari.

Niarum ed saray relihyon na Asia, Aprika, Oceania, tan Amerika, saray espiritun pinalsa so sinisian makatulong odino makaderal unong ed saray sirkumstansya tan say niwalan awawey da. Sarayan espiritu so dadayewen na totoo pian naarawian so kalamidad tan pian makaawat na saray pabor.

Niarum ni ed amin na saya et say kasmak ya interes ed mahiko tan espiritismo, tan malinew a say pananisia ed marelmeng iran espiritu so walaan na manbayag tan malaknab ya awaran. Balet kasin makatunongan a sisiaen a say ontan iran palsa so wala? Say Biblia so mangibabaga a sikara so manggagawa ed satan. Anggaman ontan, no wala ra, akin ya aabuloyan na Dios iran mangimpluensya ed too ed kapasakitan to?