Kasin Sika so Mameperdona?

SI Bill tan say mantaon na 16 ya ilalak to, si Lisa, so naiirapan a mantalosan. Saray ankekelag ya agpantatalosan ed baetan da so mabetbet a mansumpal ed paneebatan. Diad kaunoran, say gutgutan so sinmabi ed punton si Lisa so pinataynan.a

Kayari pigaran panaon, amoria nen Lisa a sikatoy akankasalanan tan kinmerew na panamerdona ed ama to. Balet imbes a si Lisa so perdonaen ed apalabas iran lingo to, say asanokan ya ama so angipulisay ed saray sagpot ton mikareenan. Isipen pa! Agto labay so mangipanengneng na panangasi ed dilin ilalak to!

Nilasus taon lay linmabas, sakey a toon andian na kabalawan so kinondena ed ipapatey lapud sakey a krimen ya agto ginawa. Walaray palson nantasi, tan saray mapulitikan opisyal so ag-inmabuloy a mangipakurang na inka-hustisya. Saman a toon andian na kasalanan et si Jesu-Kristo. Ag-abayag sakbay na impatey to, sipipikasin kinerew to ed Dios: “Ama, perdonam ira; ta ag da amta so gawaen da.”​—Lucas 23:34.

Si Jesus so sibubulos ya amerdona, manlapud puso to, tan saray babangatan to so pinaseseg ton mangalig ed sikato nipaakar ed saya. (Efeso 4:32) Anggaman ontan, singa si Bill, dakel so andiay-puson agmabulos a mamerdona. Komusta ka met no nipaakar ed sayan pamaakaran? Kasin sika so mabulos a mamerdona ed arum sano sikaray nankasalanan sumpad sika? Tan komusta met no nipaakar ed saray seryoson kasalanan? Kasin saraya so nepeg met a naperdona?

Sakey ya Angat so Pamerdona

Say pamerdona so aliwan naynay a mainomay. Tan diad sarayan maatap a panaon et saray relasyon na too so magmamaliw a lalon maproblema. Nagkalautlan mabetbet a napno na saray gonigon tan desdes so bilay na pamilya. Abayag lan imbaga na Kristianon apostol Pablo a saratan a kipapasen so niwala ed “kaonoran iran agew.” Inkuanto: “Saray totoo sikara naani so mangaro ed saray lamalaman da, maaro ra na pilak, managpasirayew, atagey a linawa, . . . maingongot ed saray maabig, managliput, mayu-uges, mapasang.”​—2 Timoteo 3:1-4.

No ontan, agnapaliisan ya amin tayo so nidudunget ed saray desdes a manubok ed abilidad tayon mamerdona ed arum. Sakey ni, sikatayo met so mipupuligesgesan sumpad inkasikatayon-dili. Onia so intagleey nen Pablo: “Ta ag ko gawaen so kaabigan a labay ko komon: sabalet so mauges ya ag ko labay, sikato ya so gawaen ko. Et no gawaen ko so ag ko labay, aliwa la a siak so mangawa na saya, no ag say kasalanan ya manayam ed siak.” (Roma 7:19, 20) Bilang nansumpalan, dakel ed sikatayo so agmanamerdona a singa labay tayo. Tutal, say atawir ya ag-inkayadyari tan kasalanan so walaan na mabiskeg ya impluensya ed sikatayon amin, a no maminsan et mangeekal ed pangabagey tayo ed kapara tayon totoo.

Sanen pinaseseg a manpeperdonaan lapud melag a lingo, sakey a bii so inmebat: “Anggapoy siopaman a mankanepegan ed nakakaukolan a sagpot pian mamerdona.” No moriaen itan a komento et singano ambetel, anggapoy liknaan, a mainap ni ingen. Anggaman ontan, no surien et nanengneng tayon ipaparungtal toy liknaan na pakakadismaya na dakel a totoo sano sikaray nidunget ed sakey a mundon momoriaen da bilang masiblet, agmaasikaso, tan maruksa. Inkuan na sakey a laki: “Abusoen ka na totoo sano perdonaen mo ra. Singa no gagatinan ka.”

Agpankelawan, sirin, a say pamayubo na awawey na inkamaperdona so mairap ed sarayan kaunoran ya agew. Anggaman kuan, papasesegen itayo na Biblia a mamerdona tekep na kaabigan. (Ipareng so 2 Corinto 2:7.) Akin a sikatayo so nepeg a magmaliw a manamerdona?

[Paimano ed leksab]