“Makapakelkelaw so Inkagawa na Inkasiak”

“INER so nanlapuan ko?” Saya so matalag ya itetepet na maslak ya ugugaw. Sano saray ugugaw so ombabaleg, mabetbet a say tepet da so magmaliw a mas aralem: “Iner so nanlapuay bilay?” Sayan tepet so nasisingbat ed loob la na nilibon taon, tan diad kaplesan et moriaen na dakel a sientista a say ebolusyon so sankamakatunongan ya ebat ed kawewetwet no nipaakar ed lapuay bilay. Diad simplin salita et nibanbana lambengat so inlesa na bilay unong ed salaysay na ebolusyonista.

Ngalngali 3,000 taon la natan so apalabas, insulat nen Arin David: “Makapataktakot tan makapakelkelaw so inkagawa na inkasiak.” (Salmo 139:14) Legan a nagkalalo so naaaralan tayo nipaakar ed bilay, nagkalalon magmamaliw a tua iratan a salita ed sikatayo. On, onia so insulat na pisiko a si Fred Hoyle: “Legan a nagkalalo so naaalmoan na saray biokimiko nipaakar ed agaylan inkakomplikado na bilay, mapatnag a saray tsansa na satan a linmesa diad panamegley na aksidente so melmelag a tuloy a saratan so kompleton nibaliwala. Agnayarin say bilay so linmesa labat ed kibanbana.”

Kanian anto sirin so lapuay bilay? Say duaran manangilukas ya artikulo na sayan magasin so maningbat ed satan a tepet. No abrasaen mo so kaaruman ya impormasyon odino kaliktan mo so sakey a mangikondukta ed sika na libren panagaral na Biblia ed abung, ipangasin mansulat ed Watch Tower, P.O. Box 2044, 1099 Manila, odino diad matukoy ya address a nilista ed pahina 2.