Piga so Balor na Sakey a Biblia?
AGANO ni et inmabobon so The British Library a manbayar na ngalngali $1,600,000 parad sakey a kopya na patalos ed Ingles nen William Tyndale ed Kristianon Griegon Kasulatan. Lapud impalapag ed apalabas lan 468 a taon, satan lambengat so kompleton inmunan edisyon na Biblian Tyndale ya akaliktar manlapud determinadon gunaet a paneral ed satan. Say Biblia so nipapanengneng ed publiko diad London.
Sinaliw so Biblian Tyndale ed Bristol Baptist College ed England, a ditan nilaniran nanlapulad 1784. Onia so inkuan nen Dr. Roger Hayden, vice-chairman na komite na kolehyo: “Saya so sakey a nasyonal, pankultora tan Makakristianon dokumento ya importantin tuloy tan labay min dakel so makabasa ed satan, unong a nilaniran mi iya ed saray kaha de yero.”
Diad loob na saray siglo et kaslakan ed Biblia so naala lambengat ed lenguahen Latin tan nabasa lambengat na klero tan pigpigaran edukado. Singa si John Wycliffe ya inmuna ed sikato, labay nen Tyndale a nawalaan na sakey a Biblian nabasa tan natalosan na amin. Aminsan et imbaga to’d sakey a klerigo ya onsusumpa’d sikato: ‘No abuloyan na Dios a manbilay ak ni na dakel a taon, gawaen koy sakey a balolakin dumaralos a makaamta na nagkalalo nipaakar ed saray Kasulatan nen say sika.’
Saya so mapeligron kundang, ta sumpan tuloy so klero ed antokaman a gunaet a nabasa so Biblia na kabanyakan a totoo. Lapud saya, tinmakas si Tyndale manlapud Inglatera ya amaarap ed Alemanya. Diman to impatalos so “Balon Sipan” manlapud orihinal a Griego. Ag-onkulang a 3,000 kopya so inimprinta tan impuslit ed Inglatera. Sinaliw na obispo na London so kada kopyan naromog to tan pinoolan iratan ed arap na publiko diad sular na simbaan na St. Paul.
Diad kaunoran, si Tyndale so inerel, inusay, tan inukom bilang erehes. Nen 1536 et sikatoy binitay tan pinoolan ed palitek. Agaylan makapainteres a say Biblia a kagulan tuloy na klero so mankantidad natan na abalbaleg!
Sigugunaet iray Tasi nen Jehova a mangipanabang na suston pikakabat ed Biblia ed amin a mananap ed satan. Nilikud ed panangimprinta tan panangibunog na arum a bersyon, manlapud saray orihinal a lenguahe et akagawa ra na sakey a patalos na interon Biblia a parehon susto tan mainomay a basaen. Kasabi 1995 et walay masulok a 74,000,000 a kopya na sayan New World Translation of the Holy Scriptures so nipalapag la ed 12 lenguahe. Siempre, say peteg a kablian na antokaman a Biblia et say manangiter-bilay a mensahe to.
[Litrato ed pahina 32]
William Tyndale
[Credit Line]
Manlapud kadaanan ya inyukit diad Bibliothèque Nationale