Say Sankabalgan a Toon Nambilay ed Kapiganman

Kapitulo 45

Diad Ag-iilaloan et Nagmaliw a Babangatan

Agaylan makapataktakot a nengneng sanen si Jesus so akasakbit! Duaran nikadkaduman masebeg a lalaki so pinmaway manlapud asingger a ponponan tan binmatik a mamaarap ed sikato. Sikara so aselepan na demonyo. Lapud sakey ed sikara so nayarin mas maramsak nen say samay sakey tan nanirap na mas abagbayag ed silong na panangontrol na demonyo, niyapasakey ed sikato so imano.

Abayag lan sayan pakaskasin too so mambibilay a labos-lakseb diad saray lubok. Agew tan labin sikatoy nantultuloy ya oneeyag tan susugatan to so inkasikato na saray bato. Sikato so maramsak a tuloy ya anggapoy siopaman a makakpel ya ondalan ed saman a dalan. Wala laray impanalin sikatoy igulong-gulong, balet ta saraya so pinakset to tan nilungat iray balatyang ya inbalewet ed saray sali to. Anggapoy siopaman a walaay biskeg pian sikatoy pugeran.

Kaleganan a samay too so onaasingger ed kinen Jesus tan ondadakmomo ed saray sali to, saray demonyon mangokontrol ed sikato so nanggawa ed sikaton oneyag: “Anto so pibiangan ko ed sika, Jesus, sika Anak na sankatageyan a Dios? Pikasik ed sika lapu ed Dios, ag mo ak pairapen.”

“Paway ka, sika [a] marumsis ya espiritu,” intuloy ya inkuan nen Jesus. Insan intepet nen Jesus: “Anto’y ngaran mo?”

“[Say] ngaran ko Sanbakir; ta lapud no dakel kami,” so ebat. Saray demonyo so manliket ed pakakanengneng ed paniirap na saraman so ayarian dan selepan, mapatnag a mangagayaga ed pankukumplot da ed sikara ed sakey a patakyot a panmumungkog ya espiritu. Balet ta sanen nipaarap ed kinen Jesus, akikasi ran sikaray ag-ibaki ed kaaralman. Anengneng tayo lamet a si Jesus so walaan na baleg a pakayari; ayarian ton talonaan anggan saray marelmeng a demonyo. Saya met so mangiparungtal a kabat na saray demonyo a say kibantak da ed kaaralman a pati ed samay lider da, si Satanas a Diablo, et kaunoran a panangukom na Dios parad sikara.

Sakey ya ulop na ngalngalin 2,000 a baboy so mangakabkab ed asingger a palandey. Kanian inkuan na saray demonyo: “Igangan mo kami ed saray [baboy], pian onloob kami ed sikara.” Mapatnag a saray demonyo so makakaala na bengatlan aliwan natural, sadistikon gayaga manlapud iselep ed silalaman iran pinalsa. Sanen inyabuloy nen Jesus ya onselep ed saray baboy, amin a 2,000 ed sikara so nanbagtikan ed kelas tan nalner ed dayat.

Sanen anengneng iya na saramay mangaasikaso na baboy, sikara so nangganat ya isalaysay so balita ed syudad tan ed saray kabangibang ya uma. Diad satan, saray totoo so pinmaway pian nengnengen no anto so agawa. Sanen sikara so sinmabi, anengneng da imay toon pinawayan na saray demonyo. Agayla, sikato akakawes tan walad suston kanonotan, a manyudyurong ed salian nen Jesus!

Saray akatasi so angisalaysay no panon a samay too so apaabig. Imbaga ra met ed totoo so nipaakar ed makapatalagnaw ya impatey na saray baboy. Sanen saya so nadngelan na totoo, baleg a takot so angemgem ed sikara, tan sigugunaet iran anagdag ed kinen Jesus ya ontaynan ed teritorya ra. Kanian sikato so tinmulok tan linmugan ed baloto. Samay datin aselepay demonyo so akikasi ed kinen Jesus a mila ed sikato. Balet ta inkuan nen Jesus ed sikato: “Onla ka ed abung mo ed saray kakaarom, tan ibagam ed sikara no panon kabaleg so bengabengatla a say Katawan [Jehova, NW] ginawa to [nipaakar] ed sika, tan no panon so panangasi to ed sika.”

Kaslakan a bibilinen nen Jesus iramay papaabigen to ya ag-ibaga itan ed siopaman, lapud agto labay a saray totoo so manggaway alablabas a salaysay. Balet sayan panangipuera so manepeg lapud say datin aselepan na demonyo so mantasi ed totoon nayarin si Jesus natan et agla nawalaan na pankanawnawan katongtongen. Niyarum ni, say kiwawala na samay too so mangitarok na pantasi nipaakar pakapanyari nen Jesus a manggawa na maabig, a mangontra ed antokaman ya agpaborablin salaysay a nayarin nikayat nipaakar ed inkaandi na saray baboy.

Diad panguunor ed bilin nen Jesus, samay datin aselepan na demonyo so linma la. Sikato so ginmapon mangiyabawag ed interon Decapolis na amin a bengabengatlan ginawa ed sikato nen Jesus, tan saray totoo so mankelaw a tuloy. Mateo 8:28-34; Marcos 5:1-20; Lucas 8:26-39; Apocalipsis 20:1-3.

▪ Nayarin akin a say imano so niyapasakey ed sakey ya aselepan na demonyon too bangta duara so wadman?

▪ Anto so mangipanengneng a kabat na saray demonyo so nipaakar ed sakey ya arapen a panangibantak ed kaaralman?

▪ Mapatnag ya akin a saray demonyo so malabay ya onselep ed totoo tan ayayep?

▪ Akin a nanggawa na panangipuera si Jesus ed samay datin aselepan na demonyo, a mamibilin ed sikaton ibaga ed arum so nipaakar ed ginawa To ed sikato?